منتديات الحصاحيصا نت alhasahisa

منتديات الحصاحيصا نت alhasahisa (http://www.alhasahisa.net/vb/index.php)
-   «۩۞۩-قسم المكتبات والتوثيق -۩۞۩» (http://www.alhasahisa.net/vb/forumdisplay.php?f=22)
-   -   مكتبة الشاعر ازهرى محمد على (http://www.alhasahisa.net/vb/showthread.php?t=5741)

ازهرى محمد على 02-04-2009 12:29 PM

مكتبة الشاعر ازهرى محمد على
 
[بسم الله الرحمن الرحيم
الاحباء اهل مدينتى الحصاحيصا
شكرا جميلا دائما لكم وانا اجد موقعى بينكم بكل محبه

مكتبة ازهرى محمد على بجانب عفيف ومصطفى وهاشم كرار وعثمان عابدين والقادمين من الكتاب
والمبدعين لا شك له دلالات عديده ومنشطه للذاكره الثقافيه لهذه المدينه وانفتاح هذه الذاكره لماهو
حادث الان فى فضاء الثقافه الامحدود بكل رحابته الكونيه المطلقه اجدد شكرى واعد ان تكون هذه المكتبه
هى النافذه الاولى للاطلاع على كل ماتيسر من الشعر والبوح عودة طيبه بالقصيده الى موطنها الاول وجسرا من المحبه والتواصل والاحترام

لكم شكرى ودعوتى لكم للدخول الى مكتبتى اهل بيت وانا ضيفكم

ابو امجد 02-04-2009 03:24 PM

الف مرحب بيك حبيبنا
 
[marq="3;right;2;scroll"]سعداء جداّ بتشريفكم لنا
وحقيقة مكتبتكم استاذ ازهرى هى مكسب كبير لمنتدانا
ونحن على يقين ان اول الغيث قطره .
وعملاّ بمقولة ( الزاد كان ما كفى اهل البيت يحرم على الجيران)
ترانا نعشم فى ان نكون دائماّ اول السعداء والمحظوظين بمطالعة كتاباتك .
لك من الود بقدر ما تستحق
وليكن مقدمك بداية لركب الكبار من مبدعى بلادى
شرفت ونورت والبيت (حقيقة ) بيتك[/marq]

ود الحصاحيصا 02-04-2009 04:13 PM

سلامات يازول يارائع
سلامات عوافى
ياخلاصة الخير الفى الناس
وياترياق الزمن المتعافى

لك التحايا استاذنا ازهرى محمد على،ولك من الود اشده وانت تعود مرة اخرى الى رحاب الحصاحيصا،تبثها الحب والحرف الجميل،واحسبها الان تبثك الشكر على هذا الوفاء
من المفرح جدا ان نحظى بهذا الحضور الجميل،ومبلغ السعاده مطالعتنا لحرفك استاذ ازهرى من خلال مكتبة الحصاحيصا،وهذا التواجد يوفر علينا كثيرا من العناء فى البحث عن جديد ازهرى محمد على ودرر قصائده التى نطالعها هنا وهناك.
سعداء جدا بهذه المكتبة والتى نتمنى ان تضم كل مبدعى المدينة الحبيبة،فلنثريها ولنملك نفائسنا لكل الاجيال وكل المحبين للحصاحيصا ،نعشم كثيرا فى الاتكاء على ظلال الحرف والادب فى مكتبة الحصاحيصا،والتحية لكتابها وادبائها ومبدعيها،والتحية لك استاذ ازهرى محمد على،وكلنا اشتياق لطلة احرفك من خلال هذه المساحة.

ابوعبيدة عباس حريبات 02-04-2009 04:31 PM



فرحانه بيك كل ( الحصاحيصا )
مانام بريقا ولا انطفا
ما الريدة ياما قلباً ندي
زاد القلوب المرهفه

الف مرحب بيك استاذنا ازهري محمد علي

البرنس 02-04-2009 04:43 PM

الشاعر والاستاذ/ ازهرى محمد علي
يسرنا تواجدك بينناوانضمامك معنا وبكل ماتحمله معاني الشوق
نتلهف لقراءة مشاركاتك وبكل معانى الود ننتظر ابداعاتك
فمرحبا بك تراحيب المطر أذا هلت
وأهلا بك عدد نجوم السماء أذا طلت
وتأكد بأننا فرحين بك مستبشرين بطلتك
فلن يكون منا الا إستقبالك
بكل مافي الوجود من معانى خفاقه ندية بعبير أزهار نرجسية
والبحث عن جمال يراعك الرائع الراقي
كل الود

إيهاب الأمين 02-04-2009 04:48 PM

الصديق الحبيب أزهري
تحياتي وحبي
وأشواقي
كم يسعدني أن أجدك هنا
(في بيتكم)
بين أحبائنا ملوك الإبداع في الحصاحيصا...
رجع الذاكرة وشوف هل تذكر هذه الصورة؟؟؟


http://www10.0zz0.com/2008/09/23/16/243455060.jpg

بابكر عبد الرازق بخيت 02-04-2009 07:21 PM

انا بندهك لو مرة ضفة اتبرجت
حلت ضفيرتها للبحر
انا بندهك لو لبش الموج في الطمي
والشاطي في ذروة المد انكسر
وانا بعذمك علي موية عذبة وضل وريف

الف مرحب بالجميل الاستاذ ازهري بيننا
ومليون مرحب يا ود العمدة
حبابك الف

بابكر عبد الرازق بخيت 02-04-2009 08:10 PM

http://www.youtube.com/watch?v=Dw_b9mwpBz4

منتصر تاج الدين 02-04-2009 09:12 PM

http://www.youtube.com/watch?v=r4hg0JcLmGM

منتصر تاج الدين 02-04-2009 09:13 PM

http://www.geocities.com/sudanesemustafa/azh.jpg

منتصر تاج الدين 02-04-2009 09:18 PM

http://www.alrakoba.com/vb/uploaded/mus05.jpg

ازهرى محمد على 02-05-2009 12:08 PM

القتامه
 
ضلمت
واتلفحت توب السواد
طفت الثعالب ضحكتا
وطولت ليل السهاد
انفضا سامر فرحته
اللمه والناس والوداد
فلق الصباح الشجر اقلام جميع والنيل مداد
الساقيه والحزن النبيل
ومن غير ميعاد
طال الشتات
ودابت حشاشات القرى
فى المدن ذات العماد
ولليله لا بان لك صباح لا ملت البوح شهرذاد
وانا كلما غابت سعاد
غابات من الشك تشتعل
يشتعل شوقى واقول
بانت سعاد بانت سعاد
دلانى اخر اليل نجم
انزع مخاوفك واتحد
اصعد وسيم فى المشنقه
واضحك على وهج الزناد
اصعد كما صعد الفراش
جذوة النار واحترق
ولملم رفاتك وانتفض
تحت الرماد
خليه جرحك للهوام
الخوف على جرح البلاد

البلاد فى حافة النار
انتبه
انت الوحيد المشتبه
انت الوحيد
فى حضرة الموت انتبه
بصرك حديد
وطيفك يجينا شبه شبه
الريح محت ريحة خطاك
ودلت عليك دابة الارض وغناك
دلت عليك فى العتمه
دعوات الخلاص
والارض ماعون التعب
ضاقت بما رحبت خلاص
اشتعل غضب الحريق
وخطوك على خط التماس
الهواجس لوعت صحو الحنين
ونعنعت خدر النعاس
والصحاب من كل ناحيه مصوبين
وجسدك على مرمى الرصاص
اترك وراك والفخاخ نصبت
على هذا الاساس
وروحك من تسامى النشوه

رقصت تحت حبل القصاص

لا ضلك الفاتح برا لا مدا ضل العافيه
لعصب الحواس
ضاقت خلاص والدودرك
للطعم من فوق الشرك
دغدق مشاعر الطيبه فى حس الدباس
ضاقت خلاص
وانت بتدارى الفرحه
من حزن المغارب
انت بتقاوم لنتزاع الورده
من وسط العقارب
فاتك قطار الامنيات
ندبت حظك وارتديت
زى المحارب
ندمان على حلم السنين
الضائعه فى حقل التجارب
وخائف على العمر الفضل
والناس تسالمك بالمخالب

الناس تسالمك
والصحاب
ضحكاته
ذى طعم الطحالب
ضاقت خلاص
من كل جانب
امسينا فى حد الكفاف
واصبحنا كلنا فى البلد
نحن المواطنين الاجانب

ضاقت خلاص

راشد محمد الجاك 02-05-2009 01:11 PM

... ضاقت خلاص
وامسينا نحن الموطنين ... الاجانب
........
ونصبح بكرة بحروف غناك ... نحنا اسياد البلد
ارفع معاى .. اسند خطاى .. ياهو البلد راجيك تقيف
.... درر ونثر وعبر تفوح من بين عبق حروفك ايها الشامخ .... دعنا نفتخر بك بيننا دوما ..
ننهل من معينك العذب ... لا ارتواءاً
تسلم .... استاذنا الفاضل .... ازهرى
لك التحية .. ومزيدا من الابداع

ابوسفيان ابراهيم احمد 02-05-2009 02:02 PM

ضاقت خلااااااااااص
ورينا درب الخلاص
بندق وراك نحن النحاس
نتلمه في الساحه اليباس
نتعاضد رمح واحد للدواس
جاهز موجه عديل لكل راس
يحاول يدوس
علي خط التماس
او يفكر مره بس
يفتت في الجسد
المن قديم للمولي
كم وكم صلي وسجد
الصابر سنين
والصبر وقتين يفوت الحد
ينقلب زي موج البحر
الكان هادي
وعلي الضفاف رقد
يغضب يثور
وناروا تلهب تفور
نرميهوا فيها مكتف بالمسد
دحين اخير يا ولد
ترفع راية النضال
ضد كل من فسد
ولا تكون بين بين وبين
ولا تتشطر
وتلعب علي الحبلين

الاستاذ الشاعر ازهري محمد علي
كونك هنا فتلك سعاده ما بعدها سعاده
وان تاتي متاخراً خيرا من ان لا تاتي
فمكانك هنا عجزت كل الحروف عن سد ثغره فيه
فلتكن فنار توجه سفن حروفنا الكايسه لي مرسي
شكراً لك ايها العملاق وشكراً خاص لهذه الاداره
التي تبذل كل رخيص وغالي من اجل الروعه والابداع
دمتم دائماً احبتي احبه وعنوان للمحبه

مبارك محمد عثمان 02-05-2009 07:32 PM

اهلا بشلال الابداع ازهرى

ازهرى محمد على 02-05-2009 07:39 PM

شكرا للجمليين العابرين من هنا
ابو امجد
ودالحصاحيصا
ابو عبيدة عباس
البرنس ( شكلك هلالابي اصيل )
ناصر السوداني
راشد محمد الجاك
ابو سفيان ابراهيم احمد
وتحية خاصة للصديق الشاعر ايهاب الامين اكيد بذكر الصورة والاشياء الجميلة لا تنسي

كل الامنيات ان نقضي وقتا ممتعا في هذه المكتبة وحقيقة انا سعيد جدا بينكم
تحياتي

مبارك محمد عثمان 02-05-2009 08:09 PM

نتمنى ان نقضى معك اجمل الاوقات واطيبها ... ونتنسم عبق حروفك ورسمك المبدع بالكلمات - وشكرا لك بابكر عبد الرازق

وهيب احمد 02-05-2009 08:34 PM

المحترم ازهرى محمد على تحيااااااااااتى

وجودك معنا ليه مليون الف معنى وكدا المنتدى يمكن اقول ولع وبق نااااار بطلتك علينا والحمد لله انك بين احبتك ومعجبيك وانا اكتر واحد فيهم وتقبل منى اجمل المعانى وجل التقدير وفايق الاحترام

وهيب احمد

Dawzana 02-06-2009 10:41 AM

مكتبة الأستاذ / أزهري محمد علي
 
.....







الطشاش


غيب إحساس الرضى

ومسَح الروح بالغباش

وانا ما نعيت

طيب معشرك

ولا أقمت عليك عزا

إشتهيت أفرد ضفيرتك للمطر

واحقن وريدك بالدُعاش

واكتفيت

أفضل أريدك إندهاش

أو ألوذ بي نفسي عنك

يامدهشة

أنا وين أفوت منك أمش؟

بشفق عليك

من حسن ظنك

بالملايكة المارقه

من باب الشمس

يا جابدة من تحتى الأرض

وقابضة فى نفسى العرش

يا نابضة من عطش الجسد للروح

مجلوبة إنت ومستباحه

كل المواعيد الزنيمه

كانت مباحة

ومطلقة

كل البراحات الحميمة

موصوده دونك ومغلقه

مسجونه فيك

إنتظارات السحاب

والإحتمالات المريحه ومقلقه

محلوبه من دمك عصارة العفه

فيك

لا فُضّ فيك

يا صومعة إملاقى

والعشق المحال

دقت مسامير الفجيعه

على العُضام الحيه

واللحم الحلال

بتمرقى من وجع المحجَه

وتندسى بين جرحى العُضال

وما أنبلــّه حلقك

بالإجابات السؤال

فعلام جدواه .. السؤال

علام جدواه السؤال

وفارسك مدجج بالدعاوى

الخايبه

والوعد الحنوط

رددتى فى سرك جلالات

الهزيمة

وتليت على سرى

التشهد والقنوت

مطموسة فيك كل الصحايح

بالفضايح

الواقفه شاهد والبيوت

وتعارضه ما بين الضحك والعبره

شوكة حوت

فعلام جدواه السؤال

يا باحثه عن كل السواقط

من نهاراتنا المهمة

ونابتة من خيبة أملنا

مع الليالى المدلهمة

يا متعبة

ومحقونة بى خدر الأمانى

المستجمة
.....

أنا ما دلقتك للشوارع البارده

ولا البيوت المترفه

لو راودك عن نفسك الماجن الدّعى

وهدّ عزمك بالوعود الزايفه

ما تنسى إنك كنت واقفة

على المسامير الصقر

مجليه بى عرق الشفا

لا شاكيه من ذل العوز

لا باكية من وجع الجفا

وأنا ما دلقتك للشوارع البارده

ولا البيوت المترفه

يا واقفه مشروخه وأبيه

يا نحملك شرف القبيله

ونغرمك سيف القضيه

أو نبعثـك حُـرة ونـبيّه

لو قد ثوبك من قفا

وأنا ما دلقتك .. ما دلقتك
.....

Dawzana 02-06-2009 10:52 AM

........

أبداكى من وين ..
ــــ ـ ــــــ

أبداكى من وين ..

وفينى منك لسة حاجات

من مخاوف

ومن شجن

أبداكى من وين ..

وظنى إنك

فكرة إعلان الحياة

وإنتهاءات العوارض

والمحن
نفسى ألقاكى وأكون

أنا كلى من بعضك

أو .. بعضى من كلك

بدن

وداير أبقاكى

وأوحد دورة الدم

المقسمة بينى

.. بينك .. والسحن

أبداكى منى ..

ولاّ منِّك

أبتديكى محل ..

محل

من ياتو منفذ

أدخلك

وكل المنافذ فيكى

سدّاها النحل

من ياتو شارع

أوصلك

وكل الدروب معطونة

لى آخر الوحل

.. أستبيح كل الحواجز ..

وأدخلك

من كلامك بدخلك

من بين مسامك بدخلك

من أى قاسم مشترك

وشبهة تشابه ..

ادخلك

ونتلاقى نهرين من تسامى ..

وإشتها

وأبداكى من حيث أنتهت

عندك خواتم الإنتها

أبداكى .. وأخلع خيام

عمرى المضى

وألقاكى مبسوطة اليدين

مفتوحة أبواب الرضا

أبداكى من لحظة أنستِكْ نار

وأخدت من قبسك .. هُدى

وأنا ضُمـّة زاهد

فى الدروب الما بتجيك


.. ولا بترجِّع ليا من تالاك صدى

أبداكى من وين ؟



.....

Dawzana 02-06-2009 10:57 AM

الخروج من بيت النمل
ـــــــ ـ ـــــــ


تمى غناك الخمجان

وزودى إيقاع الرقص

ومحل ما تمدى إيدك

أنزلى أمطار
وريحى أعصاب الطقس

مدستر فيك الزول الجواى

ومنك أول زول

نازل دستوروا معاى

أول زول صالحته لوجه الأرض

كان منك

آخر زول ناهر خوفى

وعارف معنى الرفض

كان منك

يا متوهطة حلم الكل

ومعلنة إنك ضد البعض

أنا راغب أستخلص عذبك

من بحر الشك المالح

أسقيك حليب الروح

أكسيك من عُري الزمن الفاضح

يا وحم العشق المحموم

ومخاض الجرح الفادح

أنا ليه قدامك .. دون

وعدتك نمشى نخصب حلم المويه

بوعد الرمل

رجعنا نكلم حلم المويه

برفض الرمل

وقعدنا بنقطع فى المويه وفى الرمل

سرقوك منى ودسوك

فى بيت النمل

طراك الصهيل حس الصرير فى بابى

أنا عازمك مقيل ومخصمك ما تابى

خليهو العويل كان يسترك جلبابى

يا جدية العُزاز ما بلحقك نشابى

فى الوادى الفسيح مرقت براها كلابى

فزت فى القنيص صدّن بلاها كلابى

أدتنى السلام سلمتها السبابى

حنت للرحيل رحلت مع الجلابى

وحّيدا الكتيل كتل المنخلع للدابى

ويا خيه .. كل البراحات وسوسه

الهاويه خلفك والبحر

وقدمك طنين الهلوسه

محمدك ساساق دروب الهم

محمدك .. طول المدى الشاسع

بين الإيدين والفم

ويا إنتى العشم مزبوح

أدسك فى خلايا الدم

تمرقى بى خراج الروح

حمل كاذب رعد أبكم

حبل متروك على القارب

واشوفك فى الحصار باهته

نتف غضب العُصار ريشك

حتل فيك الكلام الرخو

نقز فى دمى درويشك

واظنك إنتى

غشاك الشعور بالزهو

سقط سهواً غناك الكان

بكلب جلدة الغفوة

وينفذ من مسام الصحو

لكنك بتطلعى من حوافر الخوف

تطلعى من حلم مهووس

ومن فجة سفر طول

يسربك الحنين فينى

تعلنى عن زمن آتى

تعلنى عن وطن أجمل

ولكنك بتطلعى .

......

Dawzana 02-07-2009 02:36 PM

.......



بـحـبـك بـحـر

مـــعـــاى

وغشيتك أسلم عليك

أتكّل قصادك

هموم الحراز

أطمّن طيوف

الخريف الوشيك

أبشر دواخلك بوعد الرزاز

مودر ملامحك

غبيتك

لقيتك

بتلفظ شوارعك بيوتك

تصادر خطاك وتكاجر مشيك

تغالط حواسك ملامحك

وتحرد عيونك مقاطع وشيك

سألتك خبارك ؟!

مسُوكر لسانك ؟

وصمتك يشفق

خبارك !

بتغرب شموسك

زمان الشموس البتشرق

تضيع الملاحه التعطن وجيهك


ومّنك تدفق

خبارك!

غريبة

أقلب دواخلك

أكوس الحبيبة

اللى عنك بتفرق

بتفرق حبيبتى

البتلبس فصول الخصوبة

بتضحك أغانى

وتدفق عذوبة

وبتنزل مطر

عشقتك لأنك حبيبتى

وبحبك بحر

عشقتك لأنك

خواتم الحقيقة

وطريق الوصول

لأنك بداية الخليقة

واساس القبول

أحيّى الغيوم

البتفطم ذبولك

ترضع سهولك

مواسم الهطول

واحيّي المدائن

البتفتح حدودا

وتمنح عيونك

جواز الدخول

يزيد خيرك

ولا طابت بلاك عيشة

مقسمة إنت فى غيرك

مقسمة فيك ما فيشه

ومخيم ليلك العسعس

لا برقن بروق صحوك

لا صبحك رضى اتنفس

يحندك فى العطش غيمك

تمطري إنت فى الخاطر

وتنفضي من دواخلى العس

بديت أتسامى للآخر

رميت توب البيات الرث

قويت إتيقنت روحي

وسقط منى الكلام الغث

أنا الدّاخرك بصيرة وشوف

يا بقعة ضو

فى عتمة قلبى المحفوف

ومسربل فى بالشتا والليل

والخوف

فارغة ومليان بيك

وضيقه عليك البشره

أنا غيبتك بينى وكنتك

زمَََََََََََلتك فى الخاطر بُشرى

مزَقت ستار الجلد الهش

وطلعتى من الجسد القشرة

تاوقت

لقيتك فينى النفس الكاملة

تتوقى اليابسة

والنهر فى إيدك صلصال

يتسارق ضوَك خافت

متهافت نحوك أجرى

مهرول راكض

سابقت خُطاى وحدقتك

غيمة .. وضل .. وبُحيره

ضاريتك بينى وضاريتك

من الحزن القابض

نفسى وروحى واقف عارض

ستفت عيونك بالمطرة

وقرحتك ضد الزمن الراكض

وحدقتك حبيبتى

البتشبه فصول الخصوبه

تضحك أغانى وتدفق عذوبة

وبتنزل مطر

عشقتك لأنك حبيبتى

وبحبك بحر .

......

Dawzana 02-08-2009 07:39 AM

......

الصوت الطالع مني

بِدّي مسامعك راس الخيط

و الشوق البِحسِب حَب الرمل التحتِك

بِعرِف رنّة ضحكِك ..

رقم الهاتف ..

و شارع البيت

و الخوف البِفضَح صمتي

بِعرفِك إنتي

يعلم إنّي

ماني المالي هدومي

و ما في الجُبَّةِ إلّا إنتي ..

زولة ..

و كاكاو الدم الفيك

مين السّماكِ سِفاح

من رحم أبنوسة و نخلة

مين الورّاك إفراز الشهد

و أداكِ مذاق من ريق النخلة

كضّابة الغابة القالت

تشتِل أنناسة على الصحرا

كضّابة القلتي

حتفصّلي توب العيد للهلة

كضّاب القلتَ

ملحوقة خطاوي المهلة

يا زولة ..

مخنوقة الشهقة الفي رئتي اليمنى

محمومة خلايا الدم و الزفرة

مهمومة شعاب القفص الصدري

ممحوقة حُلول الشِفرة

مفقود مفتاح الباب السري

تذّكر؟ ..

وين لاقيتَك صُدفة ؟

قالتلي – حبيبة القلب الأولى

و الفرح المُعلن مدسوس

دسيت على رِحم الذاكرة النطفة

في هذا الزمن السوس

إتْرَفَعتْ بيناتنا الكُلفة

غنيتِك نخلة و أبنوس

و مشيتِك متقرّب لعيونِك زلفى

تذّكر؟ ..

وين لاقيتَك صُدفة ؟

أذكُر كنّا عناصر شتى

إكتملت بيناتنا العفّة

و الصيف اللاذع شتّا

صفق النيم إتساقط حتَّ

طرفة لمحتِك

قلت النفس

الأبى يتختَّ

يضحك صحوِك

نوّر كلَ مناحي الحِتة

و ما إتسائلت عن إسمِك حتى

إتلمينا عليكِ و بغتة

دسيناكِ من خفر الليل

فسحناكِ المليون ميل

صرّينا تراب أقدامِك في المنديل

و شهلناكِ هتاف

.. و مديح

.. و صهيل

و قدّمناكِ قُربان للنيل

و كان من عندِك بدت الصحوة

جيتِك مِنّك

شادّي خيال الشوق الصهوة

بدينا نفلّي الروح

من نزق الشهوة

و إترجّلتَ بفعل النخوة

جلسنا نخمّس فنجان قهوة

إتشاركنا الزاد و المقعد

فتحنا ملف الزمن الأبعد

قام الفرح الطوّل مُقْعَد

لاقيناك دلوكة و دبكة

و إتسالمنا سلام غُبار السكة

زولة

و كاكاو الدم الفيك

مين السماك سِفاح

.......

Dawzana 02-08-2009 07:42 AM

وضّـاحه

الـصباح الـباهى لونك

وضّـاحه يافجر المشارق

غـابة الأبـنوس عيونك

يَـابْنَيّه مـن خُبز iلفنادق

شـيدتي في جواىْ

صوامع للفرح

وفـتحتِ في دُنياي مسارح

لــــلـــمَـــرحْ

وبـقـيـتـي لــــيْ

سِــكّــه وعــيـون

لا قِـــدرْتَ أطـولـكْ

شــــان أجــيــكْ

لا قِـدرْتَ من غيرِكْ أكونْ

وانـا بـيك مالينى الكلام

حرّكت بيك عصب السكونْ

جَـلبتَ لـيكْ الغيم رحط

طـرّزتَ ليكْ النيل زفاف

حَــرَقْــت ليك

الــشــوق بــخـور

وفــرشــتَ لــيـك

الــريــد لِــحَـافْ

لا الـسِكَّه بـيكِ بِـتِنْتهي

ولا مـعاك ملّيت الطواف

يـا ريتني لو أقْدَر أكونِك

الـصباح الـباهى لونك

يَـابْنَيّه مـن خُبز الفنادقْ

غـابة الأبـنوس عيونك

وضّـــــاحــــه

لــو طــال ا لطريق

بـيناتْنا واتـرامي الـمدى

وصنَّت مَسَامْعِكْ من iiنِداي

شِـرْبَتْ فـيافيِك ا لصدى

مـا تـحنِْى هامات النخيل

مـا تـرمي دَمَعاتالندى

مـا تْشنِّفى الزمن الجميل

دا الـعُمرِ يـا دابـو اْبتدا

! والعُمْرِ إيه حيكون iiبدونِك

وضّـاحهَ يا فجر المشارِق

الـصباح الـباهى لـونِك

يـا بـنيه من خبز الفنادقْ

غـابة الأبـنوس عيونك

.....

Dawzana 02-08-2009 08:59 AM

......

مشرع الحلم الفسيح

يا مشرع الحلم الفسيح

أنا بينى مابينك جزر

تترامى .. والموج اللّديح

القدرة والزاد الشحيح

كملتو .. ما كِمل الصبر

نتلاقى فى الزمن المريح

ميعادنا فى وش الفجر

يا مشرع الحلم الفسيح

يا مشرع الحلم الفسيح

يا بعض منى .. وفينى ساكن

أنا أصلى منك ومشتهيك

و بيناتنا ليل الغربة ... داكِنْ

هبّة هبوبك..

أفتح شبابيك المساكن

وسـِّع دروبك ..

ولـِّع مصابيح الأماكن

يا مشرع الحلم الفسيح

يا مشرع الحلم الفسيح

يومنا النـّهِـبْ .. أسلِبنا خوفنا

كبـِّرنا قدرك .. مرتين

وطـِّول قدر كتفك .. كتوفنا

يا رغبة الرعد البيسكن ..

بين غناوينا وحروفنا

ضوِّى الدساكر والضفاف

عبِّى الحناجر بالهتاف

سدِّد مسامات الرِّعاف

نوِّر مغاراتنا وكهوفنا

يا مشرع الحلم الفسيح

أنا وإنت .. والمطر الفصيح

حانطوِّع الزمن القبيح

نأخد بعض .. شكل السما

حدِّثنى دايماً .. كلما

تنشف على البر الضفادع

يهجر الضو المواضع

وتسقط من الكف الأصابع

حدثني دايماً كلما

تحرد مراسيك السفن

تسكن مرافيك الزعامات .. الدُمى

حدثنى لو تاهت خطانا ..

على الدروب المبهمة

أو ربما..

تهدم آلات الشوارع ..

وترجمْ العُزّى الصواقِع

حدثنى لو مطرك همى ..

حدثنى لو صادف الكى المواجع

وضلك على الساحل رمى

حدثنى لو مطرك همى

علمنا دايماً كلما

نبذر على أرضك شهيد

يطلع شمس ..

يبهر بأنوارو السما

.....

الطيب عبدو 02-08-2009 07:13 PM

اقتباس:

علمنا دايماً كلما

نبذر على أرضك شهيد

يطلع شمس ..

يبهر بأنوارو السما
دأئماً لك منا كل الحب و
لك التحية ايها الكريم (مامون بدوي) دوزنه
وتحية كبري للرقم الكبير الشاعر المرهف
الاستاذ/ أزهري محمد علي
لكم مني دائماً كل الحب
الطيب عبد القادر تاج الدين

اخت الحزين 02-14-2009 12:50 PM

الف مرحب بالعم الغالى ازهرى محمدعلى ( ابوزرياب)
لك خالص التحية والاحترام
وسعدنا جداً بانضمامك الينا ونورتنا وشرفتنا..
ابنتك : دينا امين البشرى..

ازهرى محمد على 03-01-2009 10:35 AM

مكتبه ازهرى محمد على
 
اما بعد
تشبه وعد
ووعد بتشبه
وش السعد
وعد بتتضحك
من الاما
وتحت اقداما
بيصحا الورد
ووعد بتتدخل
ذى الضل
ويعلن خطوها
صوت الرعد
ووعد الارض
البحر الجذر المد
هى المخلوقه
من الصلصال
وماخد ريقا
مذاق الشهد

واما بعد
وعد رذاذ
المطر الرشا
من احلام
الغيم الشايل
ووعد لتيبة
الوادى الهشه
حتت من ضحكاته
سنابل
ونزعت من احساسنا
الوحشه
ومن ساحات
الحرب قنابل
وهى بتدهشنا
اقاصى الدهشه
غير ماتطلب
اى مقابل

وامابعد
كتبت
فى صفحات الريح
خفة روحه
وايدا البضه
وسكبت حسهافى التاريخ
كل الدنيا
اتفتحت روضه
وكشفت وعد
حجاب الليل
فجا الضو
من اول ومضه
الاطفال
احتلوا العالم
ورتبوا كل
حالات الفوضه

واما بعد

انور 03-01-2009 11:55 AM

لك التحية وتقبل مرورى
محبتى

الصادق عثمان 03-01-2009 12:01 PM

أما بعد
 


الخاطر ... يفيض ويعلن عن تهاويمه
ليسجلك عنواناً للعذوبة
ويجلسك جليس ديمومة لتسكب فيه انهار الوضوح والعفة
وسائلين عنك


الساعة الآن 07:12 AM.

Powered by vBulletin Version 3.8.7
Copyright ©2000 - 2024, Jelsoft Enterprises Ltd
HêĽм √ 3.1 BY: ! ωαнαм ! © 2010

vEhdaa 1.1 by NLP ©2009