عجاج المسك الروائي طارق اللبيب

عجاج المسك .
الحلقة 1
بقلم طارق اللبيب ..
**
كان مرة في زمن الامل.
كانت نفوس الناس وطن ..
كل المشــاكل ليها حل..
كان الفرح مالي الطيور..
تتغنى لي الناس والاهل ..
فرحانة بي طيبة القلوب ..
مبسوطه من خير انبهل ..
مبسوطة من كتر التسامح
ومن بلــد كانت أجــل ..
لمن تقيف فــوق البحر .
تتخيل الموج من طرب ..
في بهجة يرقص دون وجل .
ياربي هل. ممكن يعود ..
زمن المشاعر .مرة هل ؟
..
..
الزمن قبل خمس وعشرين سنة
اليوم الخامس عشر من فبراير العام 1990 الساعة التاسعة صباحا . في قرية من القرى الواقعة شمال مدينة شندي ..
كان (جمال) قاعد فوق جدول صغير كدا في الزراعة الفي الجروف الفوق البحر براهوقاعد .. منتظر ولد عمو . عمو اخو ابوهوغير الشقيق .. منتظر الولد في الحواشه ..الحواشة حقت عمو .. ولد عمو اسمو ياسين التخة .. واحدين بقولو ليهو الرتجة .. لانه كان سمين شوية .. وتلقاهو لابس سديري لامن مجبص على صدرو .. وشايل عصاية ..
اها جاهو من بعيد يتقدل .. ويمرق من حوض ويدخل في حوض.. لامن وصل ..
اها جمال بسأل فيهو.. ياسين . الليلة ماعندك محلة انضفها ليك .. ؟
ياسين قال لي جمال .. والله الليلة مافي.. مالك مفلس ؟
قال ليهو والله فلس شديد .. وناس البيت الليلة ماعارف اجيب ليهم المصاريف من وين . لافي من قبال الشرقة .. مالقيت لي شغل ..
قال ليهو يازول مافي مشكلة انا بدينك .. يومين تلاتة الحتة ديك تنشف من الموية .. ودايرة نضافة .. والحساب ولد ..
قال ليهو الله يبارك فيك ياياسين اخوي والله انت نعم الرجل ..
من المشهد ده .. احكي ليكم عن جمال ده شوية .. جمال ولد واحد وهو الكبير في البيت .. عندو اختين بس اصغر منو .. وامه امنة بت خالد .. ابوهو متوفي قبل سنة .. ابوهو كان شغال في سوق الخدار بتاع شندي .. بشتري وببيع رزق اليوم باليوم .. وكت اتوفى ماخلا وراهو لاقرش لاتعريفة .. جمال قرا في مدرسة شندي الثانوية .. وكتو الكان في تالتة خلاص ممتحن الشهادة ابوهو اتوفى .. خلا المدرسة ومرق على الشغل .. وبشتغل بي عرق جبينو .. وعايش امو واخواتو في امن وامان ..
يوم ينضف في الزراعة ويوم شغال بناء .. ويوم يركب كمساري في البص بتاع الحلة البمشي شندي الصباح ويجي المساء .. غايتو مامقصر كلو كلو ..
وماحصل حوج امو واخواتو لي زول .. عمو صاحب زراعة واملاك . بس على اساس انو هو العم غير الشقيق .. كان في جفوة بينو وبين اولاد اخوهو .. والسبب الاساسي .. والدة جمال صعبة شديد جدا .. ولسانها كعب .. لكن اخوهو المرحوم (محمد) واولادو معاملتهم لي اولاد عمهم رائعة وده الفرق ..
وجمال عارف السبب وعارف انو امه صعبة واخلاقها نتشة بس في اقل قليلة بتفور شكلة لي باب السماء .
المهم يازول هسع .. ياسين السمين سلم جمال تقريبا زي مية وخمسين جنيه .. بالقديم . يعني زي هسي جنيه ونص .
وقال ليهو بس ماتكلم ابوي .. مابرضى ..
جمال قال ليهو اناعارف يا ياسين مابكلمو والله .. ياخي انت الله يديك العافية ..
وفعلا شال القروش وغشى السوق الصغير الفي الحلة .اشترى اللحمة .. والخدار واشترى كمان كيسين شعيرية .. يعني الليلة الفطور مكرب .. وشايل الاكياس وجاي ماشي ينوني ساي متكيف جنس كيف .. جمال شاب مربوع مايل على الطول شعرو سبيبي لونو اسمر غامض .
لو ما شعرو السبيبي وملامحو العربية تقول من اصول افريقية.. بس ملامح وشو عربية وجميلة ماشاء الله وعيونو واسعة وصافية ..
جمال وصل البيت .. امو عاينت ليهو شايل الاكياس .. وهو طلع الصباح ماعندو التدعك الرمادة ..
سألته من وين جبت الحاجات دي ياجمال؟
قال ليها .. والله يا امي كان أأأ انا هناي ووو ..
طوالي نهرتو ليك نهرة تقلع قلب الاسد .. ياولد انا بتكلم معاك سيب التمتمة والقطيع وقول لي ..
قال ليها كنت داير لي قروش من زول ومشيت جبتهن منو ؟ قالت ليهو الزول منو ؟
قال ليها من ياسين ود العبيد عمي .. قالت ليهو العمى ال يلايسك ..
لشنو انت بتخلي قروشك عند ياسين ود القشير .. ؟قال ليها يا امي ده تعامل بينا نحن برضو اولاد عم ..بعدين انا قاعد اتدين منو ويتدين مني ..
قالت ليهو خلاص اسكت بلا يتدين مني البسمع كلامك يقول الله يوريني الزول ابقريشات ده ..
خلاص يا عمدة كلي .. من عرباتك الواقفات؟ ولامن بقرك المعلوفات؟ ...
قال ليها عليك الله يا امي قومي اظبطي لينا الفطور .. قالت ليهو انا عوست من قبيل ياخوي . كنت هسع بفكر لي في ملاح .. قبيل قلت اقوم افرك ليكم ويكة يابسة .. فوق شرموط .. لكن مادام الليلة مليت اكياسك من السوق .. حمدناهو وشكرناهو ..
بعد الحجة سوت الاكل وظبطت الشعيرية وختت الصينية .. قالت ليهو نادي اخواتك دي من بيغادي وتعالو النفطر سوا ..
قال ليها كيفن يمة يعني افطر معاكن .. هسع اكان جاني ضيف .. ولا جاني واحد من اولاد الحلة يلقوني باكل مع الحريم ؟
قالت ليهو ياولد مافي زول جاي .. سد باب الحوش وتعال اكل ساي ..
قال ليها خلاص ما داير فطور .. اكلن انتن .. قالت ليها قومي يا ماجدة (اختو الكبيرة 18) قومي رصي ليهو كسرة في الصحن وجهزي ليهو صينية اليمرق بيها بره ياكل براهو زي الكلب ..
هو طبعا كلام امو الحار ده ما شغال بيهو يتبسم ساي .. متكيف الليلة من الفطور المكرب ده ..
بعد جمال ما فطر تمام جاها قال ليها فطرتي يا امي ؟
قالت ليهو نحمد الله ..اها مالك في شنو؟ قعدت لي في نص العنقريب. داير تقول شنو؟ ..
قال ليها .. اسمعي انا قبيل كضبت عليك .. قلت ليك القروش كنت دايرها من ياسين ..
الحقيقة ياسين ديني ليها لي يومين وانا بشتغل ليهو نضافة بعد بكرة وبسدد .. من شغل أيدي ..
قالت ليهو والله حقو الزول يكفتك بالصحن الفاضي ده هسع يلوي لك خشمك ..
تتدين كمان منو ؟ انت وكت غالباك معيشتنا كلمني.. انا براي بقوم اجيب السعف واضفر .. واسوي البروش .. وابيع واعيش بناتي .. ولا اشتغل دلاليلة ابيع العدة في الحلة ..
قال ليها لالا يمة بعد الشر عليك. على القسم انا حي مابتشتغلي .. الا انا اموت ..
خلاص العفو تاني مابتتكرر .. انا والله كضبت عليك عارفك ما كنت ح تأكلي من الحاجات كان عرفتي ..
والحجة يازول صرت وشيها .. واتكربنت وبقت حالتها حالة ..
وجمال كل مرة يجيها بي موضوع .. عشان ترضى وتنسى .. وهي زولة صعبة صعوبية شديدة خلاص ..
قال ليها خلاص يا امي.. انا هسع بعد اكلت وشبعت .. بقوم اشتغل وارجع لي ياسين قريشاتو .
وقام طوالي اتخارج .. اصلو وكت تكون امو متكفرنة هو بكون مقلق قلق غريب ..
جمال زول شهم.. وشخصيتو قوية .. الا قدام امو ضعيف جدا .. وامو هي نقطة ضعفو في الحياة ..
والحكاية دي متعباهو تعب شديد خلاص .. عشان امه صعبة ومابتتعاشر كلو كلو ..
ومن الله خلقو ماحصل كذب عليها ..
ويومو اليلقاها معبية ليها شكلة.. ودايما بتكون مخربة الدنيا .. بقعد يلملم في رؤس المشاكل .. بي كل وعي .. ويحل المشكلة براحة .. ومرات يشيل وش القباحة نيابة عنها ..
مع انو معروف في الحلة اخلاقو ملائكية .. وبنات عمو التلاتة متنافسات عليهو .. اخوات ياسين .. بس وين للحاجة البتكره عمو واولادو كراهية التحريم ههههه ..
المهم يازول مرق . لي واحد كان عندو كارو بنقل الطوب من الكماين . ولي حظو الكويس .. بتاع الكارو اسمو عبد العاطي .. كان اليوم داك عيان ماشغال ..قال ليهو بشتغل بدلك .. واستلم منو الكارو واشتغل لغاية المغرب .. وجا المساء . هو والحمار مهلوكين ..
واستلم النسبة بتاعتو ومشى سدد نص القروش لي ياسين الرتجة ..
واصبح باكر الصباح محموم ..
لانو شغل الطوب بالكارو صعب شديد.. يعني تشيل مكنة مكنة .. وتخت في الكارو .. ولمن تصل تنزلهن مكنة مكنة .. والمكنة يعني (12 طوبة مرصوصات) .. وكان شغال من 11 صباحا" لحدي الساعة 6 مساء ..
اها يازول الزول ه اصبح عيان عيا ماساهل وشو مدوشش وعيونو مورمان ووبقنت .. ومحموم .. ومصدع ..
لغاية نص النهار كدا الحمى كربتو كربة شديدة خلاص.. وبقى يستفرغ . امو قالت نوديهو الحكيم .. الحكيم طبعا مساعد طبي في الحلة عندو عيادة كدا على قدر الحال .. وبكون راصي الادوية فوق الطربيزة زي عدة الشاي حقة الحبشية ..نضيفة ومتمرة .
لكن الظاهر جمال تعبان .. والشغلة اكبر شكلها من الحكيم ده ..
الى اللقاء ..

عجاج المسك
الحلقة 2
بقلم طارق اللبيب .
اها جمال معصلج تب مابي يمشي للحكيم .. قال ليها يمة الحمى دي مي دايرالا حكيم .. سوي لي موية ليمون ..هسع بقوم زي الحصان .. الحكما ديل بكجنن ..
قالت ليهو اصلو مابخليك ,, قال ليها نحن ماعندنا قروش للحكيم ده ..
الدوا بالشي الفلاني . حقنتو زاتها غالية ..
كدي انتي اصبري لي لغاية العصر انا لو ما انفكيت .. براي بمشي للحكيم ..
امو مشت دقت ليهو قرض . وخلطته بزيت السمسم .. وسوت ليهو كباية ليمون .. وجات قلعت ليهو العراقي خلتو بي سروالو بس ومسحتو ..بالقرض والزيت . وادتو كباية الليمون ..
قالت ليهو ديل نسوان الحلة ديل.. الله لاغزا فيهن بركة . عينهن تكسر الحجر .. الا اقوم اجيب لك بخرات من شيخنا هسع ..
قال ليها .. والله دي بخرات كمان .. انا من زمان كلمتك قلت لك بخرات شيخك دي ماتدخل بيتنا ده .. ماوريتك التسطير والكلام الفاضي المكتوب فيها زمان وكت ابوي كان عيان ؟
وهو بتكلم مع امو وماشي متغطي بالبطانية .. ومن تحت البطانية قالها قت .لك اصبري اصبري لي للعصر .. كدي النشوف مسوحك ده بسوي شنو؟
قالت ليهو انت بلا قوة راسك دي وانكارك في في الشيوخ شيتا مسويها فيك مافي .. وكشت كشت مشت من جنبو ..
الكلام ده قريب وكت الفطور .. ومافي زول من ناس الحلة عارف جمال عيان ..
وكت صلاة الضهر كدي قام صلى لقاها عاملة ليهو شوربة. شربها ورقد تاني ..
قام الباب دقه امو فتحت الباب لقتو ده ياسين .. قال ليها جمال في يا خالتي؟.. قالت ليهو ياهو داك جوة قاعد متكمسد تحت البطانية.. عيان ..
قال ليها عيان متين؟ البارح بالليل جاني ..
قالت ليهو جاك لشنو تاني؟ نعل ما اتدين منك تاني؟ وجاي تنكفنا في قروشك ..؟
قال ليها حرام عليك ياخالة .. ياسين البارح جاني وسدد لي خمسة وسبعين جنية .
اليوم كلو شغال طوب فوق كارو عبد العاطي .. واظنو ده الشي المرضو .. شغل الطوب حار يا خالتي .
قالت ليهو سجمي.!! نعلو مابمشي بالكارو الكماين تحت.. ويجي ينزل في اخر الحلة ؟
قال ليها .. اي والله وشغال كمان لغاية المغرب .. وانا والله شاكلتو قلت ليهو المستعجل ليها شنو؟ انا قابضك في قروش؟ .. لكن هو كان متضايق براهو ماعارفو مالو ..
وكان ما عيان الليلة. قال برضو ح يشتغل طوب. ويسدد الباقي .. وانا مشيت هسع لي عبد العاطي .. عشان اقول ليهو ماتديهو الكارو لقيتو مافي ..
انتي ناسية اظنك .. جمال ده قايم من غيرغان.. ماتم ليهو شهرين ؟
قالت ليهو والله ياولدي صدقت .. ده كلو عشان انا نضمت معاهو الصباح في الدين ..
الشي الظاهر انو الحجة متجرسة شديد .. من الموضوع ده .. طبعا امونة دي ما حجة يعني ..بنقول حجة ساي.. لكن هي صغيرة في السن .. والزول البشوفها مع جمال يقول اختو الكبيرة ما امو .. لانو الجماعة ديل بزوجو بنوتهن صغار ..
امنة وكت ولدت جمال كان عمرها 15 سنة بس ..
طبعا الكلام الحاصل بين امونة وياسين ود العبيد ده كلو في الحوش برة .. لاهسع ياسين مادخل على جمال .. جمال سامع امو بتتكلم مع زول بس موعارفو منو .. والكلام يجيهو طشاش طشاش .. وكت ياسين دخل ليهو جوة .. جمال وكت حسا بيهو مرق من تحت ..
قال ليهو والله ياسين انا كنت ماشي اشتغل .. بس كربتني الحمى .. ماتقول بكضب عليك .. لكن باكر يازول كلام رجال ..
اوعا يكون اتكلمت مع الوالدة بره ؟
قال ليهو والله ياجمال انت زول غريب خلاص.. يعني هسع انت قايلني جاي ساكك في قروشي؟ .. ياخي قروش شنو وهي كلها كمها ؟
انا والله شفقان عليك ساي .. القروش تطير ياخي ..
طيب انت مالك ما مشيت الحكيم؟ .. قال ليهو لالا الحمد لله انا هسع انفكيت تب .. عاين لي اها ,, ونزل من العنقريب .. وقف على حيلو ..
قال ليهو فوق وشك المرض ظاهر ياجمال ..ياخي ارح معاي الحكيم ..
قالو لا والله من محلي ده ما متحرك .. لغاية بعدين كان مابقيت كويس بجيك براي نمشي ..
امونة كوركت من جوة .. ياسين؟؟ ياسين؟؟ هوي يا ياسين ..
قال ايوة ياخالتي .. قالت له ماتمرق بسوي لك في كباية شاي ..
قال لالا انا مارق اتأخرت .. ابوي بعد ده بجي .لازم ارجاهو في البيت ..
اهاياسين قال ليهو يلا ياجمال ربنا يواليك بالصحة.. انا ماشي وبمر عليك بعدين..
جمال حس بانو رقدتو دي بتأثر على ناس البيت . ولازم يقوم على حيلو . المهم زي العصر كدا قام وبدا يتحرك ..
وبدعي انو هو كويس.. وماعندو عوجة .. وقال الحمى راحت منو ..
وسبحان الله بعد ساعة من الحركة دي .. فعلا بقى كويس وطبيعي مية في المية ..
ودي نتيجة علمية .. الزول البستسلم للمرض.. المرض بتمكن منو .. والزول البحاول يحس بالعافية .. ويقنع نفسو بانو هو كويس.. ربنا بساعدو وبشفيهو .. اكعب حاجة الواحد تلقاهو عندو مرض بسيط يقول لك انا تعبان.. انا منتهي .. انا مافي زول تعبان قدري .. ويقعد يشكي ربو الخلقو لليسوى والمابسوى .. ده زول مرض والمرض بتاعو بمشي زايد حبة حبة لامن يودرو ..
وفي الحديث .. (لاتتمارضو فتمرضو فتموتو) .. مع انو الحديث رواه ابن ابي حاتم .. وهو حديث (منكر) كما قال السخاوي . والالباني لايصح نسبته الى النبي صلىعليه وسلم . ولكن معناهو صحيح مية بالمية ..
على كل حال جمال عايز يكفي امو شر حكاية المشي للحكيم دي . مع انو الحكيم قروشو بسيطة .. مازي الجزارين الهسي في الخرطوم .. لكن برضو البسيطة دي ناس جمال ماعندهم .. وماعايز يكلف ياسين .. وربنا كريم حقق ظنو وبقى زي الطلقة ..
قال لي امو اعملي لي كسرة بي ملح صبو (سليقة بصل).. ساي وجيبي لي معاها ملاحة شطة وليمونة .. واتغدى زي الماحصل شي ..
قال لها الله يصبح على الواطة دي امشي اشوف ارزاقي .. والله الليلة قعدة البيت باقيه لي عوجا عوجا ..
امه قالت ليهو انا فكرت ليك في حاجة .. باكر اركب امشي شندي .. اصحاب ابوك شغالين في سوق الخدار .. امشي استرزق معاهم .. ويبقى ليك شغل ثابت .. رايك شنو؟ لانو شغلك الانت شغال فيهو ده
موثابت .. كل يوم ناطي ليك في محلة .. وكلو شغل صعب .. وانت زول مرضك كتير ..
قال ليها والله برضو فكرة .. ما مشكلة .. بمشي من بكرة ان شاء الله .
قالت ليهو بس لازم تشتغل في ضل .. كان لقيت فيها وقاف في الشمش خلو وتعال ..
اها يازول تاني يوم الحمد لله .. جمال اصبح تمام .. وصحتو ماشاء الله ركب البص وماشي شندي .. والمرة دي راكب عديل ما كمساري .. والطيب بتاع البص .. صاحبو ومابشيل منو قروش .. يعني المشوار ملح .. والركاب كلهم بتونسو معاهو .. واحد عمك كدا قالو الليلة على وين يا جمال؟ .. اوعا يكون هارب من امنة بت خالد؟ .. والبص ده كلو فقعها ضحكة .. جمال اتغاظ من جواهو ودمو فار .. لكن عمل فيها الكلام ماهاميهو .. قال ليهو والله يا عمي السيد.. امنة بت خالد انا مجبور عليها .. وربنا بديني اجر .. مافي زول بهرب من امو ومسؤوليتو ..
قال ليهو اوع يكون زعلت ياباشا.
جمال قال ليهو ازعل ليه؟ .. انت سألت سؤال عادي.. وماعندك فيهو قصد ..
وامنة بت خالد ياها اختك وخالة وليداتك .. كان كعبة كان طيبة .. ياها عرضك وشرفك ..
قال ليهو والله ياجمال ندمتني على كلمتني .. المهم الناس سكتو كلهم زي الضارباهم زيفة صقط 2015..
وجمال حس انو الناس ديل اتحرجو ..
قال ليهو عارف ياحاج السيد.. اول البارح عشان اتدينت لي قروش من ياسين ود العبيد عمي.. قالت لي ..والله حقو الزول يكفتك بالصحن الفاضي ده يلوي لك خشمك ..
وقعقعقع .. الناس ديل فقعوها ضحكة .. والموضوع بقى عادي .. ورجعو يتونسو طبيعي . .. جمال زول حساس شديد زي ما ملاحظين.
جمال وصل السوق ونزل . ومشى طوالي على سوق الخدار . او زنكي الخدار كمايحلو لي ناس شندي .
لاقى اتنين من اصحاب ابوهو . واحد من منطقة بالغرب اسمها السيال الكبير .. والتاني من ديم القراي ..
وقعد اتونس معاهم .. وهو بعرفهم لانو مرات كان بجي مع ابوهو السوق .. اها الزول المن السيال ده .. عندو ولدو في عمر جمال ..شغال في السوق (سبابي) عرّفو بيهو ..
والولد ولد ناجح ماشاء الله اسمو احمد .. وشغال في السوق احسن من الناس الكبار ..
وزول نيتو طيبة وقلبو رحيم .. وأول ما اتلاقو هو وجمال .. كل واحد شعر بي طمأنينة للتاني ..
سبحان الله الارواح الطيبة بتتعارف .. وتتألف .. زي ماقال الرسول الكريم صلى الله عليه وسلم .الارواح جنود مجندة ماتعارف منها أاتلف وماتناكر منها اختلف .. وفي اول يوم مسكو شغل.. وطلع مصاريفو في امان الله ..
احمد كان براقب في جمال طول الوكت .. وشايف شغلو وجديتو واهتمامو بالناس .. وباسم دايما وما بغلط على زول اصلو .. بالله التقول امنة بت خالد مي امو ..اها اخر اليوم .. احمد قال ليهو ..
انا ماشي يا جمال .. بس تعال انا عندي معاك كلام .. وداير اقدم ليك خدمة
كان الله ادا العافية .بتنفعك وتشكرني عليها طول عمرك ..
الى اللقاء ..

عجاج المسك
الحلقة 3 .
بقلم طارق اللبيب .
طبعا احمد شغال سبابي .. في الخدار والفواكه البتجي من الغرب ..يعني سمسار .. او وسيط بين الجلابة من الجناين وبين تجار الخدار .. وبقى زول معروف في السوق .. والناس كلها بتثق فيهو .. وابوهو زول ركيزة في السوق ..
المهم يازول ..داير يوصي جمال بي حاجة ..
قال ليهو انا عندي اصحابي شغالين في العقارات .. والسماسرة كرهوهم بالكضب.. واللف والدوران .. انا والله وثقت فيك كدي بدون مقدمات ماعارف ليه؟
فانا عايز اعرفك عليهم .. وانت بعدين اتفاقك معاهم بطريقتك .. يا اما يختو ليك عمولة .. او يدوك نسبة من الارباح .. او يفصلو ليك الفطعة .. انت تاني واتفاقك معاهم .. لانهم قالو لي جيب لينا زول بتثق فيهو ..
جمال قال ليهو بس الناس ديل شغلهم وين؟ ..
قال ليهو القطع الجديدة على مربع 18 ومربع 20 .. وعندهم شغل فوق في اركويت (حي في مدينة شندي) ..
قال ليهو طيب انا طريقة العرض بتاعتي بتكون كيف ؟
قال ليهو انت ماليك شغل.. بس انت تتفق معاهم وتجي علي بي جاي .. انا بخليك تعرف البلد كلها في اسبوعين .. بس انت تبقى زول واعي وحفاظ..
جمال قال ليهو حفاظ ساي.. ؟ انا الزول البشوفو مرة واحدة تاني مابنساهو طول عمري.. ولا اسمو ولابلدو .. والبيت البوصفوهو لي مرة واحدة .. تاني ببقى زي بيتنا ..
قال ليهو والله ياخي انت زول نادر بالجد.. انا براي هسي عرفتك . انت من زمان ماجيت السوق مالك .؟
المهم يازول جمال مشى البيت بي قريشات ماعندها عوجة.. ومشى بشر امو بالشغل الجديد .. وامو ادتو الموافقة وقالت ليهو ربنا يوفقك ..
وشال ليهو خمسة وسبعين جنيه ومشى على ياسين .. وكلمو قال ليهو انا لقيت لي شغل في شندي.. شوف ليك زول ينضف ليك الحتة ..
ياسنن قال ليهو كان الشغل سمح ناديني اشتغل معاك ..
جمال ضحك .. قال ليهو ابوك مابخليك تبراني ..
والله يا ياسين انا ماعارف ابوك ده بكرهني كدي ليه ؟ يعني لو امي زولة صعبة ولسانها فالت انا ذنبي شنو؟
ياسين قال ليهو ياخي ماتشتغل بيهو.. الزول ده اصلو كدا نحن زاتنا مكرهنا البلد ..
لكن انا يتخيلي كاجك عشان الفلس .. ديل تاس بقيمو الناس بالقروش ..هسي بعد تشتغل لو وضعك بقى تمام تاني بحترمك غصبا" عنو..
قال ليهو لالا الحكاية ما أظن كدا ..
الحكاية من امي .. بكرهني عشان انا ولدها بس ..
ياسين قاليهو طيب ابوي هسي تراهو بريد ماجدة ونجوى.. (ديل اخوات جمال طبعا" الاتنين) ..
قال ليه يازول انا العلي بعملو .. المهم زول في مقام ابوي.. انا لازم احترمو واحسن ليهو .. واتحملو زي ابوي بالضبط ..
اها يازول باكر الصباح قام طوالي على شندي .. وبدا يباشر في العمل .. ومشى اتعرف بالجماعة .. وووقع ليهم .. ووقعو ليهو .. والامور مشت كويس ..
يعني كان في بعض الصعوبات في الايام الاولى .. والتعرف علي الناس .. واجراءات التسجيلات ..ووو .. لكن مرت الايام وجمال امورو سلكت كويس ..
وبدا يشتغل بي امتياز مع الناس .. وفي فترة بتاعة شهر تقريبا .. حاز على ثقة كبار التجار بتاعين الاراضي ..
وبقى اسم ليهو شنة ورنة في شندي .. ودايما بشتغل بالفصل وفصل السعر .. انو سيد الحق يقول ليك انا قطعتي داير فيها كدي.. انت بيعها باليريحك ..
وانت بتمشي تصارح المشتري . واذا ماصارحتو بكون فيها ان ..
المهم ياجماعة غايتو باختصار .. كل اسبوع .. جمال بكسب من خمسة لي عشرة الف .. وبقى يوفر عند امه.. وامه فرحانة بالشغل الجديد.. لغاية مابقى عندو راس مال.. وبقى شغال يشتري ويبيع بي حقو .. الزول ده ماشاء الله في سنة بقى البلزو مابرميهو.. وعمل ليهو محل ثابت في الناحية الغربية من سوق شندي .
وهو طبعا ثابت الفضل بعد الله لي احمد .. والعلاقة بينهم الاتنين اتوطدت .. وجمال بقى يمشي السيال كل اسبوع عشرة يوم يبت معاهو في البيت ..
واحمد بقى راس مالى .. واحتكر تجارة التمر فترة من الزمن.
والاتنين مع بعض طول الوقت .. داير احمد امشي دكان جمال .. داير جمال امشي دكان احمد ..
امو حامدة شاكرة .. ويادوب ضاقت حياة العز .. وصلحو البيت واشترت العدة .. ودولاب الهدوم وعملت ليها تلاجة زي النسوان ..
والحمد لله الامور ظابطة بطريقة مخيفة ..
على قدر اهل العزم تأتي العزائم .. اهتم بي اخواته الاتنين اهتمام شديد خلاص .. وهدفو الاساسي يعرس ماجدة لي يونس اخو ياسين الكبير ..ويونس ماعندو مانع .. وماجدة عايزاهو .. ماعندهم مشكلة بس خايفين من العبيد .. والمراة الاسمها امنة بت خالد ..
وامنة بت خالد بقت في الفترة الاخيرة بتسمع كلام جمال .. وبتعمل ليهو الف حساب .. وبقت شكليا تريدو وبتخاف عليهو اكتر من زمان..
الكاش وما ادراك ما الكاش هه
اها يوم قال ليها يمة انا داير اعرس ماجدة لي يونس ودعمي ..
قالت ليهو البتسويهو انا ماعندي مانع.. انت راجل البيت ..
انت الضوقتنا ليها ابوك عايش معانا 22 سنة ماضوقنا ليها .. انت تقول ونحن نوافق .. لكن عمك القشير مابدورني ولابدور جناي ..
عشان كدي انا مابشيل وشي القباحة واقولك مابيه ..قت لك العبيد بكرهني ..
قال ليها ممكن اعرف السبب شنو ؟.. بس ياهو عشان لسانك ولاحاجة تاني .. امو بقت تتمتم وتقطع ..
جمال حاسي انو بينها وبين العبيد في مشكلة ماساهلة .. وحاسي امو مادايرة تشحن ليهو قلبو على عمو .. هو حسا كدا غايتو ..
قال ليها بس يا امي الحاجة البينك وبين العبيد دي.. ابوي ماكان عارفها ..
قالت ليهو ابوك؟؟ ياحليل ابوك .. ابوك ده راجل قليل حواء تلد متلو .. ابوك من الله خلقو لانهرني لازلاني .. ابوك كان عاين لي ساكت بقول لي الله يطول عمرك ..
ابوك راجل عندو مواقف قليل في الرجال البقيفوها .. وشوووو دموعها كبن ..
قال ليها بس انتي اديني الاذن انا اتكلم مع عمي العبيد يمكن ربنا يوفقني ..
وبقى مواصل في شغلو عادي .. طبعا اشترى ليهو بكسي 82 بمشي بيهو وبجي ..
يوم حكى لي ماجدة اختو .. قال ليها انا عايز. امشي لي العبيد عمي اتكلم معاهو في موضوعكم انتي ويونس ..
قالت ليهو انا يونس ما بلحيل عليهو.. لانو هو بخاف من ابوهو زي ملك الموت .. ومابقدر يواجه ابوهو باي حقيقة ..
زول شخصيتو ضعيفة ..
قال ليها اي زول المفروض تكون شخصيتو ضعيفة قدام ابوهو وامو .. هسع انتي ماشايفاني قدام امي بكون مسكين ومستسلم كيف؟
بعدين ياماجدة الراجل المابحترم ابوهو ويهابو . مابحترمك انتي .. وبكون زول مجرد من الاحترام ..
يونس ود عمي وانا بعرفو .. راجل اخو اخوان وابوهو زاتو بعمل ليهو حساب ..
قالت ليهو خلاص ياجمال .. مادام هو راجل وابوهو بعمل ليهو حساب خليهو هو يتكلم مع ابوهو ما تتكلم معهاهو انت ..
قال ليها انتي اسكتي ساي .. بعد اخدت موافقتك .. تاني الكلام كلام الرجال
اها يوم الجمعة قال ماشي يفطر مع عمو العبيد.. ويفاتحو في الموضوع بتاع يونس وماجدة ويشوف رايو ..
الى اللقاء ..

عجاج المسك
الحلقة 4 .
بقلم طارق اللبيب .
جمال مصر بعد بكرة يمشي لي عمو .. لانو عارف انو اخته متعلقة بي ود عمها .. ود العم كمان متعلق بيها .. لكن طبعا جمال .. ماعايز يتم حاجة .. والناس الكبار ما مرتاحين ليها .. والظاهر الحاصل بين امو وعمو .. حاجة ماساهلة .. ودايرة بحث .. وهو جواهو مصر انو يعرف في شنو بالضبط .. لانو كدا ما مرتاح لي شكل العلاقة دي ..
ولازم يعرف الحاصل اول حاجة .. حتي بعداك يبدأ يلملم في رؤوس المشاكل زي كل مرة ..
وزي ماحكيت ليكم.. هو براهو بينو وبين نفسو عارف انو بداية المشكلة بتكون من امو ..
مراة عنيدة وراسها قوي قوة غريبة ..
جا يوم الخميس المساء.. قعد بسأل في امه .. قال ليها يا امي انتي عارفة انا مصر على موضوع ماجدة ويونس ليه؟
قالت ليهو اها احكي لي ليه.. ؟
قال ليها انا داير الجفوة والكراهية دي تروح.. بعد تكون بتك في بيت عمها ..
وانا ذاتي اقدر ادخل في عمي واتزوج من بناته .. لانو ده الزول الوحيد الفي مقام ابوي ..
قالت ليهو هسع ماجدة مي رضيانة انك تمشي له انت . هم لو دايرنها يجوها براهم .. قالو في المقالة (المثل) "البشحد على بتو بتبور" ..
قال ليها ده كلام فاضي .. برضو في مقالة بتقول .. اخطب لي بتك قبل اتخطب لي ولدك .. ودي الحاجة الصح الماشة مع الشريعة ..
نبي الله شعيب خطب موسى عليه السلام لي بتو ..وقال ليهو (يابني اني اريد ان انكحك احدى ابنتي هاتين على ان تأجرني ثماني حجج)
سورة القصص ..
وعمر بن الخطاب خطب ابوبكر وعثمان لي بتو حفصة قبل ان يزوجها لرسول الله عليه الصلاة والسلام ..
والبتنين الاتنين ما بارن .. بالعكس اتزوجوهن انبياء ..
بعدين انا ما ماشي اتكلم مع زول غريب .. عمها اخو ابوها .. وهو ولي امرها الحقيقي .. لانو اكبر مني .. وليه حق التصرف .. حتى فيني انا ..
قالت ليهو عليك الله؟؟.. تصرف في منو؟ .. والله خبر كمان !!
قال ليها يمة .. ماتخليني ازعل منك ..
قالت ليهو خلاص يازول.. انا ما عندي مانع.. بس انت اقنع ماجدة اول .. قال ليها ماجدة ما دايرة ليها اقناع .. لو هي ماعايزاهو تقول لي براها .. انا بقيف .. تاني كان جوني ناس عمي مابديهم .. ولو عايزاهو تصم خشمها وتسكت لي .. انا بصرف بي طريقتي ..
بس انا عايز اسألك سؤال .. وياريت ماتخيبي ظني ورجاي .. وتجاوبيني ..
قالت ليهو اها اسال سامعاك ..
قال ليها الحساسية البينك وبين عمي العبيد دي.. اسبابها شنو؟
عاينت ليهو قوووي كدي.. وصرت وشها .. قالت ليهو جمال ؟ خليك في شؤونك لو سمحت ..
قال ليها لالا .. انا مصر اعرف .. وما بسكت منك الا توريني .. قالت ليهو اها ماعارفة .. طق راسك بالحيطة الجمبك دي .. قال ليها انا لازم امشي أساله هو .. قالت ليهو اوعك ..
قال ليها طيب انا اعمل شنو؟ ..انا كدا ما مرتاح كلو كلو ..
المهم النقاش ده انتهى بالطريقة دي ..
واصبحت الجمعة .. وجمال الصباح مشى لي ناس عمو.. في طرف الحلة .. بيتهم فاتح على الشارع الغربي.. شارع الفرناغة .. (الارض المطحونة بفعل العربات ) .. والشارع فاصل بين الحلة وبين الزراعة ..
ناس عمو عندهم زريبة غنم حقة شوك كدا .. لقا عمو جوة الزريبة مع الغنم .. بتنفقد في حاجة ..
سلم عليهو .. السلام عليكم .كيفك ياعم؟ .
قال ليهو عليكم السلام اهلا ياجمال .. اتفضل لاجوة ..
قال ليهو ايوة اصلي جاييك .. وين الاولاد؟ .. يونس وياسين؟ ..
قال ليهو يونس مشى شندي .. عندو عرس صاحبا" ليهو .. وياسين اتدلى لاتحت على البقرات .
قال ليهو خلاص تعال لي انا دايرك في موضوع ..
عمك العبيد في يدو كان شايل ليهو حبل .. جدع الحبل كدي على الشوك .. وجا مارق قفل باب الزريبة ..
الوكت كان زي الساعة عشرة صباحا" والحلة هادية .. والجو رهيب .. بس تشم ريحة العواسة .. وتسمع دق الفنادك .. ومرات حس الغنم أو صياح ديك من بعيد .. لا ازعاج ولاعربات ولاتلوث بيئي ..
جمال وعمو دخلو على البيت .. وعمو بتكلم معاهو .. اها دايرين نجيب الفطور ياجمال ..
جمال قال ليهو لالا اصبر شوية اليجي ياسين يفطر معانا ..
عمو قال ليهو يازول ياسين ماعندو مشكلة .. بجي براهو بدخل ويملح وياكل .. قالو في المثل ..(البي أمو ماتشيل همو)..
والله هسع تلقاهو اكل ومشى .. يازول ده مابصبر على الجوع اصلو .. تراهو كل يوم ماشي سمين .. بقى قدر التور ..
جمال قال ليهو .. قول ماشاء الله ياعم .. العين حق ..
قال ليه يازول الزول ده مابتجيهو عوجة .. لحمو مر حنضل ..
اها يازول الاتنين قعدو في ديوان عمك العبيد .. في واحدة من البنات سمعت صوت جمال جاء بره.. وبقت تجكلب ..
عمك العبيد اصلا" عندو ولدين وتلاتة بنات .. الوسطانية دي اسمها عاتكة .. غايتو وكت سمعت صوت جمال.. اتجننت كلو كلو ..
وبقت تدخل وتمرق.. زي ام العروس الراجية السيرة ..
وابت كلو كلو تكلم اخواتها.. تقول ليهن جمال جا بيغادي مع ابوي .. بس شبابك المزيرة حقة الديوان صغار مفتحات بي فوق لي الازيار.. وفاتحات في بيت الحريم بي جوة ..
عاتكة جابت ليها صفيحة بتاعة زيت فاضية .. وكفتها كدي وطلعت فوقا.. وبقت تعاين بالشبابيك .. دايرة تشوف ود عمها الميتة بي شوقو هههه .. غايتو جنس خفة ..
ولو جا عمك العبيد لقاها بتاوق بقطع رقبتها .. لكن قدر ما ناوطت وتاوقت ماشافتو .. نزلت وشالت الصفيحه من مكانها .. ومسحت اثر الصفيحه من الواطة بي سفنجتها .. عشان مافي زول يكشف العملية هه .
اها بيغادي في الديوان عمك العبيد بتكلم مع جمال .. عن الشغل .. وعن الاحوال ماشة كيف ..
وقال ليهو والله ياولدي .. انا نجاحك في شغلك عاجبني .. وبقيت مطمن على بنات اخوي تب ..
والحمد لله ربنا عندو تدابير .. الزول ذاتو يحتار فيها .. يعني هسع البنوت ديل .. كان ما ربنا جعلك ليهن سند .. كانت امهن ضيعتن ..
جمال رفع راسو .. وبقى يعاين لي عمو بي استغراب !!..
قال ليهو كيف يعني ياعمي تضيعن ؟
قال ليهو لالا .. بس عشان امك صعبة ومابتتعاشر.. ومابتقبل مساعدة من زول ..
قال ليهو ياعمي.. انت ماعمنا وبس.. انت بقيت زي ابونا .. ولازم تكون شخصيتك مفروضة .. وكراعك فوق رقابنا ..
وامي دي انسانة طيبة وقلبها حنين .. بس ياهو كلامها الفي خشمها ده ..
قاليهو طيب.. في اكعب من كلام الخشم .. ياولدي ضرب السيوف ببرا ويروح.. لكن جروح الكلام بتقعد بالسنين ..
يعني الزول اكان بقى طيب وقلبو ابيض.. زي ما انت بتقول .. ولسانو كعب .. طيبة قلبو مابتنفعو بي شي ..
احسن يكون قلبو اسود وماسك لسانو ولا شنو؟؟
قال ليهو والله كلامك صاح ياعم .. لكن نعمل شنو طبعها كدا .. زولة حارة ومابتقدر تتحكم في روحها وكت تزعل ..
لكن انا داير اسألك ياعمي ..
يعني هسي البينك وبين امي ده كلو بي سبب كلامها ؟ وبي سبب لسانها ومشاكلها ؟
قال ليهو والله ياجمال.. ممكن تقول كدا ..
قال ليهو طيب نحن موش اولاد اخوك ؟ المفروض تكون معاملتك لينا واهتمامك بينا .ماعندو علاقة بي امي .. يعني نحن ذنبنا شنو في الموضوع؟؟ ..
قال ليهو والله انتو ماعندكم ذنب.. الذنب كلو ذنبها هي .. وذنب ابوك الله يرحمو ..
قال ليهو ابوي؟ ابوي مالو كمان؟؟ ..
قال ليهو والله يا جمال .. انا لي اكتر من تلاتة شهور متردد احكي لك ولا ما أحكيلك ..
والله ياولدي خايف عليك من الصدمة.. لامن تسمع الكلام الساكتين عليهو سنين ..
قاليهو كلام شنو ياعمي .. كلام يعني بتعلق بي امي ولا ابوي ؟
قال ليهو بيهم الاتنين .. ده سر كبير ياولدي.. مافي زول عارفو في البلد دي .. غيري انا وامك وابوك الله يرحمو ..
قال ليهو طيب احكي لي ياعمي .. انا زول راجل .. وقدر الحمل ..
والله العظيم ماتلقى غيري.. انا البشيل حملك من صدرك ..
قال ليهو والله ياولدي انا بحكي لك مضطر بس .. غايتو اعفى لي .. وعارفك جمل شيل .. بس تعاهدني مافي زول غيرك يعرف .. ولاتمر الكلام ده لي امك.. ولو كان بالغلط ..
جمال قال ليهو والله بعاهدك .. بس انت قول لي في شنو؟ والله قلبي داير ينقلع من محلو ..
قال ليهو اثبت يا الاسد الغريق قدام .. بعدين القصة دي طويلة .. ومحتاجة لي وكت ..
انا ببداها ليك هسي واحتمال لغاية صلاة الجمعة ماتنتهي ..
قال ليهو كويس قول لي ..
الى اللقاء ..

عجاج المسك
الحلقة 5.
بقلم طارق اللبيب .
عمك العبيد قال ليهو جدا كويس بحكي ليك بس نفطر .لانو احتمال ياسين يجي .. بعد الفطور ان شاء الله .. نقعد برانا ونتكلم ..
اها بعد شوية ياسين جا من الحواشة . وشو مسود من الشمش . وعيونو محمرة .. ونفسو قايم ..
قاليهو ..اووو جمال .. كبف الصحة والاحوال .؟
جمال قال ليهو حبابك ياسين .. ياخي شنو التاخير ده اديتنا الجوع ..
وانا من الصباح شامي ريحة الكرارة (ملاح روب) وقدحة التوم على البصلة ..
ياسين سلم على ابوهو وقبل على جمال .
قاليهو .. والله الليلة شقة غريبة .. انت بقيت تاجر مشغول وبتاع الجابك لينا شنو في الصباحية كدي؟ ..
الجماعة قالو حتى يوم الجمعة بتمشي الشغل ..
قاليهو لالا والله يوم الجمعة بس الا مناسبات ومجاملات وكدا.. لكن شغل مافي ..
قال ليهو قالو لي بقيت تشتري القطعة وتبنيها وتبيعها .. يعني بقيت زي شركة المقاولات . والله ربنا يزيدك يا جمال ..
بس انا قلت ليك شوف لي معاك شغل ... ولا اشتغلت بي الشغلة ..
وعمك العبيد يسمع في الكلام شايل ليهو عصاية ويشخت في الواطة ..
جمال قال لياسين .. اشوف لك شغل كيفن وانت عارف انو ابوك محتاج لك في الزراعة .. يعني يونس ماسك شغلو براهو .. وانت برضو داير تمسك شغل براك .. ؟
وابوك يقعد يتشاقا مع الزراعة والغنم والبقر براهو؟
انا كدا مامقتنع بالحكاية دي ..
عمك العبيد قال ليهو قوم ياياسين جيب لنا الفطور خلي الكلام الماعندو طعم ده ..
ياسين قام ووهو بتكلم مع جمال .. قال ليهو شفت ياجمال الكلام لامن يكون وراهو كلام ؟؟
جمال ضحك وقال ليهو ايوه كدا خليك فاهم ياياسين ..
ياسين دخل يجيب الفطور ويجي .. وعمك العبيد قال لي جمال المشكلة ياجمال ياولدي حتى لو الزول خلاهو يشتغل براهو .. مو زول شغل .. زول افنس بس .. جنو رقاد واكل ..
والله يونس اخير منو . هسع هوقاعد معاي انت قايلو خادم شنو؟
والله انا بقوم الدغش بقرع الموية براي .. (يسقي الزراعة) وبخليهو نايم يقوم لا الضحى ..
يازول بعد شوية ياسين جاب الفطور الصينية الماساهلة .. صحن الطلس مردم بالكسرة الحااارة .. وملاح الكرارة .. فوقو سمن مترع بي فوق .. وصحن بتاع لحمة مححمرة بالصلصة ..
والملاحة بتاعة الشطة والليمونه مشقوقة النص .. وقعدو التلاتة ياكلو بي مزاج ويتونسوا ..
قاعدين يحكو بي واحد اسمو جعفر ود عثمان .. نطحو تور .. وقالو تعبان .
من البارح بالليل ناسو معقلين .. اها يازول يادوب من كملو الاكل وبغسلو في ايديهم .. سمعو طق الكواريك .. جاية من ناحية الحلة القدام ..
ياسين قال ليهم اسمعو اسمعو .. جعفر اظنو مات والله .. سامعين طق الكواريك دي ؟
عمك العبيد قال ليهو.. لالا .. مأ اظنو.. انا سامع الكواريك دي جاية من شرق ..
ناس جعفر في راس الحلة . البجيبهم شرق شنو؟ ..
ياسين قال ليهو يكون الهوا شايل الصوت جايبو جاي ..
عمك العبيد قال ليهو اصلو هو صوت ولا دخان طلح ؟ عليك الله قوم شيل الصينية دي.. جيب لنا الشاي النشوف الحاصل.. جمال عليك الله امرق لابرة شوف الحاصل شنو وتعال ورني ..
جمال طلع على الشارع القدامي .. ماشي بي سرعة.. قابل اولاد اتنين شباب جايين من الجيهة الشرقية .. قاليهم المات منو ياجماعة؟
واحد فيهم قال ليهو ..ماتت بت المنى بت يوسف .. دي قريبة ناس العبيد بي بعيد كدا .. والاتنين رفعو الفاتحة مع جمال . يعني بتبقى لي جمال برضو ..
جمال رجع طوالي لي عمو وكلمو ..
عمك العبيد قال انا لله وانا اليه راجعون لاحول ولاقوة الا بالله .. ده شنو المراة دي ماسمعنا ليها اي مرض ..
سبحان الله الراجل التعبان حي لاهسع .. وهي ماتت لا حركة ولاكشيشة ..وكيف الحريم ديل يطلقن البكا قبال مانجي نحن .. ديل تلقاهن بناتها المطرطشات ديل ..
كدي قومو خلوهو الشاي النقوم نمشي عليهم سريع ..
جمال قال ليهو دقيقة ياعمي النمشي اجيب البوكسي واجي ..
قال ليهو سريع داب ما لبست جلابيتي ولفيت عمتي انت تكون جيت .. وجمال اتحرك بي سرعة ساق البوكسي وجا راجع ساق عمو .. ومشو على البكا .. وانتظار الجنازة .. واستقبال العزاء.. والدفن ووو وهلم جرا .. في رحلة وداع لي حاجة بت المني الله يغفر ليها ويحسن اليها .. وفي كل لحظة تمر .. كان جمال بفكر في الكلام الكان عايز يقولو ليهو عمو ..
والفرصة الضاعت منو بي سبب الوفاة .. وطيلة يومين والحاج ماغادر مكان العزاء .. لانو هو من الاقرباء لي حاجة بت المنى تقريبا ود خالها ولا ودعمها مامتأكد ..
المهم انو من الناس الاساسيين في العزاء .
وجمال تاني يوم ركب عربيتو ومشى على شغلو .. وجاهم راجع المساء .. ومرت الايام وجمال كايس فرصة يلاقي بيها عمو براهو عشان يقول ليهو عايزك تحكي لي ..
بعد اسبوع تقريبا .. لاقى عمو في الشارع . نزل ليهو من العربية
وسلم عليهو وقال ليهو جاييك بعدين المساء ياعمي.. تحكي لي الموضوع الكنت عايز تحكيهو لي يوم البكا ..
قال ليهو لالا .ماتجيني انا غيرت راي ما داير احكي ليك ..
المهم خلاهو ومشى .. وماضغط عليهو نهائي ..
اها في البيت امه سألته.. قالت ليهو جمال انا ماسألتك انت يوم الجمعة الفاتت ديك لامن مشيت لي عمك القشير .. الحصل شنو؟
قال ليها ولاشي .. قال كان داير يحكي لي سر خطير عن ابوي وعنك
لكن حصلت الوفاة بتاعة حجة بت المنى الله يرحمها وما كلمني .. هسي قال لي ما بكلمك ..
قالت ها سر شنو دا راجل خرفان ساي
وانا ما رضيانة منك كان مشيت سعلتو تاني .. دا راجل كضاب .. وماعندو غير يكضب فوقي وفوق ابوك . موغالبو يألف ليك قصة عشان تكرهني وتكره ابوك بعد مات ..
طبعا جمال راسو جاط جواطة شديدة خلاص .
والمشكلة الكبيرة وين؟؟ .
انو امو دي بتتكلم مع ماجدة الليل والنهار .. وبتوريها في مشاكل عمها العبيد وكعوبيتو كعوبية اولادو ..
ومن يوم حست انو جمال ماشي في خطوات عايز يلم ماجدة بي يونس ..
بقت شغالة حرب غريبة من داخل البيت مع ماجدة وبتملا ليها في راسها.. انها لو اتزوجت يونس حتكون فتحت على نفسها ابواب جهنم وتعيش في تعاسة كل عمرها..
وبكترة النقة والملي والكلام البتقول فيهو لي ماجدة .. ماجدة فقدت الرغبة في ود عمها ..
اها يازول يوم ماجدة المساء جات لي جمال بعد رجع من الشغل .. قالت ليهو جمال اخوي انا عايز اقول ليك كلام ..
قال ليها قولي يا ماجدة انا سامعك ..
قالت ليهو انا خليت يونس ود عمي ده ما دايراهو .. حتى لو اتقدم لي هو بي نفسو انا ماعندي رغبة فيهو ..
ولو تميت حاجة من دون موافقتي انا ماعافية ليك ..
قال ليها سبحان الله .. كيف يعني اتم حاجة من دون موافقتك؟ .. انا جاهل ولا ظالم؟
بس انتي يوم من الايام سألتك وقلتي لي انا موافقة.. بس هو يجي براهو يخطبني صح ولالا؟
يعني انا هسي يومي المشيت ليهو في البيت.. لو كنت اتكلمت مع ابوهو
كان هسي موقفي بكون شنو؟
بعدين انا عارف علاقتك بي يونس .. وتعلقك بيهو انتي نسيتي انو انا صحبك شديد وبتحكي لي كل حاجة ..؟
عليك الله القلب ليك راسك شنو.. وغير رايك بالطريقة دي ..
قالت ليهو لالا مافي اي حاجة بس براي كدا ماعايزاهو .. قال ليها عشانو هو ولاعشان عمي وكدا ..
قالت ليهو عليك الله ياجمال ما تسألني كتير.. قلت ليك ماني دايراهو وخلاص كترة الكلام مافي ليها داعي ..
وبدون ماتحس دموعها كبن مسحتن سريع كدا .. ومشت من جنبو ..
طبعا هنا جمال عرف طوالي انو ماجدة اتكلمت معاها امها .. بس قالت ليها شنو؟
وضغطت عليها بياتو طريقة ماعندو خبر ..
وجمال حس احساس حقيقي انو امهم ماعايزاهم يتلمو على ناس عمهم باي طريقة ..
ودايما بتتكلم قدام ماجدة ونجوى .. وهو بكون سامع .. واصلو مابتقول (العبيد) .. بس بتقول القشير ..
ودايما بتتكلم عنو كلام يرمي اللقمة من الخشم .. وخاصة بعد ماحست انو جمال عندو نية في الدخول في الاسرة دي بقت شغالة حرب بلاهوادة ولاهدنه ..
اها طبعا جمال قنع من انو ماجدة تكون رابط بينو وبين اسرة عمو الوحيد في الدنيا ..
عشان كدا فكر في حاجة تانية .. اللهي شنوووووووو؟؟
عمك العبيد عندو تلات بنات .. صفية . وعاتكة .وميمونه .
صفية الكبيرة دايرها ود خالتها في السعودية .. وهي مي دايراهو دايرة جمال ..
وعاتكة دايرة جمال .. وميمونة الصغيرة دايرة جمال ..
وبالنسبة لي صفية جمال سامع بي ود خالتها الفي السعودية .. قال انا طوالي امشي اشوف خبر عاتكة .. (ست الصفيحة) ههه ..
بس انا ابدا من وين .. اول حاجة قال ادي امي خبر .. وبس . قال ليها يا امي انا ماشي اطلب بت عمي عاتكة .
قالت ليهو ربنا يوفقك ياولدي .. لكن كان عرسها ليك.. احلق شعيراتي ديل بي موس ..
قال ليها طيب انتي في وانا في ..
بعد يومين مشي العصر كدا وقف العربية في الشارع الغربي.. بتاع الفرناغة داك.. ونزل مشى على ياسين .. في الزراعة .كان لابس جلابية نضيييييفة ومكوية ..ورافعها كدا من غبار الزراعة ..
وعاين لي ياسين من بعيد كورك ليهو .
ياسين جاهو طوالي وقال ليهو حبابك يا جمال الارباب ..
اها الحاصل شنو ؟
جمال قال ليهو اقعد لي هنا في التقنت ده (طرف الحوض المسنم) ..
اسمع يا ياسين اخوي انا داير بت عمي عاتكة .. ودايرك تمشي تسألها لي سؤال سري بينك وبينها .. كان ماعندها مانع عشان اجي اتكلم مع عمي طوالي ..
الى اللقاء ..

عجاج المسك
الحلقة 6.
بقلم طارق اللبيب .
ياسين قال ليهو والله ياجمال .. دي احسن خطوة تقوم بيها في حياتك ..ونحن والله لينا الشرف بيك ياعمدة ..وان شاء الله عاتكة ماتلوي راسها .. قال ليهو بسس انت لازم تديها فرصة.. وتخليها تفكر بي راحتها وتديك الراي ..
وجمال ودعو وفات .. وبقى منتظر منو راي عاتكة ..
حصلت حاجة في الفترة دي الفترة المنتظر فيها جمال الرد من عاتكة ..
جمال حصلت ليهو مشكلة في الشغل ..
كان اشتري ليهو قطعة ارض كبيرة ..واوراقها وكل شي تمام التمام .
ويومو النزل فيها الطوب عشان يشيدها .. جو جماعة سايقين كومر..
(نوع من السيارات القديمة) وقالو ليهو . لو سمحت انت منو؟ وعايز تسوي شنو؟
قال ليهم انا صاحب القطعة .. وعايز ابني ..
قالو ليهو .. متين بقيتو ياناس شندي .. بتستولو على قطع الناس . وتدعو انها حقتكم ..
قال ليهم . الاوراق فاصل للنقاش ..
طوالي طلعو ليهو الاوراق .. وشاف اوراقهم كلها سليمة مية في المية .. مشى على البوكسي عندو فيهو شنطة سومسنايت . فتحها وبقى يقلب فيها .. وطلع ليهم الاوراق كلها .. وكانت برضو صحيحة مية في المية ..
بس تاريخ الاوراق بتاعة الجماعة اقدم من تاريخ اوراق جمال .. والمشكلة طالت.. واتفتحت فيها بلاغات .. وجرجرت ناس .. محامي.. وتاجر .. وسماسرة .. وموظف في الاراضي.. وحكاية طويلة وعريضة ..
في النهاية .. ظهرت عصابة تزوير .. واتكشفت جرايم اخرى .
وكانت قصة مشهورة في شندي في التسعينات .
المهم في النهاية جمال رجع جزء كبير من قروشو الدفعها في القطعة ..
والباقي الجماعة دخلو معاهو في تسوية .. وهو طبعا راجل فاضل اتنازل عن الباقي ..
بس بي سبب المشكلة دي انهارت اكبر عصابة تزوير.. مرت على نهر النيل .. ومن اليوم داك تاني ماحصلت مشكلة في قطعة ارض.. على حسب علمي . او انها تكون حاجات فردية.. لاعلاقة لها بالاتفاق المسبق على التزوير من الشبكات المنظمة ..
بس في الخرطوم الحكاية دي منتشرة .. وخصوصا في مناطق شمال بحري وجنوب الخرطوم .. والمناطق الطرفية في امدرمان ..
ومرات كتيرة بتلقى مسؤلين رفيعي المستوى متورطين في التزوير ..
واختلاس اموال الناس ..وفي النهاية يضيع حق الضعيف .. والمسؤول او الزول العندو ضهر .. يمرق منها مرقة السبيبة من العجين .
ناسين او متناسين حديث الرسول عليه الصلاة والسلام .
انما اهلك من كان قبلكم اذا سرق فيهم الشريف تركوه . واذا سرق الضعيف اقامو عليه الحد .. فو الله لو ان فاطمة بنت محمد سرقت لقطع محمد يدها .. بابي انت وامي يارسول الله,,
اما حالنا نحن فلاحول ولاقوة الا بالله ..
اها يازول في واحد من الناس الدخلو تسوية مع جمال .. قعد مع جمال وبتونس معاهو بعد الناس طلعو منو ..
الكلام ده كلو في سوق شندي المدينة بعيد من الحلة ..
الراجل قال لي جمال .. ياخي انا داير اتعرف عليك . والله انا معجب بيك وطريقة تفكيرك ومعاملتك .. ياخي انت زول فلتة والله ..
جمال قال ليهو ربنا يكرمك ويكرم اصلك .. انا اسمي جمال محمد فلان كيت كيت ..
من المنطقة الفلانية .. والدتي من منطقة اسمها كدا .. قريب من مدينة كسلا .. في طريق بوتسودان ..
قال ليهو غريبة جدا .. البودي زول من حلتكم للمنطقة ديك شنو؟
يعني ناس والدتك قبيلتهم شنو؟
قال ليهو والله ماعارف المهم سودانيين .. بعدين انا مامهتم كتير بالموضوع ده كتير .. قبيلة وماقبيلة المهم سودانيين مسلمين وكان الله يحب المحسنين..
قال ليهو ياخي انت زول واعي والله .. مع انك صغير في السن ..
وابوك وين؟
قال ليهو والله ابوي متوفى الله يرحمو ..
قال ليهو لكن ماشاء الله خلا ليك ورثة تمام . قروش النار ماتاكلا
جمال قالو ليهو والله الحمد لله اهم حاجة ورثني ليها اكرام الرجال واحترام الناس مهما كان قدرهم ..
المهم الونسة جرت بين الراجل ده .. وبين جمال.. وقال ليهو والله انا تاني لو جيت شندي اصلو ما بفوتك ..
جمال اتبسط من الراجل .. وقال ليهو حبابك والله في اي لحظة ..
الراجل ده طبعا عندو راي كبير ح نعرفو لي قدام ..
على كل . مرت الايام وجمال منتظر اخبار من عاتكة ..
طبعا ياجماعة جمال مابعرف كتير عن عاتكة .. المهم انها بت عمو .. ويمكن شافها مرات بالعدد .. لانو امو زمان كانت مابترضى لمن جمال يمشي لناس عمو ..
وكتير زمان بمشي منها بالدس مع ابوهو .. وبرضو بحس بمعاملة عمو فيها شي من الجفاء.. ده لمن كان صغير .. ولغاية زمن قريب.. يعني يمكن يادوب من السنة الفاتت .. مما بدأ جمال يدخل في الاعمال .. وبقى ليهو وزن اجتماعي ماساهل .. حتى معاملة عمو بقى فيها شي من الاعتبار .
ارحكم لي بيت .. عمك العبيد .. طبعا قبل كم يوم.. ياسين قال لي عاتكة انا عايزك في كلام سري ..
شوفي ليك فرصة وماتقولي لي امي ولا لي صفية .. قالت ليهو ولاميمونة لانها خشمها خفيف وقوالة ..
قال ليها اها نتكلم متين؟
قالت ليهو مافي الا الصباح .. ابوي بكون في الحواشة.. وامي بتكون مشغولة .. وانتو كلكم بتكونو بتشخرو ..
انا بجي الديوان اصحيك وتحكي ليك .. قال ليها اتفقنا .. وفعلا تاني يوم حصل وجات صحتو ..
وحكا ليها الكلام القالو جمال ..
قالت ليهو انا ماعندي مانع .. الكلام البتقولو انتو وابوي انا موافقة عليهو .. وجمال ود عمي ومافيهو كلمة ..
قال ليها طيب انتي عارفة انو ابوي هو البيرفض .. لانو مابدور امنة واولادها ...
عشان كدا مافي زول بقدر يخدمك في الموضوع ده غير امي.. لانو بعمل ليها الف حساب ومابكسر ليها كلمة
يعني انتي لو قدرتي اقنعتي امي بالموضوع.. تاني موضوعك اتحلا .. مشت عاتكة وقالت لي امها .. يا امي رايك شنو في جمال ود عمي.. .قالت ليها جمال كمان دايرلو راي؟؟ .جمال يايمه الراجل الهميم الطيب الحنين .. من الله خلقو ماحصل جاب اسمي بس بقول لي ياخالتي ..
والله بحترمني اكتر من اولادي ..
لكن انتي بتسألي ليه ؟
قالت ليها والله يا امي هو قال عايزني وكلم ياسين .. وانا موافقة .. وانتي عارفة انو ابوي ما ح يقبل بالزول ده.. بس انا عايزاك انتي تقومي لي بالمهمة دي وتقنعيهو لي ..
قالت ليها والله يابتي بس المشكلة كلها امو .. امو صعبة ومابتقدري تتعايشي معاها ..
قالت ليها انا متأكدة انو جمال ما ح يظلمني .. وانا مابغلط عليها .. تاني يتخيلي مافي عوجة وللا شنو؟
قالت ليها بس بتأذاك بي كلامها اذية شديدة ..لكن هسي المشكلة القدامنا ما امو.. المشكلة ابوك .. ابوك مابوافق انا بعرفو ..
عاتكة عاينت بعيد وشالت نفسها وختتو .. وقالت ليها والله يا امي انا ذاااتي هامة هم شديد ..انو ابوي يرفض لكن انا واثقة فيك يا امي وواثقة في انك بتقدري تقنعيهو ..
قالت ليها والله يا عاتكة يابتي .. مابقدر اوعدك .. لكن الفي قدرتي بسويهو ..
اتفقو على كدا لكن برضو .. زي ما ملاحظين عاتكة.. امها ابدا" ما طمنتها ..
اها بالليل الام لمن استفردت ام ياسين بي عمك العبيد .. جابت ليهو العشاء وكباية لبن .. وقالت ليهو اجيب لك فنجان سمن اكبو ليك في اللبن ده ؟؟ ولابتشربو ساي ؟ ..
قال ليها السمن بالليل موسمح . بجيب الترعة (حيرقان مع بلغم.. قد يخرج معة يسير من الطعام) .. خليهو بشربو كدي ساي .. قعدت جمبو في طرف العنقريب ..
وقالت ليهو .. اها انت هسي تعبان نعسان .. داير تنوم.. ولا ننضم شوية..
قال ليها لالا ما تعبان ننضم شوية ..
انا من قبيل عرفتك عندك كلام حايض لك دايرة تقوليهو ..
قالت ليهو الحقيقة جمال ود اخوك .. داير عاتكة . وكلم ياسين .. وهسع عاتكة خايفة منك انت تقوم تاباهو .
قال ليها يعني عاتكة موافقة؟
قالت ليهو موش موافقة ساي . خايفة انو الموضوع يخرب ومايتم .
عمك العبيد بعد ماكان شايل الكباية داير يشرب اللبن
نزل الكباية من خشمو قبل ماياخد منها اي جغمة ..
وسكت ساي اظن قريب الخمس دقايق ما نطق بي كلمة .. في النهاية مراتو قالت ليهو .. اها يا ابونس.
رايك شنو؟ قال ليها .. قولي لي عاتكة انا ماعندي مانع .
بس اصبري لي لامن اتكلم مع جمال ..
يازول المراة دي مشت من جنبو متكيفة كييف .. حست بانها انتصرت.. لكن العبيد من الزعل والتوتر لغاية الصباح مانام .
الى اللقاء ..

عجاج المسك
الحلقة 7.
بقلم طارق اللبيب .
عمك العبيد قعد على حيلو قبل الفجر .. ومنتظر لي متين الواطة تصبح .. صلى الصبح في الزاوية الجمبهم وجا .. بس خلا الواطة وضحت شوية .. مرق على الديوان .. لقى ياسين لسه نايم . ويونس طلع .
صحا ياسين قال ليو ياسين قوم عليك حيلك أب دفسة ده .. بس فالح لي في النوم قوم صلي وتعال ارسلك ..
قام ياسين يتمغى ويتطلق ومشى اتوضأ وصلى .. داير يشرب الشاي ابوهو قاليهو .. قبل ما تكب الشاي ده .. امشي لي جمال ناديهو لي .. مشى طوالي ياسين يكشت بي شبشبو المخفوج بالجنبات .. ياسين بمشي يتقدل ويكشت .. عشان كدا تلقا شباشبو زي الواقع فوقن قندران .
لمن وصل لي جمال . قال ليهو عمك دايرك سريع.. اتكامل اتخارج ارح معاي .. قال ليهو بس انا طالع عندي مواعيد ضرورية ..
قال ليهو بلا ضرورية بلا كرورية .. ارح قت ليك وتعال سريع لانو شكلو الموضوع ما ساهل ..
جمال قال ليهو طيب لحظات بس .. المهم خمس دقايق وجا طالع معاهو .. جمال ماكلم امو واخواتو بي مرسال عمو .. ولاهن عارفات ياسين جا .
المهم مشى ليهو ..وسلم وصبح عليهو .. وجمال قعد .عمو قال ليهو شربت الشاي؟ .. قاليهو ايوة الحمد لله هسي .. قال ليهو كب اشرب تاني .
وعمك جادي ووشو مكرفس زي الزول الداير يسألك من غلطة ..
قال ليهو ياجمال نعل ماك مستعجل.؟
قال ليه والله مستعجل وعندي مواعيد ضرورية ..
قال ليهو انا داير احكي ليك الكلام الكنت داير اقولو ليك يوم وفاة بت المنى ..
ولازم اقولو هسع ..
جمال قال ليهو خلاص انا مواعيدي بخليها.. دا ظرف خاص ممكن امشي ليها بكرة ..
اصلا "ماشي لي لزول في حلة قريش.. عندي معاهو باقي حساب .. وماخد مواعيد الليلة.. لكن ما مشكلة بقول ليهو حصلت لي ظروف ..
عمك قال لي ياسين.. ياسين اشرب شاييك ده وقوم اسبقني على البقرات ديل مرحن وعلق لهن (نضف المكان وكب ليهن العلف)..
ياسين سريع سريع جغم الشاي .. شيب شيب شيب.. وكشت نعلاتو وشال عصاتو وقام ..
عمك قام قفل باب الحوش الكبير .. وقفل بابا النفاج الصغير البدخل على بيت الحريم ..
وجا قعد فوق العنقريب واتوهط وصلح قعدتو .. وجمال مطير عيونو ويعاين لي عمو وحركاتو وقلقو ..
قال ليهو عارف ياجمال ياولدي .. القصة حصلت زمان .. وكت انا يادوب كان عندي يونس ولدي بس ..
انا طبعا كبير البيت .. وابوي كان عندو بس انا ومحمد اخوي .. انا كنت ماسك الزراعة لابوي .. ومحمد قال داير يشتغل براهو .. ويشق طريقو بي طريقتو..
وبقى شقيان.. زي شقاك الكنت متشاقيهو قبال تسوي شغلك الهسع ده ..
بس يوم من الايام ابوي جابو.. وقعد نضم معاهو نضمي حار خلاص .
وذلاهو.. وقال ليهو انت لاكنافغ سعن لاكنافع قربة .. وقال ليهو انت ولدة بايظة .. اي شغل وديناك ليهو مانجحت فيهو .. انا طبعا مارضيت من ابوي في الكلام ده .. لكين ابوي كان زول صعب شديد مابقبل اي كلام .. وكلامو زي السيف ..
المهم محمد اخوي رد على ابوي بي كلمة واحدة .. قال ليهو كويس يابا انا مارق من البلد دي.. ولو ما نجحت تاني مابجي راجع ..
وفعلا" بعد يومين من الكلام ده اصبحنا الصباح لقيناهو مافيش .. وابوي قال لي ماتشتغل بيهو .. بعدي ليهو خمسة يوم وبجي راجع ..
لكن للاسف ماحصل .. ومحمد اخوي طالت غيبتو .. ونحن ماعارفين محلو وين ..
والوالدة بقت تبكي الليل والنهار.. وداسة دموعها من ابوي طول الوكت كلو .. عشان صعوبيتو وقساوة قلبو .. الله يرحم الجميع ..
اها يازول الزمن طال .. ومحمد ماجا ولافي زول عارف عنو اي حاجة ..
والوالدة الله يرحمها .. من كترة البكا والاحزان على محمد اخوي عيت عيا شديد .. وماتت بالغل والحسرة .. بعد سنة بس من هجة محمد ..
وابوي ذاتو ماقعد وراها كتير.. يعني يمكن بعد ستة شهور ابوي مات .. مات موت الله .. نايم فوق عنقريبو ... نام في كامل الصحة جينا نصحيهو لقيناهو سلم الروح .
وانا بقيت براي .. ومافي اي زول وارث معاي .. في حق ابوي الله يرحمو ..
الحقيقة خفت من الحساب.. وقلت انا لازم اكوس لي محمد اخوي.. واديهو حقو في التركة .لانو ابوي خلا لينا 12 فدان ..
وبقيت هاجي في البلود.. ماخليت مدينة في السودان ما مشيت لها.. انا كايس لي محمد اخوي تلات سنين ..
مشيت حلفا.. ودنقلا.. وكريمة.. وابوحمد.. عطبرة .. ومدني وكوستي.. والدويم
والابيض.. ونيالا.. والفاشر
وكسلا .. والقضارف.. وبورسودان.. حلفا الجديدة.. الرصيرص والدمازين ..كل المدن دي انا حمتها بي كراع كلب.. ما خليت زول حايم ماعانت في وشو .. واي زول بلاقيهو بقول ليهو لاقاك زول بشبهني كدي .. ؟
لانو انا ماعندي ليهو اي صورة .. وكل صورو واوراقو وحاجاتو شالن في شنطو حديد ..
يوم مشيت لي ناس التصوير العندهم الاستديو في شندي . كان القى عندهم امل .. لانو في واحد قال لي بتلقى عندهم العفريتة .. برضو مالقيت ..
غايتو لفيت لف لامن كرعي ديل حفن .. وحصلت علي جنس قصص
وحكايات في حوامتي دي الله لاوراك..
وانسرقت واندقيت ..
وفي يوم من ايام الكواسة السود .لامن كنت بكوس لي اخوي في كوستي .. في ناس قالو لي اخوك بشبهك ونحن بنعرف مكانو ..
وساقوني ودوني لي بيت .. قالو لي اقعد هنا هسع بناديهو ليك ..
بعد شوية جوني داخلين ومعاهم عساكر ...
وقالو للعساكر ياهو ده الكاتل .. اكتشفت انهم دخلوني في بيت فيهو جثة زول مكتول جوة ..
واتهموني بيهو .. لكن الحمد لله ربنا مرقني براءة ...بعد خراج روح وتلتلة .. والناس الكاتلين قبضوهم واعترفو ..
واي قصة تحصل لي.. اقول سيبك بلا محمد بلا غيرو.. امشي اقعد في بلدي .. لامن محمد يجي بي راحتو ..
قلبي تاني يأكلني ويغلبني النوم .. واقوم اهج .. غايتو وليداتي الكبار ديل هملتهن هملة شديدة خلاس ...
والمشكلة كتير من الناس غشوني ... كل مرة زول يقول لي .. زولك البتكوسلو ده شفناهو في الحتة الفلانيه .. وانا اقوم اسافر والقى الزول ماياهو ..
يازول بالاختصار .. لامن قنعت تب وخلاص قلت اخوي ده بكون مات .. يوم كنت قاعد لي مع ست شاي بشرب لي في قهوة .. في الحصاحيصا .. في النيم القدامي المنو والبحر ..
بتونس لي مع واحد قت ليهو .. انا والله لي سنتين وعشرة شهور كايس لاخوي طافش من البلد ..
قال لي انتو من وين؟؟ قلت ليهو نحن من شندي ..
قال لي شندي زاتها وقريب ليها ؟ .. قلت ليهو منطقة قريب منها . جيهة السافل كدي (الشمال) اسمها كدا ..
الزول قال لي .. والله ياخي انا ساكن في منطقة اسمها كيت كيت .. قبل سنتين في زول جا اتزوج من منطقتنا.. وقالو لاعندو ام لاعندو ابو .. وجاهم بي عصايتو عرس بتهم ... قالو من حتة شمال شندي ..
والبت زاتها كان عندها مشكلة .. المهم عرسها وساقها وفات بس مشى وين ماعارفو .. الزول ده بشبهك لكن ماشبه شديد.. ولونو اغمد منك شوية ..
انا قلت ليهو والله ياخي وصفك ده ياهو تب .. بس انا دايرك توصف لي بلدك وين؟ والناس الاتزوج منهم ... واسم الاسرة .. المهم الزول كلمني .. ووصف لي منطقة كدي اول مرة اسمع بيها .. ولاجمبها مدينة .. يعني انا لو فتشت عشرين سنة ماكنت عرفت المنطقة دي . لانها غايسة في خلاء .. وسيح ووديان وشدر .. ومقطوعية في طريق بورسودان . المهم مشيت .. واسأل واسأل للامن وصلتهم
وسلمت عليهم طوالي عرفوني .. قالو لي انت اخو محمد الجعلي؟
قلت ليهم نعم .. قالو لي الزول ده ماقال ماعندي اهل؟؟ ..
قلت ليهم صاح ماعندو اهل.. ابوهو ميت وامو ميتة.. واعمامو اتنين في الصعيد ليهم تلاتين سنة .. هسع الزول ده وين؟
قالو لي والله نحن زاتو ما نخابرنو .
عرس المرة وطار.. قالو ساكن مدني . في حي اسمو الدرجة .
انا قلت ليهم طيب كيف انتو ماعارفين بتكم وين؟
قالو ليهو ماعارفين ولادايرين نعرف .. امشي سوق مدني في الحتة الفلانية بتلقى تاجر اسمو علي ود الكامل . اسألو منو بوريك ليهو ..
ومن فجتي ديك مشيت على الشارع.. وركبت لي بوكسي بتاع زبيدية .. شالوني لقوني في فجة مقطوعية .. شالوني معاهم ووصلوني لغاية مدني .. وصلت بالليل نمت في الميدان الجم الشيخ مدني السني .
وليمتين تصبح لي واطات الله .. عشان امشي لى علي ود الكامل في السوق جوة ..
الى اللقاء ..

عجاج المسك
الحلقة 8.
بقلم طارق اللبيب .
غايتو عديت الليلة ديك فارش شالي في الواطة.. ونايم فوقو .. ونصها نوم ونصها سهر .. وقمت الفجر .. ونفضت الشال مشيت الجامع صليت . وقبال الشرقة دقشت السوق .. ستات الشاي ديل يادوب يهبن في كوانينن .. ويلُخن في عجين اللقيمات .. وناس الخدار داخلين على السوق .. وحمير ناس اللبن يتحاومن بالشوارع . وانا شغال بس فرجة في الماشي والجاي .. مشيت قعدت لي جم ست شاي . قاعدة ليها في برندة مقابلة الطرمبة والشمش في وشها ..
اول زول شربت الشاي في السوق ده انا.. من شدة العجلة والشفقة .. وسألتها من دكان على ود الكامل .. ووصفت لي تمام التمام ..
بعد شربت الشاي قمت على حيلي .. ونفضت شالي وداير امشي على الزول .. قالت لي انت هسي ماشي وين؟ ؟
قلت ليها ماشي للدكان والوصف الوصفتيهو لي ده ..
قالت لي انت اظنك غريب من البلد . قلت ليها صاح والله .. غريب ..ومسكين الله والرسول ..
قالت لي اصبر شوية .. الناس ديل مابفتحو هسي .. لي تمانية تسعة كدي كان ربنا هون .. على هسع مابكون جا ..
الكلام ده في بداية السبعينات .. والبلد كان يادوب ماسكها النميري ..
والمشاكل والانقلابات شغالة شغل عجيب ..
واي زول خايف ومتوتر ومتوجس .. والحاجات الحاصلة في الخرطوم .. اكتر مدينة برشها الدم بعد الخرطوم .. هي مدني ..
المهم يازول اتونست مع المرة ديك .. وسألتها من البلد لغاية ما زباينها زحمو المكان .. وانا بعد شوية مشيت اشتريت لي علبة سجاير .. ابونخلة .. ومشيت على زولي . ماتستغرب انا زمان كنت بسجر ..
اها سألت ناس في الشارع الوصفوهو لي .. قالو لي يهوداك دكانو وهو زاتو يهوداك قاعد .. لقيتو قدامو شيشة .. وشايل ليهو ماشة .(الحديدة البشيلو بيها الجمر) وبصلح في الجمر بتاع الشيشة .
قلت ليهو السلام عليكم على ود الكامل ..
قال عليكم السلام ..حبابك والله . اتفضل .. ياولد جيب الشاي ..
قلت ليهو .. انا هسع شربت الشاي ..
قال لي تشربو تاني مالو بفقعك؟ بسويلك شنو؟ جيب الشاي آجنى..
قعدت جمبو .. قدام الدكان دكانو فاتح شمال في فسحة صغيرة كدي في نص السوق .
قلت ليهو انا اخو محمد الجعلي .. قال لي محمد الكيك؟
قت لو والله ماعارف الكيك دي لكن قالو لي اسألك منو ساكن وين .
قال لي بلخيل بعرفو .. انا بقولو محمد الكيك عشان هو زول كيك .(طبعا وكت يقولو ليك الزول ده كيك. معناها مكمل الرجالة) .. المهم
الزول ده دايرو في شنو؟
قال ليهو والله الزول ده اخوي شقيقي .. وكايس ليهو لي سنتين مالامي فيهو ..
قال لي الزول ده كان ساكن في الدرجة .. لكن رحل لي حي قريب بي جاي اسمو (حي الدباغة) قبل اسبوعين .. كدي اصبر يجي عمر ولدي .. يوصف لك محلو لانهم رحّلو معاهو عفشو .
انا بخلي عمر يمشي معاك عديل.. يوصلك ليهو في البيت ...
بعد شوية عمر جا سايق ليهو عربية دخاخينها في السما . وصوتها زي صوت طاحونة الحجر .. ابوهو كورك ليهو من بعيد .. ماتبطلها ياعمر ماتبطلها انزل تعال .. خلا مدورة كركركر . وجا نازل .. ابوهو قال ليهو عليك الله امشي مع الزول ده لي بيت محمد الكيك .. الكان ساكن جمبنا .. موش رحل الدباغة ولا وين؟
قال ليهو ايوة .. جدا .. وقبل علي قال لي ارح اركب العربية دي ما تخنزر .. (تعصلج يعني) ..
جرينا الاتنين زي ناس العصابة الجارين على الهلكوبتر. وانا شالي الهواء لافحو .
ركبت معاهو في العربية المخلقنة.. المامعروفة زاتها مصنوعة وين .
وشكلو كدا قاعل ينقل بيها التراب.. والطوب ولاشنو مانعارف ..
غايتو يازول العربية دي تكركب وتجعر لامن وصلنا حي الدباغة القالوه ده ومو بعيد كتير .
والمنطقة من ظاهره كدي منطقة ناس اغنياء .
المهم يازول وصلنا البيت.. وقال لي ده بيت محمد الجعلي.. انا ماشي احصل الوالد فتك بي عافية .
انا دقيت الباب .. جاتني مراة ما اكتر من 18 سنه.. وشكلها متزوجة من الحنة والدخان الفوق ايديها ..جاتني مارقة لابسة توبها ومتقنعة تب ... اللهي امك دي ذاتها .. وسلمت عليها قلت ليها ده بيت محمد الجعلي ..
قالت لي نعم ده بيتو وانا زوجته .. انت منو؟ قلت ليها انا اخوه ..
قالت لي انت العبيد؟ قلت ليها نعم .. قالت لي حبابك يا العبيد ..وسلمت علي وفرحت شديد بوجودي .. و اتفضل اتفضل الساعة ساعة فطور ..
قلت ليها محمد وين؟.. قالت لي محمد شغال في سوق البصل .. هسع برسل ليهو انت ادخل النكرم مثواك ..
قلت ليها وصفي لي محلو ..
قالت لي تمشي سوق البصل تسأل من محمد الجعلي اي زول بوريك ليه
وكان مالقيتو أسال منو واحد اسمو الجيلي ود الفكي .. لكن اقول لك قولة .. ماتمشي .. والله مابتمشي الا تفطر .. انا متمنية اشوفك والله عم وليداتي ..
انا قلت ليها وليداتك ؟ انتي عندك وليدات كمان؟
قالت لي ادخل لاجوة سلم عليهم .وانا هسع برسل لي محمد يجيك في ربع ساعة بس ..
اها دخلت لقيتك انت بتلعب. عمرك زي تلات سنين .. واختك الاسمها ماجدة دي يمكن عمرها شهرين تلاتة ..
وقعدت اتونس معاك واسال فيك انت اسمك منو؟
قلت لي انا اسمي دمال . قلت ليك دمال ودمنو؟ قلت لي دمال ود محمد..
مسكتك كدي سلمت عليك لامن بكيت .. وقلت ليها ..اديني البنية .. جابت البنية ماشا الله.. من شافتني بقت تفرفر وتلعب وتضحك ..
وامك اظنها رسلت ليهو واحد بتاع كارو من بره.. يمشي السوق يناديهو . وانا بسمع فيها قالت ليهو قول ليهو في ضيف في البيت .
اها كلها دقايق .. والباب دقه .. هي مرقت بره فتحت ليهو الباب بي بسمة وفرحة وهو سلم عليها باسم وشو منور زي شمس الضحى . ودقنو زي دقن الصحابة .
وانا من جوة الاوضه بعاين ليهم .. الناس ديل بترايدو ريدة . انا قلت ماشاء الله .
اها وكت جاء داخل وشافني .. غلبو يتكلم.. وماقدر يسلم علي.. بس دموعو كابات.. وبعضعض في ايديهو ..
وانا مسكتو علي واتحاضنا .. وانا غالبني اجيب كلمة .. وهوغالبو يجيب كلمة . وامك دي واقفة في الحوش شايلة بتها وتعاين لينا وتبكي . وانت ماسك في طرف توبها ..
المهم بعدالسلام انتهى.. وطلع غسل وشيهو.. وجاب لي ابريق غسلت وشي..
بقى يسأل فيني من البلد .. وموعارف ابوهو وامو الاتنين ماتو .. قلت ليهو ابوك الله يرحمو اتوفى .. الزول ده بكى على ابوهو جنس بكى قلت هسع كان كلمتو بي امو .. يعمل شنو ؟..
طبعا زي ما انت عارف انو محمد موشقيقي .. بس نحن من قمنا قمنا امنا واحدة .. وابونا واحد . ومابنعرف حاجة اسمها ده اخوي ود ابوي ..
انا طبعا زي ما انت عارف امي ماتت وهي في الوضوع .. وابوي اتزوج خالتي . اللهي حاجة السرف ام محمد الولدتو .. وهي الربتني . لامن الموت شالا ماحصل حسيت انها غير امي .. مرات بحس انها بتريدني اكتر من محمد .. وابوي بريدني اكتر منو .. وابوي مظهر الحكاية ودي الحاجة الخلت محمد اخوي يكره البلد ..
.
اها محمد اخوي سألني ابوي الحصل ليهو شنو ومات مالو ؟ وكدا .. وكل مايسألني من امو.. بلف من الكلام .. قلت براي خبرين اتنين قدر ديل قاسيات عليهو ..
بعد مسافة قال انت مالك . انا كل ما اسألك من امي بتلف من الكلام؟؟
.. قلت ليهو امي الله يرحمها اتوفت ..
قال لي ماتكضب يا العبيد .. وسيب الهظار ..
قلت ليهو والله العظيم .. وحات الذرية دي .. وختيت ايدي فوق راسك انت ..
طبعا ده زمان وكت اكنا جهلاء .. وبنحلف بغير الله . لكن هسع فهمنا الحمد لله ..
صدقت ياحاج العبيد .. الحلف بغير الله لايجوز .. قال عليه الصلاة والسلام . من كان حالفا" فليحلف بالله او ليصمت . وفي حديث اخر . من حلف بغير الله فقد اشرك ..
ويواصل العبيد في حكايتو وجمال يسمع .. اها وكت شافني حلفت فوق راسك ..
انقد بالبكاء .وبكا بكا بكا .. وقال لي والله امي يكون سبب موتها فرقها مني .. قلت ليهو لالا امك كانت عيانة براها ..
عشان ما يعيش عمرو كلو ندمان ..
المهم في الوكت ده امك جهزت لينا الفطور.. وقعدتا اكلت معاهو .. ياهو محمد اخوي ذاااتو .. نفس الطيبة والرجالة والفهم .. محمد اخوي راجل نيتو بيضاء وقلبو زي قلب الحمامة ..
كان شافلو زول عيان ساي بقعد يبكي .. مابستحمل . موزي انا .. انا قلبي قاسي زي ابوي ..
حصل يوم شفتو ضبح ليهو بهيمة ؟ ..
جمال قال ليهو لالا ولابحضر الضبيحة لانو قلبو مابستحمل يشوف الدم .. ولايشوف الخروف بفرفر من الموت..
اها بعد ماكمل بكاهو على امو وابوهو ..
قلت ليهو ماشاء الله اتزوجت مراة فاضلة .. وكمان جبت ولد وبت .. ماشاء الله تبارك الله.. محمد اخوي ياريتو لو ابوي حي عشان يشوف نجاحك ..
قال لي وينو نجاحي يا العبيد اخوي.. انا كان نجحت كنت جيت في البلد .. قعدت مع ابوي وامي .
انت الفائز يا العبيد اخوي انت الفائز ..
قلت ليهو اها اتزوجت من وين؟ والمراة دي شن نفرها؟ . وهي طبعا قاعدة بي غادي مي سامعانا .. قال لي دي قصة طويلة .. زواجي من المراة دي يستحق الناس يكتبوهو في كتب التاريخ ..
قلت ليهو طيب احكي لي ..
قال لي اصبر النشرب الجبنة ونمرق لابره ..
الى اللقاء ..

عجاج المسك
الحلقة 9.
بقلم طاؤق اللبيب ..
اها الاتنين شربنا الجبنة مع بعض .. وقمنا طلعنا وماشين بي كرعينا كدا على جيهة حي الكوبري (كبري حنتوب) ..
لقينا لينا حتة على جيهة البحر كدا
قالي نقعد هنا تحت الشدرة دي ونحكي .عجايب الدنيا ..
عارف يا العبيد اخوي .. انا وكت مرقت من البلد صممت انو ما ممكن ارضي ابوي الا اجي مالي يميني مال .. وده كان هدفي . وماكان عندي نية مراة ولازواج .
لكن كلها قسم واقدار .. زي ما قالو على كف القدر نمشي ولاندري بالمكتوب ..
اها اول من مرقت مشيت عطبرة . عندي ناس بعرفهم كانو شغالين في سوق شندي . ناس ود الوكيل اكان بتتذكرهم .؟
الناس ديل مشيت ليهم قابلوني مقابلة شينة خلاص ومارحبو بي نهائي والسبب شنو ماعرفتو ..
وقلت اصلي مابخليهن الا اعرف سبب المعاملة دي شنو؟
لقيتهم شغالين في السوق في عطبرة . وكان المفروض القى لي معاهم شغل كويس .. لكن مقابلتهم طممت بطني ..
اها في واحد بقولو ليهو ود المفتش.. راجل يوزن قبيلة . بعرفهم معرفة لصيقة .. مشيت ليهو في دكانو .. وقعدت معاهو وقت ليهو انا من شندي . وجيت كيت كيت ..
ودايرك تعرف لي الناس ديل انا غلطت عليهم بشنو؟
قال لي باكر تعال لي هنا انا بديك الخبر الاكيدة ..
كل الايام دي كنت ببيت في لوكاندة في السوق.. اسمها اسمها لوكاندة المطبعجي .. اظن خمسة يوم انا المعاي تب شبهت تنقطع .. وباكر مشيت لود المفتش.
قال لي الناس ديل انا مشيت ليهم امس المساء وسألتهم .. قالو المشكلة كلها من ابوك ما منك ..
ابوك قالو سمعهم كلام ماياهو .. واتهمهم بالسرقة .. وهم رحلو من شندي بي سبب الكلام ده.. لانو ابوك عمدة بلد .. وهم ماهم قدرو عشان يسوو معاهم مشاكل ..
لكن يامحمد انا بخدمك لوجه الله.. لانك ماعندك ذنب في المشكلة العملها ابوك ..
انا عندي اخوي وراجل صاحبي .. شديد في بورسودان .. وعندو شركة ترحيلات . ومحتاج لناس قارين ومتعلمين . وانت زول قاري ماشاء الله .. انا هسع بضرب ليهو تلفون واكلمو .
انا وكت ود المفتش قال لي بوسودان وما بورسودان .. هبشت جيبي لقيت ماعندي مصاريف بتوصلني لغاية بورسودان ..
ود المفتش عندو صندوق بتاع خشب كدي فيهو تلفون قديم .. دخل جوة .. جا لاب الصندوق .. وختاهو قدامو .. ودخل ايدو في جيبو طلع المفاتيح فتح الصندوق . وطلع ليهو تلفون قدر بابو الجاز . وعندو نوتة طلعها من جيبو .. وبقى يدور في الاعداد جك كررررررررر جك كررررر .. المهم يازول غايتو اتصل على زولو في بورسودان .. وكلمو وداك وافق . وانا همي كلو في جيبي الفاضي ..
بعد انتهى من نضمو معاهو .. قال لي تمشي للزول ده في بورسودان.. في الحتة الفلانية الشارع الفلاني .. اسمو بابكر ود المرضي اي زول في برسودان بعرفو ؟
وانا طبعا" اصلي ماقلت ليهو ماعندي حق البوصلني ليهو .. مشيت طوالى على ناس اللواري البجن من كريمة جايبين التمر ..
اول لوري وصل.. وقفتو قلت ليهو انا عتالي. محل مابتنزل معاك ..
قال لي يازول نحن بي عتالتنا .. تلقاهن قاعدين مالهن حد .. امش اقعد معاهم قدام دكان فلان .. اكان ربنا يديك معاهن طرف ..
جريت جري لي الزول القالو لي .. وادوني شوال فاضي.. قالو لي اطبقو فوق ضهرك واشتغل ..
يومي داك كلو اشتغلت عتالة .. وتاني يوم برضو جيتهم من الصباح
وللاسف الكبير. الشي الحازي في نفسي.. انو في واحد من ناس ود الوكيل شافني بعتل في التمر من اللوري .. خفت واحد فيهم يقوم يلاقي ابوي يعيرو وينبذو بي ولدو الشغال عتالي في سوق عطبرة ..
لكن يازول قلت مامشكلة انا شغال شغلة شريفة يقولو الدايرين يقولوهو .. يازول غايتو لامن خلاص ضمنت روحي قروشي بتوصلني بورسودان ..عزمت السفر . لي بابكر ود المرضي ..
لكن المشكلة قطر بورسودان بجي بعد خمسة يوم قالو..
طوالي تاني يوم الصباح ركبت لي لوري ..قالو ماشي مدني . وقالو لي من مدني هنا اركب اي حاجة ماشة بورسودان ..
المهم يازول ركبت من عطبرة وجيت مدني .وفي الطريق اتعرفت بي ناس اللوري الماشي مدني لقيتهم من غرب شندي من النوراب.. والاودلاد طلعو رجال ولاشالو مني قرش.. وعرفو ابوي . المهم يازول في مدني برضو لقيت لي لوري شاحن بطاطس ماشي بورسودان.. وصاحبو من منطقة في النيل الابيض اسمها (الدمبو) .. ركبت معاهو قدام ومبسوطين ..ونتونس ..وكل مانجي لينا في قهوة نقعد نشرب قهوتنا ونصلي ونقوم تاني نركب ..
اها يازول في قهوة كدا نزلنا يادوب والوكت صلاة المغرب .. وفي كم عربية كدا برضو واقفات في القهوة دي . شفت لي مرة زي عمر خمسين سنة كدا ولا اكتر ..
المراة دي شايلة ليها طفل شكلو عمرو ماتام شهر . صلينا المغرب وهي شايلة الشافع وقاعدة ليها فوق عنقريب مجلد بي قد ..(القد.. شكل شريط من جلد البقر) ..
بعد صلينا حسيت بالمراة دي مقلقة شديد ..شالت الشافع وجاتني ..قالت لي ياولدي الولد ده امو بتي مشت على الخلا تقطع الجمار .. (تقضي حاجتها)
وهسع تمت نص ساعة ماجات ..هاك امسك لي الوليد ده .. النمشي اشوفها مايكون حصل ليها حاجة ..المحلات دي بي جاي مليانة بالدوابي ..(ثعابين) . الله يستر ..
انا قلت ليها جيبيهو ياحجة مافي مشكلة.. امشي شوفيها ان شاء مايكون جاتها عوجة ..
المرة مشت .. وانا انشغلت مع الولد .. وبقيت بلعب فيهو واعاين في كرعهو وايديهو ... والواطة ماشة مضلمة ..
والمراة طولت .. اظن قريب نص ساعة ماجات .. انا قلت لي زولي المعاي .. اسمو عبدالله .. بقولو ليهو ود الدمبو .
عليك الله امسك الولد ده النمشي نشوف الحريم ديل مايكون جاتن عوجة.. وجريت جاي وجاي . مالقيت اي اثر لي بشر .. جيت راجع شلت لي بطارية من صاحب القهوة.. ومشيت افتش بين الشدر والوغش .. يمكن قريب الساعة .. وانا لازم القاهن .. عشان اديهن شافعن ده واواصل مشواري .. وود الدمبو ذاتو راسو اتملا من الشافع الدرعوهو فينا ده .. ونحن مانخابرين نوديهو وين .. يازول انا قريب الساعة 8 ونص مالقيت المراة ولابتها .. والعربات كلهن فاتن. ونحن واقفين ..وجن عربات تاني ونحن واقفين.. نتلفت زي الناس العطشانين في الخلا .وراجين الفرج من الله ..
اها بعد شوية الولد الشغال مع سيد القهوة.. قال لنا المراة دي خلت ليها سبت هنا تحت العنقريب الكانت قاعدة فوقو ده ..
جيت انا جاري وشلت منو البطارية وفتحت السبت لقيتو ملان هدوم .
وفوقن ظرف حق جواب جواهو ورقة .
بقيت بقلب في الهدوم . لقيتن كلهن هدوم الشافع. قمصان . ومرايل وريّالات (بتشديد الياء. الريّالة قطعة تعلق على رقبة الطفل لتمتص اللعاب السائل على صدره) ..
اها بعد قللبت الهدوم كلهن وبركتهن . قطعة قطعة .شلت البطارية وفتحت الظرف ..وطلعت الورقة عشان اقراها اكان القى لي فيها عنوان ولاحاجة توصلني ..
لقيت الورقة مكتوب فيها ...........
((اسمع يابن العم.. الطفل ده امانة في رقبتك .. نسألك منو يوم القيامة.. لاتسلمو حكومة . ولاتسلمو ملجأ . كان سلمتو لي زول ان شاء الله تحل عليك اللعنة السماوية .ولاتفرط فيهو . تكون مسؤول عنه لامن يرجع لي اهلو ولا يكون معاك .
الطفل ملائكة والطفل نعمة ماتفرط فيهو ..))
ده الكلام الفي الورقة ..
انا طبعا يا العبيد اخوي ..وكت قريت الورقة دي الدنيا ضلمت في وشي . وبقيت زي الزول المفلس وفرضو عليهو دية مقتول .. من الهم والغم الانكبا فوق راسي .. ود الدمبو معاي واديتو الورقة قراها ..
قال لي اسمع يا الجعلي .. قالو الصقر ان وقع كترة البتابت عيب .. مادام دي امانة من الله جاتك امسك الشافع .. امكن ربنا يرحمك بيهو . ويفتح عليك فتحأ من عندو ..
انا قلت ليهو ابدا والله مابقدر.. يعني اوديهو وين وانا ماعندي مراة .
وحتي امي طفشت منها انا زول عزابي .. الله ورقبتي مارق على باب الله .
ود الدمبو قال لي ياخي عرس وربي الولد معاك ..
قلت ليهو والله يا ود الدمبو انت اظنك ماك نصيح.. اعرس بي قملي؟
قعدنا متحيرين والساعة عشرة جات ..
اها في واحد من الحلة القريبة للقهوة كان قاعد .قال لي بتاع القهوة الناس ديل مالهن . هو فعلا كان بعيد شوية ..
بتاع القهوة بعرفو قاليهو حاصل حاصل ..
قال ليهو دي المراة الكانت قاعدة شايلة الشافع الكبيرة المشلخة دي؟
قال ليهو ايوة ياها .. قال ليهو ياخي دي ركبت في عربية قبيل بعد صلاة المغرب.. وانا ذاتي استغربت فيها مالا خلت الشافع وركبت .. قايلكم معاها وقايمين وراها ..
طوالي قلت لي ود الدمبو قوماكا .. انا الولد ده بغشيهو اقرب نقطة شرطة ...
قال لي يازول انستر.. وابقى راجل ..ماتخلينا نغير راينا في الجعليين .... قلت ليهو اها ياود الدمبو قول لي انت اوديهو وين؟؟
قال لي اصبر نصل بورسودان وانا بساعدك وبوعدك بي كدي ..
اها يازول قبل مانركب.. اناقلت للجماعة ناس القهوة والزول المعاهم ..
كان جا زول سأل من الشافع ده ..كان اهلو ولاكدي ..
قولو ليهم انا في بورسودان ..مع بابكر ود المرضي في السوق عندو شركة ترحيلات قالو اي زول في بورسودان بعرفو .
وركبنا ومشينا بورسودان والشافع معانا ..واشترينا ليهو لبن وملينا الرضاعات تب .(البزازة) ..
وزولي ود الدمبو سايق ويضحك ..وانا هم الدنيا نازل فوق راسي ..
والشافع لاببكي ولا بتحرك ..بس يصحى ياخد ليهو لعبة وفرفيرة ويرضع شوية وينوم ..
طبعا ياجماعة دي كلها قصة بحكي فيها محمد .. للعبيد اخوه حصلت سنة 1971..
ومواصل قال ليهو .. محمد اخوي ياجمال يحكي لي.. وكل مرة بقول لي الكلام ده سر .
جمال قال ليهو دقيقة ياعمي ماتكمل ..
وقام داير يطلع من الاوضة كرعيهو ماتن .. لامن برك على ركبيهو ..
وقام يا الله اتكل بالحيطة طلع بره .. استفرغ كل الفي بطنو .. لامن طلع المر الاصفر..
وعمو جوة خاتي ايديهو فوق راسو وبقول ياربي تسامحني ..
.الى اللقاء ..