المفهوم في علوم الواضح والمعلوم
المفهوم في علم الواضح والمعلوم :
قالوا الحاجة أم الخير حرم المرحوم حاج العبيد ،،، لحقت الصح ،، الله يرحمها ويغفر ليها ،، ضربوا التلفونات والموبايلات وكتبوها في النت والمغتربين سمعوا الخبر قبال اهل البلد وكل من يهمه الامر من قريب أو من بعيد كلموهو ،، كل الاهل سمعت والجيران ، وناس المناطق المجاورة والحَلَّال ،، كل المساجد في البلد وبراتا أخدت خبر والمكرفونات أشتغلت ،،
" ،،، والذين إذا اصابتهم مصيبة قالوا إنا لله وإنا اليه راجعون ،،، انتقلت الي الدار الآخرة ،، الحاجة أم الخير بت حاج الدغري وحرم حاج العبيد ،،، والدة كل من فلان وعلان ،، الصلاة عليها بالمسجد الكبير عقب صلاة المغرب ،، ".
أم الخير ،، ماتت وشبعت موت بعد صراع طويل مع المرض العضال الكانت بتعاني منو لما فطست ،، الله يرحمها ويغفر ليها ،،،
قالوا أذكروا محاسن موتاكم ،، آخر عمرها بقت مشاكلها كتيرة ومعادية الخلق بدون سبب ومتطاولة شديد ،، عندها كبير الديناصور ، المرحومة عندها أخوان غير أشقاء بس من ناحية الاب ،،، وبما إنو الام ما هي منهم ،، أخوانا ما شغالين بيها كتير ،، بالاضافة لي إنها طويلة لسان وقليلة إحسان ،، لسانها متبري منها ،، وماتجي مناسبة إلا تلقاها بتهاجم فيهم وتطلع في عيوبهم ،، حكاية تستُر ليها واحد منهم ده شي بعيييد ،،، وما عندها زول كدي حبيب إلا البجيها علي عدلها ،، ويتقرب منها بالكلام البرضيها وهي عايزة تسمعوا ، يعني شايفا نفسها بالحيل ،، وبالرغم من شوفة الفلاحة في كلامها وجرأتها وقوة عينها ،،، بس فصاحة ساكت وقدرة ماعندها ساعة الجد . وبي تحت ،، تحت تقعد تتعذر وتبرر وتقل في مقامها وعدم احترامها ،،،، الفهم شنو من البتسوي فيهو ده ؟ ما اتعرف ! والمصيبة انو وكت مات ابوهم وقبال ما يرفعوا الفراش ، ، والقبر لي هسه لين ، طوبتو ما يبست ،، قالت شنو ؟ يوزعوا التركة ! وهي شن التركة ! لي شلاقتهم لقوا ديون أبوهم أكتر من الخلاهو ليهم ! قبلوا ليك عليها وقالوا ليها انت كل البلاوي والمصايب دي من تحت راسك انت يا أم الخير ،،
في نهاية المطاف الناس صلت عليها في الجامع الكبير ،، بعد صلاة المغرب ، وشالوها طوالي علي المقابر ومثواها الاخير .
صورة العنقريب شايلاهو مجموعة يمشوا لما يكتفوا وشوية كدي تجي مجموعة تانية تقول ليهم صلوا علي النبي ويمسكوا يشيلوهوا منهم كمان لما يكتفوا ،،،
أها ،،، مجموعة ورا مجموعة لما في النهاية دخلوها القبر .
فما أشبهنا اليوم بي عنقريب جنازة أم الخير !!!!
" المحجوب "
|