وليد دارفور بمشي معاك الليلة

إلى أهل دارفور دفتي المصحف وسلاطين المجد التليد.... عيال السلطان علي دينار والذي كان يكسو الكعبة ويطعم الحجاج بمحمله الشهير والذي حفر الآبار لسقيا وغسل حجاج بيت الله من زوار المصطفى عليه السلام ولا زالت الآبار تسمى بأسمه.
إلى كل زملائي وأحبائي من أبناء دارفور للمرحوم أبو خليل طيب الله ثراه وإلى أخي عمر قمر الدين. والى كل أهلنا بالحصاحيصا من قبائل الفور والزغاوة.


وليد دارفور

أبـــــشر بالــذي ســواك مــن ســــلطان قديم مذكور
بكانك دفـــة الــذكر السـحـــر الفـي الكـتاب مـسطور
ابيار علي الكسوة والمحمل والسعي العظيم مشكور
بمشي مـــعاك مـــحل ما تدور بس قل لي شـن بتدور
وحاشاك انت مابتدور
لو قلت الشــــمس طائعة ذليلة ليك بتزور
ولو درت القــمر لمح الطرف في كفك يدور
لو الزمن في لحظة فكر أوحاول عليك يجور
واتنادى اللئام يوت من كان خنيت مكسور
وانــتـظمت خـلائق الأرض في ســلك الــتـليف مـــــــغرور
تلقانا في حد السلاح سن الرماح وما بنرتد سهم مكسور
في داك المشهد المحضور يرخص الدم العزيز ممهور
ضمة ما بتنضام ولا بتنلام ولاك جـــضلاي ولا مقهور
وبتا ما بنمضع فيك بنخطب ليك بنات الحور
بس قل لينا شن بتدور وحاشاك انت ما بتدور
نفخر فيك باصل العز ونننسج ليك شراع من نور
ونفتح للسلام طاقات ونسلم من حروب وشرور
ويخش الضو على الجنيات ما يخلولنا ارضا بور
وتلقى الجمع جت واقفين ننظم في الغمام بالدور
نسقي الأرض بالافراح ونسكب في كؤؤس بلور
ونترس في المساحة خدار ونطلق في فضاها بخور
ويقدل الطير الحدي شبعان وحال الفال عديل مستور
ونغني في فضا الأحزان يتبدل الغم العلينا سرور
نغني في زمن مسحور بمشي معاك وليد دارفور

نغني :- إيدا ما بتحش العيش تنقطع تنشل
ونفرا ما بيخدم الديش من الفريق ينسل
الما بتهمه قولة ليش في حال العباد يسأل
ما في خاطره قال معليش ولا متزاوغ اتنصل
تب ما بيشبهه التهميش ومن الحق ما بيزعل
يوم الفزع محمود في قلب النفير مشهود وما حنجل
ما ضن بي فهم إيد ماسكة القلم والتانية في المنجل
قطاع بحور مساك دروب بي علمه ما بيبخل
نفداك يا عشا البايتات الليلة ياك الضل
معاك يا مقنع الكاشفات اليوم فداك الكل
عافاك ..جبل الثبات اللي الحديد بتفل