عارف مصطفى انشاء الله يوم شكرك ما يجي ونشيلك وأنت عريس

في زيارة سريعة وعابره إلى مدينة جدة يوم الخميس الماضي التقيت بالأخ عارف مصطفى وبحفاوة وترحاب أولاد البلد تفرغ لنا وقام بالواجب وأكثر وعمل صحبه مع ابني مصطفى ... التحية للأخ عارف ابن الحصاحيصا البار ويا عارف انشاء الله يوم شكرك ما يجي ونجاملك في الأفراح والليالي الملاح وأنت عريس ونحن شايلنك في الكتوف ... وعارف زول ظريف بس مشكلتوا حاجة واحدة انوا مريخابي ... ويا عارف كده نحن زرناكم في جدة تقدر ترد لينا الزيارة في حائل ...

يامدثر قدر مانقول فى حق الاخ عارف ... مابنديهو حقو ...
نحن غلبنا معاهو لرد الزيارة الى الرياض مع الوعود المستمرة والتى نامل ان تحل كل الصعاب لنراه بيننا ...

الاخ مدثر تحياتي لك ولبلد البرد الشديد دي حائل دي خطيره في البرد زرتها مره واحده مكثت فيها خمسة عشر يوما كنت ابحث عن شخص ولا اعرف له مكان وقابلت اخوه سدوانيين واستضافوني وانا مااعرفهم حتي وجدت ماذهبت اليه اما الاخ عارف دائما سباق للتواصل لم اقابله شخصيا لكن اتصل بي تلفونيا واصبو ان اقابله قريب ونجتمع به لانه انسان بجد يحمل معاني كلمة الانسانيه والزوق الرفيع تحياتي لكما

التحية للاستاذ مدثر اما الكلام عن عارف فلا تكفيه هذه المساحة لانه من اكتر الناس تواصل معى وانا لم اقابله من قبل واذا غبت عن المنتدى يبادر ويتصل بى له التحية واقول ليك يا عارف
سلامات يازول يارائع
سلامات عوافى
سلامات يا خلاصة الخير الفى الناس
وترياق الزمن المتعافى

رغم ان علاقتى بالأخ عارف مصطفى السيد تمت عبر هذه الدوحة وتهاتفنا مراراً فانك تحس من نبرة صوته بالشهامة والفكاهة وطيبة ود البلد ودى من اجمل الصفات .
ود مصطفى إنكرب عشان مدثر يلفحك فوق كتفو
ونحن نبشر بى تحت

المشاركة الأصلية كتبت بواسطة مدثر عثمان الجاهوري

في زيارة سريعة وعابره إلى مدينة جدة يوم الخميس الماضي التقيت بالأخ عارف مصطفى
ويا عارف كده نحن زرناكم في جدة تقدر ترد لينا الزيارة في حائل ...

الاخ الاكبر والاب والجد والخال والعم الجاهوري
تحياتي يا راجل يا طيب
اولاً انا اشكرك جداً علي تواضعك وطيبتك وسماحة اخلاقك وجمال لسانك
هوي يا ناس ما تقولوا بنكسر تلج لي بعض
والله انا سعيد جداً بهذا اللقاء الذي تم بيننا وبي زيارتك جدة نورت والله نورت كلها زينة
ويا ريت الواحد لو كل يوم بتشرف بمعرفة عملاق من العمالقة الموجودين بالمنتدي كلهم علي السواء خصوصاً وابناء الحصاحيصا عموماً .
بعدين يا ناس مدثر ده عندو ولد يقعد معاك ويكلمك عن دوري الابطال الاوربي برشلونة ريال مدريد اي سي ميلان انتر ميلان وما عارف شنو كدا الروسي وفرق تانية صراحة انا ما سمعت بيها قبل كدا الولد ما شاء الله التقول ابوه ارسين فينغر ولا جوزيه مورينهو ... واجمل شي فيه انه مريخابي علي السكين وبشجع منبع النجوم برشلونة يعني ولدنا يا مدثر مافي اي مجال ليك
ماشاء الله ربنا يحفظوا ويخليه ويحفظ لينا إبتنا الامورة الهادية الجميلة ايلاف .
بالجد يوم كان قمة المتعة بصحبة العزيز جداً الجاهوري وعائلته الكريمة يا ريت يتكرر مرات ومرات .
وربنا يديم الاخوة الصادقة والصلاة الجميلة بين الجميع
وان شاء الله قريب بجي ناطي ليكم في حائل عشان مصطفي بس

المشاركة الأصلية كتبت بواسطة راشد محمد الجاك

...
نحن غلبنا معاهو لرد الزيارة الى الرياض مع الوعود المستمرة والتى نامل ان تحل كل الصعاب لنراه بيننا ...

الحبيب جداً ابو منوية
تسلم كتير ومشكور يا غالي وده واجبنا زي ما بقولوا ما مشحودين عليه والله كل الناس العرفتهم اللاقيتهم واللسة منتظر لحظة لقاهم يستاهلوا انه الواحد يعمل اي شي من اجلهم .
يكفي اننا ابناء الحصاحيصا
والله يا راشد ربنا ما سهل بالزيارة لكن ان شاء الله قريب معاكم

المشاركة الأصلية كتبت بواسطة جعفر يوسف ابراهيم

الاخ مدثر تحياتي لك ولبلد البرد الشديد دي حائل

الاخ الجليل جعفر يوسف تحياتي يا غالي
مشكور جداً علي الكلمات الجميلة وسعيد انا بالتعرف عليك رغم اني لم التقيك وجهاً لوجه
وأتمني من كل قلبي هذا اللقاء

المشاركة الأصلية كتبت بواسطة مدثر محمد

التحية للاستاذ مدثر

الاخ الحبيب مدثر تحياتي ومشكور كتير وربنا يديك العافية وما بعمل الا الواجب وربنا يديم بين الجميع المودة والاخوة

المشاركة الأصلية كتبت بواسطة ابو صديق ود صديق صديق

ود مصطفى إنكرب عشان مدثر يلفحك فوق كتفو
ونحن نبشر بى تحت

الحبيب صديق تكعيب
كدي انت اول شي كنت غاطس وين وحمداً لله علي سلامة العودة وان شاء مافي انقطاع تاني
ومشكور جداً يا حبيب
وان شاء الله بنكرب لكن في ضهر عارف والغريب وناصر السوداني ويكفيني فخر بس انه العزيز مدثر وجميع الاحبة الاخوة والاخوات من الحصاحيصا وبراها يكونوا متواجدين ويشاركوني الفرحة دي

وللجميع التحية والود

التحيه للغالي عارف ود ي افعال اولاد البلد وانشاء الله ذي ما قال الجاهوري نشوفك عريس ونحتفل بيك في جده قبل الحله التحت(الحي الشرقي)

انت يا يمة الزيك منو الله يخليك لينا يا عمو




وتستاهل ده

الاخ / الجاهورى

الكلام ده ماغريب على الاخ والصديق الغالى

ود الحصاحيصا والحى الشرقى عارف

جزاه الله كل خير