وقفة الونسة

للنساء عادة خاصة لا أعتقد أن الرجال يتشاركوها معهن، ألا وهي ادمان (وقفة الونسة) بجانب باب الشارع، فزياراتهن الإجتماعية إن طالت أو قصرت، متعتها لا تكتمل إلا بالمواضيع التي تتفتح في اللحظات الأخيرة وقبل (ودعناكم الله)، ولذلك حتى وإن كانت مدة الزيارة قصيرة ولنقل مثلا نصف ساعة فعند إضافة وقفة الباب إليها والتي قد تمتد لـ (ساعة إلا ربع) ومستدركات الأمور بعد الـ(مع السلامة) على شاكلة:
هي يا الغبا .. ما نسيت أقول ليك ..!!
أو
هييي يا دي .. نسيت ليك البلاء.. ما شفتي الحصل يوم داك...!!
فتكون بذلك أقصر زيارة إجتماعية ساعتين إلا شوية مع شرحو!!
كان الباشمهندس (رضوان) رجلاً عمليًا وعصرياً بالمعنى الإيجابي للكلمة، فهو قليل الكلام سريع الحركة ملتزم في عباداته، إذا وعد أوفى وإذا حدث صدق، يحترم قيمة الوقت لدرجة التقديس، كانت مواعيد حضوره للعمل تضبط عليها ساعات زملائه فسماه الجميع (الخواجة) لشدة انضباطه وإلتزامه ولكن لأن الحياة لا تعطي كل شئ، فقد كانت للباشمهندس نقطة (عدم إنتظام ) في حياته هي زوجته، فقد كانت زوجته (بدرية) ربة منزل ودودة، ونّاسة، محبة للشمارات، طيبة القلب حتى أن أمها تدعوها بـ (أم قلباً ميت)، مواصلة، ومجاملة بصورة مخلة بالأمن الأسري.
كانت لها أسرة كبيرة ممتدة تتواصل معهم، فتتمدد إجتماعياتها حتى تكاد تجور على إلتزاماتها تجاه زوجها وأبنائها الصغار، وكان ذلك التواصل مصدرا للخلاف الدائم بين (رضوان) و(بدرية)، فقد ظل يطلب منها أن تجعل لأسرتها الصغيرة الأولوية في إهتماماتها وتصر هي على القول:
البني آدم ما بعيش براهو.. وياهو الناس بالناس .. وأنا ما بقاطع ليك أهلي عشانك.
وفي سبيل تجاوز هذا الخلاف اتفق (رضوان) مع (بدرية) على أن تخصص يوم الجمعة لمواصلة أهلها، فيقوم بإيصالها لمنزل أسرتها ويعود ليأخذها في الليل بعد أن تنتهي من كل مجاملاتها ولكن سرعان ما جارت المشاوير الطارئة على باقي أيام الأسبوع، وبعد المشاورات والمفاوضات استأجر لها سائقا وترك لها العربة في أوقات الصباح ولكن ذلك الإتفاق لحق بسابقه والسبب بسيط حسب رأيها فمناسبات عقد القران وحفلات الأعراس وولائم العشاء لا تكون في الصباح.
استسلم (رضوان) لقدره وعلّم نفسه الصبر والتعايش مع إلتزاماتها واعتبرها شرا لابد منه، ولكنه كان كثيرا ما يثور عليها عندما يأتي لاصطحابها من مشاويرها المسائية (فتلطعه) أمام الباب طوال الساعة الراتب لونسة باب الشارع فكان يقول لها:
أنا نفسي بس أفهم.. أنتو الونسة دي ما بتكملوها جوه وتجوا مارقين.. ولا بتحلا ليكم جنب الباب!!
فتضحك هي بقلب صافي في حبور دون أن تهتم لغضبه وتعده بعدم معاودة ذلك، ولكنها تنسى وعودها في أقرب زيارة، إلى أن وصل به الغضب يوما مرحلة الحلف فقال:
تاني علي بي الطلاق يا بدرية أجي أقيف ليك وأضرب البوري تلاتة مرات.. إن ما مرقتي طوالي .. إلا أفوت أخليك تنومي قبلك.
أفلح التهديد الأخير في جعل (بدرية) تلتزم، فما إن تسمع صوت البوري حتى تنتفض جارية بسرعة إلى الباب تاركة الجميع خلفها في حيرة يتساءلون عن الجدّ عليها.
وفي ذات أمسية حضر مع أطفالهما لاصطحابها من (بيت بكاء) .. وقف وأطلق البوي المتفق عليه، وعندما سمعته في الداخل هبت واقفة لتخرج ولكنها صادفت حضور إبنة المرحوم القادمة من السفر فاضطرت للإنتظار وتعزيتها، وفي الخارج انتظر (رضوان) بضع دقائق أخرى وعندما لم تظهر أمام الباب حسب الاتفاق، انطلق بالعربة كالسهم وتركها خلفه.
عندما خرجت (بدرية) وجدته قد نفذ وعيده، فعادت للداخل لتمضي ليلتها في (بيت البكاء) وهي تدّعي عدم الإهتمام وتجتهد في مداراة الحزن وفي قلبها شيء من حتى، أما (رضوان) فقد عاد للمنزل ليقضي ليلته في محاولة (تحنيس الشفع) الذين لم يفهموا سبب قسوته على أمهم وتركها خلفهم فقال له صغيره الحتالة باكيا:
انت كان استنيت سوييية يا بابا مس كان جات ؟!!
سهر الليل يهدهد الصغار للنوم ولسان حاله يغني مع عثمان حسين:
وريني ايه ضرّاك .. لو كان صبرتا شوية؟!!

هههههههههههههههههههههههههههه
دة مثال للقرارات الما مدروسة يا بكرى صاحبنا
شالتو الهاشمية ودفع التمن سهر شديد ,,,, لكن
والله حكاية ونسة خشم الباب دى مشكلة الزيارة
والونسة جوة البيت ممكن تكون خمسة دقايق
بس لانهم مستعجلين ولكن وقفة الباب ممكن تكون
ساعتين ومن المتناقضات عندنا فى السودان
تلقى الاستوب فاضل ليهو ثانيتين ويقفل ولكن
كتيرين بجرو بتهور بشكل خطير عشان يمرو قبل يقفل
فى حين انو ممكن ينتظر دقيقة او دقيقتين بس
على ما بال ما يولع اخضر تانى ,,,, ياهو دة
السودان

ده شنو ياا بكري داير تجيب لينا الهوا مالك

	يا بكري يا خوي نحن في السودان طورنا اساليبنا شويه ( ما عارف انتو في لندن بتسووا شنو ؟ ) تدفع 5ج الركشه تعتزر وتقول ليها والله يا حبيبتي لو ما الاجتماع ده مهم كان وديتك بالعربيه . ومرات توديها بالعربيه وتدفع 2 ج حق الركشه والعزر:- طبعاً يا حبيبتي لو جيت بقلق بيك اكيد لكن تعالي براحتك بالركشه ولا اجيك ... ؟ الجواب اكيد ح يكون خلاص يا حبيبي جيب الجنيهين وانت راجع ما تنسى تجيب باسطه للعشاء .

المشاركة الأصلية كتبت بواسطة الطيب عبدو

هههههههههههه
والله يا الطيب الطيب...... ده احسن حل لانو الظاهر مافي حل
نحن هنا من الواحده تصل من السودان الراجل يشوف ليها عربيه نص عمر كده ......
(عشان ما تمشي بعيد )
وكان ما بتعرف يعلمها السواقه ويقول ليها اها مشاوريك براااااك