التميز خلال 24 ساعة | |||
العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم | |
قريبا |
بقلم : |
قريبا |
آخر 10 مواضيع |
الإهداءات | |
|
«۩۞۩-منتدى الحصاحيصا الحر-۩۞۩» ساحه للحوار الحر والمواضيع العامه التى تهم كل ابناء مدينة ومحلية الحصاحيصا بصفة خاصة وكل السودانين بصفة عامة |
|
أدوات الموضوع | انواع عرض الموضوع |
#1
|
||||||||||
|
||||||||||
كفاية ... كفاية.............شعر : هاشم صديق
كفاية ... كفاية
ءاتشرقت الليلة في وكت العِصير قحيت قحيت وقحيت لامن دموعي اتْحتلّن وفي حلقي حسيت الحبال اتْقطّعن . ........ قحيت بكيت قحيت بكيت لكزوني قالوا - القُحة صبحت حسه بس ( صم الخَشُم ) وأنا خشمي ما طاوع بَلَم جلجل تقول صرخة ونفير ............ أنا أصلي الليلة كُت مغيوظ ومتكرفس أساي مجدوع وملطوع ومتوسد حصير ............ قحيت بكيت قحيت بكيت قلبي دقدق بس تقول داير يطير .......... يا ربي ده منو الطراني وكان نساني الليلة عشرق بي سماي عكّر رؤاي تقول نذير ؟!! ......... في المثل القُحه أحسن من تصُم يازول خَشُم . صميت خشيمي اتوجسو قالوا السُكات تدبير خطير ضد اللوائح والنُظُم .......... قحيت بكيت قالوا - الدموع والقُحه بمبان بس الهتاف جواك كَتَم ......... نان أنا شِن أسَوْ ؟!! لا قُحه لا وحّه وهتاف في السر كمان لا صرخه أنّه وبصقه من سن القلم ........ يا أم جمعه أصلي ممغوس من هوان ( ثورتنا ) تعسيما ودَلالا ثورتنا من يوم جمعه لي يوم جمعه زي يوم ( الدِلالة ) وأخدنا رمضان كلو راحه وجانا برضو العيد اجازه . ........... ثورتنا لا صبّت مطيرة لا ( خاصم ) سحابا فريع ( حرازة ). .......... ثورتنا زي الدايْر يبيع ( السمنه ) راس مال وسوق والحال يمِش والسوق يسوق ودايْر يعرس . قام سِها ساقو الخيال حلّق وطار وصل السما |
10-12-2012, 02:53 PM | #2 |
|
عرّس فِرِح جاب الولد ءالا الوليد قلّ الأدب قام ليهو رافع للعصا لوّح ضرب ءالا بس ويااا .. خسااااره في السرحه طاااااش كسر القزازه (1) ........ يا أم جمعه لا ( مولانا ) لا ( سيدنا ) لا ( سانتانا ) يوم أدونا ( كسره ) ولا ( مُلاح ) لا قادنا فارس للنزال لا عومنا لي قيف الصباح نحن بس ( كورس ) وكوم مغموم مصنقر في الجراح فوقنا عسكر خُلفا ساده تاريخ مسيخ شربات فسيخ - وأفلام معادة وأصنام عبادة وهوان وِسادة وسُكات صراخ .......... يا ( أم جمعه ) ( دقي المحلب ) في الراكوبه اتكرّعي صبرك ولسعة جوعك وفوق لي بطنك أربطي طوبه قشي الدمعه وأرجي ( الجمعه ) يمكن نصحا وتبدا شرارة ............ آآآه .. يا أم جمعه الثورة ( وريقه ) بهددوا بيها جناب السادة معاهم خُلَفا ومافيا وحُلفا ويعفصوا بيها كراع السُلطة بس شان روحهم ونحن ( الكورس ) نحنا ( العُورا ) راجين لاشارة نمرق نهتف نحرق شارع نولّع حارة تهدا الهوجه وترجع موجه وندخل تاني سُكات في مغارة . ........... آ آه .. يا ام جمعه حَوّة الوِلدت ( ود حبوبه ) و( عثمان دقنه ) ماجال في بالها ءانو الحاله تكون الذلة ووجبه وحيدة مره ( سخينة ) ومرات ( فول ) من غير جِبنة ........ حَوّة الولدت ( قرشي ) و ( تايه ) وشافت عينها كيف الأُمة بتآخد تارا حسع شايفة كيف نحنا صِغِرنا كيف نحنا بقينا ؟! البلد السمحه يا شرف ( القُرشي ) وروح ( التايه ) بقت انداية بنقو وسرقه تشتت وفُرقه فسوق ودعارة . ............. والسوق مطلوق ماكلو ( بقالة ) رفوفو بضاعة |
|
10-12-2012, 02:54 PM | #3 |
|
آآآه .. يا ام جمعه باعوا ( الصَلبه ) شان تكبر ( جعبه ) و آخر موضه ببيعوا ( بكارة ) ........... وشوفي كمان وما تسدي أضان في دعارْة الليل جابوا جديد ( دعارة العربة ) سموها ( محلي ) ولو عايز ( واحدة ) لحدي ( الشقة ) ده ءاسمو ( السفري ) .............. شوفي المغسه ءاسم الموقع ( جمهورية ) وءاسم الدولة ( ءاسلامية ) .......... دحين يا ام جمعه وكلام بالجد حسع نحنا يانا النحنا ؟ ولاّ اتْدَردَقنْا واتلطخنا في وحل المِحْنَة وعرّت روحنا الزنقه الحارة ؟! ............ انحطينا لما بقينا مخازي عجينه كَسَرنا ( زهايمر ) ولاّ نقول - وا خجلة روحنا – كِمْل الفينا فَقَدْنا جسارة نسينا الثورة وماتت نارا ........... آآه .. يا ام جمعه خوفي نكون رغم المغسة والسكين مستنين ناس نُخبة سيدي وباقي الخُلَفَا وجوقة الحُلَفَا نفير وءاشارة . خوفي نكون لسع كورس ما اتعلمنا نذاكر وندرس ما استلهمنا فصولنا المُرة ونارا الحاره .......... الا أقولك يا ام جمعه أصُبْري دقي المحلب في الراكوبه وهزي المنقد يمشي رمادو ويفضل جمرو ماتقبلي وشك وتبصقي دمك تقولي التوبة يمكن حَوّة تجيب من روحها ولادّ للحوبه .......... يمكن بكره تولّع فكرة ويهل ( فارماس ) يصحي الناس الثورة تعشعش في الأنفاس لا عسكر فوقنا لا سادة وخلفا لا جوقة حُلَفا لا ( رامبو ) بليد ........... من غار آلامنا من وسط اولادنا يطلع صوت يتحدي الموت يبدّل شوفنا بنور وجديد .......... كفايه الصوم يا ناس يا قوم .......... كفايه كفايه كفايه كفايه .......... صَبَرنا شديد دايرين العيد شعر : هاشم صديق 8/10/2012م (1) من حكايات التراث ارتبطت بكتاب ( المطالعة ) في مراحل الدراسة الأولية |
|
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
كفاية تنظير | امين 1967 | «۩۞۩-منتدى الحصاحيصا الحر-۩۞۩» | 2 | 02-18-2012 06:36 PM |
كـارثـه كـادت أن تقتـل بعـض المتنزهين في مدينة الطــفل | احمد الهمباتى | «۩۞۩-منتدى الحصاحيصا الحر-۩۞۩» | 3 | 08-10-2011 07:20 PM |
قرنتية__للشاعر هاشم صديق | ابوبكر ا الذبيدى | «۩۞۩-منتدى الادب والثقافة-۩۞۩» | 5 | 07-26-2007 08:13 AM |
هاشم صديق | عبداللطيف محمد على | «۩۞۩-منتدى الادب والثقافة-۩۞۩» | 4 | 07-11-2007 09:33 AM |
طبقات ود جاد الله _ هاشم صديق | ابوبكر ا الذبيدى | «۩۞۩-منتدى الادب والثقافة-۩۞۩» | 9 | 07-11-2007 09:21 AM |