طاش ما طاش

بدون تاشيرة

وليد العشي

طاش ما طاش

· ربما لا اقصد معنا معينا بهذا العنوان ولكنه بالتاكيد يعبر عن الكثير من المحن الرياضية والاجتماعية والثقافية التى اصابت الكيان السودانى الذى عرف بتفاصيله الامنة واصبح الرماد كال حماد والذى يشكل الكثير من وجداننا وامنياتنا. وطاش ما طاش
· تسجيلات بملايين الجنيهات واعارات من خلف الباب وتجنيسات سبب العذاب وتصريحات وحوارات للاحباب والاصحاب وانتصارات وهمية للادارات ... معقولة دى يا حارس الباب
· طباخين فى بيوت العزاء وفطور العريس ومعاه خمسين كيس والشيلة معاها دفار .. والكوافير نار فى نار ..وناس الحفلة اشكال وانوار .. الجماعة قالوا الروووب ..استرنا يا ستار
· قنوات فضائية وحوارات مجانية وقشرة وشياكة ميه الميه ولغة عربية زى رمى الطعمية ..خرمجة ساااى .. والضيف معاه فنان بيغنى (( العشي باع القضية )) وربنا يكون فى عون الاسرة السودانية
· وسياسة وسياسة وساون سيستم وموية صحة وفول وبلح وهتافات .. والنتيجة صفر صفر والجمهور لحق امات طه ..والتحكيم فاشل ..
· وكتب الدكتور ناجى الجندى :في المواقف الكبيرة تتغير مسيرة الحياة.. وإلا لا تكن مواقف كبيرة.. ووفاة صديقنا الحميم نبيلنا الوحيد كبيرنا البهي أفضلنا باتفاق.. الرجل الشمولي.. الشجاع الباذل السخي الحبوب المحب للناس عبد الكريم عوض الله عبد الله.. في وفاته وقفة.. ووقفة كبيرة لمراجعة النفس والاستعداد برغم ضآلة زادنا قرب ما استعد هو به للحياة القادمة.. نعم استعداد لدرب هو سار فيه لكن لأنه خيار يختار غالباً الأفاضل فقد تقدم سفره عن سفرنا.. لأنه أفضل منا.
· بدون تاشيرة: عشانكم انتوا يا حلوين ويا اجمل خلايق الله ..ادق جميع ابواب الناس واقول يا اخوانى زول الله
· حاجة خاصة: البركة فينا وفيكم واحسن الله العزاء
· قبل الخروج : اللهم ارحم موتانا وموتى المسلمين .. اللهم اشفى المرضى وعافيهم . والسلام ختام وفى امان الله

نسال الله لهم العمر الطويل لموتانا
والرحمه والمغفرة لنا ولكم
وطاااااااااااش طاااااااااااش

وربنا يعين يا عزيزى اباذر