مكتبة الشاعر ازهرى محمد على

سامحنى ياليل السهاد
سامحنى او عزا السماح
كحلته عينى بالسهر
وجرحته خاطرك بالنواح
نعست نجومك وشهرزاد
سكتت عن القول المباح

الليل كمل اتلاشت انواره وخبت
لوليتا اطياف النعاس
حنستها الغمده وابت
ذى طفله فى دمى بتجوط
نزلت على روحى وحبت
شهتنى فى طعم المنام
مرجيحت الريد النبت
لوليته لوش الصباح
نعست نجومك وشهرذاد
سكتت عن القول المباح

ماتخافى يابت الضلام
القمره ماضرت نجيمات المساء
ويوم صحت النيل للقيام
انصره فى الواطه وحسى
والطعنه من نصل الكلام
ذى غصه فى الروح تلمسه
وماتخونى حفنات التراب
بخطوه للزول النسى
سهر عيونك واستراح
نعست نجومك وشهرذاد
سكتت عن القول المباح

الله عليك الاستاذ الرائع الكبير ازهري محمد علي
كلمات قمة الروعة يديك الف عافية علي الابداع ونتمني استمراريته ...

جوطة برا الحوش
ليه البخل يا استاذ تسقينا بالقطارة
امتعنا امتعك الله بالصحة والعافية

استاذنا الجميل ........ ازهري
عندما ناتي الي هنا نتمني ان نكتب شيئا ولكن نقف عاجزين
شكرا جميلا علي كل ماتكتبه

الليل كمل اتلاشت انواره وخبت
لوليتا اطياف النعاس
حنستها الغمده وابت
ذى طفله فى دمى بتجوط
نزلت على روحى وحبت
شهتنى فى طعم المنام
مرجيحت الريد النبت


يسلم فاك استاذنا ازهري قمة الابداع كعادتك ونحن دوما عطشي لكلماتك

لك كل الشكر والتقدير والاحترام

العزيز / أزهرى
سلام وشوق .. تتدفق شعراً رائعاً ،مُستسطحباً شهرزاد ، والقوى
الظلامية تُدين ألف ليلة وليلة بخدش الحياء والذوق العام !!!!!!
فى أى زمنٍ نحن ؟

استاذنا الجميل

نحن معك لا نقرا شعرا نحن نمتطي بساط سحري ياخذنا الى عوالم من السحر


معك لا نقرأ نحن فقط نذوب في عالم من الجمال

شكرا لانك ومازلت رغم تطاول هامتك يوما بعد يوم مازلت تفرد لنا مساحة لتسعدنا بكلماتك

استاذنا العزيز:ازهرى محمد على...
تحياتى لك وانت دوما تطربا بكلماتك الرائعه،وتتحفنا بعيون الشعر وتبثنا كل الجمال،وحقا نحن نتجمل بمطالعة كلماتك ونمارس كل طقوس الدهشه..
كل الامنيات ومزيدا من الابداع...وكن دوما كما نودك..

الحبيب عارف والصديق عاطف حبوبه وريرى وست كل البنات اغفروا لى غيابى وتقبلوا شكرى شكرا كتير حبوبه

سلام كتير ودالحصاحيصا هذا بيتى ما اجمله بصحبتكم

العود احمد يا استاذ ..... كلماتك ذاد عباد بعد السهاد يااستاذ
ابقي ماتحرمنا وماااااتطول الغيبه .... حمدلله علي السلامه

انا بيكى مالينى الكلام بتِ القوز مرت من هنا احسست بخطوها على عصب القصيده سلامات كتير

الخ ازهرى محمد على لو سمحت ان تكتب او تعيد كتابة يا زول يا رايع ما كملت معاك الونسة والقرقراب لو سمحت

المبدع ازهري محمد علي رمضان كريم وربنا يتقبل منا جميعا..
حقيقة قمة الروعة والابداع واتمني لك التوفيق دايما..

اسفين
دقينا قى نعشك اخر اسفين
وبعناك رخيص للتاجروا فيك بالدين
من تسعه وستين
لتسعه وتمانين
لتسعه وميتين
يوم كنا نيام ولصوص الليل صاحين
واسوق والساقيه تسوق بسم التمكين
نتباكى طوايف واحزاب
ونعاين فيك وساكتين
ايدك فى النار
وتبشر تحت السكين

اسفين

نتباكى طوايف واحزاب

ونعاين فيك وساكتين


الله يا استاذ ازهري .... لما الشعر يصبح حكمة

المشاركة الأصلية كتبت بواسطة ازهرى محمد على

بريدك وقلبى قلبه عليك
انت ولاعليك ماااااك
سارح بالغناوى غنم ابليس
وتنهر فى الحنين بى تك
حليلو قليبى انا المسكين
يغالط فى اليقين بالشك
يتشرف يعاين ليك ليك
وشوفتك بالكتير يااااك
الى صديقى معتصم محمد طاهر

يارفيق الخطوه لو عزا الرفيق
يابشوش العشره والحس الرشيق
ضيق المتاهات اتسع
ماخلى لا عدو لا صديق
وشوف كل حاجه مشت معاك
ودخلنا يا داب فى الغريق
كل الحواس عاديتا بالضحك المعافى
بالطيبه والهوس الانيق
اخضر وريف الفطره فانوس النفوس
تصبح صباح النجمه والطير الطليق
وتمر مرور النسمه فى وش الفريق
تدى العصافير وجهتا وتفتح
طلاسم الكلمه للشعراء الصعاليق
وتدفق بشارة خير ضل ممدود وفكة ريق
ولى وصديق وصادق والزمن زنديق

الليل كفيف يفتح منافى الاغنيات
والبيت خفيف علقنا فى النضم السكات
ودخلنا من باب النزيف
بشرنا فى الحزن العتيق
ومرقنا من شرف الرهان
شرينا فى التعب العراريق
ساقونا فى الليل للبطان
وركزنا جلابه ورقيق
وصنقرنا فى ضل الدخان
نتسلى بورق الحريق
شكيناها دكيناها
مرقن بنات الواطه والوجع المطاليق
مرقن وراك مرقن ينقن من خطاك وجع الطريق
ضجر المكان والحيره فى صمت الستاير والشبابيك
والمقعد الفاضى الملان
والدنيا يوم توسع تضيق
والفراشات لو ضيعت حلم الوصول
ماضيعت احساسا بطعم الرحيق
وانا فى انتظار وش الصباح
يمرق خيوط الضو من الفج العميق
ارتاح افيق
وانده عليك يارفيق الخطوه لو عزا الرفيق
يايشوش العشره والحش الرشيق
ضيق المتاهات اتسع ماخلا لاعدو لا صديق
وشوف كل حاجه مشت معاك ودخلنا
يادااااااب فى الغريق

أجلس و أغالب نفسى و أغالطها ..

كيف تراني

بعينك الجمال ..

أم بعقلك المحال ..

لا شيء بعد ..

المشاركة الأصلية كتبت بواسطة ازهرى محمد على

اسفين

دقينا قى نعشك اخر اسفين
وبعناك رخيص للتاجروا فيك بالدين
من تسعه وستين
لتسعه وتمانين
لتسعه وميتين
يوم كنا نيام ولصوص الليل صاحين
واسوق والساقيه تسوق بسم التمكين
نتباكى طوايف واحزاب
ونعاين فيك وساكتين
ايدك فى النار
وتبشر تحت السكين

اسفين

سلمت احرفك استاذ ازهرى محمد على...ورمضان كريم وربنا يحقق الامنيات..
تحياتى ورد الله غربتنا جميعا..

صوت الكلمه الاستاذ الكبير ازهري محمد علي لك التحية وانت تواصل فينا الابداع كما النيل يروي فينا جدب الجروف .............

ان والليل فى الحسبه اصحاب
بينا صلات الهم والدم
والاشواق الباب فى الباب


يامنداح فى الروح بالفطره
طال الليل والهوى غلاب
ليه قلبته مواجع الذكرى
ولسه الشوق بالشوق ماطاب
لسه الاهه بتلد الاهه
وتقعد تحرق فى الاعصاب
لابداويها الكى بخلاف
ولابتتباصر بالاعشاب

وانا والليل فى الحسبه اصحاب

يوم فى الليل بين صاحى ونايم
بدت اشجار فى الدم تتمشى
شفتها فى ماشاف النايم
تاكت باب الروح بالرعشه
وانا غفلتها ذى لبلابه
واتسلقته جدار الدهشه
وبينى وبين عينيها حجاب

وانا والليل فى الحسبه اصحاب

عبرت ذى الطيف فى العتمه
وفجاءه اشتعلت فى الكابوس
ورجمت جن الليل بالنجمه
وضجت وبقت ذى فانوس
ومرت بيا مرور النسمه
وانا بين صاحى وبين مهووس
فاضت روحى معاها تساب

وانا والليل فى الحسبه اصحاب
بينا صلات الهم والدم
والاشواق الباب فى الباب

الكبير جدا

الكتابه بعدك مستحيلة ومؤلمة وبتديني احساس مخيف باني زي البدوس بأرجل حروفي. علي

حديقة حروفك المعطرة منتدانا قرنفل احمر وياسمين

بس شهقة دهشة بتطلع غصبن عني


الله ................... الله عليك الله

ابوالزهور ..
كما يطيب لنا مناداتك
شكراً لاهدائنا اياك هنا ..
ومن الحكمه ان اختار الصمت ..
واحلم
يا مشرع الأمل الفسيح
ولك ودي واحترامي ..

ست البنات لحدهن ككيف الحال وجدت هنا بقايا عطرك لو لم تكتبى لشممته بروحى شكرا لكلماتك الفارعات وهى تساقط ثمارها فى قلبى وتخصب بذور النشيد

محمد عوض ياصاحبى بفاكهة الكلام اصبت قلبى حتى كدت ان انسى وابل الحجاره التى امطرت بها سقف منزلنا فى زمان كامل الاخضرار اميز بين ايقاعات حجارك الكريمه من بين مهرجانات الحصب الليلى على اغماءة الزنكى كبرت ياصاحبى وضمرت ازمنة الشغب صوب كلماتك الان على سطح الموت السريرى لمنزلنا القابع فى العزله والظلام بما كنا نسميه المنطقه السكنيه وهى الان بفداحة الامنطق بلاسكان

عذراً تغلبني كل المسميات وما زلت اردد ابو الزهور ..
فبت هنا وببعض ذاكرتي اقتفي اثركم .. انت وهي (لها الرحمه بقدر حب والدتي لها) وفتيتك الاشاوس وصياحهم بي حين تغلبني المثغبه فاتسلق سوركم الي تلك النخله التي تستفز مروري بما اشتهي من بلح رطيب .. واحيانا اقذفها كي تجود بما تنؤ بحمله !!
وهو مادعاك الي هجائي ذات يوم ومازلت اضحك كلما لاح بخاطري.. ولقد اتي ماعري منطقتنا الخضراء بعد ان كنا نتداول كسوتها بما طاب لنا من جميل معشر واختلاط (وطننا المصغر) الذي لايسعنا الحديث عنها هنا .. ودوماً اتغني :
حليل زمن الصبا الماضي حليل زهر الحياة الزاهر !!
وعشم صمتي الاستزاده بجمال حرفك ..
وتقبل ودي واحترامي ..

السلام عليكم ورحمة الله وبركاته
لك التحية ياازهري يا رائع

فتح الله عليك أخي ازهري وسلمت يداك

الرائع جدا ..
استاذ ازهرى..
شكرا لدفقك الذى يثير مكامن الدهشه فينا..
شكرا لقلمك الذى يتنفس احساسا ..
شكرا لنبضك الذى يعانق الافاق ..
ويمنحنا اليقين بان ثمه اشراقات حاضره ..
سلامــــــــــــــــــــــــــات
يازول
يارائـــــــــــــــــــــــــــع

الرائع بمعني الروعة الأستاذ أزهري محمد علي تحياتي..
وانت دائما بتنعشنا بإبداعاتك ودررك وربنا يحفظك...

في حضرة حرفك يطيب الجلوس ويرتقي الفكر ويعبق المكان بالجميل والرائع لرائع الحرف الاستاذ ازهري محمد علي ...
بس يا استاذ عندنا راي في برنامجكم سحر القوافي...

عفوا سيدى الحجااااج
كلابك والافاعى الحايمه
من روتانا لامواج
كااورت البلد بحالها
ماخلت فضل فى حاجه لمحتاج
ولا لقت البقولها جر
فى ناس جعانه
ما قلبت حرف فى صاج
فى ناس عريانه مالفحت
هدم فى الزيفه
ماطالت ايديها رغيفه
والسبب المعكر كيفها
دق بنوتها بالكرباج
ناس غلبانه بس دغريه
مابتعرف تخت طاقيه فى طاقيه
والدين الحنيف فى شرعها الحريه
ذدتها فى الحرج احراج
وذدتها فى الدجل دجال
عوج شفناهو ماسمعناهو
فى قول قال
بنات دقوها دق العيش
ولاد ماندقو فى شبال
وبقت فى غصة الايام
قيم غنيتها ياقدال
قيم شناها عمه وتاج
رقيص الشامه بت حمدين
وخت الحنه ليات من حضور ضفرين
ونمات العديل والزين
ورقصه جون مع اوهاج
مشينا نقدم البنوت على ضو الرتاين
خفت وهج الغناء الوهاج
رحل صوت المغنى حزين
رطن سوط العنج هراج
سقط فى غفله نون النسوه
اخوان البنات والنخوه
ستار العروض اب رسوه
شيال الحمول اب عاج
فيااحجاج
اكل نارك واتلفح بشاكيرك
مع طلعه شهر ذو الحجه
احرم حاج
وطووووف فوق الجثث طاوؤس
وشعبك لا اكل لا علاج
وحاج فى شنو
اذا كل البلد هاااصت
وفار نحل الجبايه وهاج
فياااافالق نواة الحبه يااافراج
وياااباسط عجائب الاسراء والمعراج
وياااخالق الخلايا الحيه
امشاج ابتلت امشاج
طحنتنا طاحونة الفقر
دهستنا سنواتها العجاف
ياااالله تلهمنا الصبر
الستره والعيش الكفاف
وترحمنا من صرة وشى
فى وش وليداتنا الضعاف
غرقان ويرقص منتشى
ووطنا مقطوع من خلاف
بسم الله ماخلانا شى
وفصلنا فى اخر المطاف
ياناسى اقدار الرجال
ماتخشى غضب الله وتخاف
كتر عوج الكلام والميل
وتحت الجزمه مليون ميل
تحت الازمه طاحونه حوافر الخيل
سقط تلت البلد عفوا
سقط نص البلد لهوا
سقط كل البلد سهوا
فهل صحاك ضمير الامه
فى هجعه هوايد الليل
على زبد الغناء الممحوق
شنو الحلاك تنوم تحلم
على خرطه وطن فى السوق
وطن مسروووق
وطن اشتر
مرق من ذمة التاريخ
على ذمة كلاب الحر
ينوم بجبه الدرويش
يقوم ببدله العسكر
فيااااويلك فى يوم الويل
تقوم تحتك قيامه الناس
افواج الضحايا يجوك
ستات الكجيك والشاى
والناس البعرفو شليل
حشود الطلبه والعمال
وبنوت الغياب والليل
طفوله مشرده ونازحين
وكم حجاج يجيك من ديل
وديل اولاد شوارع عوووووك
المعدمه ومعدومه
من كل فجه يجوك
يومها التسود يومها
قطامه وقرضمه وراندوك
لماضه وطرقت حلقومه
ناسات حكومه الجن
نلس جنها الحيكومه
ماطال الشوارع فى
فى ولاد بعرفو القومه
اولاد الحلال راقديين
اولاد اسمها المايقوما
ديل اولاد شريعه قوش
المستضعفين فى الارض
يبنو ويهدو عروش
لا الكل بخون البعض
لابتشتريها قروش
فى كل حته وراك
تمرق تلاقى جيوش
اصدق لسان الحال
من نضمك المهبوش
نفس الولاد جايين
من طين حضاره كوش
حافظين شعر حميد
فاهمين قصايد الدوش
ماتمشى يامحجوب
عاوزين نظبط بوش
ياداااب عرفنا الصاح
دخل الكلام الحوش
وشكرا سيدى الحجاج