الحب الخجول .. الحلــقة 2

الحب الخجول ..
الحلــقة 2 .
بقلم طارق اللبيب.
الاستاذ فارس ارتبك ارتباك عجيب خلاص .. من الحركة الجريئه العملتا البت .. وسكت مسافة .. وغلبو البسويهو .. لانو ماكان بتوقع حاجة زي دي نهائي .. الحصة باقي ليها خمس دقايق وتنتهي .. جمع قواهو العقلية والعصبية .. وختم الدرس وطلع طوالي ..
في بت من بنات الفصل .. اسمها سارة . لاحظت للحركة العملتها اريج .. مع انو سارة مركزة في الحصة .. واكتر واحدة شاركت.. برضو تابعت الحركه .. وتابعت ردة فعل الاستاذ ..
الاستاذ فارس .. فعلا” ظهرت عليهو ملامح الدهشة .. لكن حاول يشتت انتباه البنات .. بي وقعت الطبشيرة ودنقيرتو ليها ..
عشان كدا البنات مالاحظو لحركة اريج .. وفعلا ماعرفو الاستاذ .. مالو عمل كدا .. حتى البنات التلاتة العارفين الحاصل .. ماشافو حركة اريج ..
بس البت الطويلة دي الاسمها سارة .. شافت الحركة بوضوح .. لانها كانت في طرف الصف بتاع اريج زاتو .. مـن الناحية الشمالية .. وكانت في قعدتها قاعدة ملفوتة كدا ..يعني كاشفة الصف كلو .. فكانت ملاحظة لي اريج من بداية الحصة تتبسم ..
وبقت كل مرة تعاين ليها .. لغاية ماشافت الحركة .. وكانت متوقعة انو المدير يمسح بي اريج الواطة .. واستعجبت ساره لامن المدير نهى الحصة .. ومشى بدون مايقول حاجة ..
سارة دي اشطر واحدة في الفصل .. بدون منافسة .. والمدرسة كلها خاتة عليها الامال .. لانها زولة مجتهدة جدا وهادية وسكوتة .. لابتتونس لابتلعب لابتضحك .. بس تجي مواعيد معينة .. بالدقيقة .. تلاتة سنة ما حصل اتاخرت .. ولاجات ابدر من مواعيدها ..
والسر في الموضوع ..انو ابوها رتبة كبيره في الجيش .. ممشي البيت بي نظام نابليون ..
سارة دي البنات مسمنها الآلة .. لانها شاطرة شطارة عجيبة وما بتتفاوض .. والبنات عنها جامدة بقولن ماعندها اي مشاعر .. وتعاين لي الزول كدا لابتصر ولابتبتسم …. واي سؤال يسألو الاستاذ لبنات الفصل.. هي بتكون رافعة يدها .. واسرع واحدة بتحل المسائل . وواجباتها كلها زي الترتيب .. بس ياهو زي الانسان الالي.. لكنها جميلة وجسمها فارع . طويلة كدا ..
اها تعالو اسمعو سارة. لاول مرة عايزة تتكلم مع بت كلام خارج الدراسة ..
مشت بعد الحصة قعدت جم اريج ..
وقالت ليها براحة كدا .. (بالمناسبة يا اريج انتي انسانة مامربية ..
وخسارة نكون معاك في فصل واحد )..
وفاتت منها ولا انتظرت اريج ترد ليها ..
واريج ماركزت في كلام سارة .. لانها كانت خايفة من عاقبة الفعلة الفعلتها .. وماعايزة ترد على سارة تثير بلبلة وتعمل مشكلة ..
اها بعد شوية اريج جنها صاحباتها .. قالن ليها اها وينها حركتك العملتيها ؟
قالت ليهن والله كشحتو بي كنتاك .لمن اتخلع ؟ .(كنتاك يعني غمزه)
قالن ليها هوي ماتكضبي فوقنا ..
قالت ليهم امشن اسأل سارة الألة يهنديك شافتني ..
قالن ليها طيب مالو ما اتكلم معاك ..
قالت ليهن والله ماعارفة.. احتمال تكون الحركة عجبتو.. كدي نستنى نشوف البحصل علينا شنو ؟

والمشكلة انو سارة متابعة الونسة بتاعة البنات ..عرفت انو البنات اتفقو على الحكاية دي …. وزعلت جدا” .ما أشتغلت بي البنات بس بقت تفكر في المدير والأحاسيس البكون حاسيها ..
وشايله همو بصحها ونصاحها ..
ياربي المدير الحاصل عليهو شنو؟ ..ياربي بكون زعلان ؟ رضيان ؟ عادي ؟ مستاء مننا وظنو فينا فشل .. ولابكون حباها وعجبتو .؟
. المهم ..
المدير جا المكتب قعد .. وخت يديهو فوق راسو.. وجسمو ده يضرب .. وبقى زي الحاسي بي حمى .. وكان اكتر خايف انو يكون في طالبة لاحظت للبت .. وداخل في ضفورو .. اصلا هو زول عجيب خلاص .. يعني زول خجول لدرجة غريبة .. الزول ده أساسا” كان معترض شديد انو يشتغل في مدرسة بنات.. لكن اهل الشان عارفين طبايعو واخلاقو .. عشان كدا اعتبروهو يد امينة .. ترعى البنات في المرحلة الحرجة دي .. حتى ناس المنطقة عارفين المدير زول مهذب .. وبخجل زي البنات ..
الوكيل عبد الرحمن جا داخل .. لقى الزول ده في قمة القلق والتوتر .. قال ليهو مالك يافارس. ؟
قال ليهو لالا مافي حاجة حاسي بي صداع خفيف كدا ..
وبقى متردد ياربي احكي ليهو ولالا ..
ياربي البت دي اعاقبها كيف ؟ ..
واقول عملت شنو؟ ..وسمعة المدرسة حتكون كيف .. في لو القصة دي انتشرت ؟ والبت ابوها بحس بشنو لو عرف انو بتو كدا ..
المهم انتظر لغاية ما المكتب فضى.. وعبد الرحمن طلع ..
رسل قال نادو لي اريج ..
مشت الفرّاشة لي ناس تالتة.. وقالت اريج مطلوبة في مكتب المدير .. البنات قالن ليها .. الليلة .. والليله.. الليلة بكتلك يا اريج ..
قالت ليهم اتحداهو ..
وسارة متابعة الموضوع .. وبنات الفصل الباقيات يورجغن.. ماجايبات خبر للفلم الحاصل بي جاي ..
اول ما وصلت اريج للاستاذ فارس ..
قال ليها ازيك يا اريج .انتي كويسة ؟
قالت ليهو مرحب يا استاذ كويسة والله ..
قال ليها .. يا اريج ابوك شغال شنو؟.. وبجي متين في البيت ..؟
قالت ليهو سواق بص سفري ..بجي ياخد يومين ويومين بكون مافي مرات اكتر.. ..
ليه في شنو يا استاذ ؟
قال ليها حصل ابوك قعد معاك ..ووصاك ..قال ليك كدا عيب.. وكدا حرام ..وكدا ماتعملي ..وكدا اعملي ؟
قالت ليهو .. امي بتقول لي بس ابوي مابتكلم معاي زي ده ..
قال ليها عشان كدا انتي ما مربية ..
انا عرفت انو انتي جاية من اسرة ماكويسة .. انتي انسانة هابطة اخلاقيا ..
انا بتقزز اتكلم مع بت زيك .. انا هسي حاسي بانك بتطلع من روحك ريحة النتانة .. والوسخ .. انتي عيب تكوني وسط الطالبات ..
انا طول ايامي كنت بنظر ليك نظرة احترام ..
لكن الليلة اكتشفت انك ما بتستحقي حتى الزول يتفل على وجهك ..
عشان كدا انا ح أسيبك كدا .. وما حأعاقبك.. بس بعتبرك شخصية دخيلة على المدرسه .. وما بتكلم معاك نهائي .
وتاني ماتحضري حصتي .. واي برنامج انا بعملو لي طلبتي ماتحضريهو ..
لاني انا مستاء من نفسي.. اني بعلم طالبه زيك .. يا خيبة اي راجل عندو بت زيك .. اهنتي ابوك وشرف اهلك في نظري ..
خسارة الشخصية المحترمة الكنت خاتيها ليك ..
بس البت دي اتقدت بالبكاء.. وبقت تقول ليهو ..كفاية كفاية يا استاذ ..
والله آسفة يا استاذ ..
واي انا .. والله يا استاذ ندمانة .. عليك الله يا استاذ تعفا مني ..وتسامحني .. والله تاني التوبة .. ديل ناس مواهب اتفقن معاي .
والله يا استاذ تاني مابعمل كدا .. وايييي .. كانو بجلد فيها بسوط العنج .. وبتبكي بكا المتألم بالجد .. المنديل الشيلاهو في يدها بقى مبلول ..كان مصروهو ينقط دموع ..
فارس سمع حركة كشة زول جاي داخل .. قال ليها خلاص بطلي البكا وامشي ماتعملي لروحك فضايح .. فجأة كدا عبد الرحمن جا داخل لقى .. البت بتبكي .. البت طلعت طوالي ..
عبدالرحمن قال ليهو دي مالا يافارس ؟؟؟
قال ليهو دي بت مهملة ياخي..
ماقدرت تحل اي مسألة في الرياضيات قاعدة لي زي الحيطة ..
الى اللقاء ..