مكتبة د/ طلال دفع الله عبدالعزيز

احبك حب


أحبك


يا إصطباح النور


بعطر الطل .. علي الوردة الربيعية ..


احبك حب :


صبوح الغيمه لي بُرعم


طلع من شِق تراب عطشان


تناديهو ويناديه ..


أحبك :


في انقسام الموجه بين شيمتين


تلوح ايديها في الغرقان


تجي النسمة وتنجِّيه ..


احبك لقية الضهبان


جرعة مويه في العتمور


هياجة صيف نهاريه ..


واحبك حب : وله عصفور


يطير من دَن قصايدي شرود


يضمو فضاك


يرِك في غصونك المعني ويغنيه ..


حبابك نشوتو يسالم


يمد حضنين علي وعدك


حنين آهه و بشير ميلاد و أمنيَّه ..


أحبك : زهوة الإزميل


اذا شالت عيون الناس


بريق الدهشة للتمثال ؛


احبك : دمعة الترتيل


اذا نزلت علي مصحف


أواخر ليل


يسلـِّم فجرو مفتاح ضئ


و قبلِ يمِد


غطاهو عليهو ... يتذكَّر


يواعد هجعة الاطفال ...


حِلِم باكر


وصبرِ جميل ...


مواجد نجمة الزهاد


مصب النيل تحيه رَضِيَّه من نبعو


موج النيل ... عروس لرضاهو مجليه ..


بخور كُهَّان ... و أيقونات


مواسم زهرة اللوتس


سر شايلاه اهرامات ...وبُرديه ..


احبك :


دبكه .. طبله و ناي


طقوس في زفه شاميه ..


أحبك :


ظلمة الاحزان


ضَوَت شمعة أمل فيَّه


احبك :


دمعة الحبان


بعد ما آيسوا اللقيا


صباح اتلاقوا عيديه ..


أحبك :


أُمنية فارس ... جواد عربي


وسُكْسُك ... رقبه زنجيه ..


أحبك :


عود


تغازل ريشتو في وترو


هَمَنـّوا موشحِن تطريب


سهرة صيف


قمره ... وقهوه عربيه ..


أحبك ... طبله ... نـُقـَّاره


مسافر صوتها في الأحراش


تبشِّر بي زفاف ... ميلاد


حصاد أو فرحة قبليه ..


أحبك :


عين نعامه تشوف


تحت الرمله ضل صياد


تلاشي غمامه قمحيه ..


احبك... حلفة الجعلي


طرب حلفاوي كامل ذوق


و شبَّال راقصه شايقيه ..


أحبك :


بدْوَلـَه و دوبيت


وتنية بت بجاويه ..


احبك : كمبلا .. و مردوم


و هزة راس مِسيريَّه ..


احبك : حَجَّه بي طرحه


تداعـْب إيديها في سبحه


جات .. تنهي الرقيص في ظار


نزل دستوره لوليَّه ..


أحبك : طـَلـْحَه واقده النار


وُشومِك ... حتي دخانك


..


: أحبك


في فضاكِ هديل


حمامك غنى متطامن


رجع أحضانو فاتحه .. جميل


غصون بستانك الآمن


حضن أشواق فرايحيه


..


نسورك تبعد الآفه


و سورك يبقى ليك حماك


إذا عصفن عليك رياح


ودستورك .. يا هجين و خلاس


معاني الخير و حريه


..


أحبك : و إنتي ام درمان


ملخـِّصه كلَّ بستانك


و برضك زهرة التاريخ


من عِنْ نبته حتي الآن


و احبك : في الاخير انك


مَهَجَّـنه من خلاس ضدين


و إنك زنجرانيه .