ميتافيزيقيا العودة!!!

بقلم فوتون

سلامات يا ناس المنتدى!
نعلكم طيبين, غيبة طويلة منكم,
ترانى قايل نفسى ما بجيكم صادى تب,
مشاغل الدنيا!
نعلكم ما خبرتونى؟
الاستاذ فوتون, زولا قديم بالحيل
علا كت مختفى, هسى بدور اديكم طلة
مرة مرة, اتحملونى.
* * *
دى مقالة قديمة, من روائع الميتافيزيقيا
والتى انارائدها الوحيد وعقيدها زاتو.

من دليلة وكمنة:
كنت قد الفت كتابا فى القرن الثانى ( لكن ما مذكر الثانى الميلادى ولا الهجرى) واسميت هذا الكتاب
دليلة وكمنة, ثم حدث انه فى الحرب العالمية قبل الاولى فقد الكتاب, ووجده احدهم فعدل اسمه الى كليلة ودمنة
ثم نشره باسمه, وهو الان منشور باسمه من الدار السودانية للكتب, ومسجل فى مكتبة الكونغرس بالرقم
444.44.4 ا ب ت ث
وكاثبات ان الكتاب هو كتابى زاتو بزاتو ساعيد نشره مستخدما هذه المنصة مجانا كمجهود متواضع منى
فى تثبيت اركان الحكمة الكونفوشيسية, والتى هى بدورها ماخوذة من كتاب كنت قد اصدرته متين ما مذكر,
ووقع منى الكتاب فى نهر النيل عندما كنا نقوم برحلة نيلية بالفلك السياحى, وصل الكتاب الى البحر الابيض,
بعد داك كونفوشيوس قام قرص الواطة شوية فى الصين, قام الكتاب ادردق وادردق لحدى ما وصل الصين, لكن هذه قصة اخرى نتركها لميتافيزيقيا لاحقة.
الاسد والذئب والثعلب ( حسب الترتيب الهجائى)
حدث ان اسدا وذئبا وثعلبا خرجوا للصيد سويا, وباختصار صادوا نفس الحاجات, حمار وظبى وارنب,
فقال الاسد: يا ابا مرة (يقصد الذئب) قسم الشغل ده! فقال الذئب: واضحة يا شيخنا, الحمار لك والظبى لى والارنب للثعلب, يا زول راس الذئب ده لمن طار لمن الثعلب لبد, وقال الثعلب فى نفسه: هندى! اصلك ما بتتعلم, شوف يا بليد.
فاستدار الاسد وقال: يا ابا فهر, اها ادقس لى نفس الدقسة عشان الحقك ليهو هسى!
فضحك الثعلب فى نفسه, وقال: معلمين يا عمك! وقال: يا مولاى .الحمار لفطورك والظبى لغدائك, والارنب تشرب بيه شاى المغرب, فضحك الاسد سعيدا, فاستدرك الثعلب, ولكن يا مولاى الا اخبرك بما هو خير لك من الحاجات دى, التى تاكلها كل يوم كما ياكل الطلبة الفول؟؟ قال بلى, قال اذا فاتبعنى, طوالى يا زول الثعلب مشى على حفرة كان الصيادين حافرينها للفيل, وطبعا الثعلب كان قاس التوتر السطحى والعزوم بتاعت الحفرة, واستخدم برنامج الفورتران فى اللاب توب بتاعو, ولقى انو وزن الاسد اكتر ب اتنين كيلو من الوزن المطلوب للوقوع فى الحفرة, يا زول الثعلب ماشى قدام الاسد بمسافة ورافع راسو ومتكيف, فجاة! تسمع تل رب رب, اما تل فهو صوت وقوع الاسد فى الحفرة, واما رب رب فصوت تكسر مخروقة الاسد, رجع الثعلب ببساطة الى الحفرة, ومد راسه داخل الحفرة مخاطبا الاسد: يا بهائم انتو ما قاعد تقروا! ياخى ان شاء الله جريدة الدار ساكت ما قاعد تقروها, عالم داقسة.
اسرع الثعلب الى الصياد المختفى خلف شجرة بعيدة, وقال: يا معلم اها رايك شنو, الاسد زاتو وحى كمان زى ما اتفقنا,
اسرع الصياد باخراج شنطة ملئية بالدولارات ومدها الى الثعلب, والذى انطلق وهو يفكر فى الديبفريزر الذى سيفاجئ به زوجته, وقال فى نفسه: مؤلم يا الثعلب, سنة يا انا!!!

رابط الموضوع على منتدى الحوار