كيـــف تختـــار خـــــروفك ( بـوست تثقيفي )

كل الاخوة الاعضاء والزوار كل عام وانتم بالف خير وندخل توش في موضوع الخروف
طبعا غالب الشباب المتزوجين حديثا وبعض السناير وقلة من العجائز يجهلوا تماما كيفية اختيار الخروف
لذا وبما انكم لازم ترفعوا لله اضحية ممتازة وتاكلوا لحم ممتاز فقلت نكسب فيكم ثواب ونوريكم
الخروف السمح بيتعرف كيف ...

اول شئ نشوف مواصفات البهيمة الرسول صلي الله عليه وسلم قال عنها شنو :

عن البراء بن عازب قال: قَامَ فِينَا رَسُولُ اللَّهِ صلى الله عليه وسلم فَقَالَ: «أَرْبَعٌ لَا تَجُوزُ فِي الضَّحَايَا: الْعَوْرَاءُ الْبَيِّنُ عَوَرُهَا، وَالْمَرِيضَةُ الْبَيِّنُ مَرَضُهَا، وَالْعَرْجَاءُ الْبَيِّنُ ضَلْعُهَا، وَالْكَبِيرَةُ الَّتِي لَا تُنْقِي» أخرجه أحمد، وأبو داود، والترمذي، والنسائي، وابن ماجة ..

والعلما قالوا شروطه شنو :

بلوغ السن المعتبرة شرعاً، خمس سنوات للإبل، وسنتان للبقر، وسنة للماعز، وستة أشهر للضأن.
الرابع : أن تكون في الوقت المحدد، من بعد الصلاة، ويستمر إلى اليوم الثالث عشر.

• ولا يأخذ المضحي شيئاً من شعره ولا بشره ولا ظفره من أول ذي الحجة إلى أن يضحي.

• والأضحية أفضل من التصدق بثمنها.

• وتجزئ البدنة عن سبعة.

• وإن طرأ عيب على الأضحية بغير تفريط أجزأت.

• وإن استدان وكان لدينه وفاء فلا بأس.

• ويأكل منها، ويدخر، ويهدي، ويتصدق.

• ومن الآداب: أن يريح الذابح ذبيحته، ويشحذ السكين، ويسرع بإمرارها، ولا ترى البهيمة أختها وهي تذبح، ولا يستعجل بكسر رقبتها أو سلخها، ويجعلها إلى القبلة.

• ومن البدع أن تُوضأ البهيمة! أو أن يمسح عليها ليلة العيد من رأسها إلى ذنبها، أو أن يجعل بعض دمها في باب بيته، أو على جباه صغاره !

طيب الان انت دخلت سوق البهايم ونويت تشتري خروفك فاول شئ تعمل شنو ؟

اول حاجة تقيف وتعاين للبهايم بنظرة شاملة متفحصة تراعي فيها الاتي :


1ــ الخرفان الاكثر حركة لانو الخروف السليم وممتاز بيكون حركتو كتيرة علي عكس الخروف الفيهو علة بيكون ساكن .. تنشن علي كم خروف من المتحركات ديل وتمشي عليهن
اهم كشف والكشف الرئيس هو كشف الاسنان تمسك بي يدك خشم البهيمة وهنا لازم تكون عارف انوالأسنان بتكون في الفك السفلي فقط بينما الضروس تكون في الفكين معا .وتولد بثلاث أزواج من الأسنان اللبنية ويظهر الزوج الرابع عند ثلاث أسابيع من العمر ، وتدوم هذه الأسنان اللبنية حتى عمر 8 شهور من بعد الولادة وتكون متباعدة وبيضاء وده عندنا بنقول ليهو (جدع )
يبدل الزوج الأول الأمامي من عمر ( 1 - 2 سنه ) بأسنان تسمى الأسنان الدائمة ، ويسمى : ( تنى )
والزوج الثاني في عمر ( 2 - 2.5 سنه) ويسمى : ( اربعي )
وبعد كل زوج اسنان اضافي زيد سنة الي ان تصل الي اربعة ازواج وبعدها بيبدا التساقط بنفس الترتيب .. واظن هنا واضح انك حا تختار يا اما تني او اربعي ..

2ــ بعد يجتاز الاسنان اول شئ تعملو تجس ضهرو من نهاية ضهرو تجاه الضنب وهنا الناس بتغلط وبتجس جس اهل البندر والواحد فيهم بيجس بي صوابعو ذي الكأنو عاوز يرفع الخروف وده غلط لانو الجس بيكون بي كف يدك في نفس المكان ولكن ذي الكأنك بتدعك في ورم والغرض منها انك ما تلامس العضم لانو اذا دعكت ولامست العضم فدة خروف تعبان تسيبو وتشوف غيرو لحد ما تلقي واحد يكون الملمس لايصل للعظم .. طبعا الطريقة الاولي الخروف بمجرد ما صوابعك لامستو لا اراديا بتتغلص عضلاتو وبيوهمك انو تريان واصحاب البهائم من ما يشوفوك جسيت بالطريقة الاولي بيقولو الفارة دقس .. وانت ذاتك بتتوهم لما تضبح وتلقاهو مافيهو لحم والغلط طبعا منك ما من الخروف ..
3ــ بعد ما يجتاز اختبار جس الضهر تمسك الضنب من نهايتو من تحت وتديهو نفضة وتعاين فيهو من جوه اذا لقيت في شئ من بعرو عالق لسة في الضنب ده برضو تبعد منو لكن اذا لقيت انو النفضة اذالت كل البعر بس باقي اشياء بسيطة فدة سليم والطريقة دي ما تعتمد عليها كثير لانو في احيان كتيرة بيكون الضنب لامس للارض او لاي شئ ونظف نفسو .. والاهم من ذلك اياك وان تعتمد علي جس الضنب لانو في خرفان بيكون ضنبها هذيل بس تريانة والعكس كذلك والمقياس الوحيد هو الضهر ..
4ــ الصوف اهم شئ الصوف يكون سليم وما يكون فيهو بقع واختبار الصوف بتمعطو في يدك اذا طلع منو شئ كتير برضو تشوف غيرو
5ــ العيون تعاين ليهو في عيونو قوووي واذا فيها اي لون اصفرار برضو تشوف غيرو اهم شئ العيون تكون لامعة ..
اظن لحدي هنا واضح والكلام ده بيوصلكم لشية كاربة ..

المشاركة الأصلية كتبت بواسطة احمد الهمباتى

والغلط طبعا منك ما من الخروف .. ..

والله يا همباتي أنا كل ما امشي اشتري خروف بعمل نفس حركاتك دي ....وطبعا لأنه شفت ابوي بعملها ...وما كنت عارف بعملها لي ايه وداير أصل لي شنو....لكن الليلة وريتونا.......اول مرة أفهم ليك الخشم دة بفتحوهوا ليه...انا طبعا الجماعة لما يشوفوني فتحت الخشم وجسيت الضهر بي راحة يدي طوالي بيقولوا الزول دة تفتيحة يقوموا يدوك خروف كويس بي سعر كويس....يعني أنا في الحقيقة كنت بجس في سيد الخروف مش الخروف ...وكانت شغالة غايتو لحدي العيد الفات....المرة دي بنمشي نجس بي فهم....سلمت

يا الهمباتى ، كل سنة وانت بالف خير، وشيتك تجيب
الضهبان ! والله طلعت زول بُطانة نصيح ، وخابر
إمور السعيه ، طبعا أخوك ضحيته السنة دى من
خرفان ود ابوزهانة كان الله طلق !!
عيد سعيد

ياهمباتي الخرفان وعرفنا كيف نختار خروفنا الملاليم كيف ؟ قالوا الاسعار نااااااااار !!!

سمعته بالمسطول الببيع الخرفان قال ياجماعة والله انا محظوظ كلما انوي الحج يجي عيد الضحية

هسي الناس ديل كمان يقوموا يقولوا كل مانجي نضحي الاسعار ترتفع

أها يا همبته طبعنا كلامك ده طبعناهو على ورقة

ومشينا السوق نفذناهو حرف حرف وبند بند كان على الخشم فتحناهو
وشفنا السنينات ولقيناها حسب المواصفات
وكان على الضهرو ما عندو عوجة والضنب فريناهو تب والبعيرات اتنفضن
وكان على الجري انا قايلو لاعب في الهجوم...

يلى يا اخوي رايك بهمنا بالحيل عشان نطمئن على قريشاتنا الدفعناها دي

وبعد كده لو طلع ضارب يبقى العيب ما من الخروف يبقى من كلامك ده

والله نجيضن لقيتك
الاسترالي كيف يا حبه
ولا ماعندو فتوة

مشكور اخي الهمباتي على التوضيح وطلعت ماك هين والله واتمنى ان يعود علينا العيد وبلادنا تنعم بالامن والاستقرار وكل عام وانتم بخير ,,,,

مشكور اخونا الهمباتي علي المعلومات ونحن جزارين ونثني على كلامك ولكن الافنديه الفي الخليج ديل وبالذات السعوديه تلاقي اكثر من نوع ذي الاسترالي والصومالي سنون ماعندو وضنبو ملفوف ذي الضارباهو كهربا ولذلك ننصح الاخوان بالسواكني وكان ماعرفتو السواكني تكون مشكله

نسأل الله ان يجعل ايامنا طاعة وخير .. آآ ناس شوفو الايام دي بتجري كيف والله بتزكر كتابة البوست ده متل الكأنو كتبتو للعيد الجاي دة وليس للعيد الفات