خلاني ماسوره

بعيدا عن السياسة ووجع القلب ومحاولة لتفريج همومكم دعونا نتامل في بعض المفردات السودانية:
كان يقرأني احد الاخوة السعوديين (ويقراني يعني يقرأ لي) قصيدة سودانية تم تلحينها بشكل جميل يزعم انها اعجبته :
شفت الملاك بإيدي سالمته (سالمته ينطقها بفتح التاء وتسكين الهاء)
بهرني بنوره (بفتح الراء وتسكين الهاء)
وخلاني ماسوره
انا عقلي فارقته
وقد تخيلت ان الشاعر الدكتور على الكوباني قد فارق عقله فعلا بكونه ماسورة والماسورة معلومة خصوصا استخداماتها الحديثة في الرندوك.
وقد جر الموقف ذكرياتي الى حكايات مشابهة حين تخيلت ان الكاشف قد اصبح ماسورة مذكرة (ولا اعرف كيف تكون الماسورة مذكر) حيث قال في رائعة الشاعر عبيد عبد الرحمن ملأ العيون نورك.....لا زلت ماسورك........
واتذكرت ايضا عندما كانت الأغنيات تكتب في مجلة الاذاعة والتلفزيون والمسرح (اقل من اربعين يمتنعون) وقرأ أحد زملاءنا الكبار مقطع من اغنية الحب والظروف فقال:
لو تسافر دون رضانا بنشقى نحن الدهر كله
ما بنضوق فى الدنيا متعة وكل زول غيرك نمله (بسكون الميم وفتح اللام وتسكين الهاء)
أقل حاجة تخلي سفرك حتى لو إسبوع أقله
فقلت في سري يا زول نملة نملة طيب ما ربنا ذكرو في القرأن وفي سورة النمل ما لو طيب... نملة ولا نعبئ (ونعبئ معناها نملأ بس ضرورة القافية جعلتها مربوطة التاء........ والله لو اعرف الناس ديل بس قادرين على التاء دي يؤنثوها ويربطوها).
وقد كان زميلي في الابتدائية الاكبر مني سنا يشرح لي مقطعا في روضتي الغناء كالتالي:
أظل أردد الشكوى .. على ما نلت من وجد
حبيب الروح لا أقوى .. على حمل الهوى وحدي
ولما لم أجد سلوى .. ولما لم أجد سلوى
كسرت ابريقي والدنا .. سكبت على الثرى كأسي
وداعاً جنتي الغنّاء .. وداعاّ معبدي القدسي
وكان شرحه كالتالي :
اصلا سلوى كانت بت خالتو لمن عرسوها لود عمها ورحلت مشى البيت ما لقاها قام كسر ابريق والده (ابوه) ومشى يسكر وفي النهاية دفق المريسة كلها وكسح.....
اها ديل كلهم كوم وصاحبنا المشى اديس ابابا داك كوم تاني..... ياخ من يوم ما عرف ليك عملة الحبش دي اسمها "البر" شابكنا ليك يا جماعة الناس ديل نبرهم؟ ويقصد ندفع ليهم قروشهم وكان دائما يقول للاخوة الاثيوبين خصوصا الاناث منهم "لن تنالوا البر حتى تنفقوا مما تحبون".
كنت عاوز استرسل في موضوعي لكن خفته يكون كلام ساكت ...والله عندي واحد صاحبي سعودي هنا مستغرب في حاجتين "كلام ساكت" وقصة قام عمل كذا وكذا .....مثل ان تقول..." قلت ليه يا فلان ما نمشي قام زعل ولمن اصريت قام رقد عديل".
بالله في ناس في الدنيا دي احلى مننا..........؟؟؟؟