آخر الأخبار

روايه … قصة زواج

images

هذه الحكاية تدور احداثها مابين السعودية والسودان :

الجزء الاول*

انا قبل كم سنة كدى نويت اخطب وزى اى مغترب محتار اخطب منو واعرس منو – فكرت كويس قلت مادام الواحد ماراجع قريب للسودان يشوف واحدة من بنات المغتربين الموجودين هنا وبدأت البحث –
انتظارى لم يطول فقد وصلت سريعاً حيث وقعت عينى على زول بناتو كبار بزورنا طوالى حيث كنا نسكن عزابة بمستويات مختلفة فينا كبار وفينا صغار وفينا الموظفين والشغالين اعمال حرة وهلم جرا*
خلاص قلت اشوف واحدة من بنات عمك دا والسلام وهو صديق احد اعمامنا الموجودين فى البيت وهو من منطقتنا وشوفت تعاملوا وكرموا معانا كيف وترحيبو الحار بينا ودعوتو لينا بإستمرار فى كل المناسبات وكل خميس عمك بجينا البيت يتونس معانا ويشرب الشاى ويضرب معانا اكل العزابة عادى – طبائع الزول دا عجبتنى شديد وبعدين هو وسيم برغم انو كبير قلت لنفسى : يااخوى ما بتلقى زول احسن من دا*
المهم استفسرت جاى جاى لقيت عندو بنت يادوب اتخرجت من الجامعة وهى شهادة عربية وحاتكون فاهمة البلد- سماحتها دى هى الباقية لى هل هى سمحة ولا شينة والله دا الباقى لي اعرفوا ، بس كيف المهم انا قعدت شهر اسأل شوية شوية واجرجر عمنا الساكن معانا فى الكلام برغم انو حس بيا لكن هو ذاتو ذى ما شافوم – قدر ما حاولت اشوفها بقى لى صعب بس ربنا فرجها بزوجة خالى بعد ما جابها معاه وطبعاً هى قريبتى وبت حلتى يعنى ما غريبة على وخالى ذاتو كان ساكن معانا بس هى جديدة فى الغربة والحكاية محتاجة صبر منى لحدى ما تتعرف عليهم وتتعود على البلد ما مشكلة نحن ورانا حاجة*
الايام بتمر لحدى ما شوفت عمك باسرته داخلين على بيت خالى وطبعاً كلهن اسود فى اسود وعينك ما تشوف شئ كلو كلو – اها الفرصة جات لحد عندى وما بضيعها – تانى يوم طوالى مشيت ليك لمرة خالى وقلت ليها : ناس فلان جوكم امس*
– اى والله ناس ظريفين*
– وجكسيهم كيف*
– ها بوهية مغتربين ساى*
– كيف يعنى*
– هوووى شوف ليك واحدة من السودان وخلاص*
طبعاً ماوصلت معاها لاى حاجة رغم انها شكرتهم بدون ما تقصد وادتنى فكرة ما بطالة عنهم بس لسة محتار*
وقالوا صاحب الحاجة ارعن عشان كدا اتحمست زيادة – وانا بدردق فى عمنا المعانا فى البيت وابو البت فى الونسة والعرس الجماعة حسوا بحاجة كدا ونقشوا انو انا عندى نية زواج هنا فى السعودية – والله ابو البنية طوالى قلب الموجة على واهتمامو زاد بيه شوية وكل ما يجئ يسأل الجماعة عنى وهاك يا اتصالات وشاى مغرب و عمك اى برنامج عندو يتصل على عشان اكون معاهم – بينى وبينكم انا خفت قلت الزول دا الظاهر بناتو ديل بائرات ولا شينات شديد وعاوز يفكهم فينى ولا ما عارف شنو والله اول مرة اخاف زى كدا وانا زول مغامر ما بخاف من شئ مقتنع بيهو بس عمك دا حيرنى من حركاتو معاى ياربى انا فينى شنو عجبو – وكمان ام البنية اتعرفت علي وقعدت كذا مرة ونستنى هى وعمك وبصراحة الام قمة فى الجمال دا الحيرنى فيهم زيادة الاب وسيم والام جميلة زى دا معقول يلدوا ليهم شيتة لا لا – الموضوع كان كدى فيهو شئ تانى غير السماحة – وحسيت ليك انى زولاً مهم خالص وما عارف نفسى وما مديها حقها لكن ما بطغى فى الفاضى -*
عمك وعمتك لمن شافونى ما عملت اى خطوة لقدام برغم كل العملو معاى دا – قالوا احسن نشوف طريقة نلاقى الجماعة ديل بس بدون ما يحسوا*
اها ابوها دق علي وبعد التحية قال لي : انا عاوز منك خدمة بسيطة*
– فقلت ليهو خير : عم ………..
– انا والله اليوم تعبان والاولاد و امهم دايرين يمشوا يتسوقوا ممكن تجئ توديهم*
-جداً ولايهمك حاضرين وكبكة شديدة*
طوالى بعد صلاة العشاء جيت للجماعة وديتهم للسوق والله انا السواقة غلبتنى ما قادر اركز وعشان ما تنكشف الرجفة سائق بخمسين بس وعلى طرف الشارع وحتى عمتك قالت لى : والله انت سواقتك رايقة خلاص وهى ماعارفة حاجة ساى يعنى انا لو ما سمعت صفارة السرعة مابتكيف كلوكلو وكمان بعد مرات تخييط فى الطريق .*
المهم نزلنا وهاك يانظرات وتنطط شين خلاص ورشاقة جبتها من وين ما عارف اليوم داك – وزولتك فاهمة الحكاية واتارى هى ذاتها عاوزة تشوفنى وتعرفنى وهى كمان ملوها كلام وجاهزة هى شايفة كل شئ وانا ما شايف غير برقع مغطى وشها بس الحمد لله ما لابسة ليها نظارة قعر كباية – غايتو صوتها ناااااااااااااااعم وكلامها برااااااااااحة ومشيتها غزالة بس وهى متوسطة فى الطول الحجم و مخصرة ومفصلة والله حبة كرش مافى ولا العباية ما عارف – ولونها خمرى جميل – بس . قلت دى زولتى و المواصفات دى كافية و الباقى مامهم لان الباقى حايكون تمام التمام ومن امها عرفت اسمها وامها ما قصرت معانا فى الونسة بعد ما اشتروا حاجاتهم جلسنا قدام حديقة مركز التسوق نرتاح شوية من كترت اللف – بس بصراحة طلعوا ظريفين ما خلونى ادفع ريال واحد من جيبى والله قدر ما اقول ادفع امها تحلف ذى الراجل – دحين ناس زى ديل الواحد بفرط فيهم – المهم الام عملت فيها عندها مكالمة وزحت مننا شوية .طوالى انا ما كضبت وبدأت اتونس معاها وشوية شوية إتبادلنا ارقام الجوالات وبدأت الحكاية تستوى .البسمات ظهرت وزحت برقعها وكتها انكشف قمر شنو والله تقول للقمر زح انا اقعد محلك – دى كيف طلعت من الشفوت ديلك الفى السودان والله الناس القروا معاها عماية ولا انخلعوا بسماحتها دى وخافوا منها – مرة اشبهها بمنى زكى لا اقول هيفاء وهبى المهم زولة تسحر عديل كدى من جمالها والعجيب بسمتها ووجاناتها – قلت ياوزل كان كدى انت وقعت فى كنز وما تورى زول يخطفها منك زى ما بقولوا قرض على كدا – امها نادتنا عشان نمشى وانا محل السيارة واقفة نسيتو وامها تضحك فينى وتقول لى : انت ولد نساى شديد وهى ما عارفة حالتى من جوة كيف وكرعينى اشوفين خفيفات ارفع كراع وما عارف اوديها وين ورأسى لافى لفة شينة خلاص دا كلو من الاغتراب الواحد لو شاف ليهو واحدة سمحة ساى يتبهدل ويقطع فى الكلام وعيونوا ما يقدر يرفعها فى وشها .المهم وصلتهم البيت وانا دخلت البيت كاضم لانضمى ولا حتى سلام عليكم سارح فى خلاء الله البعيد ودخلت طوالى على السرير ونوم تك الحمد لله اليوم التانى يوم جمعة يعنى الله لطف ساى من دوام البلد دى اللى يكرهك الريالات .
الجزء الثانى*
مر اسبوع بالتمام والكمال وانا الشوق كاتلنى عشان اشوفه تانى وعمك من اليوم داك ما شفتو -ومرتو بتكون ادتو الشمار طازج .
– طبعاً لا فى درب مدرسة ولاعمود ولاضل حيطة اقعد انتظرها فيهو وما بقدر امشى بيتم من دون شغلة – يازول قلت اتوكل على الله وادق عليها واكلمها واسمع صوتها الحمانى النوم اسبوع كامل – وافتش التلفون طبعاً كاتبو باسم واحد هندى عشان لو نائم وواحد هبش التلفون ما يعرفو ودقيت عليها وجوالها بهناك يرن ………. ياخبر ما فى رد خلاص انا انتهيت ، قلت الزولة دى نستنى والظاهر عليها ما ركبت ليها فى رأسا وقعدت احلل فى حركاتى وكلامى معها : ياربى هضربت ليها بكلام كدا ولا كدا ياربى البت دى ما عجبتها والكلام يدور فى رأسى ويودى ويجيب وانا قاعد جو الاوضة والوقت عصرية واحد من الشباب حس بى ما طبيعى من اسبوع كدى جانى داخل : يا محمد مالك الايام دى نعل ما عيان وكان عمنا صاحب ابو البنية قاعد معانا : اسكت ساى زولنا دا ممحون محنة جد ويضحك ويعاين لى … طبعاً عمك كبير بس زول نكتة – يرد ليهو : كيفن الكلام دا مالو عربتو انسرقت ولا يمكن فصلو من الشغل وبصراحة ما قدرت اسكت وارد عليهو طوالى : المحنة إلا تكون مصيبة !!! إمكن عاوز اعرس ويضحك والله العرس محنة جد الله يتم ليك ومالك شايل هم كدى موش الشنطة دى بنلمها ليك تانى فى حاجة – وارد ليهو : ياخ انا بقول إمكن عاوز اعرس وانسحب طوالى واغمز لعمنا ما توريه حاجة واطلع برة – قلبى يأكلنى تانى واقوم اتصل بس مافى رد وقربت ابكى من الشرة وعدم التعبير ……. خلاص الزولة دى مسحتنى بأستيكة ، هسع عليك الله فى داعى للتعب دا كلو شهور وانا داير اشوفها ولمن اشوفها تطنش الطنيشة دى ، يازول لازم تانى تدق عليها وتوريها هى منو ولا اقول ليك رسل ليها رسالة العن اليوم الشفتها فيهو …. لا لا الرسالة دى دليل بتحسب عليك يا اخى هى حرة هى ما عاوزاك ، هو بالغصب …. بقيت لافى زى المجنون ما عارف امشى وين ولا اسوى شنو ونفس مافى لاى شئ حتى النوم ذاتو ابى لى اسوى شنو والعرق نازل منى وجسمى سخن ونبضى زاد من الزعل وإحباط للطيش والوقت دا كان واحد ناضمنى ساى بطرشق فيهو .
المهم مرت ساعتين كأنهم جهنم واسمع ليك رنة الجوال واقوم اشوف منو المتصل كان القاها زولتى هزيت رأسى زى الهندى وماصدقت -وقلبى برد شوية وشلت نفس وخليتها لمن كملت النغمة وقمت اتصلت عليها :
– الو ، سلام عليكم ، كيفك؟*
– تمام وانت؟
– كويس الحمد لله*
– معليش كنت نائمة وختيت الجوال فى الصامت*
شلت نفس طويل وقلت ليها : انشاء الله نوم العوافى ، وانشاء الله ما اكون ازعجتك وكدا*
– أبداً والله*
والونسة جرت ووصلت لحدى : هوايتك شنو ، اكتلك شنو وما بعرفوا شنو وماشين فى الغريق وكلام كلو مجاملات وكلمات كان قالوا لى عيدها مرة تانية ما بقدر اعيدها جبتها من وين ماعارف ، وفى اللحظات ذى دى الواحد خيالو بكون خصب و الخشم تب ما بقيف من التكشم والبسيم – ودعتها بعد ما شلتة منها الايميل عشان نشوف بعض ونتقابل براحتنا بس وين مع الشواطين العندنا فى البيت ، المهم مافى حلل غير(الكافيه ) الجنبنا . وكلام ريدة بالماسنجر عمرى ما حسيتو إلا معاها وبقيت لمن اشوف صورتها ساى برتاح وهى كمان بتقولى نفس الشئ . طبعاً الاب والام شكلهم مراقبين الوضع وجايبين الخبر وعاملين فيها ما شايفين ولا سامعين لان عاوزيننا نتعرف اكتر.
استمر الوضع دا فترة ويوم رسلت لى رسالة قالت لى : انا ماشة السودان إجازة شهر وجاية مع امى واخواتى طبعاً ما عندها اخوان إلا ولد صغير عمره ثمانية سنوات . كيفين الكلام دا نحن غرقنا خلاص دايرة تمشى تسيبينى كدا . وودعتها وطلبت منها لمن تمشى السودان ترسل لى رسالة من موبايلها هناك عشان اعرف رقمها واقدر ادق عليها .وما قصرت طوالى ادتنى رقمها و قرقر ( كلام كتير ) بالليل ونوم مافى والمصرى بتاع البقالة الجنبنا بقى صاحبى من كترت كروت الشحن البشتريها منو .
يوم دقيت عليها قلت ليها انا ماقادر اصبر و جاى السودان عديل عشان اخطبك انا بكلم ابوك هنا وبشوف رأيوا شنو وبكلم ناس بيتنا يبقوا جاهزين . البت ادربكت بس فى النهاية اقتنعت وقالت لى خلاص بس نشوف بعض قبل ما تجيب اهلك – طبعاً انا لا عندى إجازة ولا يحزنون طوالى قدمت طلب لإجازة طارئة خمستاشر يوم وبعد تلتلة وعوى وتحانيس ادونى ليها وعلى حسابى وشتات للسودان
الجزء الثالث*

اه طبعاً ركبت طيران العربية الله يقطعوا لطعة وشرة فى مطار الشارقة خمسة ساعات وصلتنا زى النيسانات الساعة ثلاثة صباحاً بجوعة كافرة دا كل عشان الرخصة
اخوكم شفقان ولفقان طوالى من صحيت من النوم ادق على ندى*
– صباح العسل ياعسل*
– احمد , حمد لله على السلامة*
– والله الشوق كاتلنى عديل يوم كامل ما اسمع صوتك*
– بطل الحركات المابتأكل عيش وخلى جاكاتك دى*
– هسه كان انا بتاع جاكات بدق عليك قبل ما اتسوك – دا ما مرض
– تتبسم وتضاير ( انا حسيت كدا ) وبراحة تقول : انازاتى مشتاقة*
– ما قولتى لى عاوز اشوفك
– مافى مشكلة تعال لينا فى البيت*
– بيت شنو ياندى انتو دايرين تدقونى هناك ولاشنو*
– امى وابوى عارفين وكل ناس بيتنا فاهمين الحاصل*
– برضو ما بتجى يقول علينا شنو
– ما بقولو اى حاجة وانا مابسوى حاجة من وراهم وامى زاته قالت لى خليهو يقابلك فى البيت وقدامنا وكمان خالتى واخواتى الهنا ومرة عمى عاوزين يتعرفوا عليك ويشوفوك ويسلموا عليك*
– طيب اجييكم بتين
– بكرة ، مرة عمى بتجى من الثورة تقيل معانا واختى (ناهد ) ماعندها جامعة و(نها ) بتجى بدرى*
– بس ما تقولى لى قيل
– تقيل شنو ياطماع تجئ الضهر تتغدا معانا وتتطلب الله*
اليوم التانى ظبطة امورى تمام ومن الصباح اتحكحك واتمسح تقول حايجيبونى فى قناة هارمونى
طبعاً نزلت مع اخوى وكان ابوى جا من البلد ليهو يومين معاه ، اشوفو برة فى الراكوبة بيفطر ويعاين فينى ساى وكت شاف حركتى كترت والطلعة والمرقة فيهو زى بوليس الحركة*
– ياولدى انت طالع ولا شنو*
– اى يابوى ماشى لجماعة اصحابى مواعدم*
– خلاص ما تتأخر بننتظرك بالغدا*
– يابوى انا ماشى بعيد واحتمال اتأخر*
حفظت الوصف حفظ جد وانا كنت فى المدرسة يلا اندق مرتين تلاتة عشان احفظ ، طينة بس فى الحفظ لكن دا الحنان كلو بتنسى – و طلعت اوقف لى شئ يوصلنى بيتم واشوف بتاع البقالة يعاين لى باللمعة ديك والتى شيرت وبنطلون الجينز والجزمة البمسح فيها كل ثلاثة خطوات من الغبار والريحة الماخمج موش ابوخمسة ريال وعشرة ودى اول مرة اشترى ريحه غالية كدا الله يقطع سنين الحب والغرام هسع الواحد داير يعرس ولا يعرض نفسو فى صالة*
وصلت البيت وادق الجرس ويدى تقيلة خلاص والعرق مع الكريم الفى الرأس وعرق الخوف غسل وشى ولحظات وانا جو البيت قعدونى فى كرسى وبعد شوية بدأ طابور السلام وعمتك شغالة تعارف دى خالة ندى ساكنة جنبنا بهنا ودى عمتها وديل اخواتها ناهد ونها والله نها تشوفا تقول نسرين سوركتى والعجب فستاين البيت تحت التياب وخصلات الشعر الزى الحرير تتطاير قدام وشها وترفع فيها كل دقيقة وانا مبلم تقول صبة فينى مطرة وجات الدرة ( ندى ) تقدل وقلبى يقدل معاها – والله العباية كانت داسة جنس شئ وصوتى يقطع وابلع فى ريقى وانطط فى عيونى وهى تتبسم لى من بعيد وجاية على ماشة زى السحابة تسبح فى الموكيت وتمد يدها : كيفك احمد وتقعد قصادى وهاك يادنقيرة خفت احوص ساى والكلام تك بس ام ندى الكلها فهم قطعت الصمت : متين جيت واسئلة عادية عشان تقطع الصنة دى*
وشوية نفسى يهدأ والكلام يجينى و اغمز لندى يعنى اتكلم فى الموضوع وهى تغمز لى مافى مشكلة وتقوم تستأذن عشان تجيب العصير*
وطوالى اعاين لامها*
– ياخالتى والله انا معجب باسرتكم ويشرفنى نكون اهل*
– مافى مشكلة ياولدى – ندى كلمتنى بكل حاجة ونحن مابنلقى زول احسن منك وربنا يتم ليكم بخير -وابو ندى بشكر فيك وبقول عنك زول كويس ومجتهد وودناس ونحن ماعاوزين اكتر من كدا .
الونسة جرت معاهم كلهم وشوية شوية ينسحبوا ويخلونا انا وندى برانا – كل واحد يعاين للتانى ويتبسم*
والباقى كلام دقاق دقااااااااق وماحسينا بالوكت إلا الغداء قدامنا المهم ضربت الغدا ووعدتهم انى بجيب اهلى واتفقنا يوم الجمعة الجاية وودعتهم وقالوا لى خلاص خليهم يجوا المساء ونعملها خطوبة عديل وندى دايرة تعزم صاحباتها وعمها بقابلكم انشاء الله
الجزء الرابع*:-

من دربى داك ابيت ارجع البيت وقلت فرحة زى دى ما بدفسه فى اربع حيطان والله كان امشى اشوف لى ضل شجرة بارد واقعد لى فى نجيلة كدة واسرح مع الطيور الهناك لحدى ما الواطة تمغرب على الاقل الواحد يعيش مع نفسو شوية – المهم اختة قعدتى ديك والجكس جنبى فى العامل فيها بذاكر وفى القاعدين اتنين اتنين وفى الطاشين ساى كان اشرته ليهم ساى تلاقيهم جنبك ’ وفى الزى- و تب نفس ليهم مافى شبعان حنان لحدى عينى ونفس ليهن مافى عشان اعيان ليهن .
رجعت البيت فى المساء والجماعة متلمين ليك فى البرندة اخوى وشفعوا ومرتوا وابوى بشوفوا ليهم فى مسلسل . خلاص قلت دى فرصتى افتح ليهم الموضوع بس شوية شوية عشان اسلاكم ما تضرب*
سألنى ابوى*
– اها نقوم البلد بتين*
– والله يابوى انا عندى موضوع هنا عاوز اتموا وبعدين نمشى البلد براحتنا*
– امك دى جننتنا كل مرة اه الزول جاى يسلم على بتين*
– انشاء الله اسبوع كدى وموضوعى بخلص*
– انت قلت إجازتك كلها اسبوعين*
– اعمل شنو موضوعى دا مهم شديد لازم اشوف نهايتو*
– اه الموضوع الماسكك فى الخرتوم دا شنو*
– موضوع عرس وكدا*
– بسم الله الرحمن الرحيم – هو قليك العرس تلوب كدا – لا اخطبوا لى لاشوف لى مرة لا دا*
– انا المرة لقيتا وجاهزة*
– ودى من وين*
– والله يابوى البت دى من الخرتوم هنا واهلها من البلد بس ليهم تلاتين سنة ما فاتوا ا البلد عدوها كلها غربة بس بعرفوا ناس البلد*
– وديل ناس منو ديل*
وهاك ياشرح وطرح وكلام واخوى شغال يلاكز جاى وجاى ويصعب لى فى الشغلة اتاريهو هو ومرتو ناوين ليهم نية على :

– مرت اخوى دايرة لى واحدة من بنات اختها واخوى بهناك قال اخير نلم الزول دا علينا جاى على اهل مرتى ، وزى ماقال جحا لمن سألوا : اهلك منو قال ليهم : اهلى اهل مرتى*
عشان كدى يشيل ويردم فينى يقول :
– هوووووووى انت طولت من البلد دى وماعارف الحاصل فيها شنو البلد دى منتهية والبنات حايمات ساى
– كيف الكلام دا
– أسألنا نحن القاعدين فيها*
– ياخوى السمح والشين والكعب والكويس فى كل بلد*
– والله انت مخير شيل شيلتك ونحن نصحناك*
يدخل ابوى ويغير الموضوع*
-الناس ديل عرفتم كيف*
وريتو بالحكاية كلها بدون التفاصيل التانية – طوالى حسم الموضوع :
– والله الناس ديل انا بعرف اهلم وياهم معانا وما فيهم كلام – انا ماعندى ما نع تب وانت عارفنى ما قاعد اجبركم على شئ ومديكم حريتكم كاملة – ثم ضحك شوية كدى وقال : بس إلا تخلى لعمتك البلد وانت عارفة صعبة وشديدة كيف*
طبعاً انا فهمت كلامو قاصد بيهو شنو ، عمتى عاوزانى لبنتها الباقية ليها بعد ما عرسو بناتها السمحات جت إلا هى الباقية ليها ودايرة تلييسة لى باى طريقة عشان انا اكتر زول بقعد فى بيتوم من اخوانى ويومى كلو كنت بقضيو معاهم .
المهم وريتهم البرنامج بتاعى والموضوع جاب زعل شوية فى شأن ما وريتهم إلا بعد ما نجضت موضوعى براى بس رضوا بالامر وبقينا فى التريبات وأبوى يهز فى رأسو كل مرة ويقول : فى زول بجهز ليهو خطوبة فى خمسة أيام – غايتو كان اخوك سخا ليك شغلتك بتقضى تب وهو مفتح وبجيهك كويس*
ويعاين لى ويقول : غايتو انا ياولدى غير عمتى الفها فى رأسى دا وامشى معاك ماعندى ليك اى شئ – اقنع اخوك دا يرتب ليك الشبكة وكان على امك انا من بكرة بكلم اخوك هناك يجى معاها .
-خلاص وكان على موضوع الشبكة انا جايبة معاى*
اعاين لا اخوى واقول ليهو : انت المشكلة شنو لوجبت لينا فنان واشتريت معاى قولة خير والذى منو يعنى خلاص حبكت معاك – يااخى شوف بتكلف كم وانا ماعندى مانع ، زولك رخا طوالى وقال لى مافى مشكلة انا برتب كل حاجة بس فك ريالاتك العندك وخليها جاهزة ،طبعاً الحكاية بتكون فيها سمسرة شوية وما بتهبش جيبو – والله انا عارف ما بطلع منها ساى يعنى خطوبة وخراب جيب بس كل هين عشانة
الجزء الخامس

من اليوم داك بقيت اغنى ليك : يايوم بكرة ماتسرع – عشان الشوق غلبنى وعشان اعلان مملكتنا الجديدة بتبدأ من يوم الجمعة الجاية . وعمتى شغالة لى شغل وهى جات مع امى تصور وتحمض- وكمان ما تقول السفر ملح وكمان فيها علاج ملح من وجع البطن والكرعين ومن شافتنى مسكتنى من جضومى وتشلق فينى :
– هسع يالمفعوص كان قلت لى داير اعرس ما كان عرستك ليك و سقت مرتك معاك طوالى*
– ياعمتى الموضوع دا جاء براهو ، وبعدين اسوقا معاى وين ، إنت قايلانى السفير السعودى احسن شاى ياعمتى تباركيها بس .
– يبركوا فيك خنق , جارى للبدرة دى .
والله كلمة البدرة حرقتنى حرقة بس اسوى شنو فهمها كدا وغير اكب الزوغة منها واخليها مع امى يناضموا ساى وامى تقول ليها ( دايرة تبرر ليها وتنسيها ) :
– برى انا امو ما ماشاورنى ، من هناك متفقين. شباب الزمن دا عاد بنقدر عليهو !!!!
– اها اتحزمى ساى وارجى الجاييك والله موش نسوان الخرتوم ديل بورينك ليهو شديدات ولضيضات , هسع بتى الرضية ما لا ما كان زيتنا فى بيتا ولا نحن لينا الله بس*
امى تقلبوا هظار طوالى معاها*
– الولد بقى راجل وانت ليوم الليلة تشلقى فيهو*
– هووى هو ود بتين ، وكان انتى امو الوليد تيهو انا امو الربيتو
وتقول ليها :
– هسع دا كلو هين كدى نشوفوا جاب لى شنو*
وانا يازول لابد لى تحت حيطة والموبايل فى اضانى واليد فى الاضان التانية التقول داير أأذن .وامى تعاين فينى ساى وتقول للجماعة*
– الولد دا مالو جن كدى طويبتو(من طوبة ) دى ما بتفارق اضانو*
– ياهو شباب الزمن دا*
– والله يقعد يباريها كدى ويتفصل ليها إلا تسوقوا من اضانو زى النعجة .

يوم الجمعة الهايس اتملت لرب عينها ومعاها بوكس والدلوكة تقول ياقدرتى والله الخطوبة براها بقت سيرة والبرنامج لازم امشى الكوفير اجيب البنية والجماعة التانيين بمشوا على البيت دغرى وبعدين على النادى والنادى دا من عمها فنجرة ساى ونظام بوبار وكمان عربية ايجار.@ و ميدو @ ود عمتى سايق لى وعايش جووو صاح مع ترباس وانا راكب معاهو بقدام ماشين للكوفير ودى فرحان بيها فرحة*
– الليلة بحتو ليك حت جد اخلى ليك علالاتا فوق*
– بس اوعك تقابض مقابضتك ديك ،وابقى رايق*
– قال رايق والله كان الجكس بتاعون دا دوم ساى بوصلك وبرجع اشوف لي نومة تنفعنى*
– دوم انت ، بس اوعك تفتح لى فى خشمك وتسهى فيهن بعدين .
ونمشى شوية واللستك يضرب بينا تاح واسبير مافى ، هسع نسوى شنو
الجزء السادس*:-

– اها يا ميدو هسة نسوى للستك البنشر دا شنو ، إتصرف يا اخ .
– إتصرف كيف ؟ انفخوا ليك بخشمى!!!!*
– خلاص عفرت العربية سر يع وفكو ونشوف لينا بنشر قريب من هنا*
– هع هع يازول انت ما نصيح دايرنى بالشكة دى افك اللستك*
– اه منو البفكو
– يازول هووووى انت ضمنت خلينا نحن نشوف سوقنا وين*
– والله انا عارفك ما زول حارة*
– زول حارة اوديك سوق ليبيا امارضك فى مستشفى لكن شيتن متيل دا اعفينى منو
– يا ميدو سوى اللستك وبعدين نرجع سريع البيت تغير ملابسك ونمشى*
– يازول هوووووووووووى ما تكتر لى كلامك والله هسع افوت اخليك هنا*
طبعاً ميدو دا زول غشيم بس طيب وحبوب ولمن تقفل معاهو لابشوف وراء ولاقدام بشوت طوالى انشاء الله تطلع اوت عشان كدى لازم اهدئ ليو شوية
– خلاص .. خلاص وقف لينا رقشة ولاتاكسى ولا اى مصيبة وكان على اللستك انا بفكو
– مافى مشكلة ياحبة*
ويوقف عمك بتاع تاكسى مارى بالشارع وشكلو من الصباح ما لاقى ليهو فردة يبرد بيها حشاه*
ميدو :-
– سلام عليكم ياحاج*
– اهلاً وسهلاً*
– ياحاج والله اللستك دا ضرب لينا هنا وديرين نوديهو اى بنشر قريب*
عمك يعاين فى العربية ببالوناتا وشرائطا الحمرة والخضرة والوردية*
– دى عربية عريس ولاشنو*
-اى ياحاج
– مافى مشكلة بلحق ليك عريسك دا الحفلة بس صلحوها معانا
– يازول مافى مشكلة ما بنقصر معاك تب*
-يالا ارفع اللستك وارح معاى وبشيل منكم سبعين الف*
– معليش ياحاج ممكن تفك لينا اللستك اصلو عفريتة ما عندنا*
– انتو بس بتاعين سواقة غير الطارة دى ما بتعرفوا الحبة لاقين عربات التقسيط دى وراكبنا
سكتنا ساى نسوى شنو يقوم يزرقن معانا يخرب لينا الشغلانة مرة واحدة ووكت مافى للنقة*
ميدو وعمك مافى نص ساعة إلا اللستك ركبوا فى العربية والجماعة بهناك فلقو رأسى كل مرة يتصلوا وين انتو حتى ندى ذاتة لمن شافت نحن أتأخرنا قلقت : واشيل واصبر فيهم وهم : نعل ما حادث – واحد تانى : انا عارف ميدو بكجك وتالت : نرسل ليكم زول ……….قالوا زول هو المعاى انستر عشان يجينى زول تانى*
الحمد لله ربنا وصلنا سالمين لى عند النادى والجماعة رابنا ربة وما شافو العربية انبهلوا فينا ناسنا وناسم وفى ناس شمارات ساى من اهل العروس عاوزين يشوف العريس ياربى سمح ولا خلاقة وتلافة وشين واهلى عاوزين يشوف العروس عشان كدى كان الهجوم كاسح واعمامك من بعيد : هو ياجنيات ادوهم الدرب خليوم ينزلوا – ناس بهناك شغالين مخرجين لبتاع الكاميرا وانا فى اللحظة ديك بقيت زى رئيس الجمهورية رأسى كبر – عالم و إستقبالات وتصوير وفنان من اول ما دخلنا وقف غنيتو وادانا واحد كدى بتاعت سيرة وننزل يجننا النسوان الكبار بالبخور و ميدو بهناك يازول اتنفخ نفخة جد ودى الدايرة وعمل طوالى وزير العريس -الشغلانة فيها لمبات تولع تطفئ وكور لافة وموكيت مفروش والغنية معانا لحدى ما وصلنا للكوشة و ميدو دا من وقف العربية برة ويديها ليك سكسكة ورقيص وكشف صاح وكان على الفنان غايتو فناناً بفك الحيرة وكان على الغنيتين الغناهم قبل ما ينزل للفاصل الاول -ما فهمت منا شئ واحدة بتقول : ( حاجة ) شنو كدا ماعارف بالهوسا ودىا لحت فيها قرض وزول فاضى للتانى مافى والتانية : قال سنتر الخرطوم*

الجزء السابع :-
الفنان نزل فاصل يرتاح فيهو شوية وفى اللحظة دى الجماعة شغلوا لينا شريط عربى لنجوى كرم والشباب اتلموا جنبنا ووقفوا فينا والبنات اترصن قدامنا وقالو يلا اشبكا
اعاين فى زولتى وفى عيونا اسرح فى دنيا بعيدة خلاااااااااص والبسها الدبلة والحاجات التانية وتلبسنى الدبلة واتمنيت فى الوكت داك اصلو ماتزح يدها من يدى ونكون كدا ماسكين فوق بعض وما تفرقنا حاجة واشوف الوشوش قدامنا كلها فرحانة لينا وكل الدنيا معانا وتجئ نها وناهد وامها وامى وبنات عمها وصاحباتها واهلى واشوف عمتى من هناك جاى علىّ كاريها ولدا ميدو وتبشر فينى وتقول لى فى اضانى
– عاد مع القمرة دى بتعرس بتى كيف
اضحك ليها واقول: ما مشكلة ياعمتى بدبل بيها
هوى ياجنة : الصيدا دى بدبلو فيها شوف ليك شغلة اقضاها ، وتبارك لى وتمشى لندى وتعصرها عليها قوى وتقول ليها : يابتى انا عمة احمد دا وولدى عديل ختيهو فى عيويناتك ، ندى تعاين لى مبتسمة وتقول ليها : انشاء الله ياخالتى
وزولى ميدو من بارك لى اشوفو هناك قاعد مع نسابتى يقرقر شكلو بقوليهم فى نكات وكمان جاب امى وامو وقعدهم جنبهم ومن بدا الفاصل خماهم فى نص الساحة وجرانى انا وندى وهاك يارقيص وبعد شوية جونا صاحبات ندى والطيب بجنبى يوسوس لى :شوف البرتق دا جامعات ساى ياخوى والله الليلة التقانة ما فضل فيها زول
ويأشر لى واحدة بجنبنا : البنفسجى دا كيف ياحبة
اتلفت اشوفا ( نها ) اخت ندى : يازول دى اخت ندى
– ها زول انا ما بقيت عديلك تب
– عديلى ، انا اتفك من اختك تقع لى انت
– يازول مالى ناقص كراع ولاناقص يد
– لا لا ما ناقص ، بس البت ما بدوك ليا هسى ، عاين ليها كويس خلقة زى دى بجدوعو ليك ساى ؟!!!
شوية يجئ ود عمها والنصيحة زولاً مليان بالحيل رزانة وادب وذوق يسلم ويرقص شوية ويسحب( نها ) ويقعدو ليهم فى كراسى جنبنا و ميدو فتح خشمو : والله القدح ماعندك .
– اها تانى شن قولك البت ودايرها ود عمها.
– يازول انا الليلة اصلى ما بطلع ساى
– يازول انا ما قلت ليك خلى مقابضتك دى
شوية نسمع ليك الفنان يغنى ليو فى اغنية : ( اللبن ابو لى بي)
والنقز اشتغل كل واحدة تنقز وزولى ميدو يكورك فى نص الحفلة : وووب وووب شاف الغزلان دى كيف بتنطط وشالتو الهاشمية وقام كدى شالنى فى كتفو ويبشر فى الناس وحلف ما ينزلنى إلا يلف بى الحفلة كلها . عديناها رقيص وفرح وبهجة وطرب والناس مبسوطة وخطوبة خمسة نجوم وتمت
فى اليوم التانى ابوى قال لى
– ياولدى دايرين نعزم الجماعة نسابتك ديل قبل ما تسافر ويرجعوا
– مافى مشكلة انا بكلمم
خلاص الامور بقت سالكة بينم وبينا زى الاهل وبقينا نمشى ليهم ويجونا واسبوعين تمام
طبعاً اخرتا سفرى اسبوع بحالو عشان ارجع معاهم سوا وفى احلى من الحب فى الطيارة والزولة بقت ملكى خلاص وكمان جايين لسجن ( الغربة )ما عارفين نتقابل كيف
وامى : اها ياولدى ختوبة وشوفناها بتعرس بتين دايرين نفرح بوليداتك والدنيا ما معروفة .
– انشاء الله قريب
الجزء الثامن :-
رجعت لشغلى زى اول ورجعت ريما لحالتا القديمة وكل شئ كويس
فى يوم ندى مسكلت لى وقمت دقيت عليها
– عاين يا محمد انا جاتنى فرصة شغل
– خير انشاء الله شغل شنو الفى السعودية كمان !!!!
– لا الشغل دا ما فى السعودية
– وين
– فى دبى
– فى دبى؟؟؟؟؟؟؟
– اى اصلاً انا من كذا شهر مقدمة لشركة طيران عشان اشتغل فيها والحمد لله الليلة اتصلوا على وقالوا لى نحن اعتمادناك معانا وحايشغلونى فى مكتب دبى
– وهسع رأى اهلك شنو
– أنا بهمنى رأيك انت قبل اهلى
– انا ماعارف اقول ليك شنو . اه هسع لو مشيتى دبى بتسكنى كيف وانتى بت
– إنت لسة مع الحاجات دى عادى الشركة عندها سكن وكل شئ مرتب
– والله انا خايف عليك من الغربة والبشتنة
– الشغل ما فيهو مشكلة وكان على الغربة نحن من قمنا متغربين
– لكن ياندى انت المرة دى براك وما معاك اهلك
– ما إنت حاتكون معاى
-اكون معاك كيف ؟
– عقد العمل فيهو السكن عائلى وكل شئ على الشركة
– واها بعدين اقعد ليك فى البيت ساى ولا كيف !!!
– لاطبعاً ، ما حاتشوف ليك شغل وبعدين انا وانت ما واحد
– نحن واحد ما قلت شئ بس الحكاية دى دايرة ليها تفكير ومامكن اخلى شغلى واجرى لى وراء شى مامعروف
– دى فرصة عمرنا وما بتتكرر
– انتى هسع محتاجة للشغل ولا ساى
– كيف ما محتاجة للشغل وانت عارف ابوى خلاص كبر والحمل بقى كتير عليهو
– وانت حاتسوى ليهو شنو
– كان شلت منو مصاريف الجامعات دى ساى قصرت معاهو .
– كدى يازولة خلينى افكر وبرد عليك
– خلاص ما تتأخر على انا فى انتظارك
الجزء التاسع :-
تلفون الزولة دى لخبط رأسى وغير كل حساباتى وخلانى محتار حيرة شديدة خلاص وما قدرت اصل فيهو لشئ وكت رأسى صدع من التفكير قلت يازول خليها على الله والبسوى الله بتبقى واعمل طناش من الموضوع
تانى يوم ندى تمسكل وتتصل لمن فترت وانا ماقدرت ارد عليها لانو ما عارف ارد اقول ليها شنو وبعدين ما كنت رايق عشان اناقشها فى الموضوع والنفسيات فى الواطة – وشوية اسمع ليك رنة الرسائل فى الجوال كان القا رسالة من ست قلبى بتقول : (محال انساك واسيب الريد وانسى هواك لانك فى قلبى وقلبى انت شلتو معاك ، شنو الجفا دا ) – الرسالة دى عملت فينى عمايل وولعت فى قلبى النار ودقيقة مافى اتصل عليها
– الو ندى كيف عاملة
– كويسة – شنو عامل فيا تقيل كدا
– والله ياحبيبتى كنت مشغول شديد و رأسى ما قادر احكو
– على الاقل كان ترد لى وتقول لى مشغول
– معليش حقك على ، رسالتك تجنن انا كان عارف بتعملى كدى كان طنشت منك من زمان
– هووى يامستهبل ، تانى تطنش كان اضبحك
تسكت شوية :
– شنو يعنى ما رأجية ردك
– والله حيرتينى معاك بسفرك دا ، و ماعاوز كمان اكون عقبة فى طريقك
– يعنى موافق خلاص
– بصراحة كان قلت ليك خلى الشغل دا بتخليهو وقلت ليك ماموافق بترضى .
– والله عشانك ممكن
– خليك منى انا ، انت ست الامر واحسبيها كويس ، هل الموضوع دا فى خير لينا ، هل بتقدر تتعايشى مع الوضع وانت اول مرة تشتغلى .
– والله الشغل دا عاجبنى وبعدين انا قريت عشان شنو- موش عشان اشتغل
– هىىى انت قايلة الشركة دى شغلتك عشان شهادتك
– نانا عشان شنو
– هسع وينا خبرتك إلا كان خلقتك دى ، فى شركات كتيرة بتهتم بالمظهر اكتر من اى شئ تانى ، ودا المخوفنى شديد وقاطع قلبى
-هاهاها هع ههههههههههه
– هسع البضحكك فى كلامى دا شنو
– بتغير علىَ للدرجة دى
– كيف ما اغير عليك والله انا بخاف عليك من الهوا الطاير
– اطمن انا ما بكون لزول غيرك ومابلعب بنفسى ، وانت كل حياتى
– خلاص عديلة وربنا يحفظك ، يلا مع السلامة
– مع السلامة
اقفل الخط بهنا كان تانى تجينى منا رسالة تقول : (ورود الدنيا اخطفها وبشوق قلبى اغلفها ومع النسيم لأحلى حبيب أرسلها , الله يخليك لى )
فى المسا جانا ابو ندى وسلم على الجماعة وطبعاً الجماعة يوسوسو ساى ويراقبوا فينى ويشاغلوا ، دى مافرصتهم كان قالو لى اعمل اى حاجة بعملها ، سترة حال وانا وشى عاوز يقع من الخجل ( النسيب ما عين شمس ) وبعد السلام براحة سحبنى من يدى ،وقال لى : ياولدى البت ورتك بالشغل وورتنى بموافقتك وانت كان ما راضى وبتجامل فيها ساى انا هسع بعقد ليك عليها وانتم بعدين مخيرين بس اهمّلها كدى براها ما بسويها- أنا قدرت الموقف وفهمت سبب كلامو يعنى يا محمد الزولة دى لو ما عقدت عليها طريقة سفر ليها مافى وهو ما معترض على الشغل بس دايرة تكون تحت راجل يحميها ويكون جنبها .
ودعت ابوالنسب بعد ما إ تعشى معانا بعد الجماعة فى البيت حلفوا عليهو طلاق ، ودا حالهم عزومتهم قوية ومابخلوا ضيف يمرق منهم ساى .
بعد ما مشى وانا قاعد برة فى الصالة بالشقة نادانى عمنا صاحب نسيبى
– اقعد انا دايرك
– خير انشاء الله نعل مافى شئ
– خير ، طبعاً انت زى ولدى وبتكلم معاك كإبن
– مافى مشكلة الموضوع شنو
– بخصوص البنية خطيبتك
ويسكت شوية ويكمل : ابو البنية كلمنى قبيل فى الشغل وحكى لى الموضوع كلو وحتة الشغل دى ما راكبة ليهو فى رأسو لا هو ولا مرتو إلا إذا بقت معاك اها ياخوى كان مستعد تعرسها طوالى وتمشى معا لدبى الموضوع بقى محلول ومابمنعوها الشغل وابوها قال لى : ياهو المرة فى النهاية للراجل وهما شفقانين عليها من شحتفة الغربة وانت شايف براك نحن الرجال قولنا الرووب عديل كدى .اه شن قولك
نفس تحليلى بالضبط والحسبتو لقيتو زى ماهو مفطس مفطس والكتلة جاتنى لحدى عندى .
– بس انت شايف الحال براك نحن ما تمينا شهر من الخطوبة وتكاليفا
– يازول ابوها ما داير منك شى بس تعقد عليها واقرب إجازة ليك تسوى عرسكم براحتكم
– دبى او السعودية ماهى نفس المشكلة برضو حاتتغرب وتتبشتن يعنى بس دايرنى اغير اسمها من ابوها لإسمى
– لا ما نفس الشئ هى لمن تمشى عزابية ما زى تمشى مربوطة ليها فى راجل وممكن بعد فترة تلحقها
– والله ياعمى كلامك سمح بس جوَط رأسى جوطة شينة
– يازول إنت رأسك براهو جايط ، هسة فى زول لاقى ليهو فرصة زى دى
-كدى خلينى افكر فى الموضوع براحة
– ياولدى البت ما عندها وكت لازم بعد اسبوعين تسافر لشغلها
-خلينى ادورا فى رأسى واحسبا
– ما تنسى ابوها حايسافر معها فى البداية لو وافقت ويقعد معا الفترة الاولى دى كلها لحدى ما تكمل هى إجراءاتا وكمان اجراءتك حسب عقد الشركة ، ولازم طبعاً تكون قسيمة الزواج معاها
– وابوها حايخلى شغلو ولا كيف
– لا حايشيل إجازة، اصلو خمسة سنين ما شال إجازة ولانزل السودان.
يعاين فينى وشاف حيرتى
– خلاص انت فكر برواقة ، وابشر حرم الناقصة بنتمها ليك بس ما تنفذر لينا ، و البنية حاتشتغل كمان ، بختك مرة سمحة ومعاها قروش
– هسع وينى القروش
– والله راتبها السمعتو قدر راتبى مرتين

الله…. يخارجك من إمتحان…. الكيمياء… الأنت فيه… قلوبنا معكم .
الجزء العاشر*:-
من دربى داك قمت اتصلت على الاهل فى السودان ووريتهم الحاصل وبعد نقاش معاهم فى الاخد والرد وصلنا لنتيجة ياهو العرس كان فى السودان كان فى اى مكان اهم شئ الزول يتلم على بت الحلال*
رغم جرسة امى ودى شئ طبيعى ومتوقعوا هى دايرة تفرح بولدها وتحننو وتهز فيهو وتبشر عليهو بس حال الدنيا وحكمها.
تانى يوم اتصلت طوالى على زولتى وهاك ياكلام واشواق وريدة التقول اول مرة الاقيا*
– ابشرك*
– خلاص*
– اي*
– هىى ما بصدق*
– انا عندى اغلى منك*
تضحك وتسكت ما خلاص الموضوع بقى ليها جد واواصل :
– اه انا الليلة بمر عليكم وبلاقى ناس بيتكم ونشوف الموضوع دا*
نسكت شوية واقول ليها
– اها تأمرى بشئ ( حركة المغتربين الشالوها من السعوديين )
– الليلة مستعجل كدى مالك*
ابتسم واقول ليها*
– ما دايرانى اودعك ولا شنو
– دايرة اتونس معاك حبة*
– مشتاقة لى قدر دا*
– تسكت شوية وبراحة تقول :كيف انا شوقى ما بكمل !!!
-خلاص انا بخليك بشوقك دا لحدى ما اجئ بعدين المساء سلام*
– سلام*
فى الشقة لميت الجماعة وقلت ليوم : انا داير اسوى عرسى هنا ودايركم تقيفوا معاى ، وبينى وبين نفسى قلت اسوى العرس وبعدين دبى يحلها الف حلال
ردودهم الحلوة وتجاوبهم معاى عجبنى شديد وعمنا طوالى نط وقال :يازول ابقى بعيد نحن بنرتب كل شئ بس جيب العندك وربنا الباقى بتمو .
الجماعة ما كضبوا فكروا فى المندى وفى الصالة والاستراحة وين تكون الحنة وكيف يعزمو العوائل البعرفوها والفنان وكل الترتيبات وكلهم ما قصروا تب شدوا من ازرى ورفعوا معنوياتى فوق فى السماء .وكمان حتة العقد فى السفارة دى هم بتولوا امرها*
فى المساء قشرت قشرة صاح واتوكلت عليك ياخالق روحى ومشيت طوالى لبيتهم وهناك تقابلنى البنية وامها اصلو ابوهم طلع قريب وبجئ وبعد ماقطعت كباية العصير المخصوص وما شفت اطعم منو كلوكلو عشان عاملة ست الناس وقعدت قصادى تضاير ساى وتتبسم وتعاين فينى من اعاين ليها تحول عيونا منى اتونسنا شوية وجا ابوها*
– كيفك ياعمى*
– تمام وانت كيف
– الحمد لله*
صنة ما طويلة واتنحنح :
– طبعاً ياعمى انا جايكم الليلة فى موضوع العرس*
– مرحب ياولدى إنشاء الله ربنا يتم على خير*
– يارب … وقررت نعملوا هنا وخلاص*
– ياولدى زى ما قلت لعمك نحن ما عاوزين منك حاجة ، ونحن مقدرين الظروف*
– والله ما بتقصروا وانا انشاء الله ما بقصر*
– مافى مشكلة بس تعال بالعندك وما تكلف نفسك وتعصر عليها ، نحن بهمنا الراجل اكتر من اى شئ تانى*
– الله يبارك فيك . استأذن انا ياعمى وانشاء الله بكرة بتصل عليك نشوف التفاصيل كيف*
يمسك فينى فى العشا بس بقى لى صعب بعد الكلام الحلو ، وكمان داير اقعد مع الشباب فى البيت عشان نحدد اليوم و الطريقة تكون كيف .
الشباب ماقصروا وحددوا معاى اليوم طبعاً اقرب خميس جاى يعنى بعد اسبوع من الليلة ووزعوا الادوار ناس مسئولين من الصالة وناس عن المطبخ والمندى وناس للفنان والحفلة وكدا*
الجزء الحادى عشر*:-
التحضيرات ماشة تمام والشباب همة ونشاط والجيب شغال والباقى بنتم ديون ياها الحال نباصر بى جاى جاى وانشاء الله تنستر معانا بعد داك. واحد من الشباب اصر إلا يعمل لى حنة اصلو هو الفردة قبل ما يعرس ويسيبنا نناجى نجوم الليل ، ويقول لى :*
– يازول انا رتبت ليك حنة كاربة*
– انت ما نصيح حنة شنو كمان فى البلد دى انتو دايرين يقول علينا شنو ، انا شايفة صعبة .*
– يازول دى ساهلة تب
– كيفين الكلام دا*
– موش الحنة الخايف منها دى والله فد يوم بنطلعها من يدك بعد العرس ماينتهى ، العلم اتطور ياخوى .
– يازول كدى النشوف الحاصل شنو وبعدين برد عليك*
– بعدين شنو؟ انا حجزت الاستراحة خلاص ، مافى طريقة .
– استراحة ؟؟؟؟؟؟
– نان نحتو معاك كيف كما ضربنا الخلا دا*
– يازول الشغلة دى بتودينا التوج هسع كان ناس الهيئة مروا علينا نسوى شنو ، والله مع الحنة دى يطلعونا شئ تانى*
– يازول العالم دى كلها شغالة كدا . هى الاستراحات البرة دى سووها لشنو ما لجنس دا وبعدين اخوك علاقاتو كويسة ما تشيل هم وكان حصل شئ بتحلا بس خلينا نهجج فى البلد المامعروف ليها رأس دى .
-يازول مشكلة مافى .
– وكمان اقول ليك حاجة نسوى معاها عازومة ونقطة مرة واحدة .
– نقطة شنو. دى انا ما بسويها ابقى زى الشحاد .
– يضحك ، يازول ماعلى كيفك ابقى بعيد بس*
سكتنا وطوالى قال :
– خلاص يازول اتفقنا الخميس الجاى وخلى الشباب يعزموا جماعتم وانا بعزم جماعتى وبالبركة*
الزول من فات والجماعة بدوا النقاش :
– يازول سوى العرس كلو هنا وانسى السودان خلاص*
– اى والله وامشى دبى مع البنية شهر عسل اقعد معاها اسبوعين تلاتة*
– والله دى فكرة كويسة وتشوف شغلها كيف إمكن تلقى ليك شغلانة هناك وتقعد معاها مرة واحدة .
– اه شن قولك*
اعاين فيهم كدى واسرح شوية اصلو الفيوزات بدت تضرب عندى واقول فى نفسى : هوى ديل بتكلموا ساى ودى ورطة بنت كلب ، دبى صرف شديد وكان قعدت تلاتة سنة ما تكفينى سداد ديون السفرة دى .*
الشباب فهموا حيرتى و نقشوا الفى رأسى*
– يازول انت خايف تنقطع ؟
-الدنيا ما معروفة والبلد داك مابنعرفوا كويس*
– يازول انت كان خايف من السكن فى فندق ، انزل معاها فى سكنها إنشاء الله غرفة واحدة*
– كدى امورك ظابطة يامعلم كان قعدت شهر ما فارقة ودبى مشكلتها سكن واتحلت ، سوى حجزك من هسع وخلى التردد بتاعك دا*
– والله ياجماعة عرسى دا شغلكم شغلة*
يضحكوا*
– يازول انت هين*
– خلاص ، الواحد على الاقل يتفسح فى الدنيا دى شوية*
كان كدى ياجماعة نعدل البرنامج*
-كيف*
– الخميس الجاى الحنة العاملها عصام والخميس البعدو نسوى العرس بزفتو وعقدوا ويوم الجمعة السفر*
-الجماعة طوالى نطو لى : اه شفت الزول كان قال بسم الله كل شئ بنتم .
الجزء الثانى عشر
يوم الخميس جانا ذى الهواء سريع اصلو ايامنا صور بالكربون الصباح الواحد يقوم معسم ومربط وجرى للدوام بعد المكابسة فى الحمام مع الشباب وهّم فوق هم يتردم فينا ،والاحر منو تكون فاضى ما شغال تشوف اليوم سنة وليلك يبقى نهار ونهارك ليل وماجايب للدنيا خبر اليوم كلو ماسك ريموت التلفزيون من فيلم لفيلم ومن برنامج لبرنامج لمن تحفظ القنوات جت وتبقى كلها مكررة لحظتها تعرف الله واحد ويبدأ قرف الغربة يسمم مزاجك ويعكر دمك والاكل يمسخ ليك والدنيا تبقى ليك جحيم الله لاوراكم عطالة الاغتراب .
الخميس نص دوام والخميس دا ما زى اى خميس فيهو بهجة وكبسة وحنة ولمة حبايب واصحاب وناس عزاز ولذاذ لمتنا الغربة ولمانا الوطن قبل اى شئ تانى وفرصة لناس كتار يتقابلوا وفرصة للعوائل تغير جو من سجن البيوت وبعدين يشوفوا ليلة من ليالى السودان بحنتها وهجيجة وغنانا السمح .
رجعت من الدوام للبيت والقى ليك ناسى فى البيت جادين اكتر من العريس التقول كلو واحد فيهم هو العريس حسيت من جو قلبى بحنيتهم وخوتهم الماكضب وحماسهم وما حسيت انى فاقد اهلى فى اليوم داك . لمتنا الغربة ومعرفة البلد وحتى القرابة اللمتنى مع بعضهم هى قرابة من بعيد ما لزم يعنى تقول تلاقى نسب وحبوبات وفعلاً تاج فوق رأسى .
من دخلت البيت*
– السلام عليكم ياجماعة*
– وعليكم السلام*
– الليلة يومك*
– ابتسم ليهم واقعد لى فى كرسى قريب*
– يازول قاعد لشنو
– اسوى شنو يعنى*
– هسه خلقتك دى خلقت زول عندو حنة*
– ماله ما تمام*
– ارح معاى بس اوديك لـ (فلبينى ) قريب من هنا يوضبك ويكشبك صاح*
– الحكاية كمان فيها تمسح وتنعم*
– دا كلامك*
وطوالى لصالون حلاقة كدى والنصيحة شغلو نضيف وماخلى شئ حلاقة وتنعيم بالبخار و مساج ، ساعتين وانا جوا الصالون لمن طلعت منو حسيت بلمعتى وبقي وشى املاس زى المراية .
المسا بعد صلاة العشا اتوجهنا كلنا لاستراحة كدى ما تتعرف إلا بخريطة والحارس فيها سودانى خاتى سفتو قدر الليلة وباكر وقاعد ليهو فى كرسى وانا فى سرى اقول ليهو :بختك الليلة جاتك ربة وحفلة فى محلك . وشوية شوية تشوف العربات واقفة زى الغنم اشكال والوان فى الهكر(قرمبع) وفى العالية وفى الغالية والنازلين منهن فيهم الكبار بالعمم والجلابيب زى انا فى اليوم دا اخر قشرة بجلابية وعمة وشال – والشباب اخر موضات وشكات وحتى الشفع الصغار حلوين ينططوا ما مصدقين طلوعهم من حصون الباستيل دى . والنسوان والبنات بالعبايات وحاقات الصرة البرة ديك تك مافى – وفى اللابسات تياب بس شوية خالص وشكلهم لبسوها بعد ما دخلوا الاستراحة .
العشا اترص ياها صوانى المندى ومشغلين استريو على شريط لوردى ( الناس القيافة ) والجماعة شغالين طفح فى اللحم والرز ماهبشوا اصلنا نحن ماناس رز بس الغربة جبرتنا عليهو ساى . واشوف واحد من الشباب خاتي ليهو دفتر قريب منو الظاهر دى النقطة . والحريم بينا وبينهم فاصل بستارة قماش . زى الساعة عشرة كدى الجماعة شغلو الساوند وجابو ليهم وليد كدى مطرش بكريم وزيت وشعروا مسوي كيف كيف وقالوا دا الفنان وبغنى لطه سليمان وحوتة وفى واحد تانى دا قالوا متخصص حقيبة المهم الحفلة بدأت وحلفتا ستين يمين ما اتحنن فى رجولى عشان ما اتربط وعاوز اهيص مع الجماعة وتبدأ الربة وشوية شوية اشوف ليك الستارة انشالت وقالوا احسن نخلى الحالة واحدة وكل زول باسرتو شغال رقيص وفى ناس حايمة ساى وفى ناس من كراسيها ماقامت واما ناس الرقيص ماقصروا انتقموا انتقام بالحيل التقول عليهم اول مرة يحضروا حفلة واخوى عصام ماقصر وزيرى اليوم داك والله يخليو للتعارف وتعال سلم على فلان دا وفلان دا صاحبنا شغال فى الشركة الفلانية ودا ودعمتى والفرحة الحلوة لى انو النسابة حاضرين إلا كان زولتى وكان جات اليوم داك فتح طوالى للجماعة ً .
يوم الخميس كان صفقة ورقيص ويوم ما بتنسى نسانا سنين الغربة وراجين اليوم الكبير واسبوع تانى عشان تعود الفرحة لينا وتضوى ليالينا -*
يوم الجمعة مر زى السلام عليكم وجا اطول يوم فى الدنيا يوم السبت ونفس للشغل مافى تب وجرجرة بعد ليل شلناهو سهر – وانا فى وسط الضجيج والازعاج داخل المصنع اسمع رنة جوالى وفى وقت زحمة شغل والواحد غرقان داير بتين يتفك من البلاوى القدامو عشان يريح وياريت راحة عدوك تقعد فى المكتب دقيقتين تلاتة تجئ كبة تانية ومرات يحبسك الشغل لمن الواطة تليل وكمان مرات تلاتين ساعة ما تشوف راحة وعينك ما تشوف نوم ما نحن زى الماكينات البندور فيها يستلهكونا زى الصابونة ولمن نبقى بروة يقولوا ليك مع السلامة وين تقبل ما تعرف .
التلفون دا من عمنا قريبى وعملت طناش خليتو صامت وهو تانى يشيل ويدق – الزول دا مالو مصر كدى ياربى عندو شنو – قررت ارد عليو واقول ليهو انا مشغول حبة وبرجع بكلمك تانى و افتح الخط*
-الو*
– احمد كيف حالك*
– كويس*
– يااخى والله انا ما عارف اقول شنو
– خير انشاء الله*
– إنت زول مؤمن ……
قلبى وقع فى ركبى وجاتنى خلعة شديدة*
– المات منو؟؟؟؟
– يازول قول بسم الله ما فى زول مات*
– الحاصل شنو*
– والله نسيبك تعبان شوية وجاتو جلطة ونقلوا للمستشفى*
– لاحول ولاقوة إلابالله*
– والكلام دا بتين*
– قبل شوية وقع فى العمل ونقلوا بالاسعاف*
– وانت منو الكلمك*
– اصلو اتصلوا على اولادو، هسى ماشين عليهو .*
خبر يالله ، الزول دا ياهو ركيزة الاسرة وياهو سندها ، ربنا يجيب العواقب سليمة*
وقت مافى والزوغة من الشغل واجبة والبحصل يحصل وطز فى الشغل وصاحبى راجندران الهندى يهزهزلى فى رويسو يقول*
– مشكلة مافى صديق انا فى ترتيب ، انا كلو فى معلوم ، بس انت روح شوف بابا*
والله حالتو صعبة الزول فى الانعاش وشكلو كدى جاهو شلل وربنا يلطف و ندى برغم المصيبة والدموع فى العيونها هى وامها صابرة ومحتسبة والواحد ما عارف يقول شنو غير يواسيهم وياريت الواحد يقدر يعمل شئ يمسح بيهو دموعهم بس إرادة ربنا يوم فرح ويوم كره وغير الصبر مافى شئ . المهم لمن شوفنا القعدة طولت بالساعات وديل ولايا براهم اصرينا لازم يمشوا البيت ونحن بنقوم بكل شئ وبعد ضغط شديد وبعد ما الدكتور طمنا على صحتو وانو حالتو بقت مستقرة رجعو للبيت ، بس الشلل دا علاجو طويل وبحتاج لعلاج طبيعى.

صور كرتونية

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى