الحب الخجول ..
الحلــقة 3 .
بقلم طارق اللبيب.
. البت اريج .مشت الفصــل وشها متورم وعيونها حمر من البكا .. البنات قالن ليها عمـــــــل ليك شنو المدير ..؟ قالت ليهم ولاشي ..
وابت تتكلم .. نهائي ..
وسارة كانت عايزة تعرف المدير عمل ليها شنو ؟ وليه ماعاقبها .؟
وبقت تتململ .. والشمار حارقها حرقة شديدة ..
اخيرا خطرت ليها فكرة ..
قالت انا لازم اصادق البت أريج دي .. واعرف منها المدير قال ليها شنو؟
اريج قالت للبنات الاتفقو معاها قبيل .. قالت ليهن اصبرن بحكي ليكن الحصل ..
المهم مشت كضبت ليهن .. كضب كتير خلاص .. وقالت ليهن المدير قال لي .. حرام عليك تغمزي لي غمزة زي دي.. عملتي لي رجه ..
وجبتي لي خوفة .. ياخي انتي عيونك اصلا بتتوه الزول في عالم الخيال .. كمان تقومي تغمزي لي بيهن .. المهم تاني ماتعملي حركة زي دي قدام البنات ..
انا طبعا” حسيت انو كان بحبني شديد .. وندمت على الحركة وخفت يفتكرني كدا ولا كدا .. لكن هو بالجد متيم فيني ..
وقال لي تاني ماتحضري حصتي.. لاني بقوم اتبشتن ومابقدر اركز في الحصة .. بس انا بكيت عشان كدا ..
بعني اريج غيرت المعلومات كلها .. طبعا” البنات قعدو يعاينو لي بعض .. زي المامصدقنها .. لانو مستبعدين انو المدير البعفرهو ده .. ممكن يقول كدا .. وطبعا ده كلام قالتو ليهن سر .. لاسارة ولاغيرها ماحاضرينو معاهن ..
لكن سارة طبعا دايرة تدفع عمرها عشان تعرف ..
اها سارة بقت تتقرب من اريج.. اول حاجة مشت اعتذرت ليها .. قالت ليها انا اسفة.. المرة الفاتت سمعتك كلام صعب اعفي لي ..
قالت ليها مامشكلة ياسارة انا زاتي غلطت .. وكل مرة سارة تجي تسلم عليها وهي الوحيدة البتبتسم معاها ..
ويوم سارة جابت هدية لي اريج .. عبارة عن مقلمة جميلة كدا .. في صندوق هداية معاها علاقة .. زجاجية مكتوب فيها .. صديقتي الجميلة اريج ..
اريج حست انو صداقة سارة دي ماطبيعية .. وعندها من وراها هدف .. وخمنت انو السبب يكون استاذ فارس .. لانو الصداقة بدت من اليوم داك ..
فحبت تختبرها .. بقت اريج تتكلم ليها عن استاذ فارس .. ولاحظت انو سارة لمن تسمع سيرة فارس.. ترتعد وترتجف ولونها بتغير ..
وبتكون منتبهة شديد .. وبتبلع ريقها كتير .. لمن اريج بتمسكها من يديها وتهديها ..يا سارة ..سارة.. هوي .. قولي بسم الله مافي حاجة .. ماتتوتري .. وتلقى يديها بارداات تلجة بس ..
لمن اريج تغير ليها الموضوع.. البت ترجع طبيعية ..
مشت اريج حكت لي صاحباتها .. قالت ليهن عندي لكن خبر مبااااالغة .. سارة الآلة بتحب استاذ فارس ..
قالن ليها اصلو مابنصدق !!.. دي ماعندها مشاعر انسانية اساسا” تحب شنو كمان ..؟
قالت ليهن قسما” بالله.. البت دي بتحبو.. وكمان الحب على اصولو .. والله انا حب زي ده بسمع بيهو في القصص ..
لكن انا اصلا مغيوظة منها وحالفة احطمها ..
لانو فارس حبيبي براي.. وماعندو ليها حاجة.. ده مجنون بي انا بس ..
قالن ليها بس نحن عايزين نعرف.. سر الصحبة الجديدة .. البينك وبينها دي شنو؟ ..
قالت ليهن صاحبتني بس لاني انا شاغلت استاذ فارس .. وقدرت حطمت اسوارو .. وهي اظنها دايرة تصاحبني .. عشان تتعلم مني الشجاعة والاقدام .. وقع قع تضحك ..
البنات طبعا عارفاات اريج .. مابوثقــن في كلامها اصــلا .. وما واقعة ليهن حكاية انو .. استاذ فارس بحب اريج .. وهي مابتحضر حصتو دي ..
اها مع مرور الايام .. يوم سارة سألت اريج .. قالت ليها يا اريج انا عايزة اسألك سؤال معذبني شديد ..
اريج قالت ليها عن استاذ فارس صاح ؟
قالت ليها ايوة ..
قالت ليها عارفاهو سؤالك.. وكنت ح احكي ليك براي ..
انتي عايزة تعرفي انو يومو الناداني في المكتب.. قالي شنو؟
انا ممكن احكي ليك .. بس توعديني انك ما تجيبي الكلام ده لاي مخلوق .. قالت ليها بوعدك قولي لي ..
قالت ليها بالمناسبة يا سارة.. الاستاذ ده استاذ منافق .. وماعندو اي ضمير .. وماتعايني لي كلامو الحلو .. ولبسو النضيف ده ..
زول من جواهو وسخان ..
سارة دي وشها اتغير من الكلام ده .. وقربت تخنق اريج .. لكن متماسكة وبتسمع ..
اريج مواصلة في كلامها .. عارفة ياسارة قال لي .. انا اصلا بحبك شديد يااريج .. ومعجب بيك من زماااان .. وهسي غمزتك دي بوظت اعصابي.. لمان الطبشيرة وقعت من يدي .. وقربت اقع انا براي ..
سارة قالت ليها صح الطبشيرة وقعت منو انا شفتها ..
اريج مواصلة في الكلام ..وعارفة ياسارة قال لي .. لازم نتلاقى ..
وكل يوم بقى يقول لي ليه انتي ماعايزة تلاقيني؟ .. وانا هسي حالفة ما أخش حصتو لاني بالجد خفت منو ..
والله ياسارة انا ندمت على اني غمزت ليهو.. لمن قعدت ابكي .. ودي نتيجة صداقتي مع البنات الهبل المغفلات ديل ..
لكن استاذ سيء وماحقو يكون مديرنا .. وانا لو ماخايفة على سمعة البنات كان فضحتو ..
سارة قالت ليها.. يخسسي عليهو.. المفروض يعتبرك زيي اختو الصغيرة ويوجهك ويحميك من الغلط ..
خسااااارة يا استاذ فارس.. ماكنت قايلاك كدا ..
لكن اقول ليك حاجة يا اريج.. احسن حاجة ماتحضري حصتو نهائي.. وانا بوعدك اشرح ليك اي حصة فاتتك
وبقت سارة تقول .. خسااارة يا استاذ فارس .. خسااارة يا استاذ فارس .. سارة بالجد انهارت وبقت ماطبيعية.. وشكلها زي العايزة تبكي .. واريج قعدت تعاين ليها .. وتأكدت فعلا انو سارة بتعشق استاذ فارس عشق غريب من نوعو ..
واتكيفت شديد انها حطمتها من جوة وشوهت صورة الاستاذ في نظرها .. وحست بالنصر لمن قعدت تتبسم ..
الكلام ده كان زي الساعة عشرة وتلت صباحا” والبنات في الفسحة بتاعة الفطور ..
سارة كانت اشترت سندوتش بتاع طعمية وبيض ..
بعد كلام اريج ماقدرت تأكلو قرمت من قرمة واحدة وغلبها تبلعها ..
ولفتو ختتو في الطربيذة بتاعة الكافتيريا . وفاتت ..
في نهاية اليوم الدراسي في الحصة الاخيرة .. قعدت تستفرغ شديد..
وتاني يوم ماجات المدرسة ..
الى اللقاء ..
مقالات مشابهة
من المعتمد المغترب الى المعتمد المغنواتي قصة مشروع
التوجيه بسفلتة 26 كيلو بالحصاحيصا و تنفيذ الخطة الاسكانيه التى تأخر تنفيذها (بفعل فاعل)
مسجد الحصاحيصا العتيق بين الامس واليوم مادة تسجيلية