تُكل السرة !!

ودعوض
حبابك فى تُكلك العامر والمكتنز بما لذ وطاب من الموائد
وشمارك المره دى حار وذى مابقولو اصحابنا العساكر
(جيبو حى ) اها انت الليله فى التكل جبتو حى عدييييييييييييل كدى ..
والزار وما ادراك ما الزار والطقوس العجيبه البتمحن المابتمحن
وتفشيه وغيره من الظواهر السالبه لحمنا وعضمنا ..
وراى علماء الدين والنفس والاجتماع فيهو وهلم جرا
من المواويل والحكايات الكثيره عنه من زمااااااااااان
ولحدى هسى مع مراعاة فروق التطورات الحاصله الزمن ده
تسلم اخوى وانشاء الله تُكلك عاااااااااامر بى قدره
واحد احد فرد صمد ...

صديقي
طفشان


شاكرا ً لك الاطراء الطويل الذي اجد له طعم اخر منك .. فانا لا استحقة بحق !!
واخر شمار ماهو الا تصور من نسج خيالي حول ما يسمي الزار بحقبة قديمة نوعاً ما (اصلو انا دقة مصدية )

مع مراعاة فرق التطور ما بيننا .. فانت من زمن المسكيت وانا من زمن والتُكل


ولك عميق ودي
واحـــــــــترامي

هههههههههه

مش يا سمير ( يابشير )

دقولك دقولك

يا الحكمت قولك
ياسمير
ضبحولك ياسمير
شن قولك
عيون بتريدك براك
مسحورة بيك والهوا معاك
والله براهو الابتلاك
في هناك وفي شقاك
يا اسياد دستوررررر
امنه جات تزور
وطلقنا ليك بخور
طق طق طق طق
(صفقة)
ورونا ليه منو ورونا ليهو منو ؟

جاتني ريحة البخور

وانا طفلة كان الوالد والوالده يمنعونا من الذهاب الي بيوت الزار ويقول

لينا الناس ما بتكون واعيه واحيانآ بكون معاهم سكاكين وما معروف كيف بيتصروفو

و كنا بنخاف لكن نفسنا نمشي

وفعلآ مره مشيت ولما جيت البيت اخدت جلده جامده ومنها تبت

ولو ما كده كنت اكون لي هسه من زار لي زار حائمه ههههههه

سلامات
حــبوبة



ياسمير .. ياسمير .. ههههههه لزوم الحبكة .. والحُوار اسمو كدا !!

طيب لما جاتك ريحة البخور ما عطستي ؟ اصلو بالزار بكون كابس لحدي السقف !!
ودا اعتراف خطير منك .. يمكن وانتي طفله ادوك المشيخة من الشيخة عوضية وانتي ناسية كدي اتذكري كويس



ولكِ ودي
واحترامي

المشاركة الأصلية كتبت بواسطة محمد عوض السيد

صديقي
طفشان


شاكرا ً لك الاطراء الطويل الذي اجد له طعم اخر منك .. فانا لا استحقة بحق !!
واخر شمار ماهو الا تصور من نسج خيالي حول ما يسمي الزار بحقبة قديمة نوعاً ما (اصلو انا دقة مصدية )

مع مراعاة فرق التطور ما بيننا .. فانت من زمن المسكيت وانا من زمن والتُكل


ولك عميق ودي
واحـــــــــترامي

صديقى
الله واحد مااديتك غير حقك
ومافيهو هواده كمان ...
وزمن المسكيت ده انا معترف بيهو
(وكلنا فى الهوا سوا) الله يدينا حسن الخاتمه
ويعرس لينا ونشوف جديد وليداتنا
لانو انا عارف انو مرض ابوى
ماسكك من اضنيك هههههههههه

ياصديقي
طفـــشان



مالا تدركه بقولي انك من زمن المسكيت هو ان هذه النبته صاحبة الرقم القياسي في ضرب جذورها في باطن الارض ولذا استجلبت الي السودان لمحاربه التصحر واصبحت نغمة لا نعمة علي بلادي
ومالك ومال اضني !! بسمعن كويس والحمد لله



ولك ودي
واشواقي

هنا توقفت


فكيف للمشرف معاذ فقيري (منتدي رمال كرمة-قسكوتيق) والمراقب محمد حسن ابوزيد (ملتقيات ابناء اوربي) من استباحو هذا البوست ان يرتقو ما بداته انا

لذا ساعقد الايادي بانتظار ماتجود به قريحتهم هناك !! ان كان لديهم شئ يمكن التفوه به او مجاراة نسج خيالي !!




الي ذلك لن انزل ما كنت سانزله تباعاً من كتابة بالتكُل المستباح ..

تسلم أخي محمد عوض ويسلم لينا نسيج خيالك
الذي اتيت به من واقع كنا نعيشه وتبدل وتغير مع
تغيرات الزمن وما يصفونها بالعوالمة والتكنلوجيا ولكني
اظنها باقية الي الان في ريفنا الحبيب ومع تباشير هلال
رمضان يتم الاستعداد وترتيب التكل لعمل الابري المشروب
الاساسي في مائدة رمضان الله يسامح الكان السبب في
ايقافك من كتابة التكل المستباح ولكننا سننتظرك حتي تعود
للكتابة هــــــــــــــــــــــــــــــــــــــــــــنــــ ــــــــــــــــــــــــا

(14)

* وككل صباح تشرق الشمس الا شمس عوضية التي اختفت منذ خذلان الاسياد وقاطعت شله التكل ونعلت سنسفيل العواسه التي تجلب لها مالا تشتهي من حديث وبهذا الصباح يعد الثالث لتغيبها .. ذهبت اليها السرة وفاطمة ليعرفوا الحاصل عليها .. وربتن علي كتفها ورضينها كل منهن بطريقتها معها .. واخيرت حملت جردل عجينها ولحقت بهم بمنزل السرة .. وعند دخولها تقول لامنه التي تنظر اليها بشماته : هوي ياامنه الموضوع داك خلاص انتهي وما تكرهونا اللمة !!
-السرة : تغمز بعينها الي امنه والاخريات لكيلا يفتحن الموضوع مره اخري .
-فاطمة : ياعوضية والله فقدناك بالعواسة ولمة الجبنه !!
-عوضية : ماتفقدي عزيز ان شاءالله يابت امي ..
- امنه تدخل وهي تدندن باحدي المقاطع المشهورة :

ســــــــــايق العظمة سافر خلاني وين

يامــــاشي لي شندي بلد الجمال عندي

وسافر ..

بفــــــــــــــــديه بي عمري خلاني وين

ياماشي لامدرمان جيب لي معاك حنان

وســافر ..

زي خــــــــــــــــــــــــــدك النديان وين

ياماشي لي كسلا جيب لـي معاك شتلا

وسافر ..

شرطاً تكون خضرا زي لونك او احلا

- فاطمة : اجي يابنات امي مش دي كانت بتغنيها الفنانة الصومالية ديك اسمها منو يابنات امي ؟
- السرة : اسمها حليمة يافاطمة وياحلاتها وقت غنتها في قاعة الصداقة وقت جات الفرقة الصومالية للسودان ..
- مدينة : والله يانسوان انتو شغالين بالفارغة والشغلة ام دق !!
- اجي اجي يامدينة دا غناء سمح من الزمن السمح يابت امي ما زي غنا الجنيات ديل هسي .. كل واحد فيهم ماسك ليه مكرفون وبصرخ فينا التقول طالبنا دين !!
- امنه : يجازي محنك .. هسي دا تشبيه دا .. قالت طالبنا دين قالت !! ههههه
- السرة وعوضية تفتر ملامحهما عن ابتسامة خفيفة .. وعوضية تلوي خشمها حين نظرت اليها امنه !!
- فوزية : سلام جاكم .. الليه الريكة شرفت بحضورك يا عوضية .. لكن امانه في ذمتك ما سمعتي نبيح راجلي بديك السجم والرماد داك !!
- عوضية : تصمت .. ولكن يغلبها الامر فترد .. انا ما سرقتو جبتيه براك يافوزيه والموضوع دا مش اتقفل ليه كم يوم !! دا ديك ولا عمبلوق !! الفلقتينا بيه دا ؟
- فاطمة : تشير بيدها الي فوزيه .. أي .. أي اتقفل ياخيتي .. خلاص .. اقصرو الكلام ..
وتحكي فوزية قصة عن امراه قريبتها تحب البوبار حين اتت بثوب فاخر وايديها مليانة دهب بوفاة نسبتها !! هكذا رجعت شلة الانس من جديد الي صاج العواسة من جديد .. وانضمت اليهم الشيخة عوضية بعد ديك فوزية الراح شمار في مرقة !!

الجميل محمد عوض السيد
اشواق بلا حدود
كنت قد وعدتنا بان تواجدك هنا سيتواصل
و لن تكون الغربه الى وقود للابداع و معين
و لكن يبدو اننا فقدنا الاثنين
شوفتك
و شوفة حروفك

جميل جدا هذا النظم
اروع مايكون تخيلي للمكان
واحساسي بالوحشة لتلك البساطة
مع فقد القليل من الملامح تتبعت اليوم 1-2-3
وساعود لإكمال المشاهد التي رسمت بدقة وتلونت
بيد مدهشة .....كن بخير اخي محمد عوض السيد

اخي محمد عوض كلما اقتربت من تكل السرة ابتعدت عنه
لا لدخان ينبعث منه
ولكن ما بدات في القراءه استوقفت
لان ما تكتب يلامس كل الدواخل
ومن الظلم للنص وللنفس ان يكون المرور على عجل فكل ما ينبعث من تكل السرة
يتطلب ان نعد له متكا وان اقف عنده
اعدك ونفسي ان اعود للتكل لاني احتاجه كثيراً
شتره
ليه حق الوزير يقول اكلوا الكسرة بالطماطم

سلامات عوافي

ابو امجد ياصاحب
الغربة ارهقت كاهلي بحق
وانا احوج ما اكون الي التواجد هنا ففيه اجد بعض من نسمات بلادي
وليتني اجد متسع من الوقت لاكون حضوراً واكتب بعض من شخبطاتي


مع ودي
واشواقي

سلامات عوافي
الاخت سبنا

شاكرا لك تواجدك هنا بتُكل السرة
ومن الجيد ان اقرا اعجابك بتلك الخربشات
وانصحك بعدم قراة حلقة الزار ففيها من الاغاني ما قد سمعته حقيقة عبر شريط كاست لاحدي الجلسات للزار
عشان ما يجيك شيطان ناطي


مع ودي
واحترامي

سلامات عوافي
اخي لوي الصادق

صدقاً لقد كنت اسعد خلق الله حين اتنشق بعض من دخان تكل امي
والان اثناء كتابتي استحضرته بكامل بياضه وسواده ببعض الحين من جراء انزلاق بعض حبات الزيت للنيران
فشكرا لدعمك هنا واتمني تواجدك دوماً بشهد الحروف عموماً .

تخريمة :
الكسرة والطماطم بقت اكل ملوك يا اخوي ههه
وتكلفة وجبة كسرة اغلي من طلب لحمة بالاسواق

مع ودي
واحترامي

المشاركة الأصلية كتبت بواسطة محمد عوض السيد

سلامات عوافي
الاخت سبنا

شاكرا لك تواجدك هنا بتُكل السرة
ومن الجيد ان اقرا اعجابك بتلك الخربشات
وانصحك بعدم قراة حلقة الزار ففيها من الاغاني ما قد سمعته حقيقة عبر شريط كاست لاحدي الجلسات للزار
عشان ما يجيك شيطان ناطي


مع ودي
واحترامي

.......
14
جميل جدا وعشت ايام جميل
مع ستات التكل وياحليل زمان العيشة كانت رخية
والخير راقد غايتو في البلد لسا التكل في وعواسة الكسرة
غي الصاج واللدايات الملامح دي قاعدة وحبوبة مابتحب العواسة
في البتجاز الله يديها العافية بقول ليها حبوبة انت بتحبي التعب
تقول لي انتو ماشفتو تعب وزمنكم سمح والله يزيدكم ...
و راكوبة حبوبة والجبنة ياسلام الكانون والشغال والسواحة والفناجين
وقطيعة فيها موية والبنابر للجلوس والعنقريب مجلد بالجلد والمزيرة
وكوز الطلس الأبيض ..هههههههه مشاهد لا تنسى .واحلى مافي اللمة
اغاني تدندن بها البنات الساكن السعودية برسل ليك هدية سلامي لصدام
الضرب السعودية سلامي لصدام ...انا ماعارفة المغسة القاتلاهم من
السعوديين شنو امن فرحانين مع صدام ........واصوات الفناجين لذيذة
وبرضو امير الحي ماجاء الماحاسي بي الليلة ماجاء امير العيون ماجاء زولي الحنون الليلة ماجاء ...حقيقة خانتني الذاكرة وانتابني الحنين واحسست بالشجن ..
اها بالنسبة للظار انا عندي عشق للون الاحمر
والقهوة وتعجيج البخور امي متهماني بالمجانين ديل
بس والله هم لذيذين .....
...............
اها صحباتي مطالبنك بالمزيد وانا وهم في انتظارك تسلم كتير
على المجهود الكبير
تقبل خرمجتي الفوق دي كنت ببري غاتيو بس كلها ذكريات جميلة
مازالت عالقة في الذاكرة .
كن بخير اخي محمد عوض السيد

عبق الامكنة يا صاحبي
وذاكرة البحر
وخيبات الحنين
وضحكتك الرائعة هن كلهم هنا
محبتي

بيكا ياصاحب

فلا يحفظ الود والجميل سوي الاصدقاء
ولا يعتبر للاشياء الا من يهتم بك
..
حرك قلمك بالقرب
لنشرب سويا القهوة
وليشتعل بعض الشوق علي نار الغربة والمداد


مع ودي
واشواقي