داقــس فــي بــلاد الـهـواجــس ؛
داقـــس فـي بــلاد الـهـواجــس :
أخونا العزيز ( ناقِش ) الشهير ب ( سلطان داقس في بلاد الهواجس ) كان بحكي لي في قصة واحد من الجماعة وجات سيرة ( سوبرماركت ) السودان والواقع في الركن المقابل لمكان أتردد عليه كثيرا . وبما أني اتعودت مشاهدة اللافتة كل لحظة فقد انطبعت صورتها في ذهني لزقة ، وحاولت عدت مرات محو هذه الطبعة ولكن دون جدوي . قلت استفيد من هذا النسخ طالما مكنكش ومتعكلت وباقي ليى في العزاها الله ، ولما ماقدرت التخلص منو ، قلت ليه ما احولو لي شي مفيد استخدمه بدل الجهد في التخلص منو ، واعكس بيهو دورة الاحداث ليكون ( سوبرمان ) السودان بدلا من ( سوبرماركت ) السودان .
هل من الممكن عكس أي حالة للإستفادة من التوجه الاساسي وعكس النتائج لصالحك . عسي ولعله يستطيع ذلك ( السوبرمان ) السوداني من تخليص خلق الله والعباد من المصيبة الجاثمة فوق البلاد وعلي نَفَس العباد ، وبدون شك ما في مواطن ما سأل نفسو كيف نتخلص من هذا الطاعون المستفحل والذي استوطن كل أوردة وشرايين وشعيرات وشعب البلد وكم من شخص قال يا أخوانا البحلنا شنو من جبارة الما بتبارا وبعض من ابناءه من حفدة البصيرة أم حمد . وفي نهاية التساءل تلقي الجواب واقف محتار في محلو ما عارف ليهو جيهة يمشي عليها ولا طريق لإجابة ، يبقي هنا في قناعة إنو الناس دي كلها وصلت لنتيجة واحدة فقط لا غير ، إنو الجماعة ديل فشلوا وأفلسوا إداريا واقتصاديا واستراتيجيا وحتي دينيا ، ونجحوا فسادا وتدميرا واصبحوا مكشوفين حالا ومآلا ، وإنهم جماعة في الاصل ما كان لديهم منهج ولا هدف ولا رسالة ،،، زي جماعة عطا الله نجار الفك ، مجموعة صعاليك منبوذين في وسطهم ، قاعدين مع بعض لا شغلة لا مشغلة ، فجاءة يقوم واحد فارغ منهم يقول ليهم : رايكم شنو ياخوانا نقوم نمشي البحر ، يعني فراغ وعدم موضوع ، وبدون هدف لمرواحم البحر أو غدوهم وليس لديهم أي مخطط مرسوم مسبقا لهدف معين او فكره . يعني مافي أي جدوي من الروحة للبحر إلا عشان يتمشوا ، فسحة يعني . فمن الواضح إنو الجماعة ديل برضو فكروا يمشوا البحر يتمشوا في الهاملة دي ، بس ! بإسم الدين وهم ابعد ما يكونوا عنه وبإختلاف بسيط من اخوانا ناس عطاالله نجار الفك وبتاعين الفارغة . إنهم واثناء تجوالهم وهم ماشين علي الضفاف لا يخلّوا أخضر ولا يابس إلا ونهبوه وأي حاجة كده تلاقيهم يلفحوها ، أي شي في طريقهم او ما في طريقهم وينشلوهو ويحللوهو المِطَرِّفة والسائبة والنطيحة والموقوذة والمتردية والميتة والدم ولحم الخنزير والفطيسة ويهبروا الهاملة والمملوكة وما أُهِلَ به لغير الله والما عندها وآلي ولا وجيع ، أملا في ثروة تنقذهم من الضياع ويقدروا يطفوا بيها علي السطح ، والما شفتو في بيت أبوك بخلعك ، والمصيبة إنهم مرقوها بره البلد ، لانهم كانوا مطمورين في بدرون الدرك الاسفل من المجتمع وطمعانين يقدروا يخفوا بيها شئ من تاريخهم المهبب ، وقد بدأ يتكشف المستور ..... !!!
نــقــشـة ؛
قالوا واحد عندو مشكلة مع زول ثري ، استجمع كل شجاعته وجراءتة ووقف قدامو وقال ليهو : انت إنسان فاسق ومتكبر وفاسد . الثري قال ليهو اكتب لي الكلام ده في الورقة دي لوسمحت وبخط واضح . لما صاحبنا كتبها ومداها ليهو ، الثري طلع ورقة نقدية كبيرة وغطي بيها الكتابة وقال لي زولي : هسي الكلام الكتبتو ده شايفو ؟ رد عليهو حِبَيبي الغلبان و قال ليهو : لا !!!
" المحجوب "
|