رياح التغيير

بسم الله الرحمن الرحيم

السلام عليكم كلكم ....
صحيت من الصباح يا فتاح يا عليم يا رزاق يا كريم ( اصبحنا واصبح الملك لله ) وطوالي ع الحمام وهاك يا تجهيز و تمييذ اليوم بالنسبه لي ( مختلف خالص)
عندنا عقد اخت المدام ( ادام لها الله الصحة والعافيه ) و لخمه و نشاط و حركه و ...و ... على غير العاده الشاي بعد الصبح و العيال كذلك حمام بعد الصبح و لبس .
المدام تخش وتمرق ومتوتره خائقه من التأخير و قلق فوق العاده .
المهم انا لبست ويممت شطر حي الصفاء . لقيت بيت العرس عادي جدا .! ( باستثناء حضور متثاقل من ابناء وبنات العائله ) وبيت الجيران مفتوح للطباخين . سلمت على المجموعه الصغيره في الصيوان البعيد من بيت العرس .
خشيت ع الديوان لقيتو نضيف و فاضي .... يعني على غير العاده السودانيه . (( زمان الحته بتكون جااااااايطه وناس كتيره و النسوان ما بنومن خالص الليل كلو النيران مولعه و الطبيخ شغال و البلد كولها في حالة استنفار و استعداد 100% . و حالة الطواري معلنه قبل اسبوع من الحدث الهام جدا .))
نرجع للمشهد الحالي ...........
الساعه 9 و30 ق/ص . اكتمل العدد اولاد وبنات العائله و الجيران و الاصدقاء والمعارف و المعازيم يتوافودن ( الدعوه فطور و "العقد بعد الفطور"). مجموعه من الصواني طلعت دفعه واحده كل الناس قعدت وبعد اقل من ساعه فضت مجموعه كبيره من الترايبذ كل واحد بغسل ايدو و يتجه ع الكشف و يركب عربيتو و يغادر . حضر عدد أخر هم ( ناس العقد) برضو الصواني ما اتاخرت و بسرعه انتهوا من الفطور وهاك يا عقد ...............ما فيش حفله و العروس راح تطلع طوالي ع شهر العسل................. و خلاص انتهى العرس وبدت الناس نسوان ورجال تغادر الناس الجو بعد غيبه من الخرطوم و مدني وحتى الجيران .
يعني انتهى العرس بإنتهاء ( مراسيم العقد ) خلاصه القول ( عرس مسييييييييخ جنس مساخه اعراس الزمن ده )
كل شي مختصر وسريع ايقاعات الحياة سريعه و علاقات الناس فاااااتره .
احيانا بيصيبني نوع من الغثيان لما اشوف انو العاطفه والحميميه السودانيه الاصيله المتاصله ( اقتلعت نهائيا من الجزور وما عادت موجوده ) و بحتار في مصير اولادنا و بناتنا وانا متاكد راح يواجهوا في ظل التفكك الاجتماعي الانحطاط الاخلاقي السافر والتحولات المجتمعيه ابتلاءت و رياح عاتيه جدا وسيل عريض من الجرائم و الاعتداءت بكل انواعها .
كل اللي بقدر اقولوا ليهم ......... ( الله يحفظكم و يكون في عونكم )