اديني من طينك بلاد

الروح يمامة
اتوهطت
في الليل حداك
باكر ترك
في الجنة
يادرويش
تهش
من روحي طيرك
ياأشوف في الجتة غيرك
ياتنادي النحلة من عرق
البنات
تخلق سعادتك من ندم
من اوردك سكك الهلاك
منذ القدم
من اوجدك كائن يباس
من العدم
او ارسلك للدنيا طير
ياكلمك تبقالو خير
اديني من طينك بلاد
يكفيني من وطن الحبيبات
البعاد
يسقيني من عطشك
اذا بارك غماماتك مسيح
يمرقني من نارك نصيح
يملاني بي شوقك
اذا راود يماماتي
الوحيح
ينقذني من هذا
البلل
او الذلل
او ريد كسيح
يعفيني من ذل السؤال
يالله
هاك ذنبي الجلل
قايضني ريح
وانثرني ريح
شتتني فوق جبل رماد
واديني من طينك بلاد .....
.....
د. معز احمد دفع الله

كل عام وانت

كما تشتهي الازهار

...ضؤآ في فنار البال

تومض

مثلها الأطيار تبني

عشها فوق الوريد

من الخيال إلي الخيال

ونجيمة سبرت

نوايا الضؤ

ترقص حين تربض

في فضاء النفس

يا كيف يكفهيها إشتعال

من قال ان الروح

حين تسوح تخبو

إذ ربما ضل السؤال

ياكيف يخبرك الحنين

عن الندي

وعن المدي

والأغنيات

يا كيف تخفت شمسها

وتهيم حيث تهم

كيف تجيئه في الحلم

تلبس ثوبها القمري

من دفئ الأماني

والمعاني

والثريات التي في الروح

هادن شوقك الفياض

خوفآ من سحابات النزوح

واستعر صمت الكمنجة

والنوي

منها

إليها

ذكريات التوق

بابها المفتوح فيك

التعرف بالوميض الذي

في عينها اليسري

بكاء طفل القلب

حين تغيب

إندهاشات النسائم

غب خصلتها

أفتتان الظل

حين تضج ضحكها

إرتباك الفراش

حين تجود بالطل

تدل

تشوق التحراق فيه

وتظل تسمو

كلما حطت يمامات

علي غصن الهوي

وتمعن في النوي

تخاتل في الهديل

ولا تبوح

د.معز احمد دفع الله

فاطنه صهيل الخيل
في الروح
ضفاير النيل
وجموح النار
والمطره
فاطنه الشدره
مشاطا تساب التربه
نكهة تودر طعم الغربه
فاطنه غناوي
القمر الجاي !
ذرة رملة
علي فستان الغابه
توسخ شجرة بن
يا كيف !
نظرة فاطنه
علي عراقي الليل
مرقوعة ضوء
ما غابت بت الطيف !
طرحة فاطنه النيل ..
يا رمشها بانه
ونخله جبانه
وغمدة سيف ..
وانا فوق القيف غرقان
يا كيف !
فاطنه بتنزل آيه
تصبح تايه
و ميس ..
يا تبقى سحابه
و قطعة جنة
وفكرة غابه
ونهر حزين ..
أو تبقي أساس الغنا
في الناى ..
فاطنه القصب حمر
يا ملعونة الريح
كلما تهبب جمر الروح
في السهله !
غليان الشوق فانوس
ما الغربه تنجض بالمهله !
وانا كان مسيتك
فإتوضيت ..
أو داعبت اورادك
كان قاسمتك درب النخله !
وقلب النهر
وكنت
شكيتك
ليك
ومشيت ..

كنا روحا"ودراويش الطين !والطين نبي منا أو نحن مزيج الطين ..والريح _تسابق حق تمضي نحو النهر لكي تتوضأ ..والحقل إنتظر النهر يجئ لكن النهر تبدى في السرحان ..وأضمر شكا"وردا"ورياحين ..والمرج تحسس قدم الناسك في معراج الروح أيا مسكين :خفف عنك دثار الخوف وانزع عنك نعال اهه ..يمم روحك وجهة مريم ..مريم قدم تهرع نحو الله ...

يا قلبى دق..
لكن بشيش
بالله هل ؟؟
شفت الورد
في باقة ماشي
وفي شفافيو بيندي طل
او لمحة من شباك اطل
شباكو شيش
يا قلبي دق لكن بشيش
ينفضح للناس هواك
قول ليه ناشدك من هناك
شايلني ليك براق شلع عبادي شققني الأراك
دوخ شذاه الفجري من التبراوي
لحد جيت
قال لي دير عينيك تحت
شوف السما النزلت
وعامت في البحر
خذ ليك نفس
ام شعاب رئتيك بشر
واسجد وطوف
من بيت لبيت
تلقى امل
بالفرحة قوم ليهو ريش
اهدي الجواهر والحرير
بنت امير
شقيانة في الحر
بسة خيش
نقرش قليبك بس بشيش
كم فيهو قاطع ليك وتر
قل للمك وقتين سفر
سيد مهجتي الما ساد سواك
جاييك اموت مرتاح حداك
سميهو حب،
سميهو جن،
سميهو طيش !
اموت وتسلم لينا يا غالي و تعيش
اموت لبسمة تضوي في الثغر الجميل
زي نيل تبهرج بالقمر
الرملة و القيف و الشدر
ليلك طويل بالغربة جاريها السهر
ما نسيت مواثيقنا القبيل
اصدح بفرحتنا القلوب تصدح معاك
و اموت وفي شفتي غناك
قرقورة صقة على الحجر
عصفورة ضاميها الوكر
مطمورة فضت ليها عيش
شبورة نازلة على اراك
شبورة نازلة على الحشيش
و يا قلبي دق،
لكن .. بشيش

البنت من كحل
والعين من ضفيره
ما قاله المساء
في تنهيدة أخيره
والعطر من قرنفل
والورد كستناء
البيت من ذنوب
لا يتوب
فالرب يغفر
والطير ها
من يمنع البحار
عن حبيبة وشيكة
من يخرج الغناء
من سبيكة
والنخل
ما سيفعل الصياد
في ظهيرة اليمام
من خبأ الكلام
في كلامي
عبأ الذخيرة البنات
أطلق النساء
في البخور
و الكؤوس
يا يداك
تغفري لصبوتي
مذ حضرت
كبوتي
ما قال ناي
لا تمت
مسني نهار
أطلق التنهيدة الأخيرة
آخر الدعاء
ماء
ليس من تميمة
وطير
تحجب البلاد
عن مكاني
والقهوة التي
كما تضن
تستغل حاجتي
إلي المساء
أخبرتني أنني
نسيت طعم الدن
في حناني
في بقعة عمياء
في لساني
وأنني أشهرت
وردتي
البصيرة
وهي أطلقت
لشعرها العنان
وأنني بقيت ساهما"
أجوس
ما برحت
_منذ أن أتيت لحنها_
مكاني
وأنني إنتصبت
بين رعشة الغناء
ورجفة
في صهلة الكمان
والبنت من سماء
البنت_يا تجف_
ماء
أصاب رشها حناني
فالنهر إنتشاء
والبيت لا يذوب
والبيت يا إلهي
من ذنوب
البيت لا يتوب

يا من طيني !
ما تساقط
فوق دربك
من ندى يكفيني
لا تبكيني
فالنوى باتت بلابله
على طلل الهوى
تشجيني
وسألت نبعك
كم سقاك الطل
يا مخلوق
من دل
الورود
إذا طيف الحبيب
أطل
يسكب
من ملاحته الربيع
يضيع
من حسن الشفاه
ويكتفي بالطل
لا قبلات تغفر
للحبيب نزوحه
وجنوحه
المرحاب
لا أبواب
نغلقها
على برد الحنين
إليك
يا مسكوب
في الناس إبتسامة
كدت تسلونا
إذا نهر رجاك
لتحفظ سر بقاءه
في السنبلات
كدت تدنينا
إذا مرقت يراعة
من فضاء الحلم
أفضت ما اعتراها
من كلام
للظلام
كنا كما ناخ الهدوء
على شوق الخطى
نغفو
نرتل
ورد ما أسقيتنا
من نور
يا محبور !

يا محبوبه ..
في مملكة العشق
السادر
شوق الدرويش
الجبة
كأس الحضرة
واللالوبه ..
صوت رفيف
الروح
قرع الطار
هزيم النوبه ..
الشوق الناضر
فتق
في أغصان القلب
بيادر
يا محبوبه ..

في إخضرارها مذهله
دخلت كإرتفاع النشيد
كالشواطئ المهمله
صعدت كالنداء البعيد
قبلتني
ومضت
ايها الملك السعيد
حدثتني حديثاً
ناجزا"
كالمقصله :
معك
أقطع أشجار الأسئله
معك أتيه
في الجهات
لا أريد البوصله
معك
أجترئ المستحيلات
أحطم أقداح اللغات
المبجله
وألعن فيك الهدوء
وسحر الكلام السديد
أسند رأسك المثقله
وأسكر منك
قبيل الوضوء
الأخير
معك أحتضن القنبله
فمنك خلقت الخمر
والتوبة
والطريق البعيد !

الصباح الباهي لونك
وضاحة يافجر المشارق
غابة الأبنوس عيونك
يابنية من خبز الفنادق
شيدتي في جواي صوامع للفرح
وفتحت في دنياي مسارح للمرح
وبقيتي لى سكة وعيون
لاقدرت أطولك شان اجيك
لاقدرت من غيرك أكون
وأنا بيك مالينى الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك الشوق بخور
وفرشت ليك الريد لحاف
لا السكة بيك بتنتهي
ولامعاك مليت طواف
ياريتني لو اقدر أكونك
وضاحة يافجر المشارق
الصباح الباهي لونك
يابنية من خبز الفنادك
غابة الأبنوس عيونك

المشاركة الأصلية كتبت بواسطة ابوعمر

الصباح الباهي لونك
وضاحة يافجر المشارق
غابة الأبنوس عيونك
يابنية من خبز الفنادق
شيدتي في جواي صوامع للفرح
وفتحت في دنياي مسارح للمرح
وبقيتي لى سكة وعيون
لاقدرت أطولك شان اجيك
لاقدرت من غيرك أكون
وأنا بيك مالينى الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك الشوق بخور
وفرشت ليك الريد لحاف
لا السكة بيك بتنتهي
ولامعاك مليت طواف
ياريتني لو اقدر أكونك
وضاحة يافجر المشارق
الصباح الباهي لونك
يابنية من خبز الفنادك
غابة الأبنوس عيونك

...............
وضاحة تعجبني حد الانتشاء
ابدع في غنائها مصطفى سيد احمد
وانت تطربنا بها هنا
شكرا ابو عمر لتواجدك
كن بخير دوما

ما داير
من سجودك
حاجة
غير طينك يضوي !
سبقني عليك دعاك
حفر مروادو
في تلة إجابة
وضل ..
زي مافي جبة
بتحتويك
_لا بت حلال_
من غير كحل ..
وأنا زي بعرفك
من بنيت
راكوبة الروح
التطير في قشها
وتهجس
تكفكف
نارك الخدرا
وتعوم
في نهرها
تهمس نشيدك
في اضان الريح
تمني على امتداد
حلم الجبل ..
وإتلصقت في دمي
من ريدتك
لبانة لئيمه ..
يوم شفتك براك
نارك حميمه ..
ترجعك تالا الحبيبة
دروب قديمه ..
ترسلك حفيان
تجيب نبوة
وغزوتين
يا حرشت دينك علي
زي معصيه
كنا بنريدك
أو نخاف
منك
نزيدك
في الهتاف
يا بلد خاتف سمار
زي دين
خلاسي
ومهرتي التحجل
صبيه
على مقامات اليقين
تغزل دروبا
التشتهيها
وتنتهي
ترسم
على إيدا العصار
نهرك غبار
فناك
على حضن الصقيعة الترتجيك أمل طفيف
وتسبني !
تخدع غناك
بي رقصة غبشة
ومذهله ..
بصرك فنار
أترك على الحفرة
بيحندك
في الطلح
نارك تفج الموية
تطفيها وتقوم
توقد تمر
أخدر
بياكل في القلب
ندمان
وصاحي
ويشتهي
يتعبأ منك ..
ينتر خدارو بلاد
معاك
وبعيدة عنك ..
لا بتفوتك
لا بتجيك
لا بتروي حنك !
لا ضفر شوقك
بحكها من غناك
كلما بتحك
نارا بتزيد
تظهر وحم
في سمرة أطفال المغارب
تنتشي
وتدفق على الشفق
الضفاف ..
يا ضرتي الكوتشينة
قالت زوجتي !
وقنعت
من الليل والصهيل
أدخل براي في جتتي ..
غناي زي قلتي ..
أكش من خلقتي ..
شعرك سبايط عجوتي ..
نورك صلاتي ..
وزلتي ..
يا كسرتي ..
نارك علي محبوبه
ناشرا طيوبا
لا معيوبه
لا مصيوبه
لبست توبا
في حلقة ذكر
لالوبة
هاك مهيوبه
أدخل
بالحضن يا طين !
وقع صوتك
على الغنوات
مرق خطوات
يتاورن الدرب
في نومو
قام من كومو
ينعل يومو
وداك للبلاد الغربة
زادك كربة
نبش التربه
فناك للمنافي ضجر
فضميتك
وفي كيس
صعود الجنة
شميتك
إتكرفت نورك
يا وضئ ..
تكلت غناك
على حيطة ورد
مالت
نفضتها
من عبير ناشف
ومن نوايا قبل
على جيد الفراش
وقمت سجدت
صحيتك