إنتــو دي ثقــافة جــديــدة ونحن ما مــواكبين ولا شنــو ؟؟؟

واعني قصة انو الناس بقت تلم الجاني والمجني علية في سطر واحد بل في كلمة واحدة مفادها ( باركوها ) ... هذا النهج اصبح سائد بصورة مستفزة جداً للدرجة التي اصبحنا كلنا مباركين من شدة ما باركناها .. في رأيي اي مجتمع صغير او كبير متى ما افتقد الراجل اخو الاخوان الناصح المناصح الشغلة بتفك ولا اعني بالتأكيد الرجل اخو الاخوان كمفرد ولكني اعني بها احساسنا جميعنا اننا ذاك الرجل .. الي عهد قريب كنا نعرف عقب اي مشكلة من المخطئ ويتفق الكل على الناتج لأن الميزان كان معتدلاً وكنا نثق ببعض اليوم اتحداكم ان تتفقو على تجريم المخطئ.. المعايير اختلت واصبحت هناك فلسفة جديدة ندير بها مشكلاتنا ترتكز على المستباح زوراً وبهتاناً ( حرية الرأي )وعادي جداً ممكن واحد اسع يجي يسب الدين وينكر حتى الاسلام ووجود الله والعياذ بالله وعادي جداً يطلع واحد يقول ليك ياخي هو حر فيما يعتقد ودي حرية وده سجم خشم ووو وعادي جداً بعد ما روحك تتسل مع الزول اللي انكر حتى وجود رب العزة ده طبعا بعد ما يكتب ليك عشرمية اساءة فاتوقع يطلع عليك زول يقول ليك باركوها يا جماعة !!! ياخي اقول ليكم شئ ممكن تلقى موضوع مكتوب عن واحد اغتصب بنت عمرها سنتين وتتفاجأ بكم التعليقات اسفل الموضوع التي تستفز فيك اي شئ للدرجة التي يرتعد فيها جسدك من عينة يا شباب باركوها الزول ده اكيد عندو اسبابو .. بل عادي ممكن اجي اسع انشر ليكم صور جنسية ( المرود في المكحل عديييل ) ولا تتفاجأو اذا في ناس جات التمست لي مليون عذر .. ده شنو ده .. متى كنا هلاميين هكذا ام نحن اصلاً هكذا متى كنا بهذا الخواء ام اننا اصلاً فارغين وعبارة عن كائنات من عظم ولحم بلا روح ولا عقل ولا قلب .. صدقوني مالم نقول للمخطئ انت مخطئ ونعاملة بقيمة اخطاءة الي ان يرتد عن درب الخطأ فسنصحو ذات يوم وقد تحولنا الي غابة هذا مع شك كامل الدسم في اننا قد وصلنا مرحلة الغابة بالفعل .. كنا الي عهد قريب الغالب منا تمر معاملتهم بمعيار مكارم الاخلاق التي كانت موجودة حتى في الجاهلية واتى الاسلام ليتممها وينظمها هذا هو المعيار الذي كنا نعتمد ولا زالت قلة ممن رحم الله تتعامل به المعيار القائم على القيم والاخلاق والمرجلة والفضيلة والايثار والشجاعة والنجدة والمروؤه والكرم وكل صفات الرجل اخو الاخوان واحترام النفس في تقديري هو درة تاج هذه المكارم لان بأحترامها يسهل احترام الاخرين ومتى ما عايرنا تعاملنا مع الناس بخلاف هذا المعيار القائم على كل هذه القيم او الغالب منها او حتى اليسير منها او قيمة واحدة تضاف لقيمة احترام النفس فعلى دنيانا السلام لاننا وقتها سنكون وحوش في غابة لا يحكمنا الا قانون الغاب عندما تنزوي فينا الاخلاق لان الامم الاخلاق ما بقيت فإن همو ذهبت اخلاقهم ذهبو ..

كبسولة من البادية سمعتها على لسان عمر الامام بها كثير من حكم ومثل عسى ان يتمعن فيها من تربع الشيطان اعلى قلبه وان يتزود بها الاكرمين ..

ماك القليل ضرب القواسي بحقــــــــرك
في الحر و الدواس دايما متلب صقـرك
بلاع الكبار في عيونو باين نقــــــــــرك
أوعاك من صديق إن خز إمكن إعقرك

ما يغرك زمن قبل عليك و إتبـــارك
شين إن قلب باكر بمرق أســـرارك
العمل السمح سويهو و أكرم جارك
أديهو القرش صدقة و بتبرد نــــارك

الدنيا يوم و التاني تب مو هولــــــــــــك
و إن جار الزمن ساويهو قنب طولـــــك
الزول الغشيم عافيهو بي مبذولــــــــــك
و اللايك الصبر في الحارة بصبح زولك

هربيش الزمن فوق النواعم ظاهـــــر
و الفقر إن غرز شيطانو ماكر و قاهر
طرف السقيد الفي خلاهو مساهــــــــر
الليلة البعينك بكرة بيها بجاهـــــــــــــر

الليلة الخلوق المال قطع طاريهـــــــــا
في الدنيا أم زوال الناس تلملم فيهـــــا
الزول الشحيح لي نفسو مو مديهـــــــا
غاراهو العبوس و الآخرة ديك ناسيها

ما فينا العرورة الفي منامو مجلخ
في بيت العوين وسط البنات متفلخ
فينا الجنا أب نارا هواها يسلــــــخ
قرام الحجامة الفي رقابنا مشلـــخ

يا الأسد الرزم ما بعجبك الهبيــــــــــــــش
يا مضاير الصفوف تقلع مشيك بي الشيش
إن دق النحاس و جات القبايل ديــــــــــــش
بتجز الرقاب قبال تجيك معليـــــــــــــــــــش

الكي النجيض فوق الرقاب بتخلفــــــــو
و الضيف أب حمل بتكرمو زاملو تعلفو
ممحوق الرجال قولو البسيئو أخلفــــــو
بودة و سعد بخرب مسورك إتلفـــــــــــو

أنحن سوادنة و في المكرمات بنسابق
و القايلين طوال بلقونا فوقهم طابــــق
حرم ناس خمج مافي القدرنا مطابـــق
بنفج أم لهيب في الحارة لينا سوابـــق

ماكلين القرض دابقنا في فشفاشنـــــــا
و أب ريشن نفش بندوسو بي دراشنــا
و المو زول فزع حرم نمرقو طراشنــا
لا بنحسب عليهو و لا بنفرشلو فراشنا

ضرب النحاس مرقت عليهو رجالو ‏
و الأسد النتر نجض عمارو الجالـو
سيفو التقيل وسط الرقاب كجالـــــو
شوف الرجال بين النساوين جالـــو
‏‎‎
إن شاف العدو بصرج سنونو يكز
العوجا البدين الفي شتاهو ينــــــــــز
إن تاتا و قدل سيرا مشيتو تعــــــــز
شافنو الكبار سون لو عوم الـــــوز
‎‎
خلف الوعد بين الأكارم خيبـــــــــــــة
و سمحة عدوك ما تمشي تنكت عيبة
لفضك حسنو و راعي الكبر و الشيبة
و السر أحفظو ما تبقى سونا و ريبـــا

الدابي أب درق ماك القليل ملــت
مضروب الدرت جماع فريكا خت
قارح يا الأسد سيد القبايل جــــت
يا البحر أب زبد بلاع بحورا ست

بتعز الكريم فوق الرجال و هميــــــــــم
زندك في اللقاء و دخريك وكت الضيم
شمار منكرب و عن عروضو لئيــــــــم
بنكجن كبير الشيب و ماهو كريــــــــــم

هولنا أب دقن علا أب دقين مو هولنا
ما بنقبل نضم وكتين نقيف علي طولنا
النية ننجضا حرم نميز زولـــــــــــــــنا
و الدارنا اللجي و خلي اللكضب قولنـا

لويعة الدود أب لطاما طــــــــــــــــــخ
أقدل يا رجل فوق الكبار و إنجـــــــخ
يا أسد العرين الما إنعرفلك فـــــــــخ
يا الموت البخلي الناس تسوي الشخ

الكل البجيك بتمدلو الكنتــــــــــــــــوش
و في مشيك قلع ماك العوير بتكـــوش
الضيف إن دخل بي طبعتك بتهـــــــوش
عن ساعة الكرم زي التقول مهبـــوش


‎
‎

الدود أب غباش ما جالس البنــــــــوت
ما إتحكر معاهن و هبش المختــــــوت
عسام الفقر لي المكري و المسخــوت
الفارس أب ضرس عزا بلاهو يفــوت

العودا أب ضراع إياك عشا البايتات
المرق التقيل البسند الواقعــــــــــات
إن حر الزمن ضلك و لا بنفـــــــــات
يا حوم الخلا الركزن عليك ثابتــــات

ماك الدغور خايب المروة مسجم
قود المقلع في سراتو محجــــــــم
ماهو التعيس ضلن كبير و ملجـم
قلام الرقاب المن صغرتو ملجــم

في السفر البعيد و المحنة زولنا رفيـــــق
بي مالو و جناهو و بي نفسو بلفا الضيق
في الحارة أم جمر تلقاهو ليك شقيـــــــق
و القرش العفن حرم نحرقو حريــــــــــق

بنراشي الضعيف و زولنا الكبير بنجلو
نقطع من لحمنا و ما بنحقرو نقــــــــلو
و الكايس المهانة حرم نهينو نذلـــــــو
و الماسك الدرب رب العباد يعدلـــــــو

إن جيت الغرب تلقانا نحن رجــــــــــال
و إن درت الشرق نحن الهناك كمـــال
في وسط البلد إن كان جنوب و شمال
نحن الأسود و رجال دواس و كتـــــال
‎‎
الحوم إن تبع بنتبعو الباكريـــــــــــــة
بندور العدو الدايرنا بي الزنديــــــة
فارسنا البغير حرم بكفي الميـــــــــة
و إن ولى الدبر حبوبتو مي بت ريــا

شور الكبير الفي حياتو مــــــــــــدرب
و قول الكبار عدو الصحيح و مجـرب
ما تغرك فلاحتك و يبقى بهمك سـرب
الدنيا العبوس بنيانا بكرة مخــــــــرب

ضرب المثل قالو الشقيق حســــــاي
و ناسي الفضل ناكر جميل نسـاي
الدارك الزمان يا قلبي صار قســـاي
أنساهو البفوت خليهو قنب ساي

كتر الكلام في الشينة تب ما بحلـــــــك
و لازم السكات طقو البجيك بشلــــــــك
حقرك لي الضعيف و تشوفو دايما قلك
إن ضاق الصدر و بقيت خزانة بقلـــــك

كعب البقودك من قفاك لي النيـــــــــــــــــــــــــة
و ما شكروهو السوا لي الناس سيـــــــــــــــــة
القاصدك عديل و بدور معاك الديــــــــــــــــــــة
يلقاك يا أب كريق من منمد و حارس الليـــــــة
‎‎
سمح اللزوم وكتين عدوهو يريــدو
سمح البلحق في المكارم إيــــــــدو
سمح المقرن في المحاصة حديـدو
سمح البوسع في المجاعة مسيدو

كعب التداخلو و يبقى ماد قدومــــــــو
و كعب الدليب وكتين يصيح بومــــــو
عريان العروض ما بسترنو هدومــو
وحدبو الضمير في الشينة كبر كومو

سمح الجنا البمرق و يجيب رايحتـــو
سمح الضمير وكتين تفارقو سنحتــو
سمح الكريم وكتين يجيك بي سمحتو
و سمح الجنا البرمي الفوارس تحتو

كعب الصديق إن شينك إت سراهو
كعب إن جميلك ليهو ما طراهــــــو
كعب البفز من حارة جات قاصداهو
كعب البعيب و الزمن عراهــــــــــو

سمح الجنا البتلبب القاسيــــــــــات
فوقو الدرع و السيف جزم خايلات
تعوس البشاتن كان دنن قـــــــالات
ببقالن حكيم و بردهن راجعـــــــات

كعب الصبي الماسح الفريق حوام
و كعب الكبير البي البيوت نـــــوام
كعب البشيل حال الخلوق لـــــــوام
و كعب البحر وكتين يشيل عــــوام

كعب الزمن وكتين يتلب صقـــــــــــــرو
و كعب البسولب لي الضعيف و بحقرو
كعب البشرك لي رفيقو يعقـــــــــــــــرو
و كعب القرش وكتين يبين فقـــــــــــرو

سمح البناصحك و إت براك وحيـد
وسمح البراحمك و إنت منو بعيـد
سمح البذكر بي رقيب و عتيـــــــد
و سمح البباشرك زي قبايل العيد
‎‎
مي كسرة و ملاح مالك بتبخل بيهـــا
أديها العديم ربك ببارك فيهــــــــــــــا
ما تنسى القبير النعمة بتقافيهـــــــــا
و بنوبك قطن يملأ القدود و يحشيها

المرابيع الملونة بالاخضر تنطبق على اخوة كثر في هذا المنتدى ولكن استسمحكم اهداءها للعزيز المنصوري فذاك شهراً ما ترك منص فية ساعة عمل الا وقام بدعكها الي ان انبتت هذا الاحساس المتعاظم كل يوم تقديراً لهذا العزيز ..

	المشاركة الأصلية كتبت بواسطة احمد الهمباتى المرابيع الملونة بالاخضر تنطبق على اخوة كثر في هذا المنتدى ولكن استسمحكم اهداءها للعزيز المنصوري فذاك شهراً ما ترك منص فية ساعة عمل الا وقام بدعكها الي ان انبتت هذا الاحساس المتعاظم كل يوم تقديراً لهذا العزيز .. العزيز أحمد تحياتي عدت وعاد لدوت نت الماء والهواء والجمال شكرآ علي الإهداء وهذا من حُسن ظنك ودرر بحرك التي طالما إهديتنا منها الغوالي وصادقات المعاني ....... يا أحمد سأتداخل معك بإشارات واللبيب من يفهم النفوس ترتقي بالعقول وتجعل القيمة الحقيقية في الإتباع إتباع علي بصيرة وعلم ونور, ومن يريد قيادة الناس لأبد له من ( حكمة ) تقوده وتقود من بعده الناس إلي بر الآمان في زمن اصبح فيه الحق كما ذكرت باطلآ والباطل يتزين ويلبس رداء الحق جورآ وظلمآ . يا أحمد الحكمة ضآلة المؤمن وهي في رأي تتوفر بسببين: ( أقناع العقل ) ( وإشباع العاطفة بالغذاء الروحي ) وضع تحت الغذاء الروحي مئات الخطوط لأننا نتحدث عن التأسيس لقيم لمجتمع ملتزم بعد الإقناع والإشبــــاع نتفاضل فيه بـ ( منهج الذوق ) رغم أختلاف ذائقتنا إلا أن الحد الأدني أننا نتوافق علي التأسيس علي هديً وصراط مستقيم. بهذا المنطق تتعدد الأذواق وتتنوع الرغبات وتحت هذا الفهم لا نحجر علي الآخر فكره ومعتقده وفلسفته بيد أننا كـ مجتمع نأتمر بدين ونتقيد بـ عُرف ونلتزم بإخلاق وتقليد وفضيلة حقيق علي كل واعي الألتزام بها والدفاع عنها لأن أمتنا المرحومة حامت حولها شُبه الحضارة فجعلت حالها بـ إسمها ( كربة ) لذلك دعني أتمني الفرج وأردد مع من قال : عسى الكرب الذي نحن فيه ،،، يكون وراءه فرج قريب تحياتي لك .

و يا عزيزي همبتة..

بإسم حرية الرأي و الفكر و المعتقدات و عداء الحكومة و قبلها بغضاء الإسلام و المسلمين من (المحسوبين منهم) و من الفراغ و الخواء الفكري و الروحي و الوحدة و الوحشة و تمكن رغبات الجسد (الساقطة) من الذات، ينشر (الفاجرون) ما يشتهون في الظلام المرئي لغيرهم من خلال سلوكهم..!! لو أنهم لم يجدوا من لم يقول لهم (بغم)، لدعُوا الناس أن يتركوا لبس الملابس بما فيها الداخلية و يخرجوا إلى الشوارع (مولاي كما خلقتني)..؟.. لا، و إن تحدث أحد مستنكراً، تم نسب كل خيبات أملهم في الحياة إليه، و ذادوا عليها من خيالاتهم و ضلالاتهم الإكتئابية.. و بني القوم (المقهورين) الذين يخشون أن يحيق بهم ما حاق بمن قبلهم، يتأبطون الصمت المهين و كلٍ يتحسس ملابسه من فرط دهشة ما يتم نشره لهم (عنوة) داخل بيوتهم أمام أسرهم و الخوف أن تلاحقهم إساءات تجعلهم في وضع أحرج من ما هو معروض على شاشات (المدينة)..!!
في سفاهة أكتر من كدة..؟
و دمت

صدقوني مالم نقول للمخطئ انت مخطئ ونعاملة بقيمة اخطاءة الي ان يرتد عن درب الخطأ فسنصحو ذات يوم وقد تحولنا الي غابة هذا مع شك كامل الدسم في اننا قد وصلنا مرحلة الغابة بالفعل

كلام ذى العسل
و استناداً للفهم الراقى اعلاه
داير اعرف رايك يا همبته
منطق الزول ده غلط
ولا نحن الغلط
http://www.youtube.com/watch?feature...&v=C7SEbfgZcM4