تـــــبـــاريــح ؛ــ
الحقيقة الرايحة مني ومزهللة بي ليل نهار ، حكاية الكباري مع أجهزة الإعلام المختلفة وبخاصة القنوات التليفزيونية المحلية ، العامة منها و المشفّرة . لكن ما علاقة الأغاني ذات الخلفية الممزوجة بمجموعة من الكباري كخلفية لعدد لا يستهان به من الأغاني والبرامج المختلفة للقنوات العاملة في البلد ، الفهم والحنك منها شنو يعني ؟ الله أعلم .
بس الفهم العندي أنا والمتشعبط في راسي ، بتمني ما يكون فهم نشاز في عالم القفلة الإنطوائية للدول الإسكندنافية المجاورة ، وأيدلوجية البرجزة الفكرية في عصر الإنبطاح الجبهوي وألإنسداح الميتافيزيقي للشعب الهوائي والمواطنة النفعية في راس العبدلله من الدخول الإزدواجي ما بين القشرة وبصلتها والبصلة وريحتها .
بس أنا البفهموا ، إنو مصطلح كبري بمعني تمريرة فوق الهدف ألأساسي بحيث يخرج الشخص المعني بالأمر أطرش في زفة التجربة المستفشلة المبنية علي الجهالة القومية والإنبثاق الطفيلي علي بيئة الإحتكام التجريبي بنتيجة مخبرية أربعة صلايب ،لا جا منها بي خبر ولا طلع بي عِبر ، ده البعرفو عن الكباري . كلمة صاحبة معني واحد وانا مطبَّل علي المعني الواحد ده ، وراسي والف سيف وأنا حر فيهو ! أفهم بالطريقة البتعجبني . فمصطلح كبري هو بمعني جسر يربط بين موقعين ، يفصل بينهما موضوع في غاية الأهمية والخطورة ، وما دايرين زول يعرفو ، يقوموا يمرروه بي فوق الكبري مصنقع ، لا من شاف ولا من دري ــ يعني فوق غباهو ،،، ده عندي أنا معني الكبري ، وقع ليكم ؟؟؟ والله كان فهمي ده صح ؟ تبقي مشكلة بجد .. وأنا أقول الناس دي تايهة مالا ؟ ونسبة التركيز عندهم متدنية ليه ؟ لامّين فينا التنمية ،، التنمية وهي كلها كباري وجقور ــ عفواً ــ كباري وجسور ،،
أتاري الشَغَلة كلها كباري في كباري !!! و الله ليك يا المصنقع ...
" المحجوب "