التميز خلال 24 ساعة | |||
العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم | |
قريبا |
بقلم : |
قريبا |
آخر 10 مواضيع |
الإهداءات | |
|
«۩۞۩-قسم المكتبات والتوثيق -۩۞۩» قسم للمكتبات يستضيف الكتاب والمبدعين من أبناء الحصاحيصا بصفة خاصة وكبار الكتاب والمبدعين السودانيين بصفة عامة |
|
أدوات الموضوع | انواع عرض الموضوع |
03-01-2009, 12:01 PM | #31 |
|
جميله جدا
مشكور الشاعر الكبير ازهري محمد علي مشاركاتك اضافه حقيقيه لمنتدى الحصاحيصا تقبل مروري تخريمه ود ام دقرسي دي انشاء الله تكون اتذكرت حاجه |
|
03-01-2009, 12:33 PM | #32 |
|
عزيزى ازهرى لك مودتى ،كم هى عذبة تلك الكلمات التى تحملك لعوالم اخرى وتعيد اليك ذكرى الايام الخوالى التى لن تعود .اهلا بك فىمنتدى الحصاحيصا .
|
هل تريد تصميم او استضافة موقعك الشخصي
كل ما علىك هو مراسلتي على الاميل التالي dafhost@hotmail.com |
03-01-2009, 06:21 PM | #33 |
أبو إسراء
|
الرائع جـداً شاعرنا الكبير أزهري يا مساحات الالق اللا متناهي
نعم إنت شيء آخــــر ومن عالم تاني . راجل وجــــداني ، تغريد إنساني ، بيلامس أعماق وبتجـدد أفراح دائماً تملأني ، هـــنئاً لنا بك وهنئاً للكلمة التي يأسرها حسك الفريد وتقع في شباك إبداعـــك أيها الــــــــرائع متعك الله بالعافية |
|
03-02-2009, 01:51 PM | #34 |
ود العمده
|
ماذا اقول لكم
عموما كل الحب ومزيدا من التواصل ولابد ان اقول ان سعادتى بدينا امين ذات طعم مختلف كيف لا وامين البشرى ذلك الرجل الجميل ياتينى من كل فج عميق سلمى لى على نعيمه وعائشه ومحمد |
|
03-15-2009, 12:43 PM | #35 |
مامون بدوى عبيد
|
.....
سلامات إلى إنبثاق نفسي على – داخلى إلى مصطفى سيداحمد ازهرى محمد على مدخل أول : لمتين متيمم شطر النيل متوقى اليابسة .. ووارد متوكى الغنية .. عصا موسى بتهش فى غيم الإلفة .. الشارد مهدودة القُدرة وفترانة حردان الضل البارد بتوجل لى يوسف فى البير يطلع من بطن البير المارد مدخل ثاني : فات الكان بدينا إحساس بالإلفة وكان راوينا فات الباكى جراحنا وناسى جروحو ولا فى ورانا مدينة .. مدينة فات الصاحى ونحن نغط فى النومة السابعة طالق حسو ولا حاسينا حتحت فينا غناهو الطاعم وفات قنعان من خيراً فينا سلامات يازول يا رائع سلامات .. عوافى سلامات يا خلاصة الخير الفى الناس وترياق الزمن المتعافى سلامات يا زول يا رائع سلامات عوافى ............ ............ ........... محاصر فيك بسأل عن سكة تطلع منك أو سكة تودي عليك بسأل عن مخرج منك ... وليك زى نهر بينبع ... وما لاقى مصب بتمدد عشقك فى أقصى ضواحى الروح لى أقصى نواحى القلب يتكثف بسعة إطلاق الربّ وانا كنت بفلى القلب بسيرتك سميتك حلاب الغيم من ضرع الجدب وطنيتك مارست الفعل .. السرى وحفظت فحولة النيل ... أيام الخصب ولمحتك وانت بتمشى وترقص فى حمامك على حُمة إيقاع الحرب وتكلكل جلد الكلمة الحافة لحبيبة بتفتح مجرى الغنا فى الدم وتفلس باب القلب فيا بنوت الشارع الطاعم قومن كب قومن لى الما قصر فى غناكن .. ضمة ولا إتلوم بى وراكن تب ولو تبقى السكة الجاية ضهب وسلامات يا زول يا رائع .......... .......... ......... البارح عفورتك ركت فى البال رقصت وادت عصفور الريد شبال وطارت من قولة كر ما الزول النهر العصفورة بحرض فى كلاب الحر لا بسنى وداخل فى اللحم الحى راصد كل البسأل عن حالى حرش ضلى على ونتف زغب الخاطرة ... التخطر على بالى ومنع العصفورة تحوم إستجوب كل الناس التجى فى النوم ماتقول !! يازول يارائع ... ومهموم يا مضيع ضى عينيى .. وراك واقف حاحاى لى النوم يا مستف رئة الدنيا شهيق ومشحتف روح الخرطوم كيف حال يا ابوى كي حال يا خال ..... وتعال ! إتفضل على باحة بيتنا .. الطيب ما عون الأطفال ضمد جراحاتك .. تعال من ضلاماتك .. تعال أدينا هينين من صبر السكة أبعد من مشيك والجرح أعمق من حدود الإحتمال السابلة والأطفال هناك قدامك المشوار .. طويل والريح .. وراك كل البيوت إتشرفت .. لى طلعتك والونسه ماكملت .. معاك القرقراب .. والقهقهة مين سمى ترحالك .. غياب ! والغيبة بتزيدك بها لويرتق الحزن المصاب كان بعدك الموت إنتهى يا أقصى حالات الحضور المشتهى يا منتهى تعال فرحنا بى دهشت غناك الحى وحى من جرحك الدامى وفتر حيلك وحى من ضلك الرامى وحمل شيلك تموت متل الشدر واقف تموت واقف على حيلك فيا حليلك يا حليلك بنستناك على صهوة جياد الريح بنستناك فى الزمن اللديح القيح بنستناك على باب الحلم فى غناك بنستناك رحيلك شلهت الدنيا ورتب العالم البى هناك بنستناك وانا تانى وراك .. شن لاحق؟ دهستنى فى بعدك حدود الخوف الداخلة على بالساحق أدينى القدرة التمنحنى بحجمك سعة الشوف لو أقدر أطل من شاهق لو أقدر ألوح لى عيونك تلمحنى وانا ضعفى أمامك فاضحنى سامحنى ما قدرتا أطولك سامحنى ........... ............ ........... شفتك من وجع طالع من برزخ ملتقى النيلين كنت هناك ... وحيدك وكل الناس ... اتنين ... اتنين براك واقف حد السيف براك الما وقف بين ... بين تغازل حلمك الفارع فتح بابين على الملكوت تسلم على حضرة جلال الموت وتفتح فى الارض نفاج إذا امتلأ الفراغ ... بالصوت فيا باطن الاديم أفتح براحات الحنين ... مشرع وأنده لى مدن شاخت أنده لأطلال القري .. الراحت بيوت فى بيوت تمرق من شبر مسرح مدن فاضلة وعالم بى إتساع الحلم بقامة يشتهى التابوت فما لفظ البحر يونس ولا إنسدت شهية الحوت ويا زول يا رائع تمشى بالحسرة .... وتموت ؟؟!! سلامات يا زول يا رائع . ..... |
|
03-15-2009, 12:50 PM | #36 |
مامون بدوى عبيد
|
......
خاطر الحبيبة أزهرى محمد على جرحت ليه خاطر الحبيبة ؟ الحبيبة المشطت عصب التضاريس وهدت على كل الخرايط .. والفراغات مدهونة بى لونا أرصفة المحطات واقده من ريقا الفوانيس جرحت ليه خاطر الحبيبة دى السكة أبعد من حدود الإحتمال والجرح أعمق من بكا الليل والنويح ويوم استفزت قدرتك قيمة المسافات عرفت إنك قليل حيله وفصيح ستفت عمرك فى حقايب الرجعه للسفر القديم مرقت تشهل غربتك وبى توبا تستر عورة الزمن اللئيم ماهى دى الحبيبة الشحتفت روحى ومعطنه فى ينابيع الألق الشاربه من فجر الشروق وما خده من لون الشفق ما هى دى الحبيبة الداخله من بين مسامات العرق رقراق وطالعة زى قمر الدُجى وسايقانى فى كل الدروب ساساق راميانى حد القريفه وقاليانى زى قهوة بجا ما هى دى الحبيبة يومى المشيت مجبور علي السكة المريبة أدتنى إحساسا الرطب وشهرت ضحكتا العذبة ومشت كانت رؤاها بتحتشد زى نار بتسجن روحها فى عود الثقاب وتعهلن مهرجانات الحريق لو كشت الواطة ولقيتا ما كنت ضليت الطريق ودفقت مويتى على الرهاب مشيت ورا الشدر اليمامه دى الرتبت خدر الحنين فى الروح وعبت دوار النشوه فى جسد الندامه وانا كنت مفتون بى تداعى اليابسه فى عرس التساب مشدود على حبل الصعود أفل مشلهت بالأيادى الفوق مشهلت والبدن منحل لفحت من الأرض طرقه مرقت على البحر شاشوق لقيت توب البحر خرقه لقيت درب الرجوع أطول هيا يازولة المخارج وين ؟ لا غلت يداك عن حل غلبت فى الحيل البلمك من حبال الصوت وبندهلك تعالى .. تعالى ما وردت مرحاكه البيوت الناشفه ساساقك عبث شن قدرتك تنسلى من قلب الضلمه الحالكه خنجر من قبس من وين أجيبلك قدرة تستلهم رؤاك وانا جاى من وحشة سنينى المرة بى آخر نفس من .. وين .. ؟؟ أجيبلك قدره بس من وين وانا هد احساسى السفر أنا بندهك لو مره ضفه اتبرجت حلت ضفاير للبحر بندهك لو لبش الموج فى الطمى والشاطئ فى ذروة المد انكسر وأنا بعزمك على مويه عذبة وضل وريف لو هم سقط من طاقه فى حلم الحبيبه وانتحر جرحت ليه خاطر الحبيبه ..... |
|
03-15-2009, 12:53 PM | #37 |
مامون بدوى عبيد
|
......
حضنك البستان أزهرى محمد على مرقت من نهرك جرف أخضر بقامة حضنك البستان بقامة يشتهيك الطل وتحشد الحديقة هديل تنفض المدينه رهام جنون الإعتصام فى بت تفسح ضحكتا الطاعمه تستف ما يشاء الدل مسامات الأزقة ضحك يسلم ضحكتا الدخان !!! جـــــنـــــون نفخ فيها الإله روحو مرق إحساسا من طين الحما المسنون ! فعمَ يتسائلون ! عن الوعد اليقين إذا أنتبذت حفيده الطين أقاصى الجرح دارين من حنين وغنيَت لى فرح وهَاج وحلت زى حلول الروح جسد فى جبة الحلاَج وهاج وحم الخليقه عليها أمشاج إبتلت أمشاج ما تاكت الباب البجيب الريح ولا واربت نفاج ومحتاج لى ضفتين من شوق إذا الهدَام بلغ قيفك أدخلى ما تسع إيديك وامرقى ما يسع كيفك أنا اتسلبط فى لونك عشان اسرقك من شمس تفرَ الضو على أبعد نفق فى الروح ألون من مزيج طيفك منو السماك ضرة المويه ونديدة النار يوم حتحتك فينا الرعاف منو العلمك نسج التباريح فى العصب وانتى بتجلبى الغله فى سنينا العجاف ؟ بخاف تجهرك موية الرهاب وفى السكة بستفك وهم وانا باتجاهك محتشد بالرغبه واحساس اللغم ! أنا متهم إنى البحبك للأبد فكره وبساسق فيك من ذرة بخار المويه لى قاع اللحد البنيات المن حلاتن عشرقن ركن على غُصنى بيقوقن نقدن قندول غناى ونقطن شهد ولبن ... ! وفاتن مشن فاتن مسافة يلمحنك ويمحن فاتن مسافة يكبحن جماح الرغبه والحاح الجسد فاتن مسافة يلفحنك من رمض أو يمنحنك ضُل رتَبى مدخلات العشق فراش بين الرحيق والفُل بناديلك حبيبة القلب ينادولك حبيبة الكل جرف أخضر بقامة حضنك البستان بقامة يشتهيك الطل وتحتشد الحديقة هديل تنفض المدينه رهان جنون الإعتصام فى بت تفسح ضحكتا الطاعمه تستف ما يشاء الدَل مسامات الأزقة ضحك نفخ فيها الإله روحو مرق إحساسا من طين الحما المسنون جنون ..... |
|
03-15-2009, 01:01 PM | #38 |
مامون بدوى عبيد
|
.....
أزهري محمد علي ثرثرة المياه والعصافير لامرأة بالغة العذوبة هيأوني للآن للموت فقط امنحونى جرعة ماء كعادتكم قبل ارتكاب شهوة الذبح امنحوني جرعة -ماء وامنحوا العصافير_ حيزاً للغناء وصلوا علىَّ واقفاً سبحاننى أنا سوف ارفع الأذان فيكم قبل ميقات التجلى فحَّي على -الغناء لا فئة تؤدى الى أختى فاطمة وإلى كل فاطمة فاطمة خبّاره ما مرقت على المطره ولا لاقت أيديها الغيث معلِّقة روحا في حبل الصبر قادوس ولا كفّت من الدعوات على التاكوه باب الروح ولا فاقت من الفاتوها فى درب البحر بتكوس فاطمة حبيبة الاطفال ضاقت المُرّه ما ضاقت فارّه بسيمها في الضلام فانوس غرستها في الارض تيراب لا كمْلت ولا حاقت ولا نَقّر عريقها السوس فاطمة لافتة تؤدى إلى النص ممطوره ومتحاشيه البلل عصفوره في وش الرياح والزيفه والخوف والعلل حمّدْني ودْعِك بالرحيل وقعّدْني دربك بالشلل عصفورة الوطن الجميل يا باقة والايام دول امسينا حاضننك حلم اصبحنا باكنّك طلل يا خيّه بحجم الرهان فى المحنه والخطب الجلل نص: حان الآن موعد اذان الغيث وصلاة المويه على الواطه الحلبت ضرع الغيمة الدرّا الغيمه الانشّت في السماء تبروقه ودشرت همهما من سبلوقة القبله وفتحت بنيان الافق الواسع للطير الرجّع عصفورة قلبي المطلوقة وفرَّ للشمس السلت روحها ومرقت من قفطان الليل ذي قرّه ودعوات القلب الفاتح لطفله اتبرّت من اوزار الطين اتوضّت من درن الاحزان المُره وفتحت للطير الطار القبله يا طير يا طيب يا صالح تحلم بس عالم متصالح ونحلم بالحاصِب في النِّبْله لي وين بنودّي وشينا الكالح من اسئلة الارض ومن نقنقة الغيم الحبلى نحن القصينا جناح الريح وعبينا العالم في طبله يا طير يا طيب يا صالح ارحل ما شاء الترحال في طلب المويه وقوت العام وفِذ ما فَذّ الوز فى السماء أو عام وامرق منسلة حلمى الخاص لرحاب الحلم العام يا كائن - عام قفاك اعوج وما طاب فى البسيطه مقام يا طير يا طيب يا صالح منو الفتح الافق لحَمام فلت من ناب لمخلب عطش جارح يغايض الصحراء ببقّه فى بطن الابل وريق صبار - يضاير الُّجه لآخر فجّه فىذاكرة المياه العذبه وينتخب المطر سلطان وكان..ما كان حديث المويه فى قعدة بداية الخلق ابتدر الغناء الصلصال وكشفت في الهجيج النار اشتدَّ الانين والطلق دخلت في الوجع سرسار وقالت قولتها الفاجعه -الولادة اتعسَّرت وانقطع العشم فى صرخه انقطع حبل الحلم وندَهْنا:- يا حلاّل تَحلّها الواسعه اضيق من رحم ياالله فاض بينا الحنين لطفله حتحتنا فى غناها النضم ويا زوله امّنْتِك غناي وقهيت وراها نجم نجم جاييك والايام وراى مكسوف وخائب ومنهزم أدِّيني من صبرك معاى للزيفة والايام هِدم ادِّيني لروحك درب واتعلمي انّو العشق يعنى الغُنا فى من تُحب يعنى إشتعالك فيك واخضرارك فى القلب قرنفلة ونعناعةِ يا مسبية بي قسَم الوعاظ الباعه براك اديتي الشواذ العِصمه ودخّلتي الاغانى الناشزة بيت الطاعة براك يا طاهرة فى الزمن النجس ومستّفة الحيل بغناك انا ما نسيتك فى الرماد شان ازرف الدمعات وراك وانا لوببيعك ما كان غمدتا الكلمه فى لُب الجفير ومرقتا أعزل فى العراك وانتى فى مفترق الطرق تطمثى تتحسسى السلك الهلاك-وتهبّشى للغله فى بيت النمل بتْفّتشى ماقطّ ماعون من كفاف الاّ وتُراق موية وشى يا واقفة فى باب السقط - تدهشي يمرجحك العطش من بحر الجبل لي دجله عاودنى الحنين لسحرتك ساكت حمَتِْي الخجله انا كل ما شرقت شمس القاك تنقّبي فى اليقين من جلدى وتلعبى فى المفاصل حِجله كل ما شرقت شمس القاك تردحى فى المنابر ((هى النار..هى النار)) ما لهلبت جمره فى كبد الرماد تتشالقى وتاطيها هى النار..... قريبة الموية ومريودة السحاب تاريها مارست الكُمون في روحا وانقطع طاريها غبت للنسيم والغيم ولّبت هواها غادر الشعراء انهار النبيذ فيها كنت كفيف والدنيا قيامه وكل النار بتعاين فيك مندهشه وانا جاييك من عبر تقاطع طالع بين الشوق والوحشة انا جاييك مهموم جدعت فيني علق من يوسف شفتها قامت زي اللهبه طلعت زي السيف من غمدو كنا تداعي الجسد الواحد انتى بتهذي وانا محموم جريت لقّطِتك من عينهم جريت بي احساس الجرى فى النوم كوركتى المد .. المد كان النهر فاتح حضن المدينه سبيل ومادى الايادى تكّيه وانا بين صرختك والبر لوّحت لي آخر غريق ومشيت لقيت قوس قزح فى كتفى وشنّقْتَ الغمام طاقّيه صافحت الحراز للمويه حمّدنى الخريف بي طيّه غنيتلك "قسيم التوبه حدّث لي ابويا عشان ازور الدونكى واجيب لى حبّة مويه" مويه لي بت منسابه وعذبه وصافيه بتنبت فى الجسد اشجار وتنقع النيل الأزرق حرِْدَت منى ودقت ضهر الفيض بالموج ناديتها العِينه... صبّت فى الرحم العاقر وسألت كم؟؟ جرعه بشفى غليل الواطة؟؟ وصبحت طينه طلقت شيطان الريح الهوج ناديت الام المرقت من ضلعى المعوج فرفر صوتها وضحكت مليانه وبرانا برانا اتونّسنا ونامت مبسوطه ورويانه ، وطامنه اتعارت توب المويه - واشتعلت برداً وسلام صعدت سمّوها البرق وهبطت سميتها الطاقه الكامنه وصلينا صلاة المويه على الواطه ...... |
|
03-15-2009, 01:08 PM | #39 |
مامون بدوى عبيد
|
...
أزهري محمد علي نخــــلـــــه وأبنــــوســـــــه يا زوله.. الصوت الطالع منِّى بِدِّي مسامعِكْ راسْ الخيط والشوْفْ البِحسِبْ حَبّ الرَّمل التِحْتِكْ بِعْرِفْ رنَّة ضحكِكْ رقم الهاتف وشارع البيت والخوف البِفْضَح صمتي بِعرفِكْ إنتى يعلم إنِّي مانى المالي هُدومي ومافي الجُبَّهِ إلاَّ إنتي.. زوله.. وكاكاو الدم الفيكْ مين السّماكِ سِفاح مِنْ رِحِم أبنوسه ونخله مين الورّاك إفراز الشهد وأدَّاكِ مذَاقْ مِن ريق النحله كضّابه الغابه القالَت تَشتِلْ أنْناسَه على الصحرا كضّابه القلتى حتفصلِّى توب العِيد للَهَلهْ كضّاب القلتَ ملْحوقه خطاوى المَهَلَه يا زوله.. مخنوقه الشهقه الفي رئتي اليمنى محمومه خلايا الدم والزفره مهمومه شِعاب القفص الصدري مَمْحوقه حُلول الشفره مفقود مُفْتاح الباب السرِّى !تذكَّرْ وين لاقيتَكْ صدفه؟ قالتلى - حبيبة القلب الأولى والفرح المُعْلَن مدسوسْ دسيتْ على رِحم الذاكره النُطفه فى هذا الزمن السوس إتْرَفَعَتْ بيناتنا الكُلفه غنيتِكْ نَخله وأبنوسْ ومَشيِتكْ متقرّب لعيونمِكْ زُلفى !تذكَّر وين لاقيتك صدفه !أذْكُرْ كنَّا عناصر شتّى إكتملتْ بينَاتْنا العِفَه والصيف الاذِع شتَّا صَفَق النِيم إتساقَطْ حَتَّ طَرْفَه لَمَحتِكْ شِلْتَ النفَسَ الأبى يتْخَتَّ يضْحَكْ صَحْوك نوّر كل مناحي الحِتَّه وما اتسائلتَ عن اسمِك حَتّى إتلمينا عليكِ وبَغْتَه دسّيِنَاك من خَفَر الليل فسّحناك المليون ميل صَرّينا تُراب أقدَمِكْ فى مِنْديل وشَهلنَاكِ هُتاف ومديحْ وصهيلْ وقدمناك قُربان للنيل وكان من عِنْدكِ بَدَت لصحوه جيِتك مِنِّكْ شادِّى خَيال الشوق الصهوه بَدينا نفلِّى الروح مِنْ نَزَقَ الشهوه وإترجّلتَ بفعل النخوه جلسنا نخمِّس فنجان قهوه إتشاركنا الزاد والمقْعَد فَتَحنا ملف الزمن الأبْعَد قام الفرح الطوّل مُقْعَدْ لا قيناكْ دلوكه ودبكه إتسالمنا سلام غُبار السِكّه. زوله وكاكاو الدم الفيك مين السمَّاكِ سِفاح ..... |
|
03-15-2009, 01:28 PM | #40 |
مامون بدوى عبيد
|
.....
الترحال أزهري محمد علي علي كيفك تفوت على كيفك تعال وأدخل براحات البيوت في العتمة أو نصة نهار لمتين مبارياك غربتك خلت حدود الرحلة حالات الدوار يوماتي بتلاقيك مدن يوماتي راجيك كم مطار قست الدياروللا الرحيل والغربة نسوك الديار صالبني في وجع النهارات غربة وهواجس وانتظار مرات أشوف بعدك حقيقة ومرات ألاقيه هظار هظار كان اعتذارك بالغياب عن بيتنا محتاج اعتذار على كيفك أمش وعلى كيفك تعال بعادك سلب جسمي وسرق من الغناوي الصوت فما ضراك اذا رد غناك رحيق وعلم الشوق السفور لو نسمة من عطر الوطن تعبر بحلتنا وتفوت كان تنفلت من ضحكتك تحبى وترك براحه فينا... البيوت.. علي كيفك تفوت على كيفك تعال وادخل براحات البيوت في العتمة أو نصة نهار ...... |
|
03-16-2009, 04:36 PM | #41 |
|
جميلة ورائعة كلماتك أزهري محمد علي متعك الله بالصحة والعافية وانت تنثر درر الكلمات والقوافي في هذا الرابط الجميل (منتدى الحصاحيصا) ...
|
وشجرنا من لفح السموم غصنوا الرقص رويان وقع
لا شابا لى ريحة دعاش لا هش لى برقاً لمع |
03-26-2009, 11:33 AM | #42 |
ود العمده
|
نزلت قصيدة ترحال فى المكتبه بصوره مختله ومخله بفكرة النص
ولغة الشعر وسيجد المتصفح لمكتبة ازهرى النص كما هو واجد نفسى محتاجا لتنبيه الاخوه الكرام التاكد من سلامه النصوص التى تنزل فى الموقع باسمىذلك مع كامل حبى وتقديرى ازهرى محمد على |
|
03-26-2009, 11:54 AM | #43 |
مامون بدوى عبيد
|
الأستاذ / الأزهري
لك التجلة كلها وحال احرفي الباهتة والمنصاعة أمام هامة احرفك لست بمقام الذي يخاطبك ولست سوي نكرة أعتز كثيرا بأنني ولدت في جيل أستطاع أن يستمد من وهج أحرفك بريق ينير غياهب العمـــر ، ولست سوي متسول بباب احرفك أسألها دوماً أن تجود علي بحسنة ادراك بعض معانيها ، أسألك الصفح والغفران ، إن كنت قد اغترفت اثما لا يغفر كهذا وأسألك أن تجود بالتصحيح ، ، الخطأ فادح لا يغفر ، ولكنك كريم وإبن كرام ربما أخطأت المطبعة التي طبعت وكررت عن غير وعي الخطأ نفسه ، مذموم أنا وان لمتزمني انت زممت نفسي وان غفرت انت لن اغفر لها ،لم يك قصدي الا ان أوثق علي قدر معيني وحتي هنا إستفحل علي الأمر أضعها نقطة حتي لا يبدر مني مايسيئ لحرف منك انا أقدره حق التقدير ..... مذمومك بكل الرضي مأمون بدوي عبيد |
|
03-26-2009, 12:00 PM | #44 |
ود العمده
|
ترحال
على كيفك تفوت على كيفك تعال ادخل براحات البيوت فى العتمه او نصة نهار لمتين مبارياك غربتك ملت حدود الرحله حالات الدوار يوماتى بتلاقيك مدن يوماتى راجيك كم مطار قست الديارولا الرحيل والغربه نسوك الديار صالبنى فى وجع النهارات غربه وهواجس وانتظار مرات اشوف بعدك حقيقه ومرات احسه هظار هظار كان اعتذارك بالغياب عن بيتنا محتاج اعتذار بعادك سلب حسى وسرق من الغناوى الصوت فماضراك لو رتق غناك جرحى وعلم الشوق السكوت لو نسمه من عطر البلد تعبر بحلتنا وتفوت كان تنفلت من ضحكتك ضحكه وترك بالراحه فى نيم البيوت على كيفك تعال على كيفك تفوت |
|
03-26-2009, 12:09 PM | #45 |
ود العمده
|
عفوا الصديق مامون
اولا لك شكرى وامتنانى لاهتمامك بما اكتب وحرصك على توصيله للقراء ويشهد الله ماقصدت انتقاصا من كل ذلك ولكن سلطة الشعر اقوى من كلانامره ثانيه لك كل الحب ازهرى |
|
03-29-2009, 11:28 AM | #46 |
ود العمده
|
مساء النيل
الى الجميل الاجمل عفيف اسماعيل مساء النيل على المقرن مساء النيل محل ركت عصافيرك وصفق لجناحه فنن مساء المويه والخضره والوجه الحسن مساء الخاطر الطيب صفاء النيه حسن الظن سنين الغربه والعمر البعدى سدى مساء النيل اذا ضاقت قلوب الناس فتح راحة ضفافه وطن مساء النيل على المقرن السنوات مضت يامافى والاحزان علاها الشيب تترامى المنافى منافى والاقدار فى حكم الغيب يتقطر جرحنا قوافى لو هجرت حبيبه حبيب فيا خلى الخليل الوافى ياحامل المسك والطيب حزين قلب الغناء المغبون يفتش نبعك الدفاق ونتشرف نعاين ليك فتر خطونا الساساق ولما النيل سال عنك الجواب كمل ماحاق ولا حتى الخطاب منك يبلل حرقة الاشواق بتتدخل فى قلوب الناس مع شمس الصباح رقراق يااخر عشم داخرنه للزمن الحنين تيراب ويافجة ضلام طول على قمر العشيه الغاب وراك لا مطر ارض ماطر ولاعمه الدميره تساب وشن طعم الرحيل يازول اذا خاطر البلد ماطاب بتتعلق شعاب الروح حنين بفكرة اللبلاب مساء النيل |
|
03-29-2009, 11:41 AM | #48 |
ود العمده
|
شكرا الصديق مبارك اسعدنى انك اول من اطلع على النص اتاحتك الفرصه لاردلك تحياك الجميله والحبيبه على نفسى لك كامل حبى
|
|
03-29-2009, 12:04 PM | #49 |
|
العزيز الأصيل الجميل الأنيق والمنحوت جوانا أبو الأزاهر
مساء النيل عليك ومساء الجمال عليك ومساء النور عليك ويا زول يا أكتر من رائع في الحقيقة كل قصائدك وبدون إستثناء رائعة كروعتك متعك الله بالصحة والعافية وحفظك من كل مكروه .. لك التحايا ولأسرتكم الموقرة ألف سلام .. |
|
04-08-2009, 02:20 PM | #51 | |
|
اقتباس:
اذا كان القران الذي انزل من فوق سبع سموات من رب العالمين واذا كان رب العباد رب الشعر والشعراء عندما يخطئ القاري لهذا القران له اجر ا المخاوله واجر الخطأ فمن كتب عنك فاصاب فله انه اصاب ومن كتب فاخطأ فله شرف المحاوله وليس هنالك من هم ادرى من مكة بي شعابها فاذا اخطأ احد يمكنك تصويبه برفق دون هذه اللهجة المنفرة وشكرا جزيلا يا بحر |
|
|
04-09-2009, 09:22 AM | #52 |
ود العمده
|
ياست البنات ازيك اولا هذا الاسم له عندى محبة لاتدانيها محبه فهو اسم امى قبل ان تذهب
لكنف رب رحيم وانا اسال هل الاسماء هى الاسماء ام ان لا ساده ولاستات هناك وانا اتمنى ان تحمل اسمها هناك شاكر لك مرورك ومشاركتك ويشهد الله انى ماقصدت تعنيفا وانما قصدت تلطيفا وتنقيه للغة القصيده وانا حافظ للاخ مامون ماقام ويقوم به من حفظ وتوثيق عموما شكرا لهتمامك وارجو ان لا نحمل الامر اكثر ممايحتمل |
|
04-09-2009, 01:11 PM | #53 |
|
الحبيب ود العمدة
كيفك ؟؟ النص الاخير جميل ورائع تحية لك وتحية للحبيب عفيف وتسلم ذي ما بتقولها محبتي |
سر الحقيقة ليس ان نحب ما نفعل بل ان نفعل ما نحب |
04-10-2009, 07:00 AM | #55 |
|
تحية بحجم هذا الابداع وهذا الألق وشكراً استاذنا الكبير ازهرى محمد على
على القصيدة الرائعة التى جعلتنا نتحرق شوقاً لنصوص قادمة ,,,, لك التحية استاذنا الكبير فقد تمدد عشقك فى دواخلنا من اقصى نواحى الروح لاقصى ضواحى القلب ودمت بعافية |
حصاحيصا ياام المدائن والقرى
من روحى بقريها السلام كل مانسيم الليل سرا |
04-10-2009, 03:35 PM | #56 |
|
مرحبا بالشاعر ازهري محمد علي . وكلنا فخرا بأنضمامك لأسرة منتدي الحصاحيصا .والله نورت وأضفت ألقا جميلا .نتمني لك أقامه طيبه وإن ماشالك المنتدي إشيلك الرأس. ...... تقبل تحياتي ابوريان
|
|
04-10-2009, 07:20 PM | #57 |
|
فقد تمدد عشقك في دواخلنا من اقصي نواحي الروح لاقصي ضواحي القلب ما اروعك اخي عارف وانت في بطن هذه الكلمات الحلوة عجبتني شدتني جذبتني لذلك مديت معابر شوقي ليها مع تحياتي لك ولاستاذنا ازهري محمد علي
|
|
04-11-2009, 09:27 AM | #58 |
ود العمده
|
شكرا الاحباء عارف محمد جبو ابوريان تسلم رؤوسكم كم انا سعيد بحضورى معكم ولا شك انا
رحم هذه المدينه يسع كل هذا الحب |
|
04-11-2009, 09:55 AM | #59 |
|
العزيز / ازهرى
حبابك الف ... ومنور المنتدى والمكتبة ...والشوق بحر ...وشعرك النضير يعطر المساحات وينسرب حتى المسام .. بالمناسبة بحثت عن وضاحة بصوت الصديق المصرى اشرف عويس فلم اعثر عليها ،فلذكرى اليك ، هذا الفديو : |
|
الذين يشاهدون محتوى الموضوع الآن : 1 ( الأعضاء 0 والزوار 1) | |
أدوات الموضوع | |
انواع عرض الموضوع | |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
ترحيب بالاستاذ ازهري محمد علي | بابكر عبد الرازق بخيت | «۩۞۩-المنتدي الاجتماعى-۩۞۩» | 17 | 02-05-2009 07:30 PM |
مبروك الرائع ازهرى دياب | العشي | «۩۞۩-المنتدي الاجتماعى-۩۞۩» | 9 | 04-22-2008 08:41 AM |
دعوة لكم جميعا لحضور سهرة النيل الازرق مع ازهرى دياب بالاحد | عمار | «۩۞۩-منتدى الحصاحيصا الحر-۩۞۩» | 2 | 04-05-2008 08:00 PM |
مكتبه الشيخ السديس | ABDALLA | «۩۞۩-المنتدى الاسلامى-۩۞۩» | 0 | 05-23-2007 05:05 AM |
من روائع الشاعر ازهري محمد علي | omran | «۩۞۩-منتدى الادب والثقافة-۩۞۩» | 0 | 05-08-2007 10:19 AM |