حليوة ليلة المولد
بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية
عشم باكر
في عينيك عشم باكر
ما إنت العمر كلو
والشمس الوضاحة ونور
وزغرودة بتدخل الناس
خبر زمنا جديد مولود
و لقيت غيرك يضيع اسمي
وأكون أنا حي زي مفقود
في عينيك عشم باكر
لاقيني يا عشقي الخرافي
لاقيني قبال الزوال
لاقيني في كل المرافيء
زفاف ربيع وفرح قوافي
وانشري في حزن السنابل
غيمه يا كل المشاعر
وامشى قدام الصباح
وأجدعي الطل للأزاهر
وأبقى يا شوقي الخرافي
غيمه بتشرب فيافي
لاقيني يا شوقي الخرافي
لاقيني قبال الزوال
غنوة من أزمان بعيدة
طالعة من خصب الدميرة
تلقيني راجيك في الأماسي
وفى المرافي وفى الملفات الخطيرة