تُكل السرة !!

المشاركة الأصلية كتبت بواسطة محمد عوض السيد

السرة : الله يوعدنا بي دهب زي دهب خديجة الماقادرة تمشي بيه دا !!

ويرفعن اكفهن جميعاً بلا استثنا ويرددن .. اللهم آمــــــــــــــــــــــــــــــين ..[/align]

انا زاتي اللهم آمييييين

يا محمد عوض جميل الحاصل هنا ده
قدر ما ادخل البوست ده اشاهد النسوه
وكمان الوان التياب والصاج كأني اشاهد
فيلم سينمائي ........سرد اكتر من ممتع
مبدع انت أخ محمد عوض يديك الف عافيه
ومعاك مواصلين ...

اختي .. حبوبة ..



ان شاءالله دعوتك تصيب .. بس ما تنسي تخلي لي نصيبي .. ان شاءالله حق حلق للبت الصغيرة الجاية :(^&^):

التُكل يكحل عيني كل صباح بزمن كنت انا سيد الموقف فيه .. والان اندب حظي فيه بعــــــــدم استمراره !!
حبوبة .. انتِ جزء من التكل ويدخلك اسمك في ذلك .. فشكرا .. لمرورك الانيق .. واتمني دوامــــــــــــــه ..




ولك ودي
واحترامي

(8)

-فاطمة تدخل بعد ان تصيح علي السرة .. السرة كيف اصبحتو .. ولا تجيبها فتدخل صوب التُكل واعداد الصاج للعواسة وهي الراتب اليومي منذ بذوغ الفجر .. وتبداء في تكسير الحطب (حطب القطن ) وهو هش نوعاً ما هذه السنة لانهن جلبنه من الحواشات القريبة منهن ..
-مدينة : هوي يانسوان كيفنكن ؟
-فوزية : ما ممكن كدا ذاتو .. الشافع وراء الشافع !! الولية دي ما بتخاف علي نفسها ولا بتخاف في الشفع البتجيب فيهم ديل !!
-السرة: كدي العني ابليس يافوزية .. مالك يابت امي بتهضربي ؟
-فوزية : والله حياة مرة احمد ولدت جابت بت .. ولسه بتها ما تمت سنة !! القصه شنو زاتو ما عرفنا .. طواااالي كدا سنة وراء سنة !!
-فاطمة : يخربنا ويطرشنا .. الوليه دي خايفه ما تلد والا شنو بتدفق فيهم كدا زي الحاجة الكعبة !!
-امنة : بعد دخولها .. لكن ما معقوله البتعمل فيه دا والله سنة !! سنة ما حرام عليها الوليه دي .. يعني الشافع القبله داك يدوه عكارة والا شنو ؟
-فاطمة: الا ترضعهم الاثنين سوا !!
-عوضية : التقول مغالطنها الزوله دي .. انا ذاتي سمعت الخبر الصباح دا .. وقالو جابت بت زي الفاتت !! اظن الراجل زانقها تجيب الصبي .. عشان كدا شغالة سك سك بالولادة !!
-امنة : جنس دا بقصر عمرها الوليه دي .. عندها 6 حاليا ولسه ما كلمت السنة السادسة !!
-فاطمة: لا يا امنه كمان ما تبالغي .. تمت ال 6 سنين من ما عرسوها ..
-السرة : والله يا نسوان تشفق الزول علي جناها !!
-عوضية : بلاي بناتها زي المفراكة الواحدة وكلهن ما بجيبن بت واحده !!
وتتعالي الضحكات ..
-السرة :مفروض يكون في فرقة زمن بيناتهم .. عشان الرضاعة بس طيب بدل تشحتفهم كدا !! والله مفروض يكونوا اضعف من المفراكة !!
-عوضية : اظن فاكنها بي نبلة .. يا تكون مشارطة ليها زول في اكبر شفع خلال 10 سنين !! لانو الحكاية دي كدا ما تمام ..
-فاطمة : الولية دي ما سمعت بي حكاية التنظيم يانسوان !!
-امنة : حقو يافوزية مادام علاقتك سمحة معاها توعيها شوية وكان ما عارفه حكاية التنظيم دي توريها بيها عشان تقلل من البتعمل فيه دا !!
-فوزية : والله علاقتي بيها ما قدر كدا .. لكن بنضم معاها .. الوليه بتنشاف عمرها 60 سنة من كترة الولادة !!
-فاطمة: اي عليك الله وقولي ليها اشفقي علي الشفع العندك ديل .. ورضعيهم سنتين وما تفكيهم في نص الفرقة كدا زي اليتامي !!
وينفض السامر بعدما .. تداولن نوضوع حياة تلك .. والتي اطلقت عليها عوضية (الارنب) وذلك لكثرة ولادته ..

	ابوحميد لك التحايا تكل السرة اعتراف حقيقي بالماضي بعد أن سلبنا الحاضر أجمل ما نملك . أنا يا ابوحميد تربية حبوبات ويشدني حنين لكل ماهو أصيل بمعيــار النــاس الكبار واتخيل لي فرصة طيبة في وجود ناس ابوكرنة نجعل من الجميع بجانب الأستمتاع الموجود في الحوارات حقوا نرجعهم عشان اعرفوا ادوات تكل السرة من المشعليب والبخسة الريكة والكتوش والدبنقة وغيرها من ادوات هذا التكل التليد والمفيد .لك التحايا ولي عودات ان شاءالله .

الجـــــــميل
المنصوري



نعم سلبنا الحاضر كثير من الموروثات الجميلة وابدلنا اياها بالحداثة التي لا اجد فيها سلوي !!
وليتك وكل من لديه معلومات ان يتداخل هنا لنورخ لفصل من التاريخ السوداني كان يحمل اسم (التُكل) ..

وبانتظار عودتك ..




ولك ودي
واشواقي

الاستاذ / محمّد عوض السيد
اشد مايعجبني هنا ان حوارت تكل السرة اراها (دوماً) موفورة العافية (عيني بارده) قياساً بحياة (النِبله) أو (الارنبه)
انت تحسن الفكرة , وان غبت عن التداخل فتكفني متابعة اخبار السُرَّة وصويحباتها
تخريمة : انت يا استاذ خالاتنا ديل الحطب البحرقوا فيهو كل صباح ده مجهود فردي ام جماعي ؟ بعدين زوج السُرَّة موقفو شنو من تجمع الشمار اليومي ده ؟
مودتي وعميق التقدير

صـــــــديقي
محمدشريف


كفانا بك حضوراً هنا .. واضفا التوهج للبوست بما تضيفه من مشاركات تثلج الخاطر ..

السرة .. وصويحباتها .. وبعلم زوجها يجتمعن بداره .. واليك ما دار باحدي الحلقات الخفية :

السرة : يابنات امي الويقود قرب يخلص !!
فاطمة : اجي يا السرة الكارو الجابها حمد الاسبوع القبل الفات كملت ؟
السرة : كيف ما تكمل وعوضية براها بتعوس ليها جردلين لما يقوموا عليها اسيادها !! والعجب مدينة لما يعيا زول في حلتهم .. الضيوف لا بتصاقعوا ولا بتجارو الا بالكسرةالمرة دي !! كيف ما يكمل مع ثنائي الدبيبة ديل يافاطنة ؟؟
فاطمة : الله عالم كنت مفتكرة انو بقعد ليه تاني كم اسبوع .. مخير الله .. بعدين نمشي نفزع لينا ويقود لحدي ما تجينا الكارو !!

ولك خالص ودي

(9)

-السرة تدخل التُكل وهي مكفهرة الوجه جرا الاخبار التي تنامت الي سمعها من احالة البعض من زملاء زوجها بالعمل الي الصالح العام بالشركة التي يعمل بها ..
-فاطمة: هوي يابت امي صحي الاخبار السمعناها دي !!
-السرة: اخبار شنو يافاطنة ؟
-فاطمة: سمعنا انو راجلك شالوه الصالح العام هو واصحابه ؟
-السرة : تفي الكلام دا من خشمك ياولية .. راجلي يطول عمرو لسه شغال وما في كلام زي دا !! وانتي وقت جبتي خبر زي دا ما تسمعيه مؤكد طيب !!
-فاطمة: والله يا السرة دا الخبر السمعناه في الفريق .. وحمد لله علي السلامة طيب وقت راجلك مافيهم !!
-امنة : بعد دخولها اليهم .. هوي يانسوان .. ازيكم ..
-السرة: اهلن يا امنه .. وكيفن عيالك .. وتعالي اسمعي فاطنة جابتو الليله خبر ناشف !!
-امنة: مالها قالت شنو ؟
-السرة: جابت كلام شين ولطشت ليها خبر ماليه اصل ولا فصل .. وطلعت راجلي عاطل من العمل !!
-فاطمة: هوي يا السرة .. انا ماقلت كدا .. قلت سمعنا خبر انو راجلك شالوه الصالح العام .. والخبر دا منتشر في الفريق !!
-امنة : اتولمتي لكن يافاطنة برضو .. يشيلوه كيف وهو شغال ليه 25 سنة في المصنع دا !! وهو ما شفناه يوم قاعد في البيت دا !!
-فاطمة: والله يا امنة انا من خوفي عليه وعلي السرة جبت الكلام بي صرتو ونقلته زي ما سمعتوا في الفريق !! بس استاهل انا ..
-السرة : شكرا يافاطنة بس كان تلجمي القالوا كدا ديل وتبكميهم في مكانهم بانو الخبر دا ماممكن يكون وراجلي زول دقري !!
-عوضية : سلام ياعوين .. صوتكن محصل ناس الفريق كلهم !! في شنو ؟ بكون خبر الصالح العام دا حصلكم صاااح ؟
-السرة : بس ياهو زاتو !! بس في ناس لفحو الكلام وجو بيه جري !!
-فاطمة .. تلوي خشمها بامتعاض ظاهر للعيان .. وتمسك بالقرقريبة لتبداء عوسه عجينها لكي تفر من ما جلبته الي نفسها من اقاويل غير صحيحة !!
* وياتي باقي الرهط وتجتمع الشلة ولكن بمزيج من الكدر الذي لم يختفي من وجه السرة والكلام ياتي مبتور وغير متواصل لعدم نية كل من فاطنة والسرة بذلك ..
-فوزية : انتو يانسوان مالكن الليله صارات وشكن كدا .. انا خايفاه يقع من التعفص دا .. فكنها عليكم الله وفرفشوا خلونا ننسي الدنيا ومشاغلها ..
-السرة : اريتو كان وقع وريحنا !!
-فوزية : ليه بس كدا يا السرة الكلام ما بستاهل قدر دا وكان بحسن نية ما اكتر !!
-فاطمة : اي وريها عليك الله يافوزية اصلها ركبت راسها وما ورتني وش سمح من ما نقلت ليها الخبر !! وعارفاه شين بس كمان السرة حبيبتي وجارتي وبوريها الشئ الحاصل في الحلة وخصوصا لما يكون الكلام فيها وفي ابو عيالها !!
-السرة: يافاطنة انا انزعجت من كلامك دا لكن .. مافي عوجة وكتر خيرك بس لما تنقلي ليك خبر تاني شين زي دا اتاكدي منو بالاول سمح !!
-فاطمة: سمح يا السرة .. وغايتو الليله دي انا اتولمت لوم العدو وزعلتك !! اعفي لي يابت امي ..
-السرة : عفو الله والرسول يابت امي ..
-فوزيه : اي خليكم كدا وبلاش كرفيس وش لامن جانا اكتئاب منو !! ههههههههه
وتتعالي الاصوات الضاحكة ..
-عوضية : اي يجازي مسختك يافوزية اكتئاب !! دي كلمة بتاعة ناس الجامعات وما سمعناها الا في الراديو .. وانتي التقول قريتي جامعة الخرطوم نطقتيها كدا طوالي وحتي ماقطعتي فيها !! هههههه
-السرة : فوزية دي بتكون لقطتها من بتها الكبيرة ما بتقرا في الجامعة ..
-فاطمة : غايتو انا بره من الفلهمة الزي دي يابنات امي وفتكن بي عافية اصلو جايينا ضيف فاطر مع ابو العيال .. امشي اجهز ليهمن من بدري ..
ويتوالي الهمس والسر والجهر منهن الس انتهاء الجلسة اليومية من عواسة للكسرة سليلة المجد وسيد الموقف بكل محافل الصواني !!

تكل السره ..
اعدت لانفى حاسه الاستنشاق لعبق تلك المنظومه الاجتماعيه الراقيه و العتيقه التى تاهت ملامحها وخبا بريقها حد التلاشى بفعل التطور الطبيعى للاشياء ورياح التغيير التى هبت دونما نشتهى وسلبتنا ذكريات عزيزه لموروثات جميله تكاد العين تدمع عند الاسترجاع لفصولها ..
(البيت الكبير - لمه شاى الصباح قبل طلوع الشمس _ قعده الجبنه وونستها التى لا تتجاوز المناكفات البرئيه واحيانا الخوض فى قصص وحكاوى من الواقع بكل صفاء نيه _ حبوبه _ صاج العواسه _ لمه الجيران _ الحنيه )
الوشائج والصلات الاجتماعيه والعادات السمحه التى كانت تحيط الناس ..
الشارع الذى كان مؤسسه تربويه ووووووووووووووووووووو
احتاج لقراءه البوست مرارا وتكرارا فهو جدير بذلك وحتما سيكون لى
فيه (مقيله )

صديقي
طفشان


شكراً لك ولمرورك هنا
فكثير .. هو ماذهب بادارج الحداثة .. وماضي تليد تئن به الذاكــــــــــرة !!
ووصف لبراح وطن ان ازلنا قفل محبرتنا لكملت قبل ان نصل الاول منه !!



ولك ودي
واشواقي

(10)

وكعادتها تدخل فاطمة بعد ان تصيح للسرة .. هوي ياولية مالك الليله ماولعتي الداهية دا .. يخربنا ويطرشنا .. والمصران فتر همتنا ..


-السرة : اتفضلي لاجوه يافاطنة .. اصلي اليوم قمت متاخره امس ساهرت مع العيال بحفظ فيهم قران عندهم امتحانات ..
-فاطمة: الله يهون ليهم وينجحهم ويبقيهم دكاتره بي اذن الله ..
-السرة : من خشمك للسماء يافاطنة ان شاءالله ..
*عوضية ومدينة وفوزية كعادتهن يدخلن وهن يتناولن موضوع شمار بالحلة فاحت رائحته منذ الصباح ..
-السرة: متقاودات كدا الله يكفينا شركن !!
-فوزية : اسكتي يابت امي .. الليله الحصل دا ما بنسكت عليه اصلو !!
-عوضية : والله دا خبر يصم الاضنين وببكم الزول !!
-السرة : قولن الحاصل شنو .. شفقتونا والله !!
-فوزية : ام عجن (الداية) قبضوها من دغش الرحمن !!
-فاطمة : الله يستر الوليه مالها قبضوها ؟
-عوضية: تخطف الكلام من خشم فوزية .. قالوا ليك عندها عصابة كبيرة وفيها بنات كمان !! كل ما تولد ليها وليه تسرقها بالمساء ان كان عندها شئ بستاهل !!
-امنة : شوفو الوليه ومصايبها والله اتلومت ام عجن !!
-السرة : كدي كملي باقي الشمار يافوزية .. بكون مغربل عندك طبعاً !!
-فوزية : تبدو علي سيماها علائم الرضا من ماقالته السرة .. وتسرح بحكيها :
قالو ليك الولية دي صعبة خلاص بلاهي كل ما تخش ليها بيت توضع ليها وليه بتخطط علي الحاجات الفي البيت كلو والمساء بجو الحراميه التابعين ليها يسرقوا !! الوليه حرامية محترفة من بدري بس الناس كانت نائمة في العسل ساكت ومفتكرنها زولة دغرية !! واتاريها طلعت زي المنجل !! والمصيبه كمان قالوا معاها فتوات صغار !! شفتو جنس المحن دي يابنات امي !! والله حاجة تخوف !!
-مدينة : سجم خشمنا .. معاهم بنات كمان !! والله الزمن دا بقي غريب خلاص وما بنضمن اصلو !! هسي كدا البورة ما كتلتن في راجل تاني بقبل عليهن الغبيانات !!
-فوزية : قالو ليك فيهن واحده معرسة ومطلقة 3 مرات ..
-السرة : اظنها سمحة البتحدل وتبدل في النسوان دي ؟
-فاطمة: والله دا العوج ذاتو يابنات امي دي بتكون عيانة وما بتركز ليها علي راجل تاني واحد !!
-امنة : يمكن حظها مع الرجال الخلاها تمشي في الدرب دا يابنات امي ؟
-عوضية : اجي اجي يا امنة هن البطلقن كلهن ببقن حراميات قالو !! هي النجفة بت الحسين طلقوها سماحة ورجاحة عقل وادب ونسب !! بس الله يلعن الرجال المابقدرو النسوان !!
السرة : كدي يافوزية لقو عندهم اي دهب او حاجة من المسروقات ؟
فوزية : قالو ليك في واحده اعترفت وبحققوا مع الباقيات .. لكن ناس المباحث ديل بجيبو خبرهن المطلوقات هاملات البيوت !!
فاطمة : انا في ام عجن دي ما دايه قديمة وسمعتها كانت حلوة الجد عليها شنو ؟
امنة : هوي انتي اظنك ما مشيتي دخلتي بيتها قريب !! المافيه شنو بيتها وفجاة كدا الغنا دا جاها !! شئ كسير بيوت قديمة وعفش وعدة مطبش وحافلة ام قزاز يلمع !!
السرة : الله يبالينا بي حالها !!
عوضية : يا السرة انتي عجبك الحال المائل دا لامن تتمني في حالها ؟
السرة : لا انا قلت يكون عندنا متل الجابتو دا لبيتها !!
عوضية : يابت امي ان شاءالله ربنا يهون لينا كلنا بس بالحلال ..
السرة : آمــــــــــــــــــــــــــــــــين .. وتتوالي الدعوات من خلفها منهن جميعاً ..

الحبيب محمد عوض
والله بدون مجامله قمة
في الابداع وروعة لاتوصف
متعك الله بالصحة والعافية

اخي ابوعمر


ومساءك ينهمر القاً وامنيات ..

شاكراً لك مرورك بالبوست وتعطيرك لاجواءه بما يسعد ..



ولك ودي
واحترامي

الأخ العزيز محمد عوض السيد / سلامات/ مشكور على هذا الكلام الجميل والسرد الرائع ـ شمارات حاجة السرة والله اليومين ده واصلانا بالاسكى بى ونسوان المغتربين بباصوها لى نسوان هولندا وامريكا فى نفس اليوم ـ أخى محمد بعد تخلص تكل السرة قبل لينا على تكل المغتربات وبينى وبينك الكلام كله حايكون عرس وطلاق ودهب. لك التحية.

ازيك يا محمد

مشروع قاص مدهش في الطريق .......

وعلى جانب الطريق نقف نحمل رايات الانتظار انبهار


ماتتاااخر

اخي د/منصور

تسلم يازول يارائع .. ومشكور علي الاطراء ..ونسوان المغتربين ديل غير الشمارات عندهم شنو انت قائل ..
وربنا يهون لي الجايات ..


ولك ودي
واحترامي

الزولة الرايقة
ســــت البنات


لست سوي خربشات بايامي .. وزادنا تشريفاً حضورك هنا بعد طول غياب



وما تبعدي كتير ..




ولكِ ودي
واحترامي

(11)

*السرة تكسر بعض الحطب لايقاد النار بالصاج .. ويدخل اليها فريق العواسة وكغير العادة ايتن سوياً .. وكن يتجازبن اطراف الحديث خارجاً ..
-السرة : مالكن اليوم متقاودات كدا في شنو لاماكن من الصباح ؟
-فاطمة : والله يا السرة الواحده فينا بعد كبرها دا بقينا نخاف علي رجالنا من الفتوات العينهن طايره .. والعجيبة بقولوا للرجال تعالوا بالعندكم بس !! شفتي جنس الرخسة دي كيف !!
-السرة : هن من مابقن يغنن لي راجل المرة انا كجنت الفتوات الصغار ديل !!
-فوزية : عاد البورة ضارباهن يعملن شنو وقت الشباب ماداير يعرس ولا بالهزار !!
-السرة : يقومن يضايقننا في رجالنا !! دا الكلام الاعوج !!
-عوضية : فلانة ديل ما عندها تلاتة شفع وابو عيالها ما عرس فيها !!
-امنة : والله اتجازي الراجل دا شن طعم العرس ليهو بعد العيال العندو ديل !!
-فاطمة : اول امس الراجل دا ماكان بجي لابو عيالي بي بنطلون واحد وقميص مفتق كلو !! بلاهي شوفو الزمن دا اتغير كيف !!
-فوزية : قالوا ليكن امورو ظبطت وجاتو قروش كتيرة من شغل السمسرة بتاعة الاراضي !!
-فاطمة: هي طيب وقت السمسرة فيها قروش قدر دي رجالنا ديل عميانين منها لامن يشتغلوا بالماهية المابتنط اكل العيش دي !!
-السرة : يعني وقت كان مفلس ومبشتن ما عرس ووقت تنفتح عليه وام العيال تفرح يقوم يعرس فيها !! يخسي علي رجال الزمن دا المابراعو العشرة !!
-عوضية : اي والله ضاقت معاه الحلوة والمرة .. وبالساهل كدا يبيعها بي مرة تانية !! دي كان انا والله اوريه ليك النجوم عز النهار !!
-فوزية : القميص المقطع داك يافاطمة رماهو بعيد وهسي اخر بدل وكرفتات التقول (الاحمدي) !! وحني عربيتو التعبانة ديك بدلها ليك بي واحده سمحة وتجرح العين من الجدة بتاعتها !!
-السرة : الله لينا بي حالهم الناس الروقو ديل .
-فوزية : وكمان عمل عرس يحكو بيه الجنيات !! جنس فشخرة وبوبار غايتو العندو قرش بحنن راسو !!
-فاطمة : يعني عمل حفلة وكدا يا بت امي ؟
-فوزية : اي والله وقالوا ليك حفلة ليها ضل .. والاكل انواع واشكال والبارد شئ الناس عرفتو وشئ ماعرفوه !! والحفلة بي وردي .. اصلها البنية ماصغيرة وبتدلع عليه !!
-عوضية : عليكم الله شوفو الراجل المابخجل دا .. حفلة شنو وهو زول معرس قبل كدا !! سجمو وسجم الاعراف البقو الناس يكسروها زي القصب !!
-فاطمة : رجال السواد والرماد ديل يابنات امي ..
-السرة : غياتو الله يصبرها ام عيالو ويديها العافية ..
*ويردنن خلفها الله : يعينها ويصبرها علي البلاء الجاها دا ورجالنا ان شاءالله عينهم ترك !!

12

*فاطمة والسره بجانبها وهي تشعل في الصاج وتمسحه ليساعد علي انزلاق العجين بيسر وسهوله .. وتناغم السرة بونسة عن حالها المائل هذه الايام وعدم صرف راجلها للماهية بعد ..
- فاطمة : سمعتي بي سرقه ناس امنة امس ؟
السرة سجمي متين الكلام دا حصل ؟
-فاطمة : والله لم ليك فيهم حرامي عدمهم الهدم البلبسوه يا السرة ؟
معقوله ماسمعتي الجوطه من الصباح ونسوان الفريق داخلت عليها يكفرن ؟
-السرة : لا والله يافاطمة كدي الننكرب امشي ليها قبل ما اللوم يحصلني ..
وتواصل فاطمة عواستها في حين دخول بقية الشله ماعدا امنه ..
-عوضية : يافطمة الوليه دي منكربه كدا ماشة وين ؟
-فاطمة : ماشة لي امنة تكفر ليها في سرقتهم امس .
-مدينة : هي يادوب عرفت يعني !! والله امنه دي لسانها طويل والبركة المرقت عليها قبل ماتجي للعواسه ..
واتت السرة غافلة ومعها امنه وهي تحمل بيدها جردل العجين وطبق الكسرة ..
-عوضية : تهزل مع انه .. عليك الله في زول سارقنو سرقة العدو ياكل ؟
-امنة : عاد نموت يابت امي .. شوفو الوليه دي عليكم الله !!
ويتعالي الضحك ..
امنه : لكن يابنات امي والله التقول الحرامي دا محرش علينا .. حتي التيبان القديمة البطلع بيها للفريق سرقها .. والله ماخلي لي الا التوب الكنت متلفحه بيه دا .. واظنو اشفق علي ساااااااكت بعدم شيلتو !!
-مدينة : لكن يا امنة معقولة الحرامي يخش ويسرق كل الهدوم ويشيل الرادي السمح داك وانتو ولا علي بالكم ولافيكم زول يصحي !! ما غريبه دي !!
-امنه : والله يامدينة مافي زول سمع حاجة ولا حتي كشكشة مع انو البيت كلو مقفل وهو قرص الشباك الوراء بالزقاق .. والله يجازيه ويجازي محنو العملها فينا.
-عوضية : هي يابنات امي حراميه الزمن دا مفتحين وعندهم حاجات بعملوها .. قالوا ليك بمشوا المقابر ويشيلو التراب بتاع القبر وبشتتوه علي اهل البيت العاوزين يسرقوه .. وتاني الرماد كال حماد كان دقو طار جنبك ما بتصحي !!
امنه : عليك النبي ياعوضية الكلام دا صاح .. اكان كدي النمشي اتاكد من القصة دي واشوف لو في اي اثر لتراب في اللحافات والمخدات !!
السرة : غايتو الحراميه ديل اتطورو .. وبقو بتاعين سحر كمان .. لكن السر في الكلام دا شنو ياعوضية .. تراب المقابر هو بعمل كدا ؟
عوضية : انا سالت الخدام بتاعني وقالوا لي الموضوع عندو سر بعملوه عند فكي
فاطمة : الله يبعد عننا المصايب واولاد الحرام ..
امنه : امنه كدي ما تشوفي لي الحرامي دا منو ياعوضية .
عوضية : سمح يا امنه وبعد المغرب تعالي لي عشان نشوف اوامر الجماعة ونجيب ليهم شنو . وتب بعرفوا ليك ..
والصمت يخيم عليهن من كلام الزار وخوف البعض من ذلك ..ويتفرفقن وعلي وعد المغرب ليروا بانفسهم ما ستفعله عوضية ومعرفة ذلك الحرامي ..

وكلنا هنا في انتظار ما سيفعله خدام الزار لمعرفة الحرامي
ياريت لو عرفنا الخدام ديل ايام الامتحانات ... ههههههه

استاذنا محمد عوض في ماذا اعقب وانت صورت لنا الحال كما عشناه دون تزييف اوخداع او رتوش زائدة فأنت قصصت وعقبت ودونت وفسرت وحكيت لنا كل ماهو مفيد في قصتك الواقعية
محمد عوض ابن التكل ابن الطاقة يالله عليك يامحمد عوض انه كان الحال في كل اقاليم السودان الونسة ساعة العواسة الجبنة في نص النهار المرقة في العصرية شاي المغرب انك قدمت لنا عملا دراميا كاملا لاتشكر عليه لانك قدمت هذا العمل ونحن تلاميذا لك فهل يشكر التلميذ استاذه

سلامات عوافي

اختي حـــــبوبة


كان تخليني اخد لي نفس شوية كدا من الكيبورت باقي ليك عمك كبر ونظرو قل ما زي زمان
وهسي ماعندك مشكلة انا بضرب ليك الرمل .. ما تمشي لي زول ياخد منك قروش ثمح ههههه


وانتظري كم يوم النخمر الفكرة في الراس



ولكِ ودي
واحترامي

سلام لحدي عـندك
محمد جبو الخليفة


تسلم وانت بدورك اسهمت بالتكل فيما قلته ووصفه باحساسك .. والونسة بالنهار موجودة وان انقلبت موجتها الي كلام مشاتر ولايشبه الامس بشئ !!
ومازالت الحاجة (ربنا يديها العافية) تدعو نساء الفريق الي شراب جبنة بين الفينة والاخري .. تعرف الاسبوع قبل الفائت لقيتهم متلمين في الركوبه والشمارات طائرة لامن عطست منها



فشكراً لك لاطرا لا استحقة فان ما اكتبه مجرد خربشات ..



ولك عميق شكري
واحـــــــــــترامي

(13)

(ان الزار مرفوض في عرفنا وديننا)

(الزار او الظار او كيفما نطق لهو ضرب وثني واحدي طرق الشعوذه لاسترضاء الاسياد لشئ ما يطلب منهم او لطرد الجن المتلبس للشخص ويكون الزار بتقديم الكرامات للاسياد(كما يسمونهم) بالذبح او تقديم اي شئ اخر يطلبونه وهو طقس يصاحب له الرقص والضرب علي الدف او الطار وقد قدم الي السودان حسبما لدي من معلومات من الحبشة بالقرن الثامن عشر تقريباً ومنه السودان الي جميع الدول العربية الاخري ).

* بالمغرب لبست امنه ثوبها وحملت بصرة ثوبها رطل سكر ووقية بن وبعض الجنزبيل من اجل جلسة الزار التي تعدها عوضية .. وهناك وجدت الشله علي قدم وساق ينتظرون مجئيها بفارغ الصبر ..
الدخان يعلو بسقف الغرفة ومنبعه ذلك المبخر النحاسي الكبير والذي كلما فرغ وضع عليه بخور بحركة تمثيليه ترهب ضعاف النفوس .. واللون الاحمر الطاغي علي الاجواء من تلك اللمبه التي اشترتها الشيخة عوضيه خصيصاً لمثل هذه الطقوس ..
ورجلان يحملان الطار ويضربانه برفق بالبداية .. وعدة نسوة يتلفحن بالثياب حتي وجوههن ويتلوين مع دقات الطار وهمسات تتعالي من الشيخة عوضية في صوت متهدل يعلو وينزل حسبما الاجواء !!
-عوضية تاخذ بيد امنه وتجرها الي زاويه الغرفة .. اها ماجبتي القلتو ليك ؟
-امنه: جبت البن والسكر والجنزبيل ..
-عوضية : ووين الديك الاحمر ؟
-امنه : هوي ياوليه ماقلتي لي الكلام دا !!
-عوضية : هوي يا امنه كمان في زار بدون دم وكرامه للخدام .. انتي دايره تمسخيني لي قرد اظنك معاهم !!
-امنه : سجمنا ياعوضية قرود شنو كمان .. مش الديك دا هسي بجيبو .. وتستدرك لكن ياعوضية ماعندنا ديك احمر !!
-عوضية :لا كمان الدك الاحمر ضروري واول طلب طلبوه الجماعه بتاعني .. كدي شوفي --فوزيه انا شفت لي ديك احمر في قفصهم اول امس ما يكونوا ضبحوه !
-امنه : سمح هسي بشوفها .. وتصيح لفوزيه .. وتحكي لها ما طلبته منها الشيخة عوضية ..
-فوزيه : والله الديك دا يا امنه راجلي بريدو شديد وكم مره اجي اضبحوا يكورك فيني .. لكن كدي بحاول اقنعوا ليك واوريه الحاصل .. خمسة دقائق بس واجيكم .. وانتي امشي جيبي ديكك عشان اختو ليه بالقفص بدل الاحمر كان وافق !! وتخرج كل منهما مسرعه صوب منزلهم ..
وعندما اتت فوزية وامنه حاملات الديك الاحمر .. لبست الشيخة عوضية ربقة سوداء ومجموعة حجبات فوق رقبتها وخلخال من حديد برجلها الشمال واخذت الديك واعطته لاحد الرجال الذين بصحبتها .. وجرت امنه الي وسط الحلقة واخذت في الرقص واطلاق الهمهات العشوائية لاسترضا الاسياد ليبوحوا بالسارق الذي عدم امنه التيبان ..
-عوضية : تصيح يافلان جيب الديك دا وختو في النص هنا .. وجميع النسوة يتمايلن بقوة مع ضربات الطار ..
-امنه : تجلس بخوف وهي بوسط الحلقة وتجلس بكرسي ومغطيه بطرحة حمراء .. وتنظر الي صويحباتها شلة التكل بنظره خوف من تحت ماتغطي به !!
-عوضية : تاخذ قطره دم وتمسح بها علي جبين امنه وتتمتم بعض الاشياء :

حي حي حي يا اسياد ..
هوم بدم ودم جنب دم ..
كان ماوريتونا السرق منو ..
وهاكم دم ..

وتمسك بيدها حفنة بخور ترشه علي المبخر الذي يشتعل بالنار .. وتصيح مدد يا اهل الله مدد يا اسياد ..
-النسوة: اللول اللول يا لولية .. بسحروك يا امنه الحبشية .. طق طق طق طق وتتعالي الصفقات ..
الشيخة عوضية تنشد :-

دقولك دقولك

يا الحكمت قولك

ياسمير

ضبحولك ياسمير

شن قولك

عيون بتريدك براك

مسحورة بيك والهوا معاك

والله براهو الابتلاك

في هناك وفي شقاك

يا اسياد دستوررررر

امنه جات تزور

وطلقنا ليك بخور

طق طق طق طق

(صفقة)

ورونا ليه منو ورونا ليهو منو ؟

-الشيخة عوضية تمسك بيد امنه وهي تدندن اخر مقطع لهذه الموشحة لاسيادها .. وتخلع الطرحة من راسها .. وتبداء اعراض المرض علي احدي النسوة التي يتحلقن حول حلقة الرقص وتبداء تهذي .. عوض ابو كيعان .. والقصير الازرق .. تمتمت بهذه الاسامي واغمي عليها ..
وبداء الهلع علي امنه ولا سيما انها اول مره تكون هي ست الشأن فقبلها كانت متفرجه لعدة طقوس زار ..
-الشيخة عوضية : خلاص الاسياد وصلوا خبرهم لينا .. والسرقك عوض ابوكيعان ودا مشهور وكلنا عارفنو .. اما القصير الازرق دا يكون صاحبو ..
وينفض السامر بعد مده ليس بطويله من حلقة الزار .. وتبداء النسوة في قلي البن لعمل القهوة ..
-فوزيه : يابنات امي مسئولين من الخير كدي ؟ انتو عوض ابوكيعان دا مش اتوفي الشهر الفات بي حادث عربية ؟
ويعم الصمت الجميع لبرهه من الزمن ..
-امنه : اي والله يا فوزيه .. وطيب القالوه الاسياد دا شنو ياعوضية !! بغضب ظاهر !!
-عوضية : يكون في زول تاني اسمو عوض ابوكيعان !!
-فاطمة : والله ياعوضية اسيادك طلعوا اي كلام هههههههه
-السرة :انتو عارفين يكون الحرمي شال تراب المقابر البقولوه داك من قبر عوض ابوكيعان !!
ويتعالي الضحك من الجميع الا الشيخة عوضية تداري فشلها بالصمت وتتعالي الضحكات وفوزيه تتحسر علي ديكها الاحمر الذي يفضله زوجها .. وامنه تخرج غاضبة وتسب وتلعن الزار وكل اسياده ..

سلام عليكم اخونا محمد عوض السيد


والله مبالغة بالجد وتحف من الكلمات والكتابة الجملية جداً
معالجات لاشياء كبيرة جدا بصورة بسيط لابعد الحــــــدود

نتمنى لك التوفيق دوما ونسعد بما تكتب

صديقي فوزي




تســلم كتير لمرورك .. ولا استحق ما ذكرته من قـــــــول !!
فان التُكل بخاطر كل منا .. من عايش تلك الحقبة الجميله ..

واتمني ان اوفق فيما اكتب لاوصل ما اربو اليه من فكر ..



ولك ودي
واحترامي

الاستاذ / محمَّد عوض السيد
عوافي
تُكل السُّرة يدين على (استحياء) فجور الصالح العام ويصرخ عالياً ضد الاشاعات وبين الأمرين فلترة تنشد النقاء
سرقة المنازل بارشاد من نأمن لهم !!
اشكالية العنوسة و (فرفرة) بعضهن المستميتة بحثاً عن (ضُل) رجل
العز الذي يشدو فيه الاستاذ وردي 00 والتحدث بنعمة الله (ربما) دون شكرٌ وثناء
الظار والطار وابراز (القاني) لوناً اساسي 000 سحراً ودجلاً وشعوذة وبله وتبله
لله درك يا استاذ
تخريمة
حينما كان الاستاذ / محمد وردي في منتصف الثمانينيات يطلب 4500 جنيهاً اجراً لاحياء الحفل كان كمال ترباس يطلب وقتها 8000 جنيه بالتمام والكمال واذاع (( ترباس لمن استطاع اليه سبيلا !!))
(صورة مقلوبة) ويصيغة اخرى لا تختلف عن الاولى (مقلوبة الصورة)
ما سبق لا ينفي البصمة (الترباسية) المميزة في خارطة الغناء السوداني
لكن 0000
على كل حال سوق ترباس كان نشطاً اكثر من غيره من (الكبار) والكبار (جداً)
وتساءلت 000
لماذا فضَّل السمسار (بطل المقطع الـ 11) ان يغني وردي في عُرسه عوضاً عن ترباس ؟ علماً بان الآخير يُسلط الضوء (جيداً) على فكرة (البوبار) !!
تحياتي النواضر

الجـــــــــميل
محمد شريف ..






تالله اسعد ايما سعادة لمداخلاتك التي استمتع بها جداً .. فانت تعطي لما اكتب بعداً اخر .. لم ارتقي اليه بعد !!
فكلما احببت ان احيك شئ بالتكل استحضره زماناً ومكانا بخاطري واتذكر كل ايامي وانا قابع بجانب الوالدة (الله يديها العافية) اثناء عواستها وانا اقرض في الكسرة واخر طرقه هي من نصيبي فتتركها علي الصاج الي ان تكاد ان تجف تماماً وحينها ياتي دوري في لهطها بشراهه وممعنا في ذلك بالتمطق في تناولها !!

واقحامي لوردي بسبيل الشهرة التي تسابقه وقدمه في مجال الغناء .. وفعلاً ترباس له اسهامه وقدرته علي التطريب العالية التي يكاد يتميز بها وحده .. الا انه لا يرقي الي وردي ولو من قبيل التمني .. ويكفي وردي انه توج فناناً لافريقيا بعام 1994م بعد حفل اديس ابابا .. واخراجها في كاسيتين .. واذكر اني كنت مقبلاً علي الثانوي العام فقمت بادخار بعض مصروفي لشراها وقد فعلت ولا زالت معي الي الان ..



ومرة اخري ..
شاكراً لك مداخلاتك الثرة ..


سانصب خيام انتظاري لك دوما هنا وهناك ..




مـــع ودي
واحترامي

تسلم أخي محمدعوض علي هذه الدرر

اخي ابوعمر

ولمرورك علي بوست التُكل الذي يشكل ذكرياتي نحو ماضي جميل بكل مغرياته .. الشيط .. والقروض للكسرة .. ورائحتها الجميله التي تثمل ذاكرتي دوماً وتملاً نفسي طمأنينة لوجبة قادمة بلا خوف من مايشتكي منه الاخرون الان من سماد او كيماوي مسخ علينا الطماطم فمن وجباتي المفضلة تالله والي الان كسرة معجونة بي طماطم ولو لقت ليها زيت سمسم بتكون انتمت الناقصة ..


ولك ودي
واحترامي