لعنـاية جمـاعة أنصــار السُنة

الاخوة في جماعة انصار السنة المحمدية السلام عليكم ورحمة الله تعالى وبركاتة وبعد ..
غالب السودانيين متوجسين من ما سيحدث خلال مولد المصطفى علية افضل الصلاة والتسليم بينكم كا أقلية ضئيلة جدا وبين بقية اهل السودان الصوفية .. ومع كثرة بحثي عن اسباب تقصدكم للصوفية لم اجد له مبرر سوى طيبة ومسالمة اهلنا الصوفية .. لذا اقترح عليكم ان توجهو جهدكم لمحاربة جماعة السلفية الجهادية فعلى الاقل بينكم وبينهم تار بايت وحادثة الخليفي وعباس الجرافة قريبة من الاذهان الناس ديل جوكم عدييل جوة جوامعكم وكتلو منكم ناس مرتين .. ولا ما كدة .. لانو بصراحة موقفكم ده بيذكرني بمشهد واحد بتاع مشاكل قابلوهو في الشارع نفرين واحد عضلات تبش وواحد طيبان الطيبان سالمو وقالدو وسألو من وليداتو وعن احوالو وابو عضلات تبش لا سالمو ولا قالدو على طول لما في زولنا بتاع المشاكل ده وقشطو كف وقبل ما زولنا بتاع المشاكل يفوق من الكف راح ملحقو شلوت اها زولنا بتاع المشاكل بدل ما يرد الكف والشلوت لي ابو عضلات ده راح طوالي يكفت في الزول الطيبان .. فدحين ان عندكم شحمة فايرة ومحرقة روحكم اندرعو في ناس السلفية الجهادية دي وليكم علي نحن بقية الشعب حجاز يدخل بينكم مافي اها رايكم شنو ؟؟؟