طنش عشان تعيش

التطــــنيش عشـــان تعيــــش

الحياة بقت صعبة خلاص ولا تحتمل.. اليوم كلو جرى وكمان فى الفاضى.. حاجات كتيرة كل يوم تعكنن عليك وتكرهك العيشة.. لازم تعمل ليك (إستراتيجية) عشان شوية الحياة تكون مقبولة وأسهل حبتين.. دى غايتو عشرة نصائح تطنيش.. لو عاوز حياتك تتحسن شوية أسمع كلامى وأعمل بيهم!!

الطناش الاول

طنش إنك كل سنة تسمع حكاية (الخريف فاجأنا) دى .. وحكاية قمنا بتكوين لجنة لدرء (الكوارث) والكلام المقدد القاعد تسمع فيهو ليك (عشرين خريف) ده لأنو لو عاوز تتكلم فى الموضوع ده وتقول للمسئولين إنو الحكاية دى كترتوها ومسختوها وإنو المسألة بقت ما مبلوعة ما ح يسمعو ليك وح يسووا فى القاعدين يسووا فيهو ده وما ح يشتغلو بيك شغلة وح تقوم (تفقع مرارتك) ساكت فأحسن ما تتعب نفسك لأنو السنة الجاية ح يحصل نفس الشىء والخريف ح يفاجىء المسئولين والمطرة ح توقع البيوت والسيل ح يكتل الناس .. صدقنى دى حكاية ما عندها نهاية عشان كده طنش الموضوع ده وما تشغل بيهو دماغك واضرب منو طناش عشان بالك يرتاح!!

الطناش التاني

طنش وما تدفع أى جباية يعنى ح يعملو ليك شنو؟ إعدام مثلاً؟ ح يجرجروك كم (جرجيرة) كده ويحبسوك شويتين وبعدين ح يفكوك يعنى ح يودوك السجن عشان يشربوك ويأكلوك؟ طبعا لا!! هم

المسئولين ديل قاعدين يأكلوا ليهم زول!! ما قاعدين ياكلو براهم وكده ..طنش يا زول وأسمع كلامى وما تدفع أى جباية!!

الطناش التالت

طنش أى زول عاوز منك قروش.. مش إنت ذاتك ما عندك ولسة قاعد تتدين؟ طيب ح تجيب ليهم قروش من وين يعنى؟ هل ح تهبط عليك ثروة من السماء عشان تسدد ليهم؟ طبعا لا.. عشان كده طنش الناس الإنت مستلف منهم ديل كلهم وشيلهم من راسك كلو كلو.. وبعدين لو إفترضنا فى واحد فيهم زهج منك وعاوز يمشى المحكمة عشان يشتكيك الحكومة ح تدفعوا رسوم ودمغات وشنو ما بعرف داك أكتر من القروش العاوزا منك ذاتا.. يعنى مش ح يمشى.. عشان كده (طنش) واسمع كلامى!!

الطناش الرابع

طنش أى زول يقول ليك تعال أطلع معانا مظاهرة (القرار) ده وإلا ضد الشنو ما بعرف داك!! هى المظاهرات براها بتعمل حاجه ؟ ما العرب ديل ليهم خمسين سنه قاعدين يطلعو مظاهرات فى كافه العواصم (العربية) هل حررو فلسطين؟ يا عم أسمع كلامى وطنش اى زول يقول ليك أطلع مظاهرة معانا عشان الحاجة دى زادوها؟ أو الحاجة دى بنوها؟ واوعك زول يقول ليك دى (مظاهرة سلمية) ولا (مظاهرة ودية) المظاهرة ياها عند الحكومة (مظاهرة) لا بتعرف ليك دى سلمية ولا دى ( ودية) كان إنت

قنعان من روحك (طنش) كلامى ده وأمشى أطلع!!

الطناش الخامس

طنش الجرايد و الأخبار لأنها كلها كلام يوجع الدماغ!! بوش ناوي يضرب مين وبن لادن ظهر ما عارف وين والهجين والعجين ولاهاى وناس هناى والفصيل ده (وقع) والفصيل داك (ما عايز يوقع) وده سافر وده رجع وداك إستقبل وداك ما بعرفو شنو داك .. والعجب الجرائد الإجتماعية.. الفنانه الفلانية أدوها (لكزس) والفنان العلانى ضبطوهو (مخمور) وقصص وحكاوى إنت فى غنى عنها.. عشان كده (طنش) حكاية الجرائد عشان بالك يهدأ وتروق وكده!!

الطناش السادس

طنش أى حوار وأى مناقشة وأى كلام عن الثروة والفلوس عشان ده حوار فاشل وإنت ما قدرو ورايح تقعد تفكر فيهو وح تتعب روحك ساااكت .. ونصيحة منى ليك أوعك تعاين لى غيرك عشان ترضى بالقسمو ليك ربنا وما توجع دماغك بفلان جاب شنو وفلان إشترى شنو وعلان بنا وين.. طنش يا عم وما تشتغل بالحاجات دى عشان والله تباريها نلاقيك طالع فى أقرب صينية!!

الطناش السابع

طنش اي حاجة ح تنكد عليك عيشتك يعني زي مشاهدة التلفزيون والمذيع الكل كلمة والتانية يقعد يقهى ليك فى (سقف الأستديو) ويكتل ليك فى عينو و(يغرودهم) ليك وإلا مقدم البرنامج القاعد يسأل الضيف ويجاوب قبالو.. ولازم تطنش كمان مشاهدة الإعلانات او الإستماع إليها.. طنش عشان ما يجيك ضغط أو ينفجر فيك عرق بلا يا يمه حضرى ليا الغدا بلا يا يمه جهزى ليا الفطور طنش السخافات دى عشان تعيش!

الطناش التامن

لو كنت ما متزوج طنش أسطوانة أهلك بتاعت (ما تعرس إنت منتظر شنو) ؟ أو (فكر فى موضوع العرس وخليهو فى بالك) !! لأنو هم ما عارفين الفى بالك!! ولو كانو عرفو الفى بالك ما كانو جابو ليك السيرة دى من أساسو .. طنش يا عم هو ناس مثنى وثلاث ورباع ديل خلو ليكم حاجة تعرسوها؟ ما عزلوا (النوار)

كلو !! ولا خلو ليكم حاجة تعرسو بيها ما شالو (الكنجالات) كلها!!

الطناش التاسع

لو كنت متزوج طنش النقة بتاعت (المرا) وما تشتغل بيها شغلة عشان ثبت علميا إنو (النقة) بتعمل إلتهاب فى صمام (العصب القولونى المترالى) وأنها تورث الفقر وإنت ما ناقص (فقر) وكفاية الفقر العليك كمان تقوم تجيب ليك معاهو (نقة) !! أسمع الكلام وطنش (نقة المرا) وأضرب (طناش) عشان ما تمشى (الإنعاش)!!

الطناش العاشر

طنش الطناشات الفوق دى كلها وما تشتغل بيها شغلة لأنى إتلفت كده وكده وحكيت رأسى عشان ألاقى ليا موضوع أكتب فيهو قمت ما لقيت والوكت زنقنى وناس الجريدة كل دقيقة يتصلو فينى ويسألونى: يا أستاذ ما رسلت المادة مالك؟ فقمت (نجرت) موضوع

(الطناش) ده .. فطنش الطناشات الفوق دى كلها وما تشتغل بيها.. احسن ليك!!
منقوووووووووووووووووووووووووووووووووول الاستاذ الفاتح يوسف جبرا

حلو جدا" يا طارق يا رائع و شكر ليك 000
حقيقي إنو الواحد من المفترض يطنش حاجات كتيرة عشان ما تحصل ليهو إي مشكلة في 0000 و لا أقول ليك 00 طنش كلامي دا 0000000

اخونا طارق يديك ,,,,, الف عافية ,,, اختيارك جميل , والاجمل طناش نمرة 9 ولو ما اتورطنا الاجمل هيثم مصطفي.
لك الود.

قيس جمال الدين الرائع والمتابع الكيك الرهيب
شكرا على المرور الانيق وقررت اطنش كل التطنيشات دى عشان نشوف اخراتا شنو