|
|
|
|
|
|
| التميز خلال 24 ساعة | |||
 العضو الأكثر نشاطاً هذا اليوم |
الموضوع النشط هذا اليوم |
المشرف المميزلهذا اليوم |
|
قريبا |
بقلم :  |
قريبا |
|
آخر 10 مواضيع
|
الإهداءات |
|
|
|||||||
| «۩۞۩-قسم المكتبات والتوثيق -۩۞۩» قسم للمكتبات يستضيف الكتاب والمبدعين من أبناء الحصاحيصا بصفة خاصة وكبار الكتاب والمبدعين السودانيين بصفة عامة |
 |
|
|
أدوات الموضوع | انواع عرض الموضوع |
|
#1
05-18-2014, 04:51 AM
|
|||||||||||
|
|||||||||||
مكتبة الشاعر محجوب شريف
|
|
05-18-2014, 04:52 AM
|
#2 | |
 
|
جميلة ومستحيلة.. يا جميله .. ومستحيله انت دايماً زي سحابه الريح تعجّل بي رحيلها عيوني في الدمعات وحيله اسمحيلا تشوف عيونك.. اسمحيلا أنا لا الصبر قادر عليّ.. ولا عندي حيله يامراسي الشوق تعالي لا الليالي تمر بدونك هي الليالي من ضواحي الدنيا جيت.. وعليْ رحالي لمداين فوق عيونك يا محالي ريّحيني.. أسُتْري حالي فرحيني عيوني في الدمعات وحيله أنا لا الصبر قادر عَلَىْ.. ولا عندي حيله حدّثت عنك نجمة جاره وزرعت اسمك.. حارة حارة في مناديل العذارى في مشاوير الحيارى في لحى الأشجار كتبتو.. نحتو في صم الحجارة وبحت للشمس البتقدل.. في مدارها عيوني في الدمعات وحيله اسمحيلا تشوف عيونك اسمحيلا أنا لا الصبر قادر عَلَىْ ولا عندي حيله وأنتِ منك لا بداية.. عرفت لسّه ولا نهايه مرة أسرح.. ومرة أفرح.. ومرة تغلبني القرايه ولّمن أكتبلك وداعاً.. قلبي ينزف في الدواية يا صبيّة.. الريح ورايا خلي من حضنك ضرايا عيوني في الدمعات وحيله اسمحيلا تشوف عيونك اسمحيلا أنا لا الصبر قادر علىْ.. ولا عندي حيله |
|
|
|
|
05-18-2014, 04:56 AM
|
#3 | |
|
الدم شلال ..... السد ارواح
الموج اترنح في الحلال اتراح اتراح شهداء حياتم يا لله تلال .. وظلال ومعيشة حلال..... وضمير مرتاح تاح... تاح .... تاح.... تاح بينم وبين الحبة محبة وبينم وبين الضفة صراح جنا يا حليلو سبيط اتدلي... مرصص راح كم الورد صباهو .. عيونو لسع فيهن باقي مزاح اسال عنو حفيف العشب لم يكسر في عمرو جناح غني معاهو القمري زمانك حسع راح بابا جاب الهم والذم والسد ينسد وحسع ينزاح
بابا جاب الهم والذم والسد ينسد يوما ينزاح نحن كذلك برضو كفاية .... كفاية كفاية كفاية جراح اي زيادة حنبقي نفاية ويبقي الطمي في العين سفاية وكل وطنا بيوت اشباح اهي دارفور الصمت رماها جياع وحفايا وآ اسفايا وآ اسفايا كاني بايدي طعنت قفايا كفاية كفاية كفاية كفاية حريق وصياح ويا ادروب سامحنا سكتنا عرق اتصبب .. ودمك ساح سلك.. وزلك..راحل ضلك..منهك كلك ليل وصباح ويوم فتحتو وراكم.. تاح ترراح... تاح ترراح السودان الوطن الواحد شبرا شبرا بقي نتاح يا اشعار العار العار اذا ما الحنضل بقي تفاح وتم تررم.... مع تاح ترراح كم سفاح ارتاح واتقدل.... والكاتلنا انحنا سماح اعتي دروع وجذوع تتهاوي.. وشتلة تقاوم اعتي رياح |
|
|
|
|
05-18-2014, 04:56 AM
|
#4 | |
|
حقو تعرفي انى انك
لما تكتبي في الغباشات الوضوح لما تنزفي زى حنك حقو تعرفي انى انك لما تبكى سحابة فرقة تضحك الواطة اليباب لما تحزن ساقية تبكى كل شاعر في الشجن تلقاهو داب الغنيوات تبقى منهل والمشاعر والصحاب لا سكت صوت المغنى ولا حزن بوح الرباب منى منك حقو تعرفي انى انك كلما عارضني خوفك تلقى انى بعيش حروفك مهما كان احوال ظروفك برضو بعرف انى انك واني زيك برضي شوفك منى منك يا المشتهنك جيتى منى مرقتى منك ضلي ضلك وانتى كلك جيت أقولك مشتهنك النسيم كلمني عنك العوارض لمعنك المشاوير دردرنك كل سكة أفوت اسيبا برضو بترجعنى عندك يانى انتى وانتى منى |
|
|
|
|
05-18-2014, 04:57 AM
|
#5 | |
|
شن بتدور آمحمود
بعد النيل ما شال الجرف الصامد طول عمرو وراح بعد العيد الكان أفراح ومسرة صارت مرة واتملت الحسرة في زينة الحي ونواره الحب كان غالبك يا محمود ؟ كان غالبك تبقى الضروة الصامدة الكلمة الوالدة سواى اللامات آمحمود ؟ كان غالبك ترفع صوتك صوت الريح النبضو بدوى وما بنشاف ؟ كان غالبك آمحمود ؟ لكين توب العافية وهدم السترة اللي أتملى حقرة فضلت تروح بالهم والغم والنم فضلت تخلى السامية تعوس في الدوكة وصاج الدوكة يحرق أيدها والدخان في التكل الأسمر دوخ سامية وأنت بعدت بعيد في الحتة الما معروفة وسامية الجرح الغور فيها يحفر ويحفر وما أظن يتداوى مع الأيام لا الزمن الفات لا الزمن الجاى ولا الهسه بطيب لي سامية الجرح إلفيها شايلة الليل في صمت الليل ونست الليل إلفيها وشعرها اتجعد وعيونها من كثر الدمعات النزلت بقت ما بتنشاف شن بتدور آمحمود كل الفات ما كفاك؟ ما قت عنيد وما بتخاف الفرجة الكانت هولك والسيل البكسح وأنت تعاين كل الناس قايلاك ما بتخاف |
|
|
|
|
05-18-2014, 04:58 AM
|
#6 | |
|
يا والدة يامريم
محجوب شريف :::::: ياوالدة يامريم يا عامرة حنية ان عندي زيك كم ياطيبة النية بشتاق وما بندم اتصبري شوية ياوالدة يامريم عارف حنانيك لي راجيك تلوليني دائما تقلديني وفي العين تشيليني القاهو عز الليل قلبك يدفيني ضلك علي مشرور قيلت في سنيني ياوالدة يامريم طول النهار والليل في عيني شايلك شيل لاكني شادي الحيل والخوف علي داهم هاك قلبي ليك منديل الدمعة لما تسيل قشيها يامريم |
|
|
|
|
05-18-2014, 04:59 AM
|
#7 | |
|
يابا مع السلامة
الشاعر : محجوب شريف ::::::::::::::::::: يابا مع السلامة يا سكة سلامة في الحزن المطير يا كالنخلة هامة قامة واستقامة هيبة مع البساطة اصدق ما يكون راحة ايديك تماماً متل الضفتين ضلك كم ترامى حضناً لليتامى خبزاً للذين هم لا يملكون بنفس البساطة والهمس الحنون ترحل يا حبيبي من باب الحياة لباب المنون روحك كالحمامة بترفرف هناك كم سيرة وسريرا من حولك ضراك والناس الذين خليتم وراك وعيونم حزينة بتبلل ثراك ابواب المدينة بتسلم عليك والشارع يتاوق يتنفس هواك يا حليلك حليلك يا حليل الحكاوي تتونس كانك يوم ما كنت ناوي تجمع لم تفرق بين الناس تساوي نارك ما بتحرق ما بتشد تلاوي ما بتحب تفرق من جيبك تداوي الحلم الجماعي والعدل اجتماعي والروح السماوي والحب الكبير في الزمن المكندك والحزن الاضافي جينا نقول نفرق نجي نلقاه مافي لا سافر مشرق لافتران وغافي وين عمي البطرق جواي القوافي يا كرسيه وسريرو هل ما زلت دافي يا مرتبتو امكن في مكتبتو قاعد يقرا وزهنو صافي يا تلك الترامس وينو الصوتو هامس كالمترار يساسق يمشي كما الحفيف كم في الذهن عالق ثرثرة المعالق والشاي اللطيف تصطف الكبابي اجمل من صبايا بينات الروابي والضل الوريف احمر زاهي باهي يلفت انتباهي هل سكر زيادة ام سكر خفيف ينده للبنية يديها الحلاوة والخاطر يطيب يدخل جنو منو محبوب الشقاوة يستنى النصيب الدفو والنداوة السنا والعبير كالغزلان هناك في الوادي الخصيب حيث الموية عذبة والغصن الرطيب كم تحت المخدة اكتر من مودة للجنا والغريب عش وعشب اخضر جدول من حليب يابا ابوي يا يابا الشمس البتطلع بلت منو ريقا والنجمة البتسطع فيه تشوف بريقا الندى في حركتو يطفيها الحريقة ننهل من بركتو زي شيخ الطريقة شاييهو وطرقتو والايدي الصديقة يلا نسد فرقتو حب الناس درقتو يا موت لو تركتو مننا قد سرقتو كنا نقول ده وقتو لكنك حقيقة النفاجو فاتح ما بين دين ودين نفحة محمدية دفئاً كالضريح ميضنة كم تلالي جيداً في اليالي مجداً في الاعالي مريم والمسيح قلباً نبضو واصل ما بين جيل جيل ما بين كان وحاصل او ما قد يكون ما بتشوف فواصل الا الذكريات وآلام المفاصل بعضاً من شجون يابا مع السلامة يا سكة سلامة في الحزن المطير |
|
|
|
|
05-18-2014, 05:00 AM
|
#8 | |
|
السنبلاية
الشاعر : محجوب شريف ::::::::::: لّما عرفتك اخترتك سعيد البال .. وختّ شبابى متيقن عليك آمال لا جيتك قبيله .. ولا رجيتك مال ولا مسحور ويوم ما كنت في عينىّ .. أجمل من بنات الحور جيتك عاشق اتعّلم من الأيام ومن سأم الليالى البور ومن أسر الوِلِف كتّال لقيتك فى طشاشى دليل .. وفى حرّ الهجيره مقيل ركزت على ضاكِ عصاى لقيتك فى حياتى جذور بنيّه اتلفّحت بالنور مهجّنه من غنا الأطفال .. ومن سعف النخيل والنيل ومن وهج الشمس موّال وان اخترتينى إنساناً .. عزيزَ النفس بتمنّى .. وبسيط الحال علىَّ حرَّمت زرعاً ما سقيتو حلال ومافصّد حصادو قفاى وبينى وبينك الضحكه .. ورحيق الشاى وطعم الخبز والسُتْره .. ومساء النور وعمق الإلفه.. بين النهر والنخله وغنا الطمبور وصدق العُشْره بين الأرضِ .. والإنسان وبيني وبينك الفكره .. وجمال الذكرى والنسيان وحسن الظن ومشوار الحيا اليوماتى ما بين الجبل والسهل .. ما بين الصعب والسهل عزّ الليل .. وفى سكّه مطر بكّاى فلا هماً تشيلى براكْ ولا جرحاً أعانى براى ولانا على بعض نمتن وتزعلى يوم .. وازعل وننفعل مرات تقبّلى منّى .. واتوسّد ضُراعى سكات وفينا حنينه تتشابك موده .. تشابك الغابات ونحن اذا اختلفنا سوا .. بنطيع الصاح ولو بتنا القوا بنرتاح اذا تمن الملح والعيش.. رُضا الشمّات وتتكى سنبلايه على ضراعى .. واميل كأنى غنا الطفوله العذبْ كأن الدنيا طى القلبِّ والمنديل كأنّ الدنيا طىِّ القلب والمنديل |
|
|
|
|
05-18-2014, 05:01 AM
|
#9 | |
|
وتر مشدود
الشاعر محجوب شريف سلمت خايف كنت ما يسلم قلب مفصود حلمت قبلك كنت لا بحلم ولا موجود معاك بحلم كأني على فرس طاير بغني على وتر مشدود واطير عبر السما المدود سما الوطن اللي مالو حدود حمامة جناها لا خايف ولا مفقود واشر الغيمة خيمة على النجم وارتاح أصادف أجمل الغابات واصادق غصنك الفواح واشرب من زوايا القلب جنبك اخر الأشباح وتفتح كلمة من عينيك لي مجرى الغنى المسدود واخط اسمك على باب الزمان اكليل وردة صبية تلمع فوق صديري النيل وباسمك أغني لي عالم بسيط وجميل وانادي عليك ملاذا في شتا الأيام وبردا في الحياة وسلام وفي شدة هجير وزحام جزيرة حنينة بين نهرين حنان القاك عليك اتلم وهودج في صحاري الهم وعالي النخيل عليك اتلم وفي السكة اللي ما بتعود معاك لآخر المشوار نغني على وتر مشدود |
|
|
|
|
05-18-2014, 05:02 AM
|
#10 | |
|
عمّـــا قريـب
الشاعر : محجوب شريف :::::::::: عمّا قريب.. الهمبريب يفتح شبابيك الحبيب والحال يطيب يا محمد أحمد تستجِمْ والبيت يتمْ تتلم تلمْ تفرح فرح تحلم حِلِم كم تطمئن حقك يجيك لافيهو شك.. يمكن واظن ويفوتو همْ والعدل يعمْ وتغني أمْ كادت تجن كبر الولد جُوّا السجن فاقداهو هى دا كلو كلو ينتهى دا كلو كلو ينبهى زولاً تريدو وتَشْتهِى تلقاهو فى لا فى السِّجِن.. لا مختفى لا يقولو ليك ما تمشي لى دا كلّو كلّو ينتهى دا كلّو كلّو ينتهى دا كلّو كلّو ينتهى |
|
|
|
|
05-18-2014, 05:04 AM
|
#11 | |
|
ست البنات
الشاعر : محجوب شريف ::::::::::::: ست البنات اتمالكت اعصابا احلامها اتكت بكت الشبابيك التي نورا انطفا فقدت حنان الهمبريب والالفة والشمس البتضحك وانسياب الدردشة نار الكوانين انطفت إلا البتوقد في الحشا حق الفطور يمه العشا ما باباليكم يا جناي اصبر كفى أدت رضيع الأشهر الأولى .. القفا ثم انكفت غرقت غرق في دمعتا عشم العشم نقطة حليبا تسكتو ولا حتى كسرة تسند من ما مشى ما اشرف الدمع الجسور إذا جرى من عين والدة سعت وبكل ما ملكت يداها وصحتا داست هموما الداستا مرقت تفتش في الشغل كم مهنة حامت كاستا نكتت شهادات الزمن ما كان تخلى دراستا رمت اللقيمات الدغش والكسرة قامت عاستا كم حاجة عندها باعتا دبلة زوجا وساعتا ترخص حياتا .. وكل شئ بس سمعتا ياالله ما اطول خميسا وجمعتا احد أحد.. احد احد جر السبت حبل الأحد احد احد واليوم يجر الثاني والثالث كما ود الأحد احد احد احد احد احد احد حيلا انتهى يا منتهى الصبر البخلي السترة قاب قوسين وادنى من الذي ما يشبها يا منتهى الصبر البخلي السترة ترخص حياتا .. وكل شئ بس سمعتا بس سمعتا بس سمعتا |
|
|
|
|
05-18-2014, 05:05 AM
|
#12 | |
|
البطاقة الشخصية
الشعر محجوب شريف ::::::::::::::: الاسم الكامل انسان الشعب الطيب والدي الشعب حبيبي وشرياني اداني بطاقة شخصية من غيرو الدنيا وقبالو قدامي جزائر وهمية لا لون لا طعم لا ريحة وايام مطفية مصابيحها زي نجمة بعيدة ومنسية المهنة : بناضل وبتعلم... تلميذ في مدرسة الشعب المدرسة.. فاتحة علي الشارع والشارع فاتح علي القلب والقلب مساكن شعبية |
|
|
|
|
05-18-2014, 05:06 AM
|
#13 | |
|
أم اليتامى
شعر: محجوب شريف بين العمل والبيت فصّد جبينها عرق.. أم اليتامى بكت لمن حسابها فرق ماهية تمشي السوق مركب مصيرها غرق حق اللبن والزيت الكسرة والكراس هم في عيونها برق الما بحس ما بهم والخان همومو سرق هذا المرتب تب ما بسدها الفرقة.. القعدة في المكتب والإمضا في الورقة العبرة في الخبرة الأيدي لو تعمل جرح الزمن ببرا اتباصرت مكنة ماكوكها يتقدّل بين خيطها والإبرة زي ما القلب ساساق الخطوة ساساقة وعيونها منتبهة تباري زقزاقها لا شك ولا شبهة والسترة أشواقها والشفع القصر والدمعة رقراقة يا حليل شريك العمر الدنيا فراقة اتيقنت أحسن من تبقى نقناقة شقشق مقص في ليل نامت خلايق الله طاير سُقد حلّق في بيتها واتدلّى تدّي الولاد بصة وتجرب القصة وتقلّب الحلة جاهز عمل بكرة أسأل تقاريرها السرية والسمعة هل ركلست يوماً حتى ولو جمعة مشكورة في المكتب مستورة في الحِلة رغم الشجن هبت لم تعرف الذلة ما فارقت سرباً تتفهم الموقف تستدرك العلة ولم تعد أماً مسكينة بتشفِّق تفرتق وترتق قُصاصة في إيدها كالوردة بتبتِّق ريانة منشرحة هدِم قدِم يصبح في لمحة كم طرحة لا بد من تكية لا بد من بكية لا بد من غمدة لا بد من سرحة أنعم بها أماً بين العمل والبيت يا مرحىَ يا مرحىَ |
|
|
|
|
05-18-2014, 05:07 AM
|
#14 | |
|
غنى ياخرطوم غنى
شدى أوتار المغنى ضوى من جبهة شهيدك أمسياتك واطمئنى نحنا منك ريح وهبت نار وشبت فى وجوه الخانو اسمك ياجميلة ونحن ياست الحبايب من ثمارك فى دروب الليل نهارك وقبل مايطول انتظارك نحن جينا وديل أنحنا القالو متنا وقالوا للناس انتهينا جينا زى ما كنا حضنك يحتوينا لما فارسك فينا هبَّ وعبَّ حجرك بالمحبة وبالأماني صحى نار الثورة تاني وجانا داخل زي شعاع الشمس من كل المداخل وهز بالمنشور وبشر ياما فرهد فى عيونك غصن أخضر وفرحة أكبر من شجونك والسلاسل يا جميلة يوم ما كان ميلاد شهيدك يلا غني ولاقي عيدك ولى ثمارك لقي ايديك جيل مكافح حلَّ قيدك فى غضبنا الحر ولافح وياما باكر وفى زنازين العساكر نبني مجدك ومهرجانك وكل قطرة دم عشانك ولى جديدك يا جميلة |
|
|
|
|
05-18-2014, 05:09 AM
|
#15 | |
|
تبتبا تبتبا تبتبا تبتب
باكر تعرف تقرا وتكتب وياما ترتب نحنا بنحلم وكم نتمنى هي تحقق كل ما تحب تبني حياتا الند بالند اي مكانة وخانة تسد هدهدا هدهد كل الورد ينوم ويفرهد زي عصفورة تطير وترك تحبى وتمسك وتاني تفك سيبا تفكفك سيبا تلكلك عايزة تنطط بكرة حترسم وياما تخطط بكرة حا يبنوا مدائن ضو ما بيعكر صفو الجو صفارة حرب تشطب من قاموس الدنيا الضرب الشك الخوف ينعموا كم بالشم والشوف واغاني الحب افتح بابك آمن تب زي ما النهر بيلقى مصب اي حمامة بتلقى الحب تلقى الورده الندى في الكم تلقى حداها جناها الام يرضع صافي حليب الحب نقدل نحنا الجد والعم تملا عيونا كهارب سد باباً جاب الهم والزم والصد ينسد نفرح لما ندمع جد مد البصر الامل يمتد العمل يشتد البنا ينتم الغنا يمتد هدهدا هدهد اكتبي اكتبي الف المد حمام وسلام وسعادة بجد اكتبي اكتبي ياء المد سرير وعصير وعبير ينشم اكتبي اكتبي واو المد حقول وعقول تقرا المجهول كتاب الغد اكتبي علم وسلم لا حد يئن لاتسمع بم لا ينزف دم لا يعجز رد لا يعجز طب لا دمعه في خد |
|
|
|
|
05-18-2014, 05:09 AM
|
#16 | |
|
مريم ومى بنياتي
وحشتنى ولعبتن بى تحياتى تصحووا امامى اشواقاّ تهز النبض وتتاقى عميقاُ من شعاب النور الاقى الذكرى بتاتى سلاماً يا حماماتى اسكنن فى مسامتى سلاماً يا غماماتى البتدني ابتساماتى مريم ومى بنياتي وحشتنى ولعبتن بى.. يسافر قلبى صوتي يرن يسابق الريح قلب (الوالد) انت صحيح تحن وتهم حذاراك من الجواك وحذراك من جرى التبريح حتهرب منه جلدك وين ويوماً ما حتسكت تم واخت رأسى وافارق دنيتى وناسى واخلى وراي كراسى وما أسود سطر بالشين وما تعود اساك العين وما تشمت عدوي فينى طريق الشعب اوسع من زحام الطين وقلب الشعب ارحب من رحاب الضو ونبض الشعب كلو حلم بداه بيتم وتطلع من شقوق الارض آلاف المدن قامات ويطلع حتى من قلب الحجر والصى شجر متشابك الهامات وجيل جاى حلو الشهد صبايا وفتية يمرحوا فى صباح الغد عيونهم برقهن لماح سؤالهم رد خفاف ولطاف وثابين أوان الجد دفاعا عن حياض السلم والافصاح سلموا لى عليهم جملة حتى اللسه قبل الخلق والتكوين صناع الحياة اليوماتى ملح الارض نبض الشعر والموسيقى والتلوين هدامين قلاع الخوف كانت هذه الدراجة يوماً ما كلاشنكوف مابين منارات السمع والشوف نقاشين فى جدار الصمت نساجين خيوط الشمس كهربجيةالظلمات واجمل ما تكون الدنيا رسامين حفاريين مجارى العصر نصرا نصر حروفاً واحلالى تشمهن ترتاح ح حرية ت تغيير ت تعليم ك كتاب م مسمار ح حرية ت تغيير ت تعليم ج جراح سكة حديد تهز وترز ب بحارة بحراُ عب وثار وطن مدرار جرت تتلاحق الانهار كما تتلاحق الاعراف كما تتمازج الالوان كما تتصافح الاديان كما تتمازج الالوان هجيناً من سلالات الفخار والعز مرور النسمة وايضاً هبة الاعصار علم فى نشرة الاخبار وهيبة على امتداد الكون علماً فى حماه الوردة حتى الزهرة والمريخ شبه حرب النجوم انزاح ايادى القهر خلف الظهر مكتوفين افاعى السحت حيث مزابل التاريخ سلموا لى عليهم جملة حتى اللسة قبل الخلق والتكوين بشوفهم كلهم أسه عصافيراً ترك جنبى نوافيراً ترش قلبى حماماتى بتشرب حسه من ايدى مريم ومى بنياتي سمعتن صوتى جيتن هى طلعتن من زوايا السجن كاللبلاب وبين السونكى والترباس وبالرقراق وحلق الباب وعبر السور زى النجمة والعصفور تجرن جدولاً رقاق من حبل العشم فتلات ومن حقل الوطن شتلات امكن الفى قلب جيتن لى من تيابها شراع ومنديلأ خيوطو شعاع وكراسا مسطر بالضحى اللماع وخط ايدا وشعورا الحي وقالت لى قالت لى وقالت لى سلاماً ياابو مريم ومى ثباتك شعلة فى ايدى بنياتك خلي راسن فوق وحاشاك الكلام النى وحاتك ما انكسرنه وراك ولابد أن يعود الحى وفجراً كالكرِب حيبين وشعب تترب حيقوم ويملا شوارع الخرطوم وتجري مدامع الحلال تجر النم تسوى القوق فوق فوق سودانا فوق سودانا فوق بدل شاهيك اشرب دم اذا قلت الكلام النى وانا الما عندى ليهن شىء لا فى البنك ولا فى الدين سوى الكلمة الما بتنداس ولا بصبح مكانا الرف ولا عصفورة جوه الكف ولا صقراً يحلق فوق وينزل كف نبض الشعب اجمل من بريق الماس واجمل من حليب الستره ما حبيت مشارب كاس و القمرية بين اغصانا اشرف من موائد ناس واقرب للوطن من ناس وخيراً جانا ما عم البلد وسواس أذن فلتقرع الاجراس مريم حضرى الكراس مريم ومى تعالن جاى نغنى لاخر المشوار نغنى لاخر الانفاس نغنى لاخر المشوار نغنى لاخر الانفاس |
|
|
|
|
05-18-2014, 05:11 AM
|
#17 | |
|
أشوفك جنبى..واتمّناك
واكذّب عينى إنى أراك أصدق كيف بتحكى الشوق وليل الغربه..لى مضناك لى أنا..اللى بحلم بيك ولى أنا..اللى بترجاك يا حلمى البعيد..وعزيز زمان يا حلمى مأ أقصاك أعِد أيامى.. وأحسب بيك ثوانى العمر ..واستناك وما فكّرت يوم أنساك ولو فكّرت كيف انساك؟ وذكراك يا أعزّ حبيب دوام رغم الزمن ذكراك انتَ الليله..جنبى قريب بأىِّ مشاعر..أتلقّاك؟ وين أعصاب بتتحمل.. وين أحرف بِقَدْر هواك؟ |
|
|
|
|
05-18-2014, 05:11 AM
|
#18 | |
|
حنبنيهو
البنحلم بيهو يوماتى وطن شامخ وطن عاتى وطن خيّر ديمقراطى وطن مالك زمام أمرو ومتوهج لهب جمرو وطن غالى نجومو تلالى فى العالى إراده سياده حريّه مكان الفرد تتقدم.. قيادتنا الجماعيّه مكان السجنِ مستشفى مكان المنفى كليّه مكان الأسري ورديّه مكان الحسره أغنيّه مكان الطلقه عصفوره تحلق حول نافوره تمازج شُفّع الروضه حنبنيهو البنحلم بيهو يوماتى وطن للسلم أجنحتو ضدّ الحرب أسلحتو عدد مافوق ما تحتو مدد للأرضو محتله سند للإيدو ملويّه حنبنيهو.. البنحلم بيهو يوماتى وطن حدّادى مدّادى ما بنبنيهو فرّادى ولا بالضجه فى الرادى ولا الخطب الحماسيّه وطن بالفيهو نتساوى نحلم نقرا نتداوى مساكن كهربا ومويه تحتنا الظلمه تتهاوى نختّ الفجرِ طاقيّه وتطلع شمس مقهوره بخط الشعب ممهوره تخلي الدنيا مبهوره إراده وحده شعبيّه |
|
|
|
|
05-18-2014, 05:12 AM
|
#19 | |
|
يا شعبنا
يا والداً أحبنا يا من وهبت قلبنا ثباتك الأصيلا إليك هذه الرسالة القصيرة الطويلة إليك من زنزانة تخاصم الفصولا إليك رغم أنف كل بندقية وطعنة شقية وحقد بريرية إليك الحب والسلام والتحية إليك يا حبيبنا وبعد أدبتنا أحسنت يا أبي فلم نتابع الهوى لكنما قابيل ما أرعوى كالذئب في حظيرة عوى وكم غوى وتابع الهوى وتاه في الأنا أراد للدماء أن تسيلا ونحن مثلما عرفت يا أبي بفضلك الكريم من أشرس الرجال حينما نقاوم نموت لا نساوم ندوس كل ظالم ونفتح الصدور للمدافع الثقيلة ومن هنا أبناءك الرفاق أقسموا فصيلة فصيلة أن يثأروا لحرمة الأمومة الجليلة لطفلة جميلة تنفست قليلا تمددت قتيله رصاصة في قلبها وطعنة في جنبها ولم تعش طويلا لكنما مليون مثلها سينجبوا النضال يا أبي حقيقة وأجمل الأطفال قادمون ساعة فساعة عيونهم أشد من عيوننا بريقاً صدورهم بما وهبت أكثر اتساعا سيوفهم تزيد من سيوفك الطوال طولا |
|
|
|
|
05-18-2014, 05:13 AM
|
#20 | |
|
احبك احبك
الشاعر : محجوب شريف احبك احبك أحلى فصول العمر حنانك حتة لقيتَ مكانك اجمل أجمل سكة مشيتَ عيونك أحبك أحبك أنا مجنونك ساكن فيني هواك وبريدك جوا القلب النبض يصونك معاك معاني حياتي تبدا وافتح باباً ياما انسدَّ أشوف العالم ربوة جميلة عليها نسيم الصبح مخدّة وبيني وبين النهر عشانك عشرة بتبدا وبين عينية وخد الوردة تبقى مودة أصالح روحي تبرا جروحي ابشر باسمك اهلل أغني أقيف اتحدى أديتيني مشاعر حية عوضتيني الزمن الماضي زمن الجرح الأكبر مني وقاسي علية وبيك صادفني ولقى عنواني رزاز الفرح الخلَّى الجية أريت صادفني حنانك بدري لو لاقيتك بدري شوية |
|
|
|
|
05-18-2014, 05:15 AM
|
#21 | |
|
محبة البينا ولا صداقة؟
محجوب شريف محبّه البينا.. ولاّ صداقه؟ ولاّ بداية فرقه طويله؟ أهو بنتقابل نمشى ونضحك وياما نعدّى أماسى جميله وكم بتساءل.. وكم بتفاءل ومرّه أكون غلبان الحيله واسارع أسارع أطوى الشارع وبرضو خطايا بشوفا تقيله واساهر.. أطرّز باسمك غنيه وأنوم والشمسِ مسح منديلا جبين الدنيا ولفّ جديله وأقول أكتبلك.. أنا من قبلك يمكن تبقى الخطوة عديله وأقول أصبّر يمكن نكبر أكبر من تغلبنا وسيله وتانى الشوق يشعلنى فتيلة وافتش عنك.. واهرب منك وسيرتك دايماً بمشى واجيلا محبة البينا ولاّ صداقه ولاّ بداية فرقة طويله |
|
|
|
|
05-18-2014, 05:16 AM
|
#22 | |
|
واحلالي القبلي شال شبال لمع برق المهيرة
قيرة قيرة يا مطيره يا رزاز الدم حبابك لما يبقى الجرح عرضة ولما نمشي الحزن سيرة من دمانا الأرض شربت موية عزبة كل ذرة رملة شربت حبة حبة موية أحمر لونها قاني فتقت ورد الأغاني تهدي لى اسمك رمزاً للوطن كنز المحبة قيرة قيرة يا مطيرة يا شهيد الشعب أهلاً مش بتطلع كل يوم الشمس أجمل وكل يوم النخل أطول زيدو قامة وياما شفتك ياما ياما لما شفت البدر طالع فى سما الوطن ابتسامة إنتّ فى النهر البسافر جاري طول العمر صاحي طبعو منك يا الملامحك من ضفافي واللي شافك مرة شافو واسمك الختيتو فرهد عشب أخضر فى الجناين فى الشوارع نيمة نيمة فى مصابيح المدينة فى فوانيس الضواحي تملا نادي الحلة سيرتك اسمك الخلانا نقدر فى ظلام الليل نعاين والبتسأل عنو ده الخليتو شافع لسه دابو يا ما حيعجبك ، شنابو صوتو رقان فيهو بحة ود فلان اصرار وصحة عندو قصة حب جميلة جرب آلام الحراسة وحرض أولاد الدراسة وهدّو حيل العسكرية البنية أم طرحة كبرت يا سلام الفنجرية ليها راية وبى كلامها وبى اهتماماتها الجديدة دقت أجراس القصيدة وشدت أوتار الصلابة الكتوف اتلاحقت فى السكة يابا واحلالي القبلي شال شبال لمع برق المهيرة قيرة قيرة يا مطيرة يارزاز الدم حبابك لما يبقى الجرح عرضة ولما نمشي الحزن سيرة |
|
|
|
|
05-18-2014, 05:16 AM
|
#23 | |
|
مساجينك ... مساجينك ... مساجينك
تغرد في زنازينك عصافيراً مجرّحه بى سكاكينك نغنى.. ونحن فى أسرك وترجف.. وانت فى قصرك !سماواتك دخاخينك مساجينك ... مساجينك ... مساجينك برغمك نحن مازلنا بنكبر بى زلازلنا بنعشق فى سلاسلنا وبنسخر.. !من زنازينك مساجينك ... مساجينك ... مساجينك حكايات الهوى الأول.. بنحكيها بدايات الغُنا الطول.. نغنيها حقيقه وليس تتأول !حتخجل من عناوينك مساجينك ... مساجينك ... مساجينك للسودان عواطفنا وبالسودان مواقفنا ولّما تهب عواصفنا ما حيله قوانينك؟ مساجينك ... مساجينك ... مساجينك |
|
|
|
|
05-18-2014, 05:17 AM
|
#24 | |
|
حقُو ناخد لينا وقفة
في التكافل والتراحم في التآزر والتعاضُد وكل شي يِقربنا زُلفي ********* حقو ناخد لينا وقفة في القوانين واللوايح في التشرد والرِّعاية ونِعتنِي بِي كُلِّ نُطفة حقو ناخد ليناوقفة للافق ننظر نخطٍط ومانسيب حاضرنا تايه وما يجينا الجاي صدفة ********* تِسعة والوالد تَوفي والرِّزق كان بيتو يِجفي تسعة يوم ماضاقو إلفة لا الطعام شبَّع وكفي الوالدة واصلت المسيرة صابرة مؤمنة ياحليلا في ضرا الكرتون مقيلا لا صديق بي لُُقمة يِلفي ولا رفيق لي عطشة يَطفي ********* تسعة والوالد توفي ووالدة بين كانون ومصفي بس ياريت الشاي يصفي والزباين تلقي وصفة شاي مظبوط حالا يشفي والقروش تُحسب كتيرة وللعيال تنفكا حيرة وللمؤجِر والمديرة والقسط تدفع أميرة والدكيكين يلقي خيرا وتلغي صفحة وتبدا غيرا والديون قاسية وعسيرة ********* الوالدة واصلت المسيرة صابرة مؤمنة ياحليلا للجمرة والكانون زميلة الحاجة للاولاد كفيلة ماهرة سِت شاي وقديرة والسُلوك راقي وأصيلا ما بتفكر في جريرة وما بتهين شرف القبيلة ********* (وهل تذكرت القبيلة؟ تَحصِّن الأولاد تَعيلا) لا صديق بي لقمة يَلفي لا رفيق لي عَطشة يطفي تسعة والوالد مُفارِق والوالدة للاسواق تساسق ولعنة الاسواق تلاحق والرزق ممحوق وماحق وللضرورات ماهو لاحق ********* واليتيمة قوامها شاهق يومي للوالدة ابترافق نظرة واغراءات تلاحق ولسه بتقاوم أميرة عام وتانى ويوم وليلة وللزباين ألف حيلة ومرت السنوات تقيلة والدة مشغولة وكسيرة والقبيلة ! ما بتجيب خبر القبيلة ! ولينا مشروعات عليلة وللزباين ألف حيلة طرفة واغراآت تقيلة والنفيس إنهدَّ حَيلا ********* خارت وانهارت أميرة وقررت فعل الرزيلة واختلت طايعة وكسيرة ********* النفيس عادت جميلة؟؟!! الا لسة الام هزيلة ********* دُنيا لما تشيل رفيقك البآزرك والبِطيقك الحزُن بزرع دريبك والليالي تنوح تِشيبك ********* الصبر بِشفيك يطيبك بيهو جلِد عنقريبك وخلي عطر التقوي طيبك |
|
|
|
|
05-18-2014, 05:18 AM
|
#25 | |
|
(1)
غطى الجبال الليل لكن هدير السيل لكن صهيل الخيل نار الغضب والجوع تحت الجبل مسموع يضووا عز الليل ( 2 ) والموج شديد الظلام غطى الشهيد الهمام لكن دماهو بتقيد لكن طريقو المجيد ابداً شديد الزحام رايات ترفرف غمام ينزل رزاز النشيد والنجمة تلمع هناك رغم المكان البعيد ( 3 ) والنهر عبر السنين يزحف بعنف وبلين في الليل بيلمع يبين فارس بسيفو السنين يحمينا حضنو الامين نطلع بكتفوا الشمال ننزل بكتفوا اليمين لكنو مين يقدر يقول أنا سيدو مين ( 4 ) في منحنى الدرب الطويل الحبة تفلت من جراب عابر سبيل مسكين هزيل عطشان يموت في السكة ما يتم الرحيل تكبر تشيل تلبس جميل تصبح مقيل عابر سبيل ( 5 ) عصفورة من أخر بلاد في رحلة لي أخر بلاد تعرف مواعيد الحصاد وكل دورات الفصول وأنضر ايام الحقول وتعادي أسراب الجراد وتنادي لوكركب زناد صياد على العش والولاد ( 6 ) أنسانة ابسط ما يقال لو صاح اعز من النساوين الرجال أنثى ولا دستة رجال تمشي وما بتطأطي ما بين بير وشاطي تطلع عالي واطي نهارها مع السواقي وليلها مع الطواقي وعمرها للجهال ( 7 ) والنملة في الصف العجيب وعلى انفراد نفس النشاط والأنضباط نفس الحماس تسعى وتجيب ولا من رقيب ولا حتي في الأمر التباس ولا في اختلاس أحسن كتير من بعض ناس ولا في اختلاس وهيلا .. وهيلا هيلا .. هيلا تلقى تفسها في سفينة وهيلا .. وهيلا هيلا .. هيلا تاني في شارع مدينة والحكمة بنفس الحماس تلقاها في الصف العجيب كم مرة تهرب من مداس من طفل عابث ومن لهيب بالحبة تمسك في عناد الحبة ملك الاتحاد ( 8 ) والحكمة في مر السحاب والعلاقة البينو ما بين الجذور واللسة في الباطن بذور وغنا الطيور والمعركة الدارت تصلصل بسيوفها وبالحراب والعلاقة البينو بين الغابة والهبابة والربابة والمنديل ومجرى النيل وضلفة باب وبكية طفلة في الكتّاب تفتش عن قلم رصاص وقع في الباص وحس رصاص هدر في ناحية فيها العيش حكر للجيش بتاكل من زمن مافيش وتشرب من زمن مافيش وكان اضراب ( 9 ) والشمس تطلع يبين ادق ما في الجبال تبدأ الموانئ العظيمة الهدور وتصحى المصانه بيهمة وتدور ووتملأ الشوارع وكل الجسور وتشفى الصدور جموع الشغيله خطاها ثقيلة تخلى القصور تحس بالفتور وحمى الزوال ( 10 ) تصحى المدينة تقوم تستحم وتولع سيجارة تدخن تسخن بشاى الصباح وحق الملاح وسيد الجزارة وتقعد تدندن تخيط زرارة ترتق هدوما وتفتق هموما وتسب الحكومة وتفن الريال وتنفض سريعاً غبار النعال وتنزل تواجه مشاكل عويصه تشرّط قميصا وتدق العيال ليه العيال يعيش النضال يخلى الحكومة تدخن تسخن بنار الكفاح وتقعد تطنطن لحدي الصباح بتطلع بتطلع حزينة وكتومة تشرّط هدوما وتحش المصحة يعيش الأصح يعيش النضال وضروري النضال |
|
|
|
|
05-18-2014, 05:19 AM
|
#26 | |
|
(مرت الأشجار)
محجوب شريف مرت الأشجار كالخيال أحلام ناس لطاف وظراف مابين غزال وزراف مابين ظلال وغمام مرت الأشجار طابق طبق طابقين في ضلهن كرتون حر والسقط أولاد تحت المطر ياجون لاعندكم عداد ولابوهيتك كم لون ما احتجت لي حداد يوما ولا نجار وكنت ألطف جار ومرت الاشجار الباقي تحت العين حيث الرماد أحجار من يوما داك فاقداك كل الدروب فوق راي ياخيت وهيت ياكيت حس المقص بكاي سكسك سنون براق نار الفراق جواي أمونه ست الشاي صمت الكبابي عويل برادا ساكت ساي ياحليل تريزا قريب كانونا كان بي جاي ياحليل جناها جناي هم يسألون وعيون تحزن تقول باي باي يامنتهي الأشواق اتمحن الكنتين والنيمه ذات الساق القدره كم تشتاق كم كمشه مويه فول سمسم عمل زقزاق وين الملامح ديك يازحمه البصات واللفه والدقداق ليل القهاوي حزين عدد الكراسي فراق جفت عروق السوق ريق الطريق العام واتحتت الأوراق --------- وين ياسواد العين مشهد علي صعبان شبان وهم حبان تحت النجوم الفوق في عتمة الميدان الشوق بلا بيبان من وين ذهاب واياب وكلاهما تعبان ابنوسة اللاوو ياحليلا غصن البان جمر الحصي الوقاد علا الكتف أركان ميري الفراق بي طال وسال سيل الدمع هطال لكنو مهما كان لو بالوسم سكان لو بالرسم جيران متين بقيت يانيل عددا من الخيران نتدفي بس أو قول نعزم بعض يوم داك بنولع النيران يناير 2011 |
|
|
|
|
05-18-2014, 05:20 AM
|
#27 | |
|
الكبرت علي والفاض عن الحاجة
المنسي في الدولاب والجوه تلاجة إلفي الزقاق مركون فردا وازواجا الكرسي في الحمام البمبر المكسور أو باقي دراجة والبي الهموم مسكون والأرض وإزعاجا ما كان غدا حايكونللصابر الممكون يسدو كم فرقة ويسدو كم حاجة الناس اذا بالناس ما تقيفوا فراجة خوفي المدن تنداس لو دونما احساس اتعلت ابراجا كم من ولد لا أم لا بيت ولا حاجة ياحليلو مابحلم مدرستوا مافتحت قداموا ادراجا لابحس بالعيد لو مر او ما جاء بتوسد الطرقات والحمي سهراجه لمن يراهو الجوع واللقمة محجاجة هوج الرياح في الليل ساكيهو كرباجا الجمرة تحت العين مابكرة نتفأجا الغبن ذو الحدين والفتنة مذواجة الواحد يبقي اتنين والستة افواجا طقس التسامح ذين والشمس وهاجه كل العشم ياريت تتفتح الاديان بيناتنا نفاجا نتدفئ بالحسنى وبالسلم نتناجى مايبقي زول محتاج ماتبقي محتاجة. |
|
|
|
|
05-18-2014, 05:21 AM
|
#28 | |
|
إنا الفارقت أحبابي وانا العذبت اشواقي |
|
|
|
|
05-18-2014, 05:22 AM
|
#29 | |
|
أحبك... |
|
|
|
|
05-18-2014, 05:23 AM
|
#30 | |
|
مجنون مجنون مجنون مجنون الحزن المسجون بارود الحزن المسحون جواي انا شافع محزون عن امو بفتش فتيش فتش فتيش هبش هبيش دقش دقيش يصرخ ياناس مريم محمود راحت شقيش في زنك اللحمة وفي الزحمة مريم محمود راحت شقيش في منحنيات الاسواق مريم محمود راحت شقيش ولا آه يا مريم محمود آه يامريم محمود ياذات الضل الممدود ياذات القلب الساساق حتلت جواي الاشواك حتلت جواك الاشواك وكنت الولد المحبوب لا هجراً ليك ولا عاق حبيتك ذي ما حبيت الوطن الوالد البيت منك خطفوك تماسيح كم مرة وخلو التباريح كم جيتك راجع مسحور بذات الوجه المفرور البيني وبينك عصفور علي قلبومنشن صياد ظلموك يامريم ظلموك حرموك يامريم حرموك خلوك الدمعة تفصد خدك في الاعياد مشوك في الشوك علي حد السيف اتعلمتي الشك في الغربا وكنتي ملاذ الشتا والصيف سرقو امانك وإطمئنانك قلبك كل ما باب الشارع دق يدق إيدك ترجف في الصقاطة وشك شاحب ربنا يستر يمكن هم تفرحي فرحاً قدر الدنيا إذا ما كان الطارق صاحب حارق نارك بالهبابة لهيبا يبق |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| تشييع الراحل محجوب شريف | ابوعمر | «۩۞۩- أحزان الحصاحيصا -۩۞۩» | 5 | 04-04-2014 07:35 PM |
| ورحل محجوب شريف | لؤي الصادق | «۩۞۩- أحزان الحصاحيصا -۩۞۩» | 6 | 04-04-2014 05:30 AM |
| الشاعر محجوب شريف - الكوفة حصري | بكري حاج احمد | «۩۞۩-منتدى الادب والثقافة-۩۞۩» | 0 | 09-07-2012 11:18 PM |
| مريم ومي محجوب شريف | منتصر تاج الدين | ♬ ♪♩♭قسم اغاني الحقيبة وكبار الفنانين ♬ ♪♩♭ | 1 | 04-22-2011 05:45 AM |
| السنبلايه...... رائعة محجوب شريف | عباس السر سلمان | «۩۞۩-منتدى الادب والثقافة-۩۞۩» | 2 | 06-30-2009 08:58 PM |
 |
 |
 |
|
 |
العرض العادي
