مشكلتنا في لوزتنا وكل مشكلة وليها حل ؛

كل مشكلة وليها حل ؛
نحنا الناس االبرسلوا لينا في المعلومات المفيدة عبر الهواتف المحمولة غصبا عننا ديل ، جايبين لينا الضغط والسكري وفقع المرارة والكبد ،، قالو شنو ؟؟ قالوا ( اللوزة الدماغية الموجودة في المخ البشري هي مسئولة عن الشعور بالخوف ،، فإذا تمت إزالتها لن تشعر بالخوف ابدا ،،، ) والله عاد يا ناس الاتصالات أكان كلامكم ده صحي ، يكون حلينا أكبر مشكلة في العصر الحديث ،،، أها يا أخوانا دي فرصة ما بتتفوّت ،،، عندي ليكم إقتراح بأنو الشعب السوداني الشايفو قدامي ده ، يؤسس ليهو مركز قومي بالمجهود الشعبي الخالص لإزالة وإستئصال اللوزة الدماغية جراحيا من قعرا ويسميهو " المركز القومي السوداني التخصصي لإستئصال وإزالة اللوزة الدماغية " حتي يستطيع المواطن السوداني البدون اللوزة الدماغية ( مقطوعة الطاري ) ،، الله لا بارك فيها ولا كسبها كان قاطعه قلبنا قطعة ، وجايبة لينا البلاوي والمصايب ، المهم في الإقتراح ،، الامة السودانية تتخلص من اللوزة الدماغية وتوابعها ومشتقاتها ومكملاتها ، خلاصا بائنا بالتلاتة وبالتالي نكون أتحلينا من العكلته واللياقة و ملاح الويكاب النحنا مجلبطين بيهو زي صمغ الفيران ،، ونشد حيلنا شوية أكان نلحق ركب الإنسانية والآدمية العالمية ... رايكم شنو في الاقتراح ده ،،، ؟؟ بالله ما فكرة ،،، ؟؟
" المحجوب "

يعنى يالمحجوب
لوزة الشعب السودانى الدماغية
هى الاخرتنا
و خلتنا نتخلف عن الربيع العربى
و شيلة الجماعة ديل ؟؟

تباً لها من ..!!