بقلم المحجوب
سؤال بي مية جواب ؛
انا غِلِبتَ حيلة وجاني العصبي والرجفة ، وشواطين الدنيا والآخرة من بنى البشر والجن الوطني والشعبي لقيتم إتشعبطوا في فقرتي ، قلت لي نفسي ‘ ياود إستهدى بالله وخت الرحمن في قلبك وما تابع الشيطان وتجري ورا البقولو ليك وتفقع مرارتك وتفتفت كبدتك وتهرد مصارينك وبخاصة القولون المسمي جزافا بالأعور . روق دمك وأنسى همك وفكر بى هدوء وإجابية وما يلبسوك الطاقية .
مشكلتي ،، في لحظة قررت أبيع عربيتى . ولما قلت أفكر بى هدوء بعد ما أصابتنى أم هلّاهلّا ونزلوا فينى أولاد ماما ولولية الحبشية وبشير لومي والخواجة ومتلازمة الشعور بالقهر المصاحب بالحماقة وشعور الإحباط ! وسألت نفسى عن إجابيات وسلبيات هذا القرار المتفرد تفرد الجاهلية و تبعاته على المدايين القريب والبعيد الابعد ( لانو الشَغَلة جابت ليها إنتخابات لفترة 5 سنين قادمة ) . أحيييي أنا ،،
أولا السلبيات لبيع العربية ؛
1) اولا حا أمشى كداري وده حا يكلفنى ضياع كتير من الوقت ويخفض من نسبة الإنتاج عندى ، ورفع المستلزمات وتكلفة الإنجازات ، إضافة الى تأجيل أوطناش أوإهمال بعض الواجبات الاجتماعية الملحة من مجاملات وتعازي وزيارات .
2) سوف يعطل هذا القرار أحد الضروع المادية الحيوية والأساسية الهامة لجبايات شبه جمهورية السودان ، من مخالفات مرورية ورسوم ترخيص مركبة وضرائب وزكاة وقيمة مضافة واسعار قطع غيار ورفع الدعم عن المحروقات من بنزين وجاز وغاز وزيوت وغلغلة لحرق الأعصاب ( بالمناسبة حرق الاعصاب داخل مع المحروقات ) وعتب وعوائد ودمغة وفرق تحسين وفاقد ضريبى ورسوم عبور وهبش ولبش ولهط وتسهيلات ورسوم تسليك وتمليك ،، هبوب ساكت .
3) المسافة ما بين مدني والخرطوم حوالى 187 كيلو متر تقريبا يمر فيها العابر بثلاثة نقاط عبور لمن يعتبر ! فمن عَبَر فهو عابِرٌ عُبورا مُعتبرا مُعبِرا لكل عابرعِبرة مُعتبرة وإعتِبارا مُعبرا ،،، ثم ما لا يقل عن 7 دوريات ونقاط رادار و تفتيش لي مافيش !! بفتشوا لى شنو ؟؟ ما عارف ،، ( وزي ما قال حيران : البفتشوا فيهو ده كان مالقوه قولوا لي سيد الرايحة فتش خشم البقرة ؟؟ والحقيقة ، الناس دي ذاتها بقرتهم رايحة ،،،
4) حبايبنا الحلوين حا يصابوا بالإكتئاب وبعضا منهم حايدخل في حالة من اليأس والإنطواءية والتوحد لو الناس حزت حزوي ، لانهم ما حا يلقوا ناس يتفشوا فيهم تكملة لنقصان في الشخصية والتربية يتموها عنترية بى دفاتر المخالفات والهرشة وهي دليل علي فاقد تربوي وعقدة الدونية والله المستعان .
5) هي ذاتها العربية لزوما شنو عليك الله في بلد مستوي الفقر فيها تحت مستوي البحر ،، لا صحة ، لا تعليم ، لا لا ، لا لا ولا أمان وكل يوم ناقصة منها حِتة ، وآخر دعوانا أن الحمد لله رب العالمين ..
ــــــــــــــــــــــــــــــــــــــــــــــــــ ـــــــــــــــــــــــــــــــ
ثانيا ألإجابيات لبيع العربية ؛ ( وإلى لقاء في الحلقة القادمة )
موقع ومنتديات الحصاحيصا
مقالات مشابهة
من المعتمد المغترب الى المعتمد المغنواتي قصة مشروع
التوجيه بسفلتة 26 كيلو بالحصاحيصا و تنفيذ الخطة الاسكانيه التى تأخر تنفيذها (بفعل فاعل)
مسجد الحصاحيصا العتيق بين الامس واليوم مادة تسجيلية