بالأمس ام روابة وغدا ود مدني

لو سمعنا بقوات التمرد وصلت مدينة ود مدني لانتعجب ولا نستغرب
في كل يوم نسمع باحتلال منطقة جديدة والمفاضات مستمرة ، تضرب كادوقلي بالكاتيوشا والمفاوضات مستمرة تضرب هجليج والمفاضات مستمرة تسقط كاودا والوضع كما هو انا داير افهم المفاضات لزومة شنو؟،، والان ابو كرشولة والسميح والله كريم في قبضة التمرد وبكل بجاحة يظهر الناطق باسم القوات المسلحة تصدت لهم القوات المسلحة ولكنهم واصلو السير ( اسي دي يفهموها كيف) وبعد شوية يجي يقول ليك القوات المسلحة تعلن سيطرتها علي ام روابة بعد انسحاب المتمردين ، يعني ممكن انا دة اقول الكلام دة اقوم امشي ام روابة بعد ما المتمردين ينسحبو واقول الان انا مسيطر علي الوضع ، هم من الاول كانو وين والله العظيم شبعونا مغص وزل واهانه في احداث امدرمان قالوا نحن راصدين حركات التمرد من قبل ما تتحرك ووالي شمال كردفان زاكي الدين بقول نحن عارفين تحركاتم قبل خمسة ايام ، ياجماعة الكلام دة منطقي؟؟ لو كان حقيقي تبقي المصيبة كبيرة ولو كان كذب تبقي المصيبة اكبر يعني نستنتج نتيجتين الاولي انو حكومتنا ماخايفة علي حياة المواطن يعني تخلي المتمردين يدخلو أي مدينة وبعد داك تطالب بالشجب والادانة من المجتمع المدني الذي لايملك لنفسه ضرا ولا نفعاً وعشان تاكد للعالم اجمع انو الحركات المسلحة هي التي لا تريد السلام ، وعشان الحرامية يجمعوا ليهم قرش قرشين لزوم التعبئة وكدة وياكلوا البياكلوها ويوصلوا البوصلوها وعشان الكراسي الواسعة دي ماتطير منهم يعملوا السبعة وزمته.
النتيجة الثانية انو الحكومة لاتستطيع ان تبسط الامن يعني بالدارجي كدة العين بصيرة والايد قصيرة تبقي عليهم النكتة البتقول: واحد ماشي في السوق مع امو ولاقاهم واحد قام كفت ام الولد دة والولد زعل شديد وقال ليهو كيف تكفت امي وانت كان راجل اكفته تاني وصاحبنا داك ماعليهو الا لصق للحاجة كف من جديد فما كان من الولد والا قال ليها يمة ورح خليهو خليناهو لي الله ، ياشيخنا قبيل الله دة مافي ، لو ماعندك قدرة طول اللسان لي شنو؟ وين راداراتك ؟ وين استخباراتك ؟ وين حرس الحدود ؟
يا جماعة الكلام كثير والوضوع متشعب فقط مانرجوه من وزير الدفاع ومدير جهاز الامن تقديم استقالاتهما فورا لو كان همهم الوطن والمواطن!!!!

المشاركة الأصلية كتبت بواسطة صديق قوزالرهيد

فقط مانرجوه من وزير الدفاع ومدير جهاز الامن تقديم استقالاتهما فورا لو كان همهم الوطن والمواطن!!!!

والله الحكومة كلها تمشي وغير كدا مافي حل

ادب الاستقالة لا يمكن الوصول اليه حاليا
اقترح علي مسؤل ان يبري زمته من قضية ما
وذلك بتقديم استقالته حتي يبعد عن نفسه الشبهات
فكان رده يعني اودي ليكم نفسي الشارع