المومياء..

سمعت خبرا" يقول أن حزب المؤتمر الوطني بصدد ترشيح عمر البشير < خسارة الإسم والله > في الإتخابات الرئاسية القادمة < دة لو عملو إنتخابات أصلا" > لأ والأظرف من كدة قالو ما عندهم مرشح غيرو !!!
لكن المحيرني ح يقولو شنو في الدعاية الانتخابية ؟؟؟
لو بياخدو بي رأي شخصي الضعيف أنا عندي ليهم أفكار .. يكتبو الآتي :
إنتخبووووووووووووو مرشحنا الدائم , الأبدي , الأزلي .. الفاقد الأهلية .. منتهي الصلاحية .. المطارد من الجنائية .. الذي قسم بلادكم .. نهب أموالكم .. شرد أبناؤكم .. قتل اطفالكم .. و له ميزات خاصة , ممكن يحلف طلاق ولا يبر يمينو لا يطلق .. و يمسك عصايتو و يرقص 24 ساعة عاااااااااااااادي .. لأ و الميزة الأجمل إنو لا يكل .. ولا يمل .. و لحدي هسي يعمينا ما شفناه مات .. أها في مواصفات أحلى من دي ؟؟
أما إن سألت عن المؤهلات .. الزول دة ظابط في الجيش و شرطي في نفس ذات الوقت ..
أما إن سألت عن الخبرة .. الزول دة إشتغل رئيس لمدة ربع قرن من الزمان .. خبرة ربع قرررررررن يا جماعة يعني ماف خبير أحسن منو ..
أما إن تحدثت عن الغلطات الإرتكبا .. ف عادي يا شباب ماف زول بتولد متعلم ,, إنتو أدوه فرصة تاني و أي زول بتعلم من غلطاتو ..
إنتخب مرشحنا و أحصل على فقع مرارة زيادة .. سارع الآن الفرص محدودة .. التوصيل داخل الوطن البينزف مجانا" .. و العفش داخل البص مسؤولية صاحبه .. هي بسم الله دة شنو أنا إبتديت أخرمج !!!
أخير أمشي أنوم على أمل أصحا في يوم ألقا الوضع إتغير و الرئيس اللي مما إتولدنا و قمنا شايفنو دة يجي واحد أحسن منو